Nioqqutissanik eqqussuinermi akitsuutit il.il. pillugit Namminersornerullutik Oqartussat nalunaarutaat nr. 34, 17. december 1992-imeersoq.

Nioqqutissanik eqqussuineq pillugu Inatsisartut inatsisaanni nr. 18, 30. oktober 1992-imeersumi § 11, imm. 2, § 16, § 18, § 19, imm. 2, § 20, § 39 aamma § 46, imm. 4 naapertorlugit makku aalajangersarneqarput:

 

§ 1. Nioqqutissat akitsuuserneqartussat akitsuuteqarfiusumut eqqunneqarneranni akitsuutit atuuttut naapertorlugit akitsuuteqartinneqassapput.
Imm. 2. Akileraartarnermi Pisortaqarfiup akiliiffigineqartartussatut innersuussaanut akitsuutit akilerneqartassapput.
Imm. 3. Akiliiffigineqartartup akitsuutit qaammatip siuliani akiligassanngorsimasut kingusinnerpaamik qaammatip tulliata ulluisa 15-iani Akileraartarnermi Pisortaqarfimmut ingerlateqqittassavai.

§ 2. Nioqqutissat akitsuusigassat konsulitut aallartitaanngitsunit imaluunniit konsuleqarfiit atorfilittaannit taakkualu sulisuinit eqqunneqartut aalajangersakkat nalinginnaasut naapertorlugit akitsuuteqartinneqassapput.

§ 3. Nuunnermi angalanermilu nassatat minnerpaamik qaammatini arfinilinni, qimatami Kalaallit Nunaata avataaniittumi nuuttumit pigineqareerlutillu atorneqareersimasut Kalaallit Nunaannut nuunnermut atatillugu akitsuusernagit eqqunneqarsinnaapput nioqqutissanik eqqussuinermi akitsuutit pillugit Inatsisartut inatsisaanni nr. 19, 30. oktober 1992-imeersumi § 3, nr. 5 naapertorlugu. Nuunnermi nassatat kingusinnerusukkut eqqunneqartut akitsuutit atuuttut naapertorlugit akitsuuteqartinneqassapput.

§ 4. Timmisartoqarfinni kioskit nioqqutissanik akitsuuteqanngitsunik eqqussisinnaanerannut, taakkuninngalu timmisartut taquassaannik kiisalu ilaasunut inuttanullu akitsuuteqarfiusumiit aallartussanut nioqquteqarsinnaanerannut Akileraartarnermi Pisortaqarfik akuersissuteqartussaavoq.
Imm. 2. Kioskit ammarsarfiisa avataanni nioqqutissat akitsuuteqanngitsut inimi parnaarsimasumi toqqortarineqartassapput.
Imm. 3. Akitsuuteqanngitsumik nioqqutissaasivinnut il.il. nioqqutissanik pilersuineq tassanngaaneersunillu toqqortarinninneq nakkutilliinerlu pillugit Nioqqutissanik Akitsuutinillu Nakkutilliisoqarfik erseqqinnerusumik aalajangersagaliorsinnaavoq.

§ 5. Umiarsuit silaannakkullu angallatit danskit, savalimmiormiut nunalluunniit allat umiarsualiviinut ingerlassallutik Kalaallit Nunaanni akitsuuteqarfiusumik qimatsilersut akitsuuteqanngitsumik taquassarsiniarsinnaapput.
Imm. 2. Nioqqutissanik ataani taaneqartunik umiarsuit taquassarsiniarneranni annertussutsit inummut ataatsimut ullormullu unnuamullu ataatsimut angallavissamut naatsorsuutigineqartumut sinnerneqassanngillat:
1) tupat 40 g,
2) imigassaq kimittooq 0,25 literi,
3) viinni 0,25 literi aamma
4) immiaaqqat 2 literi.
Imm. 3. Timmisartut taquassarsiniarneranni ilaasuisa inuttaasalu amerlassusaat kiisalu timmisartumi atugassatut tunisassatullu naatsorsuutigineqartut eqqarsaatigineqartassapput.
Imm. 4. Timmisartut akitsuuteqarfiusumut tikinnerminni imm. 1 naapertorlugu nioqqutissanik pisiarineqarsimasunik nassataqarpata, timmisartup tikinnerani ingerlaannaq akitsuuteqanngitsumik nioqqutissaasivimmut parnaarsimasumut immikkoortillugit toqqorneqassapput. Akitsuuteqanngitsumik nioqqutissaasivinnut il.il. nioqqutissanik pilersuineq tassanngaaneersunillu toqqortarinninneq nakkutilliinerlu pillugit Nioqqutissanik Akitsuutinillu Nakkutilliisoqarfik erseqqinnerusumik aalajangersagaliorsinnaavoq.

