Kangerlussuarmut nioqqutissanik akitsuuteqanngitsunik eqqussuineq Kangerlussuarraiillu nioqqutissanik annissuineq pillugit Namminersornerullutik Oqartussat nalunaarutaat nr. 24, 28. september 1992-imeersoq.

Nioqqutissanik eqqussuineq, eqqussuinermilu akitsuutit pillugit Inatsisartut inatsisaanni nr. 1, 6. maj 1989-imeersumi, kingullermik Inatsisartut inatsisaatigut nr. 1, 28. marts 1992-imeersukkut allanngortinneqartumi, § 1, imm. 3 aamma § 10 naapertorlugit kiisalu Nioqqutissat Kalaallit Nunaannut eqqunneqartartut tassanngaaniillu anninneqartartut nalunaarsorneqarnerat nakkutigineqarnerallu pillugit Inatsisartut inatsisaanni nr. 16, 29. oktober 1985-imeersumi § 11 naapertorlugu makku aalajangersarneqarput:

 

§ 1. Nalunaarummi pineqarpoq Kangerlussuarmi mittarfiup eqqaa, 1. oktober 1992 tikillugu Kalaallit Nunaata illersorneqarnissaa pillugu isumaqatigiissummi 27. april 1951-imeersumi ilaatinneqartoq.
Imm. 2. Nioqqutissat imm. 1-imi taaneqartumut, tassani inuussutissarsiornermut atorneqarnissaat imaluunniit tuniniaqqinnissaat siunertaralugu eqqunneqartut aammalu nioqqutissat inuinnarnit, tamaani najugaqavissunit imaluunniit aalajangersimasumik tamaaniittumit, nammineq atugassatut eqqunneqartut eqqussuinermi akitsuummik akitsuuserneqassanngillat.

§ 2. Nioqqutissat akitsuuteqartinneqanngitsut akitsuuteqarfimmut anniseqqusaanngillat, nassaqqusaanatilluunniit, taamaaliornissamut Akileraartarnermi Pisortaqarfik akuersissuteqaqqaartinnagu.
Imm. 2. Aatsaat taamaaliornissamut akuersissuteqartoqarsinnaavoq nioqqutissanik eqqussuineq, eqqussuinermilu akitsuutit pillugit Inatsisartut inatsisaat naapertorlugu akitsuummik akiliisoqartillugu.
Imm. 3. Imm. 1-imi 2-milu aalajangersakkanut ilaatinneqanngillat nuunnermi nassiussat aamma angalanermi nassatat, nioqqutissanik eqqussuineq, eqqussuinermilu akitsuutit pillugit Inatsisartut inatsisaanni § 1, imm. 1, nr. 29-mi 31-milu pineqartutut ittut, inuussutissarsiornermut atorneqarnissaat siunertarinagu eqqunneqarsimasut aammalu sivikinnerpaamik qaammatini arfinilinni piginnittuminnit atorneqareersut kiisalu nioqqutissat, tikinnermi nioqqutissat akitsuuteqanngitsut nassatarisinnaasat pillugit nalunaarut nr. 12, 22. marts 1990-imeersoq naapertorlugu, eqqunneqartut.

§ 3. Kangerlussuarmi neriniartarfinni, cafeteriani assigisaanniluunniit immiaaqqat, viinnit, imigassat kimittuut tupallu taamaallaat inini neriniartarfimmut, cafeteriamut assigisaannulluunniit atasuni nungunneqarnissaat naatsorsuutigalugu nioqqutigineqarlutillu sassaalliutigineqarsinnaapput.

§ 4. Inunnut Danmarkimut, Savalimmiunut nunanulluunniit allanut aallartussanut Kangerlussuarmi kioskinit nioqqutissanik akitsuuteqanngitsunik nioqquteqarnissamut Akileraartarnermi Pisortaqarfik akuersissuteqarsinnaavoq.
Imm. 2. Umiarsuit timmisartullu Kangerlussuarmiit danskit, savalimmiormiut nunalluunniit allat umiarsualiviannut imaluunniit mittarfiannut ingerlasussat taquassaannik nioqqutissanik akitsuuteqanngitsunik nioqquteqarnissamut Akileraartarnermi Pisortaqarfik akuersissuteqars innaavoq.

§ 5. § 3-mi § 4-milu pineqartut saniatigut inunnut akitsuuteqanngiffiusup avataani najugalinnut Kangerlussuarmi nioqqutissanik akitsuuteqanngitsunik nioqquteqarnissaq, atukkiinissaq allatulluunniit tunniussinissaq inerteqqutaavoq.
Imm. 2. § 3-mi § 4, imm. 2-milu pineqartut saniatigut suliffeqarfinnut akitsuuteqanngiffiusumi aalajangersimasumik atassuteqanngitsunut Kangerlussuarmi nioqqutissanik akitsuuteqanngitsunik nioqquteqarnissaq, atukkiinissaq allatulluunniit tunniussinissaq inerteqqutaavoq.

§ 6. Akileraartarnermi Pisortaqarfiup pisortat oqartussaasut allat maleruagassat malinneqarnerinik nakkutilliisussatut piginnaatissinnaavai.

§ 7. § 2, imm. 1-imik, § 3-mik, § 4-mik aamma § 5-imik unioqqutitsinermi akiliisitsisoqarsinnaavoq, soorluttaaq nioqqutissaq, taannaluunniit peqanngippat aningaasat taassuma nalingata angeqqatai, arsaarinnissutigineqars innaapput.
Imm. 2. Akileraartarnermi Pisortaqarfiup § 3 § 4-lu naapertorlugit aalajangersakkat piumasaqaatilluunniit aalajangersagai niuertarfik, neriniartarfik assigisaaluunniit sinnerlugu unioqqutinneqarpata niuertarfimmik, neriniartarfimmik il.il. piginnittoq, attartortoq, akisussaalluni naalagaasoq assigisaaluunniit akiliisinneqarsinnaavoq, piaaraluneerluni mianersuaalliorujussuarluniluunniit unioqqutitsisimanermut pisuutinneqarsinnaaguni.

§ 8. Nalunaarut 1. oktober 1992-imi atuutilissaaq.

Namminersornerullutik Oqartussat, ulloq 28. september 1992.

Emil Abelsen

/

Kaare Hagemann