Kalaallit Nunaanni nannut eqqissisimatitaanerat pillugu Namminersornerullutik Oqartussat nalunaarutaat nr. 25, 2. oktober 1992-imeersoq.
Kalaallit Nunaanni pinngortitamik allanngutsaaliuineq pillugu Inatsisartut inatsisaanni nr. 11-mi 12. november 1980-imeersumi § 2, imm. 1 aamma Inuutissarsiutigalugu piniarnermut aallaaniarnermullu Inatsisartut inatsisaat nr. 12-imi 22. november 1984-imeersoq naapertorlugit aalajangersarneqarput:
§ 1. Nannut (Ursus Maritimus) taamaallaat piniarneqarsinnaapput inunnit Kalaallit Nunaanni najugaqartunit kalaallinullu inuiaqatigiinnut aalajangersimasumik attuumassuteqartunit, kiisalu piniarnermik aallaaniarnermillu inuutissarsiuteqavinnerminnut uppernarsaammik peqartunit.
Imm. 2. Taamaattoq kinaluunniit, inunnit § 1-imi piumasaqaatinik naammassinninngitsunit angallanneqartoq imaluunniit akissarsiaqarluni ingiortaasoq nannussinnaatitaanngilaq.
Imm. 3. Naak imm. 2-mi aalajangersagaq taamaakkaluartoq, akissarsiaqarluni ingiortaasoq nammineq imm. 1-imi piumasaqaatinik naammassinnittoq nannunniarsinnaatitaavoq, akissarsiffigalugu ingiugaa tassaasimappat pisortani atorfeqarluni angalasoq.§ 2. Nannut piaqqat qaammatinik 24-nik utoqqaassuseqalernissartik tikillugu kiisalu nannut arnavissat taamaattunik piaqqisartut ukioq kaajallallugu eqqissisimatitaapput. Taamaakkaluartoq Avanersuup, Upernaviup, Illoqqortoormiut Tasiilallu kommuniini nannuaqqat qaammatit 12-it sinnerlugit utoqqaassusillit arnavissallu taamaattunik piaqqisartut imm. 2-mi piffissap taaneqartup eqqissisimatitsiviusup avataani pisaasinnaatitaapput.
Imm. 2. Nannut imm. 1-imi taaneqartunut ilaanngitsut Kalaallit Nunaanni tamarmi piffissami 1. juli - 31. august eqqissisimatitaapput, taamaattorli Tasiilap kommuniani 1. augustimiit 30. septemberimut.
Imm. 3. Kisianni nannut angutivissat insersimasut kisermaat ukioq tamaat piniaqqusaapput.§ 3. Nannut apissiminniittut akornusersornissaat apissiinillu assaanissaq inerteqqutaavoq.
§ 4. Timmisartut, helikopterit, qamutit motorilli, takkununnga ilaallutik snescooterit, kiisalu angallatit 40 BRT-it sinnerlugit angissusillit nannunniarnermi imaluunniit piniarfimmut utimullu angallatitut atorneqassanngillat.
Imm. 2. Toqunartut, kiisartut, nigarniutit isigassiutit aallaasillu nammineq aallartussiat atorneqassanngillat.
Imm. 3. Qoorortuuaqqat, timmiarsiutit kiisalu aallaasit eqqarasuartartut nutsuinnartakkalluunniit nannunniarnermi atorneqassanngillat.§ 5. Taamaallaat nannunik ilisimajunnaartitsisoqarlunilu nalunaaqutsersuisoqartassaaq Namminersornerullutik Oqartussanit akuerineqarsimagaanni.
§ 6. Nannut piaraallu uumasuutigeqqusaanatillu Kalaallit Nunaannit aallaruteqqusaanngillat Namminersornerullutik Oqartussanit akuerineqanngitsumik.
§ 7. Nannup unioqqutitsinikkut pisarineqartup neqaanik, amianik ilaanilluunniit sumik arlaanik pisineq pinerluunniit inerteqqutaavoq.
§ 8. Maleruagassanik siuliini allassimasunik unioqqutitsineq akiliisitsissutaasinnaavoq, kiisalu nannut unioqqutitsilluni pisarineqarsimasut pisarsiarineqarsimasulluunniit neqaat, amii pisataallu allat arsaarinnissutaassapput. Arsaarinnissutaasut sumut atornissaat Namminersornerullutik Oqartussanit aalajangiiffigineqartassapput. § 4-mi aalajangersakkanik unioqqutitsinermi angallatigineqartut sakkugineqartullu arsaarinnissutaasinnaapput.
Imm. 2. §§-ini 1-2-mi aamma 4-mi aalajangersakkanik unioqqutitsinermut piniartoq kisimi akisussaanngilaq, aammali akisussaavoq angallammik, qamutinik imaluunniit sakkumik allamik piniarnermi atorneqarsimasumik piginnittoq, piniaqataasimaguni imaluunniit atortut pineqartut unioqqutitsilluni piniarnermut atorneqarumaarnerannik siumut ilisimannereersimaguni.§ 9. Namminersornerullutik Oqartussat ilisimatuut misissuinissaannut siunertanullu allanut nalunaarummi maleruaqqusanit allaasumik immikkut akuersissuteqarsinnaapput.
§ 10. Nalunaarut erniinnaq atulerpoq tamatumalu peqataanik Kalaallit nunaanni nannut eqqissisimatitaanerat pillugu nalunaarut nr. 75. maj 1988-imeersoq atorunnaarpoq.
Kalaallit Nunaanni Namminersornerullutik Oqartussat, 2. oktober 1992.
Hans Iversen/
Henrik Leth