Ukioq 1993-imut aasaanerani nalunaaquttap aalajangersarneqarnera pillugu Namminersornerullutik Oqartussat nalunaarutaat nr. 5, 17. marts 1993-imeersoq.

Aasaanerani nalunaaquttap atorneqarnera pillugu Inatsisartut inatsisaanni nr. 14-imi, 19. oktober 1989-imeersumi § 1 naapertorlugu aalajangersarneqassaaq:

 

§ 1. Ukiumi 1993-imi immikkut piffissamik naatsorsuineq atorneqassaaq, aasaanerani nalunaaqutaq, piffissami 27. martsimiit 25. septemberimut.
Imm. 2. Ullumikkut Kalaallit Nunaanni sumiiffinni sisamani piffissat assigiinngitsuupput. Europap kitaanut sanilliullugu, tassa imaappoq Greenwich meantimemut (GMT) ilisimatitsissutitut piffissat tulliuttut naatsorsuutigineqarsinnaapput:

	Pituffimmi sakkutooqarfik	Nunatsinni nalinginnaasumik nalunaaqutaq	Ittoqqortoormiini	Danmarks- havnimi
Assersuutigalugu	GMT-4 nal. 8	GMT-3 nal. 9	GMT-1 nal. 11	GMT nal. 12

§ 2. Aasaanerani nalunaaqutaq nalinginnaasumik Nunatsinni nalunaaquttamut tunngatillugu aallartittassaaq 27. marts nal. 22.00, piffissamimi tassani nalunaaqutaq allanngortinneqassammat nal. 23.00-imut.
Imm. 2. Ittoqqortoormiit, Pituffiimi sakkutooqarfik kiisalu Danmarkshavn, nalinginnaasumik Nunatsinni nalunaaquttamik malinnaaviunngitsut, eqqarsaatigalugit tulliuttut atuupput: Ittoqqortoormiini aasaanerani nalunaaqutaq atuutilissaaq 28. marts nal. 00.00-imiit, piffissamimi tassani nalunaaqutaq allanngortinneqassagami nal. 01.00-imut. Pituffimmi sakkutooqarfimmi aamma Danmarkshavnimi aasaanerani nalunaaqutaq atussanngilaq.

§ 3. Aasaanerani nalunaaqutaq nalinginnaasumik Nunatsinni nalunaaquttamut tunngatillugu atorunnaassaaq 25. september nal. 23.00, piffissamimi tassani nalunaaqutaq allanngortinneqassagami nal. 22.00-imut. Ittoqqortoormiini aasaanerani nalunaaqutaq atorunnaassaaq 26. september nal. 01.00-imi, piffissamimi tassani nalunaaqutaq allanngortinneqassagami nal. 00.00-imut.
Imm. 2. Akunneq qaangiuttoq piffissamik nalunaarutiginninnermi taaguuserneqartassaaq nal. 22.00 A-tut, aamma nal. 00.00 A-tut, akunnerlu aggersoq taaneqartassalluni 22.00 B-tut, aamma nal. 00.00 B-tut.

§ 4. Nalunaarut atuutilerpoq 19. marts 1993.

Namminersornerullutik Oqartussat, ulloq 17. marts 1993

Lars Emil Johansen

/

Kaj Kleist