Inatsisartut peqqussutaat nr. 2, 9. april 1992-imeersoq Inissianik attartortitsineq pillugu Inatsisartut peqqussutaannut allannguut.

 

§ 1.

Inissianik attartortitsineq pillugu Inatsisartut peqqussutaanni nr. 3-mi, 20. juni 1989-imeersumi makkua allanngortinneqassapput:

1. § 13, imm. 1-imi "taamaallaalli takuuk imm. 2" imatut allanngortinneqassaaq: "taamaattorli tak. imm. 2 aamma 3".

2. § 13-imi, imm. 3-tut, ilanngunneqassaaq:
"Imm. 3. §§ 11-imi aamma 12-imi aalajangersakkat aammattaaq inissianut innarluutilinnut inissiatut immikkut ittumik ilusilersorneqarsimasunut tunniunneqarsimasunullu atuutinngillat. Naalakkersuisut maleruagassiorsinnaapput inissiat innarluutilinnut naleqqussarneqarnissaannut qanoq ilusilersuisoqarnissaa kiisalu inissianik taamaattunik tunniussisarneq pillugit."

3. § 15, imm. 2, imatut oqaasertaqartinneqassaaq:
"Imm. 2. Najugaqartut sinniisissaannik qinersiniarluni najugaqartunik ataatsimiititsinermi inissianik attartortut ikinnerpaamik arfineq-pingajorarterutaat, minnerpaamilli attartortut pingasut, najuutissapput. Attartortoq napparsimanini, aallarsimanini sulininiluunniit pissutigalugu najuussinnaanngikkuni allagartaq piginnaatitsissut atorlugu inuk alla taaseqataasussanngortissinnaavaa."

4. § 15, imm. 6, imatut oqaasertaqartinneqassaaq:
"§ 26, imm. 1, malillugu attartortoq najukkaminit aneqquneqarsinnaanngilaq attartortut sinniisaattut qinigaasimatilluni."

5. § 27, imm. 2-mi, naggatit pingajuattut ikkunneqassaaq:
"§ 26, imm. 2, malillugu Namminersornerullutik Oqartussat kommunillu inissiaataanni attartortittakkani attartorunnaarsinneqarnissamut akerliliineq kinguartitsinermik kinguneqassanngilaq."

 

§ 2.

Peqqussut atuutilerpoq 1. juni 1992-imi.
Imm. 2. § 1, nr. 1, 2 aamma 4, attartornernut peqqussutip atuutilernerata kingornagut aatsaat atulersimasunut taamaallaat atuuppoq. § 1, nr. 5, peqqussutip atuutilernissaa sioqqullugu akerliliissutaasimasunut atuutinngilaq.

Namminersornerullutik Oqartussat, ulloq 9. april 1992

Lars Emil Johansen

/

Kuupik Kleist