Meeqqanik inuusuttunillu ikiorsiisarneq pillugu Namminersornerullutik Oqartussat nalunaarutaat nr. 2, 18. januar 1993-imeersoq.
Meeqqanik inuusuttunillu ikiorsiisarneq pillugu Inatsisartut peqqussutaanni nr. 9-mi 30. oktober 1992-imeersumi § 4 imm. 2, § 11 imm. 4, § 15 imm. 3, § 35, § 44 imm. 4 aamma § 45 tunngavigalugit makku aalajangersarneqarput:
Kapitali 1
Nalunaaruteqartussaatitaaneq§ 1. Kinaluunniit meeqqat inuusuttullu naammaginanngitsumik atugaqartitaanerannik ilisimannittoq tamanna pillugu isumaginninnermut ataatsimiititamut nalunaaruteqartussaatitaavoq.
§ 2. Inuit pisortanit suliaqartitaasut imaluunniit naalakkersuinermi qinigaanikkut suliaqartitaasut taamatut suliaqartitaanerminni imaluunniit naalakkersuinermi qinigaanikkut suliaminnik ingerlatsinerminni meeqqap inuusuttulluunniit ikiortariaqarsorinartumik atugaqarneranik paasisaqarunik isumaginninnermut ataatsimiititamut sukannernerusumik nalunaaruteqartussaatitaapput.
Imm. 2. Isumaginninnermut ataatsimiititap nalunaarfigineqartarnissaanut pisussaatitsinermik sukanganerulersitsineq inunnut isumaginninnermut tunngasunik suliaqarnermi, atuarfimmi suliffeqarnermi imaluunniit peqqinnissaqarfimmi suliffeqarnermi taamatulluunniit suliaqartitaanermi meeqqat inuusuttullu atugaannik immikkut ittunik ilisimasaqartunut tunngavoq.
Imm. 3. Imm. 2-mi inuit pineqartut isumaginninnermut ataatsimiititaq nalunaarfigissavaat meeraq inuusuttorluunniit ulluinnarni avatangiisiminut, atuarfimmi inuiaqatigiinniluunniit avatangiisiminut naleqqiulluni ajornartorsiuteqarpat, meeraq inuusuttorluunniit napparsimanerminut innarluuteqarnerminulluunniit atatillugu pisariaqartumik katsorsarneqaraniluunniit paaqqutarineqanngippat, kiisalu meeraq inuusuttorluunniit naammaginanngitsunik atugaqartitaalluni inuusorinarpat.
Kapitali 2
Nammineq siunnersuisorisaq§ 3. Meeqqamut inuusutturaulluunniit namminerisamik siunnersuisumik toqqaasoqartassaaq immikkut ittumik suliniuteqarnissaq isumaginninnermut allaffiup nalinginnaasumik siunnersuinera ilitsersuineralu aqqutigalugit naammaginartumik ingerlanneqarsinnaasorineqanngippat.
Imm. 2. Meeqqamut inuusuttumulluunniit pinerluttulerinermi inatsimmik unioqqutitsisimalluni unnerluunneqaatissaraluaminik taamaatitsivigineqarsimasut imaluunniit meeqqanik inuusuttunillu ikiorsiisarneq pillugu Inatsisartut peqqussutaanni aalajangersakkat tunngavigalugit ikiorserneqartussanngorlugit pineqaatissinneqarsimasut namminerisamik siunnersuisulerneqartassapput.§ 4. Isumaginninnermut Sulif feqarnermullu Pisortaqarfiup allagartat atugassiaasa ilaat atorlugu namminerisamik siunersuisorisaq allaganngorlugu toqqarneqartassaaq. Toqqaanermut ilagitillugu namminerisamik siunnersuisorisamut iliuuseqarnissamut pilersaarut tunniunneqassaaq, kiisalu namminerisamik siunnersuisorisap tamanut tunngassuteqartillugu pisinnaatitaaffii pisussaaffiilu pillugit ilitsersuut.
Imm. 2. Namminerisamik siunnersuisorisaq pisinnaatitaavoq meeqqamut inuusuttumulluunniit tunngasut, suliap ingerlanneranut pisariaqartinneqartut tamaasa, ilisimalernissaannut. Namminerisamik siunnersuisorisaq suliamik ingerlatsinerminut tunngatillugu paasisaminik nipangiussisimasussaatitaavoq, tak. Inatsisartut peqqussutaanni § 50.§ 5. Namminerisamik siunnersuisorisatut toqqarneqartassapput inuit nammineersinnaassusillit, taamatut suliaqarnissamut immikkut ittumik piukkunnaateqartut, taaraatullu suliaqarnissamut kajumittuusut.
