Nunaminertat atorneqartarnerat pilersaarusiorfígineqartarnerallu pillugit Namminersornerullutik Oqartussat nalunaarutaat nr. 23, 18. november 1992-imeersoq.

Nunaminertat atorneqartarnerat pilersaarusiorfigineqartarnerallu pillugit Inatsisartut peqqussutaanni nr. 6-imi 19. december 1986-imeersumi aammalu Inatsisartut peqqussutaatigut nr. 1-ikkut 18. juni 1987-imeersukkut allanngortinneqartukkut § 3 naapertorlugu makkua aalajangersarneqarput:

 

Kapitali 1
Siunertaa.

§ 1. Kommunalbestyrelsip nalunaarummi matumani malittarisassat naapertorlugit pilersaarusiornermigut ingerlatsinermigullu pisussaaffigaa kommunimi nunaminertat atorneqalertassasut innuttaasut akornanni pissutsit tamakkiisumik naliliiffigeqqaarlugit.

 

Kapitali 2
Kommunini pilersaarusiorneq

§ 2. Kommunalbestyrelsip kommunimini pilersaarusiornermini makkuninnga paasissutissinneqareersimanissani pisussaaffigaa:
1) Kommunip ineriartortinneqarneranut pilersaarusiornermi tunngavigisat siunertallu pillugit nassuiaat, § 3 naapertorlugu,
2) pilersaarusiaq kommunimi illoqarfimmik nunaqarfinnillu immikkoorsitsilluni ilusilersugaq,
3) kommunimi illoqarfiup pilersaarusiorneqarnera, tamatumani aalajangersarneqarsimassallutik illoqarfiup ineriartortinneqarneranut periusissat pingaarnerit aammalu immikkoortut ataasiakkaat pilersaarusiorneqarneranni killiffigisat imarisaat, § 4 naapertorlugu,
4) kommunimi nunaqarfiit pilersaarusiorneqarneri, tamatumani aalajangersarneqarsimassallutik nunaminertanik atuinerni aammalu sanaartuinernut maleruagassat, § 5 naapertorlugu,
5) illoqarfiit nunaqarfiillu iluini kommunalbestyrelsit nunaminertanik atugassanngortitsisarnerinut malittarisassat, § 6 naapertorlugu.
Imm. 2. Kommunimut tamarmiusumut pilersaarusiaq nuna tamakkerlugu pilersaarusiornermut akerliussanngilaq.
Imm. 3. Naalakkersuisut kommunalbestyrelsimit ataatsimit qinnuigineqarunik aalajangiisinnaapput nalunaarummi matumani kommunimi pilersaarusiornermi pissarsiarereersimasassanut tunngasunik malittarisassat atortuutinneqassanngitsut, taamaallaalli kommunip pilersaarusiorneranut najoqqutassiaassallutik.
Imm. 4. Naalakkersuisut kommunalbestyrelsinik isumaqatiginninniareerunik aalajangersinnaavaat kommunimi pilersaarusiornissamut siunnersuutinik tunniussivissat piffissalersornissaat.

 

Kommunini pilersaarusiat imarisaat

§ 3. § 2, imm. 1, nr. 1-imi nassuiaat taaneqartoq makkuninnga imaqassaaq:
1) Maannakkumut killiffigisaq: Tassani allassimassapput innuttaasunut inuussutissarsiutinullu tunngasunik kommunimi ineriartortitsinerit aammalu kommunip illoqarfiani nunaqarfiinilu sanaartortitsinermi pissutsit. Taamatuttaaq kommunimi pilersaarusiornermi maannamut killiffigisaq nassuiaateqarfigineqassaaq,
2) pilersaarusiornerup nassuiaateqarfigineqarnera: Tassani allassimassapput pilersaarutip nuna tamakkerlugu pilersaarusiamut, tamatumani Naalakkersuisut aningaasaliissuteqarnissaminnut pilersaarusiornerat ilanngullugu, naleqqiulluni qanoq pissuseqarnera aammalu kommunip nammineq aningaasarsiornikkut qanoq pilersaarusiorsimanera,
3) siunertarineqartut nassuiaateqarfigineqarnerat, tassani allassimassapput kommunalbestyrelsip kommunimini illoqarfimminik nunaqarfimminillu ineriartortitsinermini siunertarisai, tamatumani inuttussutsikkut inuussutissarsiutitigullu ineriartortitsineq ilanngullugit - aammalu kommunip illoqarfiani nunaqarfiinilu isumaginninnikkut, kultureqarnikkut ilinniartitaanikkullu sullissiviit siunissami qanoq atorneqarnissaannik siunnerfiit.

