Kangerlussuup akitsuuteqarfiunnginnissaa pillugu Namminersornerullutik Oqartussat nalunaarutaat nr. 38, 17. december 1992-imeersoq.

Nioqqutissanik eqqussuineq annissuinerlu pillugit Inatsisartut inatsisaanni nr. 18, 30. oktober 1992-imeersumi § 19, imm. 2 aamma 3 aamma § 46, imm. 4 naapertorlugit makku aalajangersarneqarput:

 

§ 1. Nalunaarummi pineqarpoq Kangerlussuarmi mittarfiup eqqaa, 1. oktober 1992 tikillugu Kalaallit Nunaata illersorneqarnissaa pillugu isumaqatigiissummi 27. april 1951-imeersumi ilaatinneqartoq.
Imm. 2. Nioqqutissat imm. 1-imi taaneqartumut, tassani inuussutissarsiornermut atorneqarnissaat imaluunniit tuniniaqqinnissaat siunertaralugu eqqunneqartut aammalu nioqqutissat inuinnarnit, tamaani najugaqavissunit imaluunniit aalajangersimasumik tamaaniittumit, nammineq atugassatut eqqunneqartut kiisalu nioqqutissat ilisimatusaatigalugu angalaqatigiinnit ilisimasassarsiortunillu eqqunneqartut, takuuk § 4, eqqussuinermi akitsuummik akitsuuserneqassanngillat.

§ 2. Nioqqutissanik, eqqussuinermi akitsuutit pillugit Inatsisartut inatsisaanni nr. 19, 30. oktober 1992-imeersumi § 1, imm. 1, nr. 3-mi aamma 7-imiit 10-mut pineqartunik aatsaat Kangerlussuarmut eqqussisoqarsinnaavoq Nioqqutissanik Akitsuutinillu Nakkutilliisoqarfiup akuersissuteqarneratigut.
Imm. 2. Akuersissut taamaallaat nioqqutissanut Kangerlussuarmi inuussutissarsiutigalugu tuniniaqqitassatut eqqunneqartunut atuutsinneqarsinnaavoq.
Imm. 3. Tikinnermi nioqqutissat akitsuuteqanngitsut nassatarisinnaasat pillugit Namminersornerullutik Oqartussat nalunaarutaat naapertorlugu nioqqutissanik eqqussinermi akuersissut imm. 1-imi pineqartoq piumasaqaataanngi1aq.

§ 3. Nioqqutissat akitsuuteqartinneqanngitsut akitsuuteqarfimmut anniseqqusaanngillat, nassaqqusaanatilluunniit, taamaaliornissamut Akileraartarnermi Pisortaqarfik akuersissuteqaqqaartinnagu.
Imm. 2. Aatsaat taamaaliornissamut akuersissuteqartoqarsinnaavoq eqqussuinermi akitsuutit pillugit Inatsisartut inatsisaat nr. 19, 30. oktober 1992-imeersoq naapertorlugu akitsuummik akiliisoqartillugu.
Imm. 3. Imm. 1-imi 2-milu aalajangersakkanut ilaatinneqanngillat nuunnermi nassiussat aamma angalanermi nassatat, eqqussuinermi akitsuutit pillugit Inatsisartut inatsisaanni nr. 19, 30. oktober 1992-imeersumi § l, imm. 1, nr. 22-mi aamma 23-mi pineqartutut ittut, inuussutissarsiornermut atorneqarnissaat siunertarinagu eqqunneqarsimasut aammalu sivikinnerpaamik qaammatini arfinilinni piginnittuminnit atorneqareersut kiisalu nioqqutissat, tikinnermi nioqqutissat akitsuuteqanngitsut nassatarisinnaasat pillugit Namminersornerullutik Oqartussat nalunaarutaat naapertorlugu Kangerlussuarmut eqqunneqartut.

§ 4. § 2-mi 3-milu aalajangersakkat apeqqutaatinnagit nioqqutissanik ilisimatusarlutik angalaqatigiinni ilisimasassarsiortunilu peqataasut inuussutissarsiutiginagu sermersuarmi imaluunniit Kangerlussuup nunataani ilisimasassarsiornermut atatillugu nerisassatut atugassatullu Kangerlussuarmut eqqussisinnaapput.
Imm. 2. Nioqqutissanik Akitsuutinillu Nakkutilliisoqarfik aalajangersagaliorsinnaavoq nioqqutissat akitsuusernagit ilisimatusaatigalugu angalaqatigiinnit ilisimasassarsiortunillu Kangerlussuarmut eqqunneqartut Nioqqutissanik Akitsuutinillu Nakkutilliisoqarfiup erseqqinnerusumik toqqagaani toqqortarineqassasut.

§ 5. Kangerlussuarmi neriniartarfinni, cafeteriani assigisaanniluunniit nioqqutissanik akitsuuteqanngitsunik, tamatumani ilaallutik nioqqutîssat taakkunannga sananeqarsimasut, taamaallaat nioqquteqartoqarlunilu sassaalliisoqarsinnaavoq tamaani nungunneqarnissaat atorneqarnissaallu naatsorsuutigalugu.
Imm. 2. Inuit Kangerlussuarmi najugaqavissut najugaqarallartulluunniit namminneq ilaquttamillu atugassaminnik nungutassaminnillu Kangerlussuarmi sulisunut niuertarfimmi imigassanik aalakoornartortalinnik tupanillu nioqqutissianik pisiniarsinnaapput.
Imm. 3. Inuit najugaqavissuunngitsut najugaqarallartuunngitsulluunniit nioqqutissanik akitsuuteqanngitsunik, imigassat aalakoornartortallit tupanillu nioqqutissiat pinnagit, Kangerlussuarmi niuertarfinni pisiniarsinnaapput tamaani atugassaminnik nungutassaminnillu.