Imm. 2. Inuk ataaseq amerlanerpaamik meeqqanut inuusuttunulluunniit ataatsikkut pingasunut namminerisamik siunnersuisutut toqqarneqarsinnaavoq. Namminerisamik siunnersuisorisaq eqqartuunneqarsimasunut aamma nakkutilliisuuppat, tak. Kalaallit Nunaanni pinerluttulerinermik inatsimmi § 94, namminerisamik siunnersuisuuffigisat nakkutilliisuuffigisallu katillugit ataatsikkut pingasut sinnersimassanngilaat.§ 6. Namminerisamik siunnersuisorisaq qaammammut kingumoortumik akissarsisassaaq paaqqinninnersiutit sukkulluunniit atuuttup 15%-ianik amerlassusilinnik, tak. § 14. Akissarsiap angissusia, 1. januar 1993-imi qaammammut 475,- kroniusoq, Isumaginninnermut Suliffeqarnermullu Pisortaqarfiup aningaasat isuraaginninnermi tunniunneqartartut pillugit ukiup affakkuutaartumik kaajallaasitaa atorlugu nalunaarutigineqartassaaq.
Imm. 2. Isumaginninnermut ataatsimiititap akissarsiaq 50 imaluunniit 100%-imik qaffattassavaa immikkut ittumik suliniuteqartoqarnissaa piumasarineqarsimappat.
Imm. 3. Tamatuma saniatigut namminerisamik siunnersuisorisaq suliaminik ingerlatsinerminut atatillugu immikkut ittunik aningaasartuutit uppernarsaaserneqarsimasut matussuserneqarnissaannut pisinnaatitaavoq, taamaattorli tamanna pillugu isumaginninnermut ataatsimiititaq isumaqatigiissuteqarfigineqareersimasassaaq, piaarluinnartumik qanoq iliuuseqartariaqalernerit eqqaassanngikkaanni.§ 7. Namminerisamik siunnersuisorisap meeraq imaluunniit inuusuttoq kiisalu taassuma ilaqutai siunnersortassavai ilitsersortassallugillu.
Imm. 2. Namminerisamik siunnersuisorisap suliani angajoqqaajusut allalluunniit meeqqamut inuusuttumulluunniit paaqqinnittut qanimut suleqatigalugit ingerlatissavaa. Aammattaaq namminerisamik siunnersuisorisap atuarfik, peqqinnissaqarfik, pinerluuteqarsimasunik isumaginnittoqarfik, politiit aamma oqartussaasut allat suleqatigisassavai.§ 8. Namminerisamik siunnersuisorisaq akuttuallaanngitsumik, ikinnerpaamik ukiup affakkuutaartumik, suliani allaganngorlugu nalunaarusiortassavaa taamatut toqqarneqarsimanini naapertorlugu. Namminerisamik siunnersuisorisap isumaginninnermut allaffik piaartumik nalunaarfigissallugu pisussaaffigaa iliuuseqarnissamut pilersaarutip ingerlanneqalersimasup allanngortittariaqarneranik kinguneqarsinnaasumik pisoqartillugu.
Kapitali 3
Illersuisutut ikiorteqarneq§ 9. Isumaginninnermut ataatsimiititap meeraq inuusuttorluunniit angerlarsimaffiup avataanut inissinneqassasoq isumaliutersuutigisimappagu, angajoqqaatullu oqartussaassuseqartup taamaaliornissaq akuersissutigiumanngippagu, isumaginninnermut allaffiup angajoqqaatut oqartussaassuseqartoq ilisimatissavaa siunnersorneqarnermut ilitsersorneqarnissamullu illersuisutut ikiorteqarnissaminut pisinnaatitaasoq. Angajoqqaatut oqartussaasup nammineerluni illersuisussamisut ikiortissani, isumaginninnermut allaffimmeersuussanngitsoq imaluunniit kommunalbestyrelsimut ilaasortaasuussanngitsoq, toqqassavaa.
