Namminersornerullutik Oqartussat nalunaarutaat nr. 42 ulloq 18. december 1992-imeersoq arfattat pissatallu nalunaarutigineqartarnerannut tunngasoq.
Inuutissarsiutigalugu piniarnermut aallaaniarnermullu inatsisartut inatsisaanní nr. 12, 22. november 1984-meersumi §§ 6, 7 aamma § 9 naapertorlugu aalajangersaaneqarpoq:
§ 1. Tikaagullimmik arfermilluunniit tikaagullimmik anginerusumik pisaqartoq pissaasorluunniit tamatuminnga piaartumik kommunimini kommunalbestyrelsemut nalunaaruteqassaaq. Ataatsimoorluni piniarnermi tamatuminnga aquttoq (kaptajn) toqqagaq nalunaartussaavoq.
Imm. 2. Kitaani tikaagulliit pisat pissatallu tamarmik kommunemut tunniussaniit ilanngaataassapput ukiumi pineqartumi imaluunnit ukiumi tullermi. Tunumimili pisat kisimik ilanngaataassapput.
Imm. 3. Nalunaarut immersuiffimmut akuerineqarsimasumut immersorneqartassaaq kommunellu allaffianut imaluunniit immikkoortortaqarfimmut qaninnerpaamut tunniunneqarluni, tassanngaaniillu piaartumik nalunaarut pisaqartup kommuneanut ingerlateqqinneqassaaq.
Arfannermi
§ 2. Arferit § 1-imi taaneqartut pisarineqareeraangata immersugassami makku nalunaarutigineqartassapput:
1) arfermut tunngatillugu (immersugassami B-E):
a) Suunera.
b) Takissusia, kakkiviaata nuuaniit sarpiisa kiggaannut uuttorlugu.
c) Suiaanera.
d) Arnaviaappat: immoqarnersoq, illaaqarnersoq, taamaassimappallu illaava qanoq takitiginersoq suiaanersorlu.
e) Sunik aqajarormioqarnersoq.
2) piniarnermut tunngatillugu (immersugassami A, F, G, H, I, J aamma L):
a) Angallatip aqqa GR-normualu, ataatsimoorluni piniarnermi; angallatit aqqi GR-normuilu imaluunniit angallateeqqat qassiunersut.
b) Piniartup aqqa, cpr.nr.-a, ataatsimoorluni piniarnermi piniaqataasut aqqi cpr.nr.-ilu. Taakku allaffissiap tunuanut allanneqassapput.
c) Pisaqarnissamut kommunip akuersissutaata normua.
d) Pisaqarfiup sumiinnera, allorniusat sanimukaartut ammukaartullu atorlugit imaluunnit feltkode (sumiiffik immikkut ilisarnaasigaq) atorlugu, takuuk Kalaallit Nunaanni aalisakkaník avatangiisinillu misissuisoqarfiup feltkodenut tunngatillugu assiliaa. Imaluunniit allatut paatsuugassaanngitsumik nalunaarutigalugu.
e) Ulloq pisaqarfik.
f) Pilaffik.
g) Pisap missingersuilluni oqimaassusaa; kilogram mattak, orsoq kiisalu neqi.
h) Sakku arfannermi atorneqartoq. Qamutilimmik sakkoqarsimagaanni tuukkaq qaartartoqarsimanersoq nalunaarutigineqassaaq.
i) Arfeq qanoq sivisutigisumik toqujartorsimanersoq nalunaarutigineqassaaq, tassa eqqortinneraniit toqunissaa tikillugu.
j) Immersuisup aqqa ullorlu immersuiffik.
Pissaanermi
§ 3. Arferit § 1-imi taaneqarsimasut pissanneqarsimappata tulaanneqaratilli makku nalunaarutigineqassapput (immersugassami A, B, F, I, K & L):
1) Arfeq suusimanersoq.
2) Angallatip aqqa GR-normualu, ataatsimoorluni piniarnermi piniaqataasut aqqi q)r.nr.-ilu; pujortuleeqqat aqqi GR-normuilu imaluunniit angallateeqqat qassiuneri.
3) Piniartup aqqa, ataatsimoorluni piniarnermi peqataasut aqqi cpr.nr.-ilu.
4) Pisaqarnissamut kommunip akuersissutaata normua.
5) Arfeq sumi pissanneqarsimanersoq, allorniusat sanimukaartut ammukaartullu atorlugit imaluunniit feltkode (sumiiffik immikkut ilisarnaasigaq) atorlugu, takuuk Kalaallit Nunaanni aalisakkanik avatangiisinillu misissuisoqarfiup feltkodenut tunngatillugu assiliaa imaluunniit sumiiffia allatut ililluni paatsuugassaajunnaarlugu nalunaarutigalugu.
6) Ulloq pissaaffik.
7) Pissaanermi sakkut atukkat. Qamutilimmik sakkoqarsimagaanni tuukkaq qaartartoqarsimanersoq nalunaarutigineqassaaq.
8) pissaasimanermi peqqutaasut suunersut; soorlu assersuutigalugu silap ajornera, atortunik ajutoorneq il.il.
9) Immersuisup aqqa ullorlu immersuiffik.§ 4. Nalunaarnermi immersuiffiit tunngavigalugit kommune nalunaarummik immersuissaaq. Takuuk arfernik angisuunik piniarnermut nalunaarusiaq.
Imm. 2. Allattuiffik qaammatip siuliani arfernillu pissaasimanermik imalik qaammatip aallaqqaataani Aalisarnermi, piniarnermi nunaateqarnermilu Pisortaqarfimmut nassiunneqartassaaq. Nalunaarut ilaqartinneqartassaaq qaammammi qaangiuttumi pisaasimasut nalunaarusiornerisa nuutinnerannik.
Imm. 3. Unioqqutitsilluni arfattoqarsimaneranik pissaasoqarsimaneranilluunniit paasisaqartoqarsimagaangat kommunalbestyrelse pisussaavoq tamatuma oqarasuaatikkut kiisalu immersugassaq atorlugu nalunaarutiginissaanut. Nalunaarut tuaviortumik fax-ikkut Aalisarnermi Pisortaqarfimmut nassiunneqartassaaq.
Imm. 4. Naalakkersuisut kommunalbestyrelse piumaffigisinnaavaat akuersissutit tunniunneqarsimasut atorunnaarseqqullugit kommunalbestyrelse paasissutissanik piffissaq eqqorlugu Naalakkersuisunut nassitsisarsimanngippat imaluunniit paasissutissanik amigartunik nassitsisarsimappat.§ 5. §§ 1, 2, aamma 3-mik unioqqutitsisoq akiliisitaasinnaavoq.
§ 6. Nalunaarut atortuulissaaq januarip aallaqqaataani 1993.
Imm. 2. Tamatumunnga peqatigitillugu nalunaarut nr. 12, 19. juni 1992-imeersoq arfattanut pissatanullu tunngasoq atorunnaarpoq.
Namminersornerullutik Oqartussat, ulloq 18. december 1992.
Hans Iversen/
Henrik Leth
Ilanngussaq 1(pdf-format)
Ilanngussaq 2 (pdf-format)