Inuussutissarsiutiginagu piniarnermi aallaaniarnermilu aallaaniarsinnaanermut upernarsaat (inuussutissarsiutiginagu piniartunut) pillugu Namminersornerullutik Oqartussat nalunaarutaat nr 19, 22. juli 1993-imeersoq.
Inuussutissarsiutiginagu piniarneq, aallaaniarneq aalisarnerlu pillugit Inatsisartut Inatsisaanni nr. 11-imi, 29. april 1992-imeersumi § 2, imm. 2 aamma § 5 naapertorlugit aalajangersarneqarpoq:
§ 1. Nalunaarummi uani Kalaallit Nunaata nunataani imartaanilu aalisarfiusumi inuutissarsiutiginagu piniarneq aallaaniarnerlu pineqarput.
Imm. 2. Nalunaarummi miluumasut timmissallu tamarmik pineqarput.§ 2. Inuutissarsiutiginagu piniarneq aallaaniarnerlu taamaallaat ingerlanneqarsinnaavoq inunnit naalakkersuisunit taamaaliornissamut akuerineqarsimasunit.
§ 3. Inuit Inatsisartut inuutissarsiutiginagu piniarnermut inatsisaanni § 2-mi, imm. 1-imik imaluunniit § 3-mi pineqartut aallaaniarsinnaanermut akuerineqarnerat allagartamik tunniussinikkut pisarpoq.
Imm. 2. Inuit 16-it inorlugit ukiullit angajoqqaamik nakkutilliisumilluunniit aallaaniarsinnaanermut allagartaannut ilaatinneqarput; namminerisaminnilli piumagunik allagartartaarsinnaapput.§ 4. Aallaaniarsinnaanermut allagartaq inatsisit periarfissarititaasa iluanni piniarnissamut aallaaniarnissamullu pisinnaatitsivoq.
§ 5. Inuussutissarsiutiginagu aallaaniarsinnaanermut allagartamik qinnuteqaat Naalakkersuisunut tunniunneqassaaq, qinnuteqarnermi immersugassaq tamatumunnga suliarineqarsimasoq atorlugu.
Imm. 2. Qinnuteqaat nassiutinnginnerani najukkami inuit nalunaarsorsimaffiannit § 3-mi piumasaasut naammassineqarsimanerat uppernarsarlugu kommunimit atsiorneqassaaq.
Imm. 3. Qinnuteqaat Kommunip akuerisinnaanngippagu taamalu atsiorumanagu naalakkersuisunullu ingerlateqqinnagu taava tamanna allakkatigut kommunip qinnuteqartumut nalunaarutigissavaa. Nalunaarut taamaattoq tunngavilersuutinik imaqassaaq. Qinnuteqartup taanna tunngavigalugu kommunip aalajangernera naalakkersuisunut naammagittaalliuutigisinnaavaa.
Imm. 4. Naalakkersuisut aallaaniarsinnaanermut allagartat tunniuteriikkat atorunnaarsissinnaavaat allagartaqarnissamut piumasaqaatit naammassineqarsimanngippata.
Imm. 5. Inuutissarsiutiginagu aallaaniarsinnaanermut allagartap tunniunneqarnerani 30 kroninik akiliisitsisoqartassaaq.
Imm. 6. Aallaaniarsinnaanermut allagartaq tassaavoq allakkerivimmut akiliissutissap (girokort) naalakkersuisut sanatissimasaata akiliisimanermut uppernarsaatitaa.§ 6. Aallaaniarsinnaanermut allagartaq taamaallaat atuuttarpoq akiliisimaneq allakkerivimmit imaluunniit Aalisarnermut, Piniarnermut Nunalerinermullu Pisortaqarfimmit uppernarsarneqarsimatillugu atuuttarlunilu ukiup allagartap atuuffiata naanissaata tungaanut.
§ 7. Aallaaniarsinnaanermut allagartaq piginnittuinnarmut tunngavoq allamullu tunniuteqqusaanani, tuneqqusaanani, atukkiuteqqusaanani assigisaanilluunniit peqqusaanani.
Imm. 2. Aallaaniarsinnaanermut allagartaq piniarnermi aallaniarnermilu nassarneqartassaaq, misissuinermilu politiit allalluunniit taamaaliornissamut piginnaatitaasut piumasaqarnerisigut takutinneqartassalluni.§ 8. Aallaaniarsinnaanermut allagartalik kinaluunniit pisussaavoq pisaminik allattuissalluni. Qaammatit naanerini tamaasa pisarisimasat naatsorsuusiorneqartassapput. Ukiumut pisarisimasat naatsorsuutaasa inerneri piffissap pisanik nalunaarsuiffiusussap naanerani, tak. imm. 3, pisanik nalunaarsuiffissamut Naalakkersuisunit suliarineqarsimasumut nuunneqassapput, oktoberillu 15-iat tikitsinnagu akeqanngitsumik utertinneqassallutik.
Imm. 2. Inuit 16-it inorlugit ukiullit § 3, imm. 2-mi pineqartut pisarisimasatik angajoqqaamik nakkutilliisumilluunniit pisanik nalunaarsuiffissaatigut nalunaarutigissavaat.
Imm. 3. Piffissaq pisanik nalunaarsuiffiusussaq tassaavoq oktoberip aallaqqaataanniit septemberip 30-iannut. Piffissaq pisanik nalunaarsuiffiusussaq siulleq tassaavoq 1993-imi januarip aallaqqaataaniit septemberip 30-ianut.
Imm. 4. Aallaaniarsinnaanermut allagartap nutaamik taarsernissaanut piumasaqaatigineqarpoq pisanik nalunaarsuiffiup piffissaq eqqorlugu nassiunneqarsimanissaa.§ 9. Naalakkersuisut nalunaarummi uani piumasaqaatinik atorunnaarsitsigallarsinnaapput tamanna ilisimatuutut misissuinerit pissutsilluunniit allat pisariaqalersippassuk.
§ 10. Inuup peqqussutit nalunaarummi uaniittut imaluunniit piniarnermi aallaaniarnermilu peqqussutit allat unioqquterujussuarpagit aallaaniarsinnaanermut allagartaqarsinnaaneranik arsaarsinnaavaat. Allagartaq tunniunneqareersimasoq taama pisoqartillugu atorunnaarsinneqassaaq.
§ 11. § 2, aamma § 7, imm. 1 aamma 2-mik unioqqutitsineq akiliisitsinermik arsaarinninnermilluimnit pineqaatissineqaataasinnaavoq.
Imm. 2. Suliassat tamatumunnga tunngasut inuutissarsiutiginagu piniarnermut, aallaaniarnermut aalisarnermullu inatsit tunngavigalugu suliarineqartassapput.§ 12. Nalunaarut atulerpoq 1. august 1993.
Imm. 2. Tamatumunnga peqatigitillugu atorunnaarpoq inuutissarsiutiginagu piniarnermi aallaaniarnermilu aallaaniarsinnaanermut uppernarsaat pillugu Namminersornerullutik Oqartussat nalunaarutaat nr. 15, 16. juli 1992-imeersoq.
Namminersornerullutik Oqartussat, ulloq 22. juli 1993.
Hans Iversen/
Henrik Leth