§ 6. Akitsuuteqanngitsumik taquassarsiniarnermi inuussutissarsiummik ingerlatsisumut, taquassarsiarineqartut annertussusaat pillugit taquassarsiniarnermut qinnuteqaatikkut Nioqqutissanik Akitsuutinillu Nakkutilliisoqarfimmit akuerineqarsimasukkut uppernarsaaserneqartassapput, umiarsuaq silaannakkulluunniit angallat akitsuuteqarfiusumit danskit, savalimmiormiut nunalluunniit allat umiarsualiviannut timmisartoqarfiannulluunniit ingerlaassalluni taquassarsiniaraangat.
Imm. 2. Inuussutissarsiummik ingerlataqartup, umiarsuarnik silaannakkullu angallatinik nioqqutissanik akitsuuteqanngitsunik taquassarsisitsisimasup, nioqqutissat akitsuutaannik utertitsiniarluni taquassarsiniarnermut qinnuteqaat imm. 1-imi pineqartoq, fakturallu assilineranik ilaqartinneqartoq Nioqqutissanik Akitsuutinillu Nakkutilliisoqarfimmut nassiutissavaa.

§ 7. Nioqqutissat inuussutissarsiuinmik ingerlataqartumit qimagutsinnatik ajutoornikkut annaaneqartut akitsuutaat qinnuteqarnikkut utertinniarneqarsinnaapput, nioqqutissat annaaneqarsimanerat uppernarsarlugu Nioqqutissanik Akitsuutinillu Nakkutilliisoqarfik atsiorsimappat.
Imm. 2. Inuussutissarsiornermut atatillugu tuniniaaqqinnermi nioqqutissat Danmarkimut, Savalimmiunut nunanulluunniit allanut anninneqartut akitsuutaat inuussutissarsiummik ingerlataqartup qinnuteqarneratigut utertinneqarsinnaapput. Utertitsivigeqqulluni qinnuteqaatit 300 koruuninit ikinnerusunik aningaasartallit utertinneqarsinnaanngillat.
Imm. 3. Inuussutissarsiummik ingerlataqartup inuussutissarsiornerminut atatillugu inuinnarnut ingerlatsivinnulluunniit Kangerlussuarmi imaluunniit Pituffimmi sakkutooqarfimmi aalajangersimasumik najugaqartunut najugaqarallartunulluunniit tuniniaaqqinnermini akitsuutit akilersimasai qinnuteqarnikkut utertinneqarsinnaapput. Utertitsivigeqqulluni qinnuteqaatit 300 koruuninik ikinnerusunik aningaasartallit utertinneqarsinnaanngillat.
Imm. 4. Nioqqutissat akitsuusigassat inuinnarnit eqqunneqartut amigaateqarneri ajoquteqarneriluunniit pissutigalugit akitsuuteqarfiusumit anniseqqinneqarpata akitsuutit akilerneqarsimasut qinnuteqarnikkut utertinniarneqarsinnaapput.

§ 8. Danmarkimiit, Savalimmiuniit nunanilluunniit allanit sikaritsinik tunisinermi tunisisup pisussaaffigaa poortat ataasiakkaat pappiaraminermik amitsukujuumik Kalaallit Nunaannut atorneqartumik nipititsiviginissaat.
Imm. 2. Sikaritsinik eqqussinermi nioqqutissanik tigusisussap nassiussat Nioqqutissanik Akitsuutinillu Nakkutilliisoqarfimmut misissugassanngorlugit takutissavai.

