Igitassanik eqqaasarneq pillugu Namminersornerullutik Oqartussat nalunaarutaat nr. 28, 17. september 1993-imeersoq.
Avatangiisit innarlitsaaliorneqarnissaannik Inatsisartut peqqussutaanni nr. 12-imi 22. december 1988-imeersumi Inatsisartut peqqussutaatigut nr. 7-ikkut 13. maj 1993-imeersukkut allanngortinneqarsimasumi § 1, imm. 1 nr. 4, § 7, imm. 2 nr. 5, § 15 aamma § 46, imm. 2 tunngavigalugit makku aalajangersarneqarput:
Kapitali 1.
Atuuffissai il.il.§ 1. Nalunaarummi matumani igitassanik eqqaasarnermi immikkut inatsisiliuunneqarsimanngitsumi malittarisassat aalajangersarneqarput.
§ 2. Igitassat suulluunniit eqqagassat aalajangersimasut pillugit nuna tamakkerlugu atuuttuinik immikkut maleruagassiaasut sukkulluunniit atuuttut nalunaarullu manna malillugu kommunalbestyrelsip ilitsersuussineri malillugit eqqarneqartassapput.
§ 3. Illuutilittut isigineqassaaq kinaluunniit nunaminertamik pisortanit tunineqarsimalluniluunniit nunaminertamik nunatamilluunniit atuisinnaatitaasoq. Tamanna nunaminertani sanaartorfineqarsimanngitsuni igitassaqalerfiusimasumili aamma atuuppoq.
Imm. 2. Aamma illuutilittut isigineqassapput:
1) Inissianik inuussutissarsiornermut atorneqartunik, illuutinik inuussutissarsiornermut atorneqartunik nunaminertanillu inuussutissarsiornermut atorneqartunik attartortut atuisullu.
2) Inissianik illunillu najugassianik attartortut atuisullu.
Kapitali 2.
Innersuussisussaatitaaneq eqqaasussaatitaanerlu.§ 4. Illuutilinnut kiisalu suliffeqarfinnut, suliffinnut il.il. igitassanik eqqaviusinnaasumik kommunalbestyrelsi innersuussissaaq. Eqqaavissatut innersuussutigineqartoq atorneqassaaq.
§ 5. Illoqarfinni nunaqarfinnilu tamani igitassanut makkununnga eqqaaviusinnaasumik kommunalbestyrelsi pilersitsissaaq:
1) igitassanut taakkununngalu assingusunut,
2) qimminut uumasunullu mikinerusunut allanut toqungasunut,
3) poortuutissanut ikuallajasunut ikuallajasuunngitsunullu,
4) ujaqqanut, issumut, ujaraaqqanut, sanaartornermi atortussanut kiffiutissanullu allanut, aamma
5) saviminikunut.
Imm. 2. Eqqaaneq imatut pisinnaavoq:
1) Eqqaaveqarfimmi akuerisaasumi inissiinikkut.
2) Ikuallaavimmi akuerisaasumi ikuallaanikkut.
3) Nr.l-ip nr. 2-llu akuleriillugit atornerisigut.
4) Assigiinngitsutigut atueqqinikkut, imaluunniit qulaani taaneqartut ilaata ataatsip arlalilluunniit akuleriillugit atornerisigut.
5) Aaqqissuussineq Naalakkersuisunit akuerisaasoq alla atorlugu.§ 6. Eqqaaneq suliffeqarfimmit tamakiisumik ilaannakortumilluunniit akuerisaasumit ingerlanneqarpat eqqaanerup kommunalbestyrelsimit ilitsersuutigineqartut malillugit ingerlanneqarnera kommunalbestyrelsip nakkutigissavaa.
Imm. 2. Eqqaanermik aaqqissuussinerit kommunimit ingerlanneqanngitsut eqqaaneq pillugu paasissutissanik tamanik tunniusseqqullugit kommunalbestyrelsip naalakkersinnaavai, matumani igitassat kommunip suliffeqarfiillu ataasiakkaat katersortitaanit tiguneqartartut suussusii amerlassusiilu ilanngullugit.
Kapitali 3.
Katersuinerit aaqqissuunneqarneri.§ 7. Sanaartorfiusimasuni illoqarfittut nunaqarfittulluunniit isigineqartuni angerlarsimaffinnit igitassanik suliffeqarfinnillu igitassanut assingusunik kommunalbestyrelsi katersuisitsisinnaavoq, matumani suliffiit, kantinat sutorniartarfiillu ilanngullugit eqqarsaatigalugit.
Imm. 2. Igitassat imm. 1-imi taaneqartut kommunalbestyrelsip nunaminertanit allanit katersortissinnaavai.
