Isumaginninnikkut pensionit utoqqarnillu paaqqinniffiit il.il. pillugit inatsisartut peqqussutaata allanngortinnera pillugu inatsisartut peqqussutaat nr. 3, 9. april 1992-imeersoq.

 

§ 1.

Isumaginninnikkut pensionit utoqqarnillu paaqqinniffiit il.il. pillugit Inatsisartut peqqussutaat nr. 8, 22. oktober 1990-imeersoq makkuninnga allannguuteqartinneqassaaq:

1. § 8 imm. 1 aamma 2 ima oqaasertaqartinneqassaaq:
"§ 8. Isumaginninnikkut pensionit 1. januar 1992 aallarnerfigalugu annerpaamik ukiumut tunngaviusumik aningaasartat, takuuk isertitat tunngavigalugit aaqqiissuteqartarneq pillugu imm. 2 aamma siusinaartumik pensionilinnut tunngaviusumik aningaasartat minnerpaaffiat pillugu imm. 3-mi aalajangersakkat, ima angissusilerlugit tunniunneqartassapput:
1) Aappariinnut, aappaannaa pensionisiaqarnissamut patsisissaatitaasunik eqqortitsisimasumut aammalu kisimiittunut 82.812
2) Aappariinnut, tamarmik pensionisiaqarnissamut patsisissaatitaasunik eqqortitsisimasunut 124.218
Imm. 2. Tunngaviusumik aningaasartat isertitaqqortussuseq najoqqutaralugu aaqqiiffigineqartarnerat ukiumi akileraaruteqarfiusumi ilisimaneqartumi kingullermi akileraaruteqaataasussatut pensionisiat saniatigut isertitat (akileraaruteqaataasussatut saniatigooqarnikkut: isertitat) tunngavigalugit pisassaaq, imaaliornikkut:
1) Kisimiittumut aaqqiissuteqartarneq aallartittassaaq kisimiittoq 14.000 kroninik akileraaruteqaataasussatut saniatigooqarnikkut isertitaqarsimappat, aamma tunngaviusumik aningaasartat tunniunneqartarunnaartartussaapput kisimiittoq 158.000 kroninik taakkuluunniit sinnerlugit isertitaqarsimappat.
2) Aappariinnut aaqqiissuteqartarneq aallartittassaaq aappariit katillugit 21.000 kroninik akileraaruteqaataasussatut saniatigooqarnikkut isertitaqarsimappata, aamma tunngaviusumik aningaasartat tunniunneqartarunnaartartussaapput aappariit 237.000 kroninik taakkuluunniit sinnerlugit isertitaqarsimappata.

Isertitaqqortussuseq najoqqutaralugu aaqqiissuteqartarneq imaaliornikkut pisassaaq: Tunngaviusumik aningaasartat = Annerpaamik tunngaviusumik aningaasartat minus (annerpaamik tunngaviusumik aningaasartat agguarlugit (akileraaruteqaataasussatut isertitat qummut killingat minus 14.000 kisimiittumut/21.000 aappariinnut)) inernerlu taanna amerlisarlugu (saniatigut akileraaruteqaataasussanik isertitaasut minus 14.000 kisimiittunut/21.000 aappariinnut). Isumaginninnikkut pensionit saniatigut akileraaruteqaataasussanik isertitat 1000-imik agguarneqarsinnaasumut qaninnermut akunnaallisinneqassapput. Tunngaviusumik aningaasartassatut taamaaliornikkut inerneq pissarsiarineqartoq 12-imik agguarneqarsinnaasumut qaninnermut koruuninngorlugu akunnaallisinneqartassaaq."

2. § 10 imm. 2-p kingorna ilanngunneqassaaq:
"Imm. 3. Paaqqinnittarfimmut allamut, pisortat taamaattuniinnermut akiliutissanik il.il. akiliussiffigisartagaannut, nuunnermut tunngatillugu Naalakkersuisut isumaginninnikkut pensionit tunniunneqartarnerannut malittarisassanik aalajangersaassapput, matumani aamma sivisuumik napparsimmavimmiittut eqqarsaatigalugit imaluunniit eqqartuussaanikkut pillagaanermi pineqaatissinneqarnikkut Kalaallit Nunaanni pinerlussimasunut isertitsisarfinniittussanngortitaasimasut Danmarkimiluunniit parnaarussivinniittussanngortitaasut eqqarsaatigalugit."

3. § 22-mi imm. 2-mi aamma 3-mi oqaatsit "Sundhedsministeriap" aamma "Isumaginninnermi Naalakkersuisoqarfiup" peerneqarput, taarserneqassallunilu uuminnga "Naalakkersuisut".

4. Inatsisartut peqqussutaanni nr. 8-mi 22. oktober 1990-imeersumi taaguutit makku allanngortinneqassapput:
1) "isumaginninnikkut pensionit" ima allanngortinneqassaaq "pensionit",
2) "utoqqalineq pissutigalugu pensionit" ima allanngortinneqassaaq "utoqqalinersiutit", aamma
3) "utoqqarnillu paaqqinniffiit" ima allanngortinneqassaaq "utoqqarnullu angerlarsimaffiit".

 

§ 2.

Inatsisartut peqqussutaat manna 1. maj 1992 aallarnerfigalugu atortussanngortinneqarpoq, § 8-li 1. januar 1992 aallarnerfigalugu atortussanngortinneqarluni.

Namminersornerullutik Oqartussat, ulloq 9. april 1992.

Lars Emil Johansen

/

Henriette Rasmussen