Meeqqat atuarfianni tjenestemanditut atorfinnik il.il. amerlassusiliisarneq pillugu Namminersornerullutik Oqartussat nalunaarutaat nr. 31, ulloq 1. december 1992-imeersoq.
Meeqqat atuarfiat pillugu Inatsisartut peqqussutaanni nr. 10, 25. oktober 1990-imeersumi § 28 imm. 3 aamma § 29 imm. 2 naapertorlugit aalajangersarneqarput:
Kapitali 1.
Amerlassusilersuineq, pointilersuineq.§ 1. Nalunaarummi uani atorfiit amerlassusilerneqarneri atorfiit amerlassutsimikkut suussutsimikkullu (atorfiit taaguutaat) aalajangersimasut pineqarput.
Imm. 2 Amerlassusilersuineq atuarfimmi pointilersuineq tunngavigalugu pisassaaq, tak. § 4.§ 2. Ukioq atuarfiusoq sioqqullugu atorfiit amerlassusissaat naatsorsorneqartassapput nalunaarutigineqarlutillu Kultureqarnermut, Ilinniartitaanermut Ilisimatusarnermullu Pisortaqarfimmut, tassanngaanniit tamanna pillugu maleruagassanik nassitsisoqartassaaq. Atorfiit inuit amerlassusii tunngavigalugit amerlassusilerneqartassagaangata inuit amerlassusii ukioq taanna januaarip aallaqqaataani naatsorsorneqarsimasut tunngavigineqartassapput.
§ 3. Namminersornerullutik Oqartussat atuarfiutaanni aamma Kultureqarnermut, Ilinniartitaanermut Ilisimatusarnermullu Pisortaqarfimmi atorfiit amerlassusilernissaannik pilersaarusiaq Inatsisartut ukiumut aningaasanut inatsisaannut ilanngunneqartassaaq.
Atuarfinni pointilersuineq.
§ 4. Atuarfinni tamani klassit amerlassusiat najoqqutaralugu imatut pointilersuineqartassaaq:
1) Ukiut atuarfiusut 1. - 9.: klassimut ataatsimut 1 point.
2) Ukiut atuarfiusut 10. - 12.: klassimut ataatsimut 1 imaluunniit 1,5 point.
3) Klassit immikkut iluarsartuussat: klassimut ataatsimut 2,5 point.
Imm. 2 Klassini imm. 1-imi taaneqartuni naatsorsuinermi makku atorneqassapput:
1) Klassit ukiuni atuarfiusuni l.-mit 9.-mut 11-nit amerlanerusunik atuartoqartut kisimik klassivittut naatsorsuunneqassapput.
2) 10. - 12. klassit klassivittut isigineqassapput atuartut qassiuneri apeqqutaatinnagit, imaassallu tillit.
a) Klassit 12-t ataallugit atuartoqartut klassimut ataatsimut 1 point.
b) Klassit 12-nik amerlanerusunilluunniit atuartoqartut klassimut ataatsimut 1,5 point.
3) Klassit immikkut iluarsartuussat ikinnerpaamik pingasunik atuartoqartut kisimik klassitut immikkut iluarsartuussatut isigineqassapput. Klassit immikkut iluarsartuussat pingasunit ikinnerusunik atuartoqartut klassitut nalinginnaasutut isigineqassapput atuartut qassiuneri apeqqutaatinnagit.
Imm. 3. Klassit atuartullu imm. 2 malillugu ilanngullugit naatsorsuutigineqanngitsut naatsorsuinermi ilanngunneqassapput amerlassusilersuinerit uku malillugit:
Atuartut 0 - 12 = 1 point
Atuartut 13 - 25 = 2 point
Atuartut 26 - 39 = 3 point
Atuartut 40 - 53 = 4 point
Atuartut 54 - 67 = 5 point
Atuartut 68 - 81 = 6 point
Atuartut 82 - 95 = 7 point
Amerlassusilersuineq taanna malillugu pointit ataasiakkaat atuarfiup klassiisa naatsorsorneranni klassitut ataatsitut naatsorsuutigineqassapput.
Kapitali 2.
Tjenestemandit.
Piareersarfimmi ilinniartitsisut.§ 5. Kommunit atuarfiini atuarfimmi piareersarfiusumi atuartitsinissaq eqqarsaatigalugu piareersarfimmi ilinniartitsisutut atorfiit amerlassusilerneqartassapput atuarfimmi piareersarfiusumi ilinniartitsisut skemami tiimiisa sapaatip akunneranut amerlassusiisa tamakkerlutik 100%-ii tunngavigalugit aamma 2. - 3. klassini ilinniartitsisut skemami tiimiisa sapaatip akunneranut tamakkerlugit 20%-ii.