Imm. 3. Igitassatut isigineqartut tassaapput igitassat angerlarsimaffinni nalinginnaasumik pinngortartut, piniakkanit nammineq nerisassatut pisunit igitassat ilanngullugit.
Imm. 4. Igitassat naatsiivinneersut, igitassat uumasuutineersut aamma eqqagassat annertunerusut igitassanik nalinginnaasumik katersuinerrai ilaatinneqanngillat.§ 8. Kommunalbestyrelsi illoqarfinni nunaqarfinnilu ukiumut ataasiarluni arlaleriarluniluunniit angerlarsimaffinnit eqqagassanik annertunerusunik igitassanillu kommunip aaqqissuussaanik saliisitsinikkut katersorneqarsimasunik katersuisitsisinnaavoq, tak. § 17.
§ 9. § 7 imaluunniit 8 tunngavigalugu kommunip aaqqissuussinera aallartinneqarpat, illuutilik, suliffeqarfik, suliffik il.il. sunaluunniit pisussaaffeqarpoq aaqqissuussineq atussallugu, tamatumunngalu akiliutigitinneqartussatut kommunalbestyrelsip aalajangersagaa akilissallugu.
§ 10. Immikkoortortani immikkuullarissuni aamma igitassat nalinginnaasumik eqqarneqartartut katersorneqarnerinik aaqqissuussinerit piumassuseq naapertorlugu peqataaffigineqarsinnaasut kommunalbestyrelsip allartissinnaavai.
Kapitali 4.
Atuisussaatitaaneq.§ 11. Illuutillit, suliffeqarfiit, umiarsualiviit, suliffiit il.il. pisussaapput eqqavissatut kommunalbestyrelsimit innersuussutigineqartut atussallugit, tak. § 4.
Imm. 2. Imm. 1-imi taaneqartut piumasaqartoqarneratigut uppernarsassavaat igitassaatitik kommunalbestyreIsip innersuussutai malillugit ilumut eqqarneqartartut.§ 12. Kommunalbestyrelsip suliffeqarfiit umiarsuliviillu naalakkersinnaavai igitassat katitigaaneri pillugit paasissutissanik tamakkiisunik tunniusseqqullugit, taamaaliornikkut avatangiisit eqqarsaatigalugit illersorneqarsinnaasumik eqqaasoqarnera kommunalbestyrelsimit qulakkeerneqarsinnaaqqullugu.
Imm. 2. Suliffeqarfiit umiarsualiviillu kommunalbestyrelsip naalakkersinnaavai igitassat passunneqarnerminni eqqarneqarnerminnilu avatangiisinut sunniutaat misissuiffigeqqullugit.§ 13. Suliffeqarfiit umiarsualiviillu kommunalbestyrelsip naalakkersinnaavai igitassat immikkoortiteqqullugit, matumani igitassat immikkut ittut inatsisit allat tunngavigalugit eqqarneqartussat immikkoortiterneqarnerat ilanngullugu.
§ 14. Igitassat amerlassusiisa, katitigaanerisa suussusiisaluunniit annertuumik allannguuteqarnernerisigut igitassanik pilersitsisoq tamanna pillugu kommunalbestyrelsimut piaartumik nalunaaruteqassaaq.
Kapitali 5.
Nunaminertanik eqqiluitsuutitsineq.§ 15. Igitassanik sunilluunniit nunaminertanut namminersortunit pisortanilluunniit pigineqartunut inissiisoqaraniluunniit eqqaasoqassanngilaq.
§ 16. Illuutillit, suliffeqarfiit, umiarsualiviit suliffiillu tamarmik pisussaaffeqarput illuutimik eqqaat illup isuaniit sanimut 25 meterit angullugit imaluunniit illumut sanilerisamut ungasissutsip affaa tikillugu akuttunngitsumik saliisarnissamut. Illuutit pinnguartarfillit assigisaannilluunni.it atortulersukkat eqqaat illumik piginnittumit aamma salinneqartassapput.
Imm. 2. Kommunalbestyrelsip illuutilik aamma naalakkersinnaavaa igitassat pineqartup illuutaaneersut peeqqullugit.
Imm. 3. Nunaminertat imm. 1-imi aamma 2-mi ilaatinneqanngitsut tamarmik kommunalbestyrelsimit salitsinneqartassapput.
Imm. 4. Illoqarfiit nunaqarfiillu iluini nunaminertani tamanit orninneqartartuni eqqaavinnik containerinillu eqqaaviusinnaasunik kommunalbestyrelsi ilioqqaatsitsisassaaq.§ 17. Upernaat tamaasa aputip aattornerata kingorna kommunalbestyrelsi kommunimi nunaminertanik ataatsimoortumik inuinnartut pisortatigoortumillu saliinissaq taassuminngalu aallartitsinissaq pillugit nalunaarusiortassaaq.
