Inuussutissarsiutigalugu piniarnermut aallaaniarnermullu akuersissuteqartarneq (inuussutissarsiutigalugu piniartunut) pillugu Namminersornerullutik Oqartussat nalunaarutaat nr. 18, 22. juli 1993-imeersoq.
Inuussutissarsiutigalugu piniarneq aallaaniarnerlu pillugit Inatsisartut Inatsisaanni nr. 12, 22. november 1984-imeersumi § 3, imm. 3 aamma 4 kiisalu § 9, kingullermik inatsisartut inatsisaatigut nr. 10-kkut 29. april 1992-imeersukkut allannguuteqartinneqartoq malillugu aalajangersarneqarput:
§ 1. Nalunaarummi uani Kalaallit Nunaata nunataani imartaanilu aalisarfiusumi inuutissarsiutigalugu piniarneq aallaaniarnerlu pineqarput.
Imm. 2. Nalunaarummi miluumasut timmissallu tamarmik pineqarput.§ 2. Inuussutissarsiutigalugu aallaaniarnermik ingerlatsisinnaapput taamaallaat inuit suliffeqarfiilluunniit taamaaliornissamut akuerineqarsimasut.
Imm. 2. Akuersisissut inuutissarsiutigalugu aallaaniarsinnaanermut allagartanngorlugu tunniunneqartarpoq.§ 3. Inuussutissarsiutigalugu aallaaniarsinnaanermut allagartaq qinnuteqartoqarneratigut tunniunneqartassaaq inunnut
1) inuiaqatigiinnut kalaallinut aalajangersimasumik attuumassuteqartunut,
2) Kalaallit Nunaanni najugaqartutut inuit aqqisa allattorsimaffianni nalunaarsorsimasunut, Kalaallit Nunaannilu inuit aqqisa allattorsimaffianni ukiuni kingullerni marlunni nalunaarsorsimasimasunut,
3) Kalaallit Nunaannut tamakkiisumik akileraartartussaasunut, Kalaallit Nunaannullu ukiuni kingullerni marlunni tamakkiisumik akileraartartuusimasunut, aammalu
4) a) ukiumi qaangiuttumi kingullermi pingaarnerutillugu minnerpaamillu ulluni 125-ini piniarnermik, aallaaniarnermik aalisarnermillu inuus| sutissarsiuteqarsimasunut imaluunniit
b) ukiumi qaangiuttumi kingullermi minnerpaamik ulluni 125-ini aalajangersimasumik akissarsiaqarlutik sulisuusimanngitsunut.
Imm. 2. Soraarnerussutisiat nalunaarummi uani inuutissarsiorluni isertitatut isigineqanngillat.
Imm. 3. Najugarisami kommuni § 3, imm. 1, pkt. 4) litra b)-mi aalajangersakkat saniatigut immikkut akuersissuteqarsinnaatitaavoq qinnuteqartut misilittakkat malillugit ukiup ingerlanerani minnerpaamik ulluni 125-ni suliffissaaruffiugajuttuni suliffeqareersimagaangata.§ 4. Inuussutissarsiutigalugu aallaaniarsinnaanermik qinnuteqarneq immersugassaq naalakkersuisut sanatissimasaat atorlugu pisassaaq.
Imm. 2. Qinnuteqaat KNAPP-imut saqqummiullugu tusarniaaneqareerpat kommunip § 3-mi aalajangersakkat naammassineqarsimanersut uppernarsereerlugu qinnuteqaat naqissuserlugu ingerlateqqissavaa.
Imm. 3. Kommunip qinnuteqaat akuerisinnaanngikuniuk taamalu atsiorumanagu naalakkersuisunullu ingerlateqqinnagu tamanna allakkatigut qinnuteqartumut nalunaarutigissavaa. Nalunaarut taamaattoq tunngavilersuutinik imaqassaaq. Taanna tunngavigalugu qinnuteqartup kommunip aalajangernera naalakkersuisunut naammagittaalliuutigisinnaavaa.
Imm. 4. Naalakkersuisut aallaaniarsinnaanermut allagartat tunniuteriikkat atorunnaarsissinnaavaat allagartaqamissamut piumasaqaatit naammassineqarsimanngippata.
Imm. 5. Inuutissarsiutigalugu aallaaniarsinnaanermut allagartap tunniunneqarnerani 30 kroninik akiliisitsisoqartassaaq.