Imm. 2 Piareersarfimmi ilinniartitsisut amerlassusissaat aalajangerneqartassaaq tiimissatut naatsorsuutigineqartuni 27-ni tamani ataasiutittarlugu. Atorfiit amerlassusii killilerneqarsinnaapput atuarfimmi ataatsimi skemami tiimissani 27-nik tiimeqarsinnaasunut.
Imm. 3 2. aamma 3. klassini tiimit naatsorsorneqartut imm. 1 malillugu piareersarfimmi ilinniartitsisunik inuttalerneqarsinnaanngitsut ilinniartitsisunik/-ilinniartitsisuunernik atorfinitsitsinissani tunngavissatut naatsorsuinermi ilanngunneqassapput.
Ilinniartitsisut/ilinniartitsisuunerit.
§ 6. Kommunit atuarfiini ilinniartitsisutut/ilinniartitsisuunertut atorfiit amerlassusilerneqartassapput tiimit amerlassusii makku tunngavigalugit:
1) 4. - 12. klassini ilinniartitsisut tiimiisa skemani allassimasut katinneri, taakkununnga ilanngullugit immikkut ittumik atuartitsineq kiisalu meeqqat atuarfii pillugit Inatsisartut peqqussutaat § 4 malillugu ilinniartitsisut tiimiisa aalajangersimasut iluanni tiimit sunngiffimmi atuartitsinermut atorneqartussat.
2) Ilinniartitsisut 2. aamma 3. klassini skemami tiimiisa katillugit amerlassusiisa 80%-ii.
3) Maleruagassat atuuttut naapertorlugit tiiminut ilassutit, kisiannili viceskoleinspektørit,skoleinspektørit,skoleinspektøriunerit fritidsinspektørillu atuartitsisutut/ingerlatsisutut tiimiinut ilassutit pinnagit.
4) Atorfilittut suliffik sivikillisaq, meeqqat atuarfiini ilinniartitsisunut ukioq atuarfiusoq tamaat atuuttussamik akuersissutigineqarsimasoq, kiisalu tiimit atuarfinni allani - meeqqat atuarfiginngisaanni - imaluunniit suliffinni (institutioner) immikkut isumaqatigiissuteqarnikkut imaluunniit Kultureqarnermut, Ilinniartitaanermut Ilisimatusarnermullu Pisortaqarfimmit akuersissuteqarnikkut sulinerup nassataanik tiiminik ikilileriffigineqarnikkut pilersut.
5) Tiimit atuarfimmi piareersarfiusumi 2. aamma 3. klassini piareersarfimmi ilinniartitsisunit atuartitsivigineqarsinnaanngitsut, tak. § 5. Tiimit kinguliini taaneqartut naatsorsuinermi tunngavigisanit ilanngaatigineqassapput:
6) Tiimit atuartitsiviusut amerlassusii, atorfinnut imm. 3-mi taaneqartunut pinngitsoorani atuartitsiviusussaatinneqartut iluanni tigummisassaatinneqartut.
7) Tiimit qaangiuttoorfissat neriorsuutigineqarsimasut.
Imm. 2. Ilinniartitsisisutut/ilinniartitsisuunertut atorfiit amerlassusii aalajangerneqassapput tiimit amerlassusiinut taamatut naatsorsorneqartunut 27-nut ataasiutittarlugu.
Imm. 3. Kommunini ilinniartitsisutut/ilinniartitsisuunertut tjenestemanditut atorfinnik ikinnerpaamik 30-nik inuttaliisimasuni ilinniartitsisutut/ilinniartitsisuunertut atorfimmik ataatsimik aalajangersimasumik skemaqanngitsumik (aalajangersimasumik vikariusartussamik) pilersitsisoqarsinnaavoq tjenestemanditut atorfiit 30-t inuttalerneqareerneri tamaasa. Atorfinnut tamanut tiimit ilinniartitsisunut tallimanut agguarneqarsinnaapput taamaaliortoqarpallu skemaanni aalajangersimasumik vikariuffissatut inissinneqassallutik.
Viceskoleinspektørit.