Imm. 2. Imm. 1 tunngavigalugu kommunalbestyrelsip nalunaarutaa ataatsimoortumik saniliinissap qanoq sivisutiginissaanik paasissutissanik imaqassaaq. Saliineq illoqarfimmi nunaqarfinnilu immikkoortukkaanut agguataarneqarsinnaavoq.
Imm. 3. Ataatsimoortumik saliineq kommunalbestyrelsip piffissaliullugu nalunaarutigisaata iluani ingerlanneqassaaq tunaartarisassat imm. 1-2-mi taaneqartut malillugit.
Imm. 4. Igitassat, eqqagassat annertunerusut taakkulu assigisaat angerlarsimaffinnit katersorneqartut periarfissaq taanna atorlugu kommunalbestyrelsip nalunaarutigisaatut aqqusinermut qaninnerpaamut containerimulluunniit eqqaavissatut ilineqarsimasumut inissinneqarsinnaapput.
Kapitali 6.
Aalajangersakkat allat.§ 18. Kommunimi illoqarfimmi nunaqarfinnilu katersuinissamik eqqaanissamillu aaqqissuussinerit pillugit maleruaqqusani raalittarisassat erseqqinnerusut kommunalbestyrelsimit aalajangersarneqassapput. Maleruaqqusat paasissutissanik makuninnga imaqassapput:
1) igitassanut § 5-imi taaneqartutut ittunut eqqaanermut aaqqissuussinerit, matumani eqqaavinni ataasiakkaani igitassat suut tiguneqarsinnaanersut, taakkulu sumi inissisimaneri pillugit paasissutissat ilanngullugit,
2) igitassanut containerit atorneqarnissaat taakkulu sumi inissisimaneri,
3) kommunimi katersuinissanik aaqqissuussinerit,
4) ataasiakkaat eqqaavinnik karsinik imaluunniit eqqaavinnik puussialertakkanik ikkuisuinissaminnut pisussaaffii pillugit,
5) suliffimmi avatangiisit aamma passussinermi ajornartorsiutit pissutigalugit igitassat eqqarneqarnerini immikkut ittumik malittarisassaasinnaasut, aamma
6) kommunit igitassanik katersisarnermi aaqqissuussinerinik igitassanillu eqqagassanik tigooraanernik atuinermi akiliutit.
mm. 2. Maleruaqqusat nammineq piumassuseq naapertorlugu katersinernik aaqqissuinernut tunngasunik aamma imaqartinneqarsinnaapput, tak. § 10.§ 19. Illup ataatsip igitassaatai karsinut eqqaavinnut, eqqaavinnut puussialertakkanut imaluunniit containerinut eqqaavissianut illup qanitaanut inissinneqarsimasumut imaluunniit illumit atuisumit eqqaavilerisunullu ukioq kaajallallugu tikikkiminartumut inissinneqarsimasunut katersorneqartassapput.
Imm. 2. Kommunalbestyrelsip akuersissutigisinnaavaa karsit eqqaaviit eqqaaviilluunniit puussialertakkat inissinneqarsinnaasut immikkut illuaqqiani assigisaanniluunniit pisortat aqqusiniutaannut qaninnerpaamut imaluunniit pisortat aqqusiniutaasa illullu akorninut inissisimasunut.
Imm. 3. Eqqaaviit karsit, eqqaaviit puussialertakkat containerillu eqqavissiat ilusilersorneqarsimassapput imarisaat qimminit, tulukkanit assigisaannillu suneqarsinnaajunnaarsillugit.
Imm. 4. Igitassanik katersisarnerni aaqqissuussinermut atatillugu kommunalbestyrelsip maleruaqqusamigut naalakkiutigisinnaavaa eqqaaviit karsit eqqaaviilluunniit puusialertakkat aalajangersimasut atorneqassasut. Eqqaaviit puussialertakkat atorneqarnissaat naalakkiutigineqarpat puussiat katersisernermi aaqqissuussineq aqqutigalugu tunniunneqartassapput.
Kapitali 7.
Nakkutilliineq il.il.§ 20. Igitassanik uninngatisineq assartuinerlu peqqinnissakkut avatangiisitigullu illersorneqarsinnaasumik aamma kommunalbestyrelsip kap. 6 malillugu aalajangersagai malillugit pisassaaq.
§ 21. Igitassat eqqarneqarnissaasa tungaannut igitassat passunneqarneri suulluunniit kommunalbestyrelsimit nakkutigineqassapput.
