Imaatigut assartuineq pillugu peqqussummut ilaatinneqassanngitsut ilaat aamma usinik imaatigut assartuinerit ilaannut akuersissuteqartarnissat pillugit Namminersornerullutik Oqartussat nalunaarutaat nr. 4, 16, marts 1993-imeersoq.

Kalaallit Nunaannut, Kalaallit Nunaannit Kalaallit Nunaannilu usinik imaatigut assartuineq pillugu Inatsisartut peqqussutaanni nr. 16-imi, 30. oktober 1992-imeersumi §-it 3 aamma 7 naapertorlugit aalajangersarneqarpoq:

 

§ 1. Imaatigut assartuinernut tulliuttunut Inatsisartut peqqussutaat atuutinngilaq:
1) Orsiaatit atorlugit nioqqutissianik uuliamit pisunik uuliaasivinnut uuliaasivinniillu pisortanit Kalaallit Niuerfiat Sullissivik A/S-imillu pigineqartunut assartuineq.
2) Kalaallit Nunaata iluani usinik assartuineq, Kalaallit Niuerfiat Sullissivik A/S-ip assartuinermik ingerlatsivianit nunaqarfinnut illoqarfinnullu isorliunerusuniittunut pilersuinermut atatillugu ingerlanneqartoq.
3) Aalisariutit aalisarnermik inuussutissarsiumminnut atatillugu namminneq atugassaminnik assartuinerat, angalaneq aalisarnermik inuussutissarsiummut atatillugu allamik siunertaqarpat usinik assartuinerunngitsumik.
4) Kalaallit Nunaata iluani illoqarfittut nunaqarfittullu sanaartorfiusimasut avataannut avataanniillu usinik assartuineq, assersuutigalugu tammaarsimaartarfinnik, savaateqarfinnik imaluunniit takornarissanut atortuutinik asimiittunik pilersuineq.

§ 2. Naalakkersuisut Kalaallit Nunaannut, Kalaallit Nunaannit Kalaallit Nunaannilu usinik imaatigut assartuinermut akuersissummik tunniussisinnaapput.
Imm. 2. Akuersissummik tunniussisoqassanersoq aalajangiiniarnermi pingaartinneqassaaq assartuineq assartuussisumit Inatsisartut peqqussutaanni § 4 imm. 2 naapertorlugu akuersissummik tunineqarsimasunit ingerlanneqarsinnaanersoq annertuumik saniatigut aningaasartuuteqarani kinguaattoorfiunngitsumillu.
Imm. 3. Qinnuteqaammut isummertoqartinnagu Pisortat Suliassaqarfiutaannut Angallannermullu Naalakkersuisoqarfiup akuersissummik tunineqarsimasut imm. 2-imi taaneqartut oqaaseqaateqaqqusassavai.

§ 3. Imaatigut assartuiniarluni qinnuteqaat Pisortat Suliassaqarfiutaannut Angallannermullu Naalakkersuisoqarfimmut tunniunneqassaq angalanissaq ullunik 14-inik sioqqullugu. Qinnuteqaat umiarsuup aqqa, angerlarsimaffia, piginnittui umiarsuaatillillu pillugit paasissutissat saniatigut angalanissaq pillugu paasissutissanik, tassunga ilanngullugit naatsorsuutigisamik aallarnissaq aamma tikiffissatut piffissaliussat kiisalu usit suuneri, annertussusii, usinik piginnittuusoq aanunalu assartugassap annertussusia pillugit paasissutissanik imaqassaaq.
Imm. 2. Piffissamut aalajangersimasumut imaatigut angallassiniarluni akuersissummik qinnuteqartoqarpat, qinnuteqaammi ilanngullugit angallavissaq pillugu paasissutissiisoqassaaq.
Imm. 3. Imm. 1-imi aalajangersagaq apeqqutaatinnagu assartuineq aallartinneqassanngilaq akuersissummik tunniussisoqareertinnagu.

§ 4. Assartugassanik piginnittup qinnutigippagu nioqqutissianik annertuunik assigiiaanik imaluunniit nalinginnaanngitsunik angalavinni aalajangersimasumik angallaffissatut akuersissuteqarfioreersumi usinik imaatigut assartuiniarluni, qinnuteqaat ilaqartinneqassaaq akuersissummik piginnittuusumit allanillu neqeroorununik inaarutaasumik pituttuisumillu. Neqeroorutinik tunniussineq assigiinunik tunngaveqarluni pissaaq akuersissummillu piginnittoq, paasissutissat pisariqartinneqartut saqqummiunneqareernerini kingusinnerpaamik ullut arfineq-marluk qaangiutsinnagit neqerooruteqassaaq imaluunniit neqerooruteqarniarnerminit tunuaannarluni nalunaaruteqassalluni.

§ 5. Usinik imaatigut assartuisinnaanermut akuersissut tunniunneqassaaq Pisortat Suliassaqarfiutaannut Angallannermullu Naalakkersuisoqarfimmit Naalakkersuisut aalajangereernerisigut.
Imm. 2. Kalaallit Nunaanni umiarsualivissinnermi akuersissut umiarsuarmiisinneqassaaq umiarsualivimmilu oqartussaasut qinnuteqarnerisigut takutinneqartassalluni.

§ 6. Akuersissut utertinneqarsinnaavoq, piginnittuusoq mianersuaalliorujussuarluni arlaleriarluniluunniit usinik imaatigut assartuineq pillugu peqqussummik, peqqussut naapertorlugu aalajangersakkanit imaluunniit akuersissummut piumasaqaatinik unioqqutitsippat.

§ 7. Nalunaarut atuutilissaaq 1. april 1993.

Namminersornerullutik Oqartussat, ulloq 16. marts 1993.

Kuupik Kleist

/

Jens K. Lyberth