§ 7. Atuarfinni ikinnerpaamik 17-inik pointilinni imaluunniit 280-nik atuartulinni imaluunniit skoleinspektøriunerusumittaaq skoleinspektøreqartuni viceskoleinspektøritut atorfik ataaseq pilersinneqassaaq.
Imm. 2. Atuarfinni, skoleinspektøriunerusumittaaq skoleinspektøreqartuni, viceskoleinspektørimik ataatsimik atorfinitsitsisoqaqqissaaq, atuarfik minnerpaamik 35-nik pointeqarpat imaluunniit 520-nik atuartoqarpat.
Imm. 3. Atuarfinni, tassunga atasumik kollegialinni 48-nik taakkuluunniit sinnerlugit ilinniartulinni, atorfiit imm. 1 - 2-mi taaneqartut saniatigut viceskoleinspektørimik ataatsimik atorfinitsitsisoqassaaq.
Skoleinspektørit.
§ 8. Atuarfinni ikinnerpaamik 8-nik pointilinni imaluunniit 95-nik atuartulinni skoleinspektørimik atorfinitsitsisoqassaaq.
Imm. 2. Nutaamik atuarfittaartoqassagaangat atuarfik naleqquttumik amerlassusilinnik klasseqartussanngorlugu suli atulinngikkallartillugu skoleinspektørimik atorfinitsitsisoqarsinnaavoq, amerlanerpaamilli qaammatinik 6-inik sioqqutsisumik.
Skoleinspektøriunerit.
§ 9. Kommunini ataasiinnaanngitsumik atuarfilinni, skoledirektørimillu atorfinitsitsiviusimanngitsuni, centralskolemi skoleinspektøriusoq skoleinspektøriuninngortinneqassaaq.
Skoledirektørit.
§ 10. Kommunini ikinnerpaamik 5.000-inik inulinni imaluunniit 1.000-inik atuartulinni skoledirektørimik atorfinitsitsisoqassaaq.
Fritidsinspektørit.
§ 11. Kommunimi ikinnerpaamik 1500-nik inulinni fritidsinspektørimik ataatsimik atorfinitsitsisoqassaaq.
Imm. 2. Fritidsinspektørinut tiimimut tapisiaritinneqartartut malittarisassat atuuttut malillugit tiimimut tapisiaritinneqartussat qaffasinnerpaaffiat qaangerlugu fritidsinspektørimut tiimimut tapisiaritinneqarsimappat ilinniartitsisut ilaat ataaseq perorsaanermi ikiortitut atorfinitsinneqartassaaq. Taamatut atorfinitsitsisarneq ukioq ataasikkaartumik, atuutsinneqartassaaq.
Imm. 3. Tiimimut tapisiaritinneqartut 18-init amerlaneruppata tak. imm. 2, perorsaanermi ikiorti ataaseq tiimit 18-it aallartiffii tamaasa, atorfinitsinneqartassaaq.
Kapitali 3.
Tjenestemandit ilaasa suliassaat immikkut ittut.
Skolelederit.§ 12. Atuarfinni 8 pointinit ikinnerusunik pointeqartuni imaluunniit 95-nit ikinnerusunik atuartoqartuni atuarfimmi ilinniartitsisut/ilinniartitsisuunerit ilaat ataaseq skolelederinngortinneqassaaq.
Fritidslederît
§ 13. Kommuneni 1.500-t inorlugit inoqartuni centralskolimi ilinniartitsisut ilaat ataaseq fritidslederiuninngortinneqassaaq.
Imm. 2. Nunaqarfinni ikinnerpaamik 60-inik 6-init 19-inut ukiulinnik meerartalinni inuusuttortalinnilu atuarfimmi ilinniartitsisut ilaat ataaseq fritidslederinngortinneqassaaq.
Imm. 3. Nunaqarfinni imm. 2 naapertorlugu fritidslederinngortitsiviusimanngitsumi skolelederi taamatut sulissaaq.
Ilinniartitsisut siunnersuisartut/atuartitsissutinut ilitsersuisartut.
§ 14. Centralskolini atuarfinnilu atuartut 120-t sinnerlugit atuartulinni atorfinitsinneqassapput:
1) atuarnerup aallartinnerani immikkullu atuartitsinermut ilinniartitsisoq siunnersuisartoq aamma
2) 7. - 12. klassinut ilinniartisisoq siunnersuisartoq.