Imm. 2. Aamma tamanna atuuppoq angajoqqaatut oqartussaassuseqartup angerlartitsinissamik qinnuteqarnerata itigartitsissutigineqarnissaa isumaginninnermut ataatsimiititap eqqarsaatersuutigisimappagu, apeqqutaatinnagu inissiisimaneq akuersisitsinikkut imaluunniit akuersisitseqqaarani pisimanersoq, aamma isumaginninnermut ataatsimiititap namminersuutamik paaqqutarineqartup angerlartinneqarnissaata itigartitsissutiginissaa eqqarsaatersuutigisimappagu.§ 10. Illersuisutut ikiorteqartitsinissaq pilersinneqarpat piaarnerpaamik isumaginninnermut allaffiup tamanna Isumaginninnermut Suliffeqarnermullu Pisortaqarfiup nunap immikkoortuani allaffianut allakkatigut nalunaarutigissavaa.
§ 11. Illersuisutut ikiorti suliassap qanoq suliassartaqarneranik angajoqqaatut oqartussaassusilinunik isumaqatigiissuteqarnikkut ilisimanninnissamut pisinnaatitaavoq. Illersuisutut ikiorti suliaminut tunngatillugu paasisaminik nipangiussisimasussaatitaavoq, tak. Inatsisartut peqqussutaanni § 50.
§ 12. Illersuisutut ikiorti Eqqartuussisuunerup pinerluuteqarsimasunik eqqartuussinermi ilinniagarisimanagu illersuisussatut toqqarneqarsimasunut akissarsiassat amerlassusissaannik aalajangersimasai malillugit akissarsiaqartinneqassaaq. Amerlassuserititat siunissami Isumaginninnermut Suliffeqarnermullu Pisortaqarfiup ukiup affakkuutaartumik aningaasat isumaginninnermi tunniunneqartartut pillugit kaajallaasitaani nalunaarutigineqartartussat maanna ima amerlassuseqarput, tak. Eqqartuussisuunerup kaajallaasitaa nr. 215:
Nal. akunnera ataaseq tikillugu 300,-
Nal. akunnera ataaseq sinnerlugu nal. akunnerisa marluk tungaannut 450,-
Nal. akunnerisa marluk qaangiunneranni nal. akunnerisa aallartinneri tamaasa 250,-
Imm. 2. Aningaasarsiat tunniunneqartassapput pisortat oqartussaatitaannik ataatsimeeqateqarnerit amerlassusiat aamma ataatsimiinnerit qanoq sivisutiginerat tunngavigalugu. Nalunaaquttap akunneri ataatsimiiffiusut aallartinneri tamaasa angissuserititaq piareersarnermut ataatsimiinnerullu kinguneranik suliassat ingerlannerannut matusissutaasassaaq. Akissarsiaq kommunimiit, Isumaginninnermut Suliffeqarnermullu Pisortaqarfiup nunap inunikkoortuani allaffiani.it utertitassanngorlugu, tunniunneqartassaaq, tak. Inatsisartut peqqussutaanni § 48.
Kapitali 4
Ilaqutariinni paarsaqartitsinermi paaqqinninnersiutit§ 13. Isumaginninnermut ataatsimiititap meeraq inuusuttorluunniit ilaqutariinnut paarisassanngortippagu paarsaqarnissamut akuersissut allaganngorlugu atortussanngortinneqassaaq, ilaqutariillu meerarsiallit paaqqinninnersiutinik neqeroorfigineqassapput. Qitornarsiaqarnissamut patsisissaatitaasut isumaqatigiissutigineqarsimasut qitornarsiaqarnissamut isumaqatigiissummi allassimassapput, aamma iliuusissanut pilersaarut allaganngorlugu suliarineqarsimasoq. Qitornarsiaqarnissamut akuersissut aamma ilaqutariinni paarsaqartitsinissamut isumaqatigiissut Isumaginninnermut Suliffeqarnermullu Pisortaqarfiup allagartat atugassiai atorlugit suliarineqassapput.
§ 14. Ilaqutariinni paarsaqartitsinermi paaqqinninnersiutit maanna qaammammut 3.167,- kroninik amerlassuseqarput. Paaqqinninnersiutit, qaammatikkuutaarlugit siumoortumik tunniunneqartartussat, nerisaqarnermut ineqarnermullu aningaasartuutinut kiisalu atisanut nalinginnaasunut aningaasartuutinut kaasarfimmiunullu matusissutaassapput.