§ 6. Kangerlussuarmi neriniartarfiit, cafeteriat assigisaalluunniit inunnut Kangerlussuarmi najugaqavissuunngitsunut najugaqarallartuunngitsunulluunniit ullormut unnuamullu ataatsimut tupanit nioqqutissianik ima annertutigisunik nioqquteqarsinnaapput: sikaritsit 40-t imaluunniit sikaat 10-t imaluunniit cigarillot 20-t imaluunniit tupat 50 g.

§ 7. Kangerlussuup eqqaani piniariarfinni aallaaniarfinnilu piniariarnermi aallaaniarnermilu peqataasut nerisassaannik atugassaannillu niuertarfiit, taamaattorli takuuk § 6, kiisalu neriniartarfiit, cafeteriat assigisaalluunniit Kangerlussuarmiittut, imigassat aalakoornartortallit pinnagit, nioqqutissanik akitsuuteqanngitsunik, tamatumani ilaallutik nioqqutissat taakkunannga sananeqarsimasut, peqataasut amerlassusii ullullu unnuallu qassit tamaaniissanganerit eqqarsaatigalugit nioqquteqarsinnaapput.
Imm. 2. Kangerlussuup eqqaani takornariarnermi peqataasut nerisassaannik atugassaannillu niuertarfiit, taamaattorli takuuk § 6, kiisalu neriniartarfiit, cafeteriat assigisaalluunniit Kangerlussuarmiittut, imigassat aalakoornartortallit pinnagit, nioqqutissanik akitsuuteqanngitsunik, tamatumani ilaallutik nioqqutissat taakkunannga sanaat, nioqquteqarsinnaapput.

§ 8. Inunnut Danmarkimut, Savalimmiunut nunanulluunniit allanut aallartussanut Kangerlussuarmi kioskinit immiaaqqanik, viinninik, imigassanik kimittuunik tupanillu nioqqutissianik il.il. akitsuuteqanngitsunik nioqquteqarnissamut Akileraartarnermi Pisortaqarfik akuersissuteqarsinnaavoq.
Imm. 2. Umiarsuit timmisartullu Kangerlussuarmiit danskit, savalimmiormiut nunalluunniit allat umiarsualiviannut imaluunniit mittarfiannut ingerlasussat taquassaannik nioqqutissanik akitsuuteqanngitsunik nioqquteqarnissamut Akileraartarnermi Pisortaqarfik akuersissuteqarsinnaavoq.

§ 9. § 4-mi, § 5-imi, § 6-imi, § 7-imi § 8-milu pineqartut saniatigut inunnut akitsuuteqanngiffiusup avataani najugalinnut Kangerlussuarmi nioqqutissanik akitsuuteqanngitsunik nioqquteqarnissaq, atukkiinissaq allatulluunniit tunniussinissaq inerteqqutaavoq.
Imm. 2. § 4-mi, § 5-imi, § 7-imi § 8, imm. 2-milu pineqartut saniatigut suliffeqarfinnut akitsuuteqanngiffiusumi aalajangersimasumik atassuteqanngitsunut Kangerlussuarmi nioqqutissanik akitsuuteqanngitsunik nioqquteqarnissaq, atukkiinissaq allatulluunniit tunniussinissaq inerteqqutaavoq.

§ 10. Akileraartarnermi Pisortaqarfiup pisortat oqartussaasut allat maleruagassat malinneqarnerinik nakkutilliisussatut piginnaatissinnaavai.

§ 11. § 2, imm. 1-imik, § 3, imm. 1-imik, aammalu § 9-mik unioqqutitsineq akiliisitsinikkut pillarneqaatissiissutaasinnaavoq, soorluttaaq nioqqutissaq, taannaluunniit peqanngippat aninqaasat taassuma nalingata angeqqatai, arsaarinnissutigineqarsinnaasut.
Imm. 2. § 5-imi, § 6-imi, § 7-imi § 8-milu aalajangersakkat niuertarfik, neriniartarfik assigisaaluunniit sinnerlugu unioqqutinneqarpata niuertarfimmik, neriniartarfimmik il.il. piginnittoq, attartortoq, akisussaalluni naalagaasoq assigisaaluunniit akiliisinneqarsinnaavoq, piaaraluneerluni mianersuaalliorujussuarluniluunniit unioqqutitsisimanermut pisuutinneqarsinnaaguni.

§ 12. Nalunaarut ullormi 1. januar 1993-imi atuutilissaaq.
Imm. 2. Tamatumunnga ilutigitillugu Kangerlussuarmut nioqqutissanik akitsuuteqanngitsunik eqqussuineq Kangerlussuarmiillu nioqqutissanik annissuineq pillugit Namminersornerullutik Oqartussat nalunaarutaat nr. 24, 28. september 1992-imeersoq atorunnaarsinneqassaaq.

Namminersornerullutik Oqartussat, ulloq 17. december 1992.

Emil Abelsen

/

Kaare Hagemann