Kalaallit aalisariutaataanni inuttalersuineq pillugu Namminersornerullutik Oqartussat nalunaarutaat nr. 35, 28. oktober 1993-imeersoq.
Inuussutissarsiutigalugu aalisarneq pillugu Inatsisartut inatsisaanni nr. 17-imi ulloq 22. oktober 1990-imeersumi §§7, 18 aamma 28 malillugit aalajangersarneqarpoq:
Atuuffii
§ 1. Nalunaarut atuuppoq angallatit 50 BRT/90 BT-inik taakkuninngaluunniit anginerusut Kalaallit Nunaanni nalunaarsorsimasut atorlugit inuussutissarsiutigalugu aalisarnermut.
Inuttalersuinermut maleruagassat
§ 2. Ikinnerpaamik aqumiut 60%-ii aamma angallammi inuttat allat tamarmik tassaassapput inuit,
1) Kalaallit Nunaanni inuit nalunaarsorsimaffianni najugalittut nalunaarsorneqarsimasut aamma Kalaallit Nunaanni inuit nalunaarsorsimaffianni ukiut qaangiuttut marluk naallugit najugalittut nalunaarsorneqarsimasut, aamma
2) Kalaallit Nunaannut tamakkiisumik akileraartartussaatitaasut aamma qaammatisiutit malillugit ukiut qaangiuttut marluk naallugit Kalaallit Nunaannut tamakkiisumik akileraartartussaatitaasimasut, tamatumanili ilinniarnissaq siunertaralugu Kalaallit Nunaata avataaniikkallarsimanerit naatsorsuutigineqassanatik.
Imm. 2. Tamatumunnga atatillugu inuttat imatut inissisimasut aqumiutut paasineqassapput:
1) Umiarsuup naalagaa,
2) aquttut,
3) igasoq/hovmester,
4) trawlbas aamma
5) fabrikkimi pisortaq aamma formandi.
Imm. 3. Maskinchefi maskinmesterillu kiisalu teknikerit, fabrikkimi atortunik aserfallatsaaliinermik taamaallaat suliaqartut, imm. 1-imi maleruagassanut ilaatinneqanngillat.
Imm. 4. Kalaallit Nunaata avataani ilinniarniarluni najugaqarsimanernut uppernarsaatit inuttanngortitsinermut atatillugu KANUAANA-mut (Kalaallit Nunaanni Aalisarsinnaanermut Akuersissutinik Nakkutilliisoqarfik, Box 501, 3900 Nuuk, fax 2 32 35) nassiunneqassapput.
Imm. 5. Immikkut pissutissaqartillugu Naalakkersuisut - nunami suliffissuit pilersorneqarnerisa isumannaarneqarnissaat aammalu angallatini imartani Kalaallit Nunaata aalisarnikkut oqartussaaffigisaasa avataanni aalisartuni inuttalersuineq aammalu aalisariaatsinut nutaanut inuttanik ilinniartitsinisaq eqqarsaatigalugit imm. 1-imi maleruagassat saneqqunneqarnissaannik nalunaaruteqarsinnaapput.
Nakkutilliineq
§ 3. Inummik aalisarnerup nalaani umiarsuarmi sulisussamik inuttanngortitsisoqartillugu inuttanngortitsisup akisussaaffigaa inuttanngortup Kalaallit Nunaannut attuumassuteqarnissamik aalisarnermut inatsimmi aalajangersakkanik naammassinnissimanissaa.
Imm. 2. Uppernarsaatitut atsiorfissaq ilanngunneqartoq inuttanngortup Kalaallit Nunaannut attuumassuteqarneranik uppernarsaatitut atsiorfigalugu atorneqarsinnaavoq.
Imm. 3. Inuttanngortup aqqa, atorfiata taaguutaa, CPR-normua aamma kommuni najugaqarfia aammalu inuttanngortup § 2-mi imm. 1-imi titarnertaani 1)-imi aamma 2)-mi piumasaqaatit naammassisimanerai aalisariarnermi inuttalersuinermut allattaavimmi inuttanngortitsinermut atatillugu kingusinnerpaamillu umiarsuup aalisarfissaminukarluni aallarnerani allattorneqassapput.
Imm. 4. Inuttalersuinermut allattaavik ilanngunneqartoq, KANUAANA-mut, Box 501, 3900 Nuuk imaluunniit faxikkut 2 32 35-kkut saaffiginnilluni pineqarsinnaasoq, atorneqarsinnaavoq.
Imm. 5. Inuttalersuinermut allattaavik pisariaqassappallu uppernarsaatitut atsiorfissaq umiarsuup allattaaviinut ilanngullugit KANUAANA-mut nassiunneqassapput.
Pineqaatissiissutaasinnaasut
§ 4. § 2-mi imm. 1-imik aamma § 3-mik unioqqutitsinerit akiliisitsinermik kinguneqarsinnaapput.
Imm. 2. Aktieselskabi, anpartsselskabi, andelsselskabi imaluunniit umiarsuaatileqatigiiffik unioqqutitsisimappat ingerlatseqatigiiffik pineqartoq taannaatillugu akiliisussanngortinneqarsinnaavoq.
Imm. 3. Tamakkuninnga suliassat inuussutissarsiutigalugu aalisarneq pillugu Inatsisartut inatsisaanni aalajangersakkat malillugit suliarineqassapput.
Atuutilerfia
§ 5. Nalunaarut atuutilerpoq ulloq 1. december 1993.
Imm. 2. Atuutilersitsinikkut uku atorunnaarput; nalunaarut nr. 27 27. december 1988-imeersoq, § 5 nalunaarummi nr. 40-mi 30. december 1991-imeersumiittoq, § 3 nalunaarummi nr. 39-mi 30. december 1991-imeersumiittoq, § 10 nalunaarummi nr. 6-imi 8. april 1991-imeersumiittoq, § 2-mi imm. 6 aamma 7 nalunaarummi nr. 25-mi 27. december 1988-imeersumiittut aamma § 2-mi imm. 5 nalunaarummi nr. 3-mi 3. januar 1985-imeersumiittoq.
Namminersornerullutik Oqartussat, ulloq 28. oktober 1993.
Hans Iversen/
Henrik Leth
Ilanngussaq 1 (pdf-format)
Ilanngussaq 2 (pdf-format)