Imm. 2. Paaqqinninnersiutit 1. aprilimi 1. oktoberimilu nioqqutissat akitsuutaannut iluarsiivigineqartassapput januarimi julimilu iluarsiissutit najoqqutaralugit (1984 = 100 najoqqutaralugu). Paaqqinninnersiutit 3%-imik qaffanneqarlutilluunniit appartinneqartassapput nioqqutissat akitsuutaat pointinik pingasunik qaffalluniluunniit apparsimagaangat. Paaqqinninnersiutit amerlassusiat Isumaginninnermut Suliffeqarnermullu Pisortaqarfiup aningaasat isumaginninnermi tunniunneqartartut pillugit ukiup affakkuutaartumik kaajallaasitaa atorlugu tamanut nalunaarutigineqartassapput.§ 15. Isumaginninnermut ataatsimiititap paaqqinninnersiutit 50 imaluunniit 100%-imik qaffattassavai perorsaanermik imaluunniit isumaginninnissamik inunikkut ittumik piumasaqartoqarsimappat.
Imm. 2. Isumaginninnermut ataatsimiititap angajoqqaarsiat aappaata angerlarsimaannarnissaa piumasarippagu paaqqinninnersiutit 200%-imik qaffanneqassapput.§ 16. Nukinginnartunik, sivikitsuinnaassangatinneqartunik, tassa piareersaqqaarneqarsinnaanngitsunik, inissiisoqartariaqalersillugu paaqqinninnersiutit qaffatat tunniunneqartassapput. Inissiinerit taamaattut taamaallaat ilaqutariinnut isumaginninnermut ataatsimiititamit nukinginnartumik inissiisoqassatillugu piareersimasoralugit paarsaqarnissamut akuerineqareersimasunut pisinnaapput.
Imm. 2. Nukinginnartumik inissiisoqarnerani ullormut unnuamullu paaqqinninnersiutit qaammammut paaqqinninnersiutit 1/30-iattut naatsorsorneqassapput, 200%-imillu qaffallugit. Paaqqinninnersiutit qaffatat meeqqamut pineqartumut sivisunerpaamik ulluni unnuanilu 30-ni tunniunneqarsinnaapput, piffissarli ullunut unnuanullu 60-inut sivitsorneqarsinnaavoq, pissutsit immikkut ittut taamaaliornissaq pisariaqartippassuk.
Kapitali 5
Angajoqqaat akiliisarnerat il.il.§ 17. Meeqqap inuusuttulluunniit angerlarsimaffiup avataanut inissinneqarnissaa pisariaqarpat, inissiinermut atatillugu kommunip aningaasartuutai angajoqqaanut ilaannakortumik tamakkiisumilluunniit akileqquneqassapput. Akiliutissaq, qaammammut kingumoortumik akileqquneqartartussaq, aalajangerneqassaaq angajoqqaat aningaasaqarnerat aamma angajoqqaat pilersuinerminni katillugit nammataat naatsorsuutigalugit.
Imm. 2. Akiliisarnermut aalajangiinerit nutaamik naliliiffigineqartassapput angajoqqaat isertitaqartarnerat imaluunniit pilersuinermi nammataat allannguuteqarsimappata.§ 18. Immikkoortoq 2-mi aamma 3-mi aalajangersakkat malillugit angajoqqaat tamarmik immikkut minnerpaamik, meeqqanut akilersuutit sukkulluunniit atuuttut amerlaqataannik amerlassusilinnik, tak. meeqqanut akilersuutit il.il. pillugit Inatsisartut peqqussutaat, akiliutissaat aalajangerneqassaaq.
Imm. 2. Isertitap SIK-p isumaqatigiissutaa malillugu ilinniagaqarsimanngitsunut agguaqatigiissitsinikkut akissarsiaq assigippagu akiliutissaq minnerpaamik akiliutissamut, nalinginnaasumik meeqqanut akilersuutit amerlaqataannut, aalajangerneqassaaq. Oqaaseqatigiinni siullerni isertitap ilanngaatissat ilanngaatigeqqaarlugit angissusiata taaneqartup 25.000 kroninik sinnerneri tamaasa akiliut 25%-imik qaffanneqassaaq.
Imm. 3. Akiliisussaatitaasoq meeqqanut arlalinnut pilersuisussaatitaappat, matumani aamma meeqqanut akilersuutinik akilersuisussaatitaappat, meeqqat marluk meeqqamik ataatsimik sinnerneri tamaasa imm. 2-mi oqaaseqatigiit siulliit malillugit isertitamut killiliussaq 25.000 kroninik qaffanneqassaaq.§ 19. Isumaginninnermut ataatsimiititap angajoqqaajusup aappaa akiliisinngitsoortassavaa tamaasaluunniit akiliinngitsoortittassavai, akiliisussaatitaaneq taraatumunnga atatillugu naliliinikkut pineqartup/-tut imminut/imminnut ilaquttaminulluunniit naammaginartumik atugaqarnissamut isumaginnissinnaaneranut qulakkeerinninnissaq ajornartorsiorfigineqalissasoq paasineqarpat. Taamatut pisoqartillugu isumaginninnermut ataatsimiititap akileeqqusissutigereersimasaraluani isumakkeertassavai.