Imm. 2 Ilinniartitsisut siunnersuisartut imm. 1-imi taaneqartut saniatigut atuarfinni 70-it sinnerlugit atuartulinni atuartitsissutini aalajangersimasuni atuartitsissutilluunniit iluanni ataatsimoortuni ilitsersuisussanik arlalinnik atorfinitsitsisoqassaaq.
Imm. 3 Aammattaaq atuarfinnut atuartut 120-t inorlugit atuartulinnut 10. - 12. klassinilu 12-it qaangerlugit atuartulinnut 7. - 12. klassinut ilinniartitsisumik siunnersuisartumik atorfinitsitsisoqassaaq.
Imm. 4 Kultureqarnermut, Ilinniartitaanermut Ilisimatusarnermullu Pisortaqarfiup ilinniartitsisut siunnersuisartut atuartitsissutinullu ilitsersuisartut pillugit malittarisassanik aalajangersaassaaq.
Imm. 5 Ilinniartitsisut siunnersuisartut atuartitsissutinullu ilitsersuisartut ukiumi atuarfiusumi ataatsimi atasussatut atorfinitsinneqartassapput.
Atuarfinni bibliotekarit bibliotekariunerillu.
§ 15. Atuarfinni ikinnerpaamik 6-inik pointilinni ilinniartitsisut ilaat ataaseq atuarfimmi bibliotekaritut atorfinitsinneqassaaq.
Imm. 2 Atuarfinni 20-nik imaluunniit annerusumik pointilinni bibliotekaritut ikiortinik atorfinitsitsisoqarsinnaavoq.
Imm. 3. Centralskolimi bibliotekariusoq bibliotekariunertut atorfinitsinneqassaaq.
Imm. 4. Skolebibliotekarit imm. 1-imit 3-mut pineqartut ukiumi atuarfiusumi ataatsimi atasussatut atorfinitsinneqartassapput.
Kapitali 4.
Timelærerinik allanillu tjenestemandiunngitsunik atorfinitsitsisarnerit.
Timelærerit, ukiimoortumik vikariusartut vikarillu.§ 16. Tiimit, naatsorsorneqareeraangata sinneruttut, tak. § 6, imm. 2, atuartitsivigineqarnissaasa isumagineqarnissaannut timelærerinik atorfinitsitsisoqarsinnaavoq.
Imm. 2. Ilinniartitsisutut/ilinniartitsisuunertut atorfinni, inuttalerneqarnissaannut periarfissaasuasuni, tiimit atuartitsivigineqarnissaasa isumagineqarnissaannut timelærerinik ukiumoortumilluunniit vikarinik atorfinitsitsisoqarsinnaavortaaq.
Imm. 3. Ilinniartitsisut ukiup atuarfiusup ataatsip iluani sulinngiffeqarsinnaanerinik akuersisoqarpat, atuartitsinerup isumagineqarnissaanut ukiumoortumik vikarinik timelærerinilluunniit atorfinitsitsisoqarsinnaavoq.
Imm. 4. Ilinniartitsisut atuartitsisinnaanngikkallarnerini atuartitsinerup isumagineqarnissaanut vikarinik atorfinitsitsisoqarsinnaavoq.
Socialpædagogit atuartitsinermilu ikiortit.
§ 17. Socialpædagogit atuartitsinermilu ikiortit atorfinitsinneqarsinnaapput:
1) Atuartut arlaatigut innarluutillit ikiorserniarneranni suliassat isumagineqarnissaannut,
2) atuartunut inissiani atuartunullu angerlarsimaffinni nakkutilliinerni suliassanut, aamma
3) fritidshjemmini atuartunik nakkutilliinermik suliaqartitsinermillu isumaginnittussatut, vikarinut imaluunniit tiimini atuarfissaanngitsuni assigisaannilu sinnersaasartussatut.
Kapitali 5.
Atortuulersitsineq il.il.§ 18. Kultureqarnermut, Ilinniartitaanermut Ilisimatusarnermullu Pisortaqarfik atorfiit nalunaarummi amerlassusilikkat imarisassaat pillugit erseqqinnerusunik aalajangersaassaaq.
§ 19. Nalunaarut atortuulissaaq 1. august 1993. Tassunga peqatigitillugu atorunnaarsinneqassaaq meeqqat atuarfianni tjenestemanditut atorfinnik il.il. amerlassusiliisarneq pillugu Namminersornerullutik Oqartussat nalunaarutaat nr. 9, ulloq 15. april 1991-imeersoq.
Namminersornerullutik Oqartussat, ulloq 1. december 1992.
Marianne Jensen/
Aqigssiaq Møller