Imm. 2. Nalunaarummi matumani aalajangersakkat malillugit igitassat passunneqarnissaat eqqarneqarnissaallu qulakkeerniarlugit kommunalbestyrelsi inerteqquteqarsinnaallunilu naalakkiuteqarsinnaavoq.
Imm. 3. Nakkutilliinermi malittarisassanillu atortitsinermi Avatangiisit innarlitsaalineqarnissaannik Inatsisartut peqqussutaanni nr. 12-imi 22. december 1988-imeersumi Inatsisartut peqqussutaatigut nr. 7-ikkut 13. maj 1993-imeersukkut allanngortinneqartumi kap. 4-mi aamma § 44, imm. 2-mi malittarisassat atuupputtaaq.§ 22. Akornutaasinnaasut pinngitsoortinniarlugit kommunalbestyrelsip illuutillit, suliffeqarfiutillit, umiarsualiviit, suliffiit il.il. igitassanik uninngatitsineq, toqqortaqarneq, orniguffissat, tunniussineq il.il. pillugit naalakkiuteqarfigisinnaallugillu inerteqquteqarfigisinnaavai.
Imm. 2. Naalakkiummi ilaatinneqarsinnaapput eqqaavinnik puussialertakkanik karsinilluunniit eqqaavinnik amerlanerusunik pissarseqqusineq, igitassanik isugutattunik immikkut poortueqqusineq allatulluunniit pooqartitseqqusineq, orniguffinnik aputaajaaqqusineq il.il., eqqaavinnik akulikinnerusumik imaarsisaqqusineq assigisaallu.§ 23. Nalunaarut manna tunngavigalugu aalajangernerit tamarmik peqqinnissakkut nakkutilliisoqarfimmut ilisimatitsissutigineqartassapput.
Imm. 2. Nalunaarut manna tunngavigalugu maleruaqqusassiornerit allanngortitsinerillu tamarmik Naalakkersuisunut ilisimatitsissutigineqartassapput.§ 24. Nalunaarut manna malittarisassalluunniit allat taassuminnga tunngavillit tunngavigalugit aalajangiinerit tamarmik Avatangiisit innarlitsaaliorneqarnissaannik Inatsisartut peqqussutaanni nr. 12-imi 22. december 1988-imeersumi Inatsisartut peqqussutaatigut nr. 7-ikkut 13. maj 1993-imeersukkut allanngortinneqarsimasumi kap. 10-mi malittarisassat tunngavigalugit naammagittaalliuutigineqarsinnaapput.
Kapitali 8.
Pineqaatissiinermut atortuulersitsinermullu aalajangersakkat.§ 25. Akiilisinneqarsinnaapput:
1) §§ 4-5-imik, § 9-mik, § 11-mik, §§ 14-15-imik, § 16, imm. 1, 3 aamma 4-mik kiisalu § 17, imm. 1-imik unioqqutitsisut,
2) § 6, imm.2, § 12, imm. 1 aamma 2, § 13, § 16, imm. 2, § 19, imm. 4, § 21, imm. 2 aamma § 22, imm. 1 malillugu piumasaqaatinik, naalakkiutinik inerteqqutinilluunniit sumiginnaasut, imaluunniit
3) § 18 tunngavigalugit malittarisassanik aalajangersarneqartunik unioqqutitsisut.§ 26. Aktieselskabi, anpartsselskabi, andelsselskabi assigisaalluunniit unioqqutitsisuuppat selskabi akiliisitaasinnaavoq. Namminersornerullutik Oqartussat, kommuni kommunilluunniit ataatsimut ingerlatseqatigiiffiat unioqqutitsisuuppat Namminersornerullutik Oqartussat, kommuni kommunilluunniit ataatsimoorlutik ingerlatseqatigiiffiat akiliisitaasinnaavoq.
§ 27. Nalunaarut manna atortuulersinneqarpoq 1. oktober 1993 aallarnerfigalugu.
Imm. 2. Piffissami ikaarsaariarfiusumi 31. december 1993-ip tungaanut igitassanik eqqaanermi ileqqoreqqusat manna tikillugu atuuttut atukkallassapput, tamatumalu kingorna atorunnaarsinneqassallutik.
Imm. 3. Kommunalbestyrelsilli ataasiakkaat Naalakkersuisunut innuttaminnullu siumoortumik nalunaaruteqaqqaarlutik kommunimi igitassanik eqqaanermi ileqqoreqqusat imm. 2-mi piffissaliunneqarsimasoq sioqqullugu atorunnaarsissinnaavaat.
Namminersornerullutik Oqartussat, ulloq 17. september 1993.
Ove Rosing Olsen/
Torben Cordtz