Inuutissarsiutiginagu piniarneq, aallaaniarneq aalisarnerlu pillugit Inatsisartut inatsisaat nr. 11, 29. april 1992-imeersoq.

 

§ 1. Inatsimmi pineqarput piniarneq, aallaaniarneq aalisarnerlu Kalaallit Nunaata nunataani imartaanilu inuutissarsiutiginagu ingerlanneqartut.

§ 2. Qallunaatut innuttaassuseqartut Kalaallit Nunaanni najugaqavissut Kalaallit Nunaata nunataani imartaanilu inuutissarsiutiginagu piniarsinnaatitaapput, aallaaniarsinnaatitaapput aalisarsinnaatitaallutillu.
Imm. 2. Naalakkersuisut taama piginnaatitaanermut piumasaqaatigisinnaavaat piniarnermik, aallaaniarnermik aalisarnermilluunniit ingerlataqartup, taama ingerlataqarsinnaanermut akuersissummik pigisaqarnissaa. Aallaaniarsinnaanermut akuersissummik tunniussineq Naalakkersuisut akiliutitaqartissinnaavaat.

§ 3. Danmarkiunngitsumi nunani allani innuttaassuseqartut Kalaallit Nunaanni aalajangersimasumik najugaqartut ataannartumillu ukiuni marlunni najugaqarsimasut qallunaatut innuttaassuseqartutut piginnaatinneqarput.

§ 4. Inuit §§ 2-mi aamma 3-mi pineqanngitsut qanorluunniit piniarniassagunik aallaniassagunillu aamma kapisilinniarlutik eqalunniarlutilluunniit aalisassagunik immikkut akuersissummik peqqaartassapput. Naalakkersuisut malittarisassiorsinnaapput aalisakkanik allanik aalisarsinnaaneq aatsaat pisinnaalersillugu immikkut akuersissuteqarnikkut.
Imm. 2. Imm. 1 naapertorlugu akuersissut akiliutitaqartinneqartassaaq, angissusia Naalakkersuisunit aalajangerneqarsimasumik.
Imm. 3. Siunertanut ilisimatusarnermut tunngasunut imm. 2-mit allaasumik Naalakkersuisut immikkut akuersissuteqarsinnaapput.

§ 5. Naalakkersuisut piniarsinnaanermut, aallaaniarsinnaanermut aalisarsinnaanermullu akuersissutit inatsimmi pineqartut pillugit erseqqinnerusunik malittarisassiussapput.

§ 6. § 4, imm. 1, uniffik siullermik, imaluunniit § 2, imm. 2, § 4, imm. 1, uniffiit aappaat, imaluunniit § 5 tunngavigalugu malittarisassianik unioqqutitsinerit akiliisussanngortitsissutaasinnaapput.
Imm. 2. Aallaaniarnermi aalisarnermilu atortut inerteqqutaasut pisallu, imaluunniit taakku nalingi, arsaarinnissutaasinnaapput Landskarsimut nakkartussanik.

§ 7. Inatsit 1. juli 1992 atuutilerpoq.
Imm. 2. Peqatigitillugu atorunnaarsinneqarpoq Inuutissarsiutiginagu aallaaniarneq aalisarnerlu pillugit Inatsisartut inatsisaat nr. 11, 29. maj 1990-imeersoq.

Namminersornerullutik Oqartussat, ulloq 29. april 1992

Lars Emil Johansen

/

Kaare Hagemann