Imm. 6. Inuutissarsiutigalugu aallaaniarsinnaanermut allagartaq tassaavoq allakkerivimmut akiliissutissap (girokort) naalakkersuisut sanatissimasaata akiliisimanermut uppernarsaatitaa.§ 5. Inuutissarsiutigalugu aallaaniarsinnaanermut allagartaq taamaallaat atuuttarpoq akiliisimaneq allakkerivimmit imaluunniit Aaalisarnermut, Piniarnermut Nunalerinermullu Pisortaqarfimmit uppernarsarneqarsimatillugu atuuttarlunilu ukiup allagartap atuuffiata naanissaata tungaanut.
§ 6. Inuussutissarsiutigalugu aallaaniarsinnaanermut allagartaq piginnittumuinnaq tunngavoq allamullu tunniuteqqusaanani, tuneqqusaanani, atukkiuteqqusaanani assigisaanilluunniit peqqusaanani.
Imm. 2. Inuit 16-it inorlugit ukiullit angajoqqaamik nakkutilliisumilluunniit inuussutissarsiutigalugu aallaaniarsinnaanermut allagartaannut ilaatinneqarput namminerisaminnilli piumagunik allagartartaarsinnaapput.
Imm. 3. Inuussutissarsiutigalugu aallaaniarsinnaanermut allagartaq piniarnermi nassarneqartassaaq, misissuisoqartillugulu politiit allalluunniit taamaaliornissamut piginnaatitaasut piumasaqarnerisigut takutinneqartassalluni.§ 7. Inuussutissarsiutigalugu aallaaniarsinnaanermut allagartalik kinaluunniit pisussaavoq pisaminik allattuissalluni. Qaammatit naanerini tamaasa pisarisimasat naatsorsuusiorneqassapput. Ukiumut pisarisimasat nalunaarsornerisa inerneri piffissap pisanik nalunaarsuiffiusussap naanerani, tak. imm. 3, pisanik nalunaarsuiffissamut Naalakkersuisunit suliarineqarsimasumut nuunneqassapput, oktoberillu 15-iat tikitsinnagu akeqanngitsumik utertinneqassallutik.
Imm. 2. Inuit 16-it inorlugit ukiullit § 6-imi, imm. 2-mi, taaneqartut pisarisimasatik angajoqqaamik nakkutilliisumilluunniit pisaminnik nalunaarsuiffiatigut nalunaarutigissavaat.
Imm. 3. Piffissaq pisanik nalunaarsuiffiusussaq tassaavoq oktoberip aallaqqaataaniit septemberip 30-ianut.
Imm. 4. Taamaakkaluartorli piffissaq pisanik nalunaarsuiffiusussaq siulleq tassaavoq 1. januar 1993-imiit 30. september 1993-imut.
Imm. 5. Inuussutissarsiutigalugu aallaaniarsinnaanermut allagartap nutaamik taarserneqarnissaanut piumasaqaatigineqarpoq pisanik nalunaarsuiffimmik piffissaq eqqorlugu nassitsisimanissaq.§ 8. Naalakkersuisut nalunaarummi uani piumasaqaatinik atorunnaarsitsigallarsinnaapput tamanna ilisimatuutut misissuinerit pissutsilluunniit allat pisariaqalersippassuk.
Imm. 2. Inuutissarsiutigalugu aallaaniarsinnaanermut allagartaq suliffeqarfimmit qinnutigineqarpat tunniunneqassaaq piniarneq suliffeqarfiup perorsaanikkut suliniutaanut imaluunniit aningaasaqarniarneranut tunngaviusunut ilaavissimappat.§ 9. §-inik 2-imik § 6-imilu imm.-inik 1-imik 3-millu unioqqutitsinerit akiliisitsissutaasinnaapput aammalu pisat imaluunniit taakku nalingi arsaarinnissutaasinnaallutik.
§ 10. Nalunaarut atulissaaq 1. august 1993.
Imm. 2. Tamatumunnga peqatigitillugu Namminersornerullutik Oqartussat nalunaarutaat nr. 14, 16. juli 1992-imeersoq Inuutissarsiutigalugu piniarnermut aallaaniarnermullu akuersissuteqartarneq (inuutissarsiutigalugu piniartunut) atorunnaarpoq.
Namminersornerullutik Oqartussat, ulloq 22. juli 1993.
Hans Iversen/
Henrik Leth