Imm. 2. Aamma isumaginninnermut ataatsimiititap angajoqqaajusup aappaa akiliisinngitsoortassavaa angajoqqaajusulluunniit tamaasa akiliisinngitsoortassavai, imaluunniit anginerusumik akiliutissatut naatsorsugaareeraluartoq minnerpaamik akiliutissamut appartittassallugu, tak. § 18 imm. 1, pissutsit allat immikkut ittut atuussimappata. Akiliinngitsoortitaaneq akiligassamilluunniit millileriffigineqarneq pisassaaq, angerlarsimaffiup avataanut inissiineq napparsimaneq innarluuteqarnerluunniit kisiisa pissutigalugit immikkut ittumik sullissinissamik pisariaqartitsisuusimagaangat, kiisalu angerlarsimaffiup avataanut inissiineq angajoqqaat meeqqamut inuusuttumulluunniit pissusaasa imaluunniit iliuusaasa kingunerisimanngikkaangassuk.§ 20. Angajoqqaat aappaata imaluunniit angajoqqaat tamarmik pilersuisussaatitaanerat akilersuisussaatitaanermut allagartaq malillugu meeqqanut akilersuutinik akiliisarnikkut matuneqartarpat isumaginninnermut ataatsimiititap qinnutigissavaa meeqqanut akilersuut qaffanneqassasoq, tak. Kalaallit Nunaanni qitornat inatsisitigut pisinnaatitaanerat pillugu inatsimmi 16. juni 1962-i-meersumi, kingusinnerusukkullu allannguuteqartinneqartarsimasumi, § 18 imm. 2.
§ 21. Meeraq inuusuttorluunniit angerlarsimaffiup avataanut inissinneqarsimasoq amerlasuunik isertitaqartarpat, tak. imm. 2, isumaginninnermut ataatsimiititap pineqartoq peqqusinnaavaa inissiinermut atatillugu kommunip aningaasartuutaasa tamakkiisumik ilaannakortumilluunniit matussuserneqarnissaannut missiliuussinikkut angissusilikkamik akiliisassasoq. Akiliutip qaammammut kingumoortumik akileqquneqartartussap nalinginnaasumik meeqqanut akilersuut sukkulluunniit attuuttoq qaangersimanngisaannassavaa, tak. meeqqanut akilersuutit il.il. pillugit Inatsisartut peqqussutaat. Aammattaaq akiliutip ilanngaatissat ilanngaatigeqqaarlugit isertitap 20%-ia qaangersimassanngilaa.
Imm. 2. Isertitaq annertuutut naatsorsuunneqassaaq taanna ilanngaatitaqartinnagu Isumaginninnermut Suliffeqarnermullu Pisortaqarfiup ulloq unnuarlu paaqqinnittarfiini najugallit paaqqinniffimmi sulisunut akissarsiarititamit sukkulluunniit atuuttumit angineruppat, maanna sapaatip akunneranut 1.126,- kroniusunit, tak. Isumaginninnermut Suliffeqarnermullu Pisortaqarfiup aningaasat isumaginninnermi tunniunneqartartut pillugit kaajallaasitaa atuuttoq.§ 22. §§ 18 aamma 21 tunngavigalugit katillugu akiliutip inissiinermi katillugu aningaasartuut qaangersimanngisaannassavaa. Taamaalissagaluarpat angajoqqaanut aamma meeqqamut inuusuttumulluunniit akiliutigititaq akiliutip qanoq angitigissusia naatsorsuutigalugu millisinneqassaaq.
Kapitali 6
Atortussanngortitsineq§ 23. Nalunaarut manna atortuulersinneqarpoq 1. februar 1993 aallarnerfigalugu, taamaattorli § 6-imi namminerisamik siunnersuisorisamut aamma § 12-imi illersuisutut ikiortimut akissarsiarititanut angissuserititat 1. januar 1993-imiit atulersinneqarput.
Namminersornerullutik Oqartussat, 18. januar 1993.
Henriette Rasmussen/
Nukákuluk Kreutzmann