§ 9. Akitsuuteqartussaaneq kingusinnerusukkut atuutilissappat qamutit motoorillit makkua akitsuutaat qinnuteqartoqarneratigut Nioqqutissanik Akitsuutinillu Nakkutilliisoqarfimmit appartinneqarsinnaapput:
1) qamutit motoorillit ikuallattoqarnerani annaassiniarnermilu atorneqartartut, ambulancetut toqusullu illerfiinik angallassissutitut atorneqartartut kiisalu qamutit motoorillit naalagaaffiit allat aallartitaannit konsulitullu aallartitaannit pigineqartut pillugit inatsimmit aalajangersakkat naapertorlugit qamutit motoorillit akitsuuteqarfiusumut akitsuuteqanngitsumik eqqunneqarsimasut, aammalu
2) qamutit motoorillit sakkutooqarfinnut imaluunniit akitsuuteqarfiunngitsunut eqqunneqarnikuusut, takuuk nioqqutissanik eqqussuineq annissuinerlu pillugit Inatsisartut inatsisaanni nr. 18, 30. oktober 1992-imeersumi § 19, imm. 2.
Imm. 2. Akitsuutinik appaanissaaq taamaallaat pisinnaavoq qamutit motoorillit siunertanut imm. 1, nr. 1-imi pineqartunut ukiut sisamat sinnerlugit atorneqarsimappata imaluunniit piffinni imm. 1, nr. 2-mi pineqartuni ukiut sisamat sinnerlugit nalunaarsorneqarsimappata.

Appaanissaq kisitsisit makku atorlugit pisassaaq:

Benz inatortut:
ukiut tallimassaanni ........... kr. 30.000
ukiut arfinilissaanni ........... kr. 25.000
ukiut arfineq-aappassaanni ........ kr. 20.000
ukiut arfineq-pingajussaanni ....... kr. 15.000
ukiut qulingiluassaanni .......... kr. 10.000

Dieselitortut:
ukiut tallimassaanni ........... kr. 21.000
ukiut arfinilissaanni ........... kr. 17.500
ukiut arfineq-aappassaanni ........ kr. 14.000
ukiut arfineq-pingajussaanni ....... kr. 10.500
ukiut qulingiluassaanni .......... kr. 7.000

Qamutit motoorillit benzinatortut minner paamik akitsuuteqartinneqassapput 10.000 koruuninik qamutillu motoorillit dieselitortut minnerpaamik 7.000 koruuninik.

§ 10. Qamutit motoorillit nunakkoorutit minnerit sisamanik amerlanerusunilluunniit assakaasullit (All-Terrain-Vehicle assigisaalluunniit) angallannermut inatsimmi § 2, imm. 1, nr. 3 naapertorlugu qamutitut motoorilittut taaneqarsinnaasut aqqusinikkut angallatigineqanngikkunik eqqussuinermi akitsuummik akiliisitsissutigineqassanngillat.

§ 11. Nioqqutissanik nalunaakkanik annisseqqinnermi akitsuutinik akiliisussaatitaasoq pisussaavoq Nioqqutissanik Akitsuutinillu Nakkutilliisoqarfimmut nioqqutissap anniseqqinneqarnerani akiliut utertitsissutigissallugu.

§ 12. Nalunaarummi uani § 1, imm. 3-mik, § 4, imm. 2-mik, § 5, imm. 2-4-nik, § 8-mik aamma § 11-mik unioqqutitsineq unioqqutitseriaraluarnerluunniit akiliisitsinermik pillarneqaatissiissutaasinnaavoq, soorluttaaq nioqqutissaq, taannaluunniit peqanngippat aningaasat taassuma nalingata angeqatai, arsaarinnissutigineqarsinnaasut.

§ 13. Nalunaarut una ullormi 1. januar 1993-imi atuutilissaaq.
Imm. 2. Tamatumunnga ilutigitillugu nioqqutissanik eqqussuinermi akitsuutit il.il. pillugit nalunaarut nr. 18, 17. maj 1991-imeersoq atorunnaarsinneqassaaq.

Namminersornerullutik Oqartussat, ulloq 17. december 1992.

Emil Abelsen

/

Kaare Hagemann