§ 4. § 2, imm. 1, nr. 3-mi kommunimi illoqarfiup pilersaarusiorneqarneranik taaneqartoq aalajangiiffigineqartassaaq makkununnga tunngasunik pilersaarusiat ataqatigiissillugit nalilerneqaraerisigut:
1) Illoqarfimmi innuttaasut inissaqartinneqaraermikkut suliffissaqartinneqarnermikkullu piorsaavigineqarnerat, tamatumani qanoq tulleriiaarisoqarnissaa ilanngullugu,
2) sullissivinni pisortallu sullissinerini allani pissutsit,
3) umiarsualiviit ingerlanneqarnerinut angallassinermullu atatillugit sanaartukkat,
4) sanaartukkat aserorneqannginnissaat imaluunniit isumannaallisaanissaq pissutigalugit sanaartukkat eqqaasa isumannaatsuutinneqarnissaat, (immikkut naammassisariaqartortalittut pissuseqartut),
5) nunaminertat sullivinnut pinngortitap pissusiinik innarliisinnaasunut naatsorsuussat,
6) nunaminertat sanaartuiffigeqquneqanngitsut aammalu sanaartukkat sunngiffimmi sammisaqartitsinernut atorneqartut annerusut,
7) pisortat pilersuinerannut atatillugit aammalu atortorissaarutitigut allatigut sanaartukkat,
8) sanaartukkat illoqarfiullu iluani immikkoortut eqqissisimatitassaqqillutillu eriagisassaqqissut,
9) nunaminertanik atuinerit allat, tamatumunnga ilanngullugit ujaqqanik, ujaraaqqanik í pinngortitamilu siumugassanik allanik iluaquteqarnerit.
Imm. 2. § 2, imm. 1, nr. 3-mi taaneqartutut illoqarfiup pilersaarusiorneqarnerani immikkoortut ataasiakkaat imarisaasa killiffissaasut aalajangiiffigineqassapput illoqarfiup immikkoortuini makkununnga tunngassuteqartut:
1) Nunaminertat sanaartuiffiillu qanoq atorneqarneri, tamatumunnga ilanngullugit pisortat sullissiveqarfiinik sullissinerinilu allani ingerlatsiviit,
2) nunaminertat sanaartuiffiillu illuliorfigineqarnissaminnut inuussutissarsiutitigullu | ineriartortitsiviunissaminnut qanoq inissiivissaqartigissusiat,
3) nunaminertani sanaartuiffinnilu sanaartuinerup pissusia, matumunnga ilanngullugit ' sanaartukkat suussusii, sumiissusii, portussusii ilusilersorneqarnerilu,
4) illoqarfiit iluini pioreersuni nutaaliornerit iluarsaassinerillu,
5) nunaminertani sanaartuiffinnilu eriagineqarsinnaasutut isigisariaqartut, tamakkununnga ilanngullugit illut sanaartukkallu allat aammalu sumiiffiit oqaluttuarisaanermut pingaaruteqartut,
6) nunaminertanut sanaartuiffinnullu angallassinikkut atortorissaarusersuinermullu atatillugu pilersorneqarnikkut aqqusersuinerit pingaarnerit,
7) nunaminertani sanaartuiffinnilu sanaartuiffigineqartussaanngitsunik sunngiffimmilu sammisassaqartitsinermi atugassiaasinnaasunik periarfissaqarnerit,
8) qaartartuusiviit, tankeqarfiit, timmisartoqarfiit, imeqarfiit aallaaviisa, nalunaarasuartaaserisoqarfiit eqqaaveqarfiillu eqqaasa isumannaatsuutinneqarnissaat,
9) nunaminertat sanaartukkalluunniit atorneqarnissaannik killiliisinnaanerit taakkua eqqaanniittui pissutigalugit,
10) nunaminertanik sanaartuiffissanillu atuinissamut piumasaqaataasinnaasut, tamakkununnga ilanngullugit illutaliortitsinermi sanaartortitsinermilu piginnittuussutsinut aningaasalersuisuunernullu tunngasut aalajangersaavigineqarneri,
11) nunaminertat sanaartuiffiillu naafferaartumik piorsaavigineqarnerat.
Imm. 3. Kommunimi illoqarfiup pilersaarusiorneqarnerani aammattaaq maleruagassanik allanik nunaminertanik atuinermut sanaartuinermullu pingaaruteqartunik aalajangersaasoqarsinnaavoq.

§ 5. § 2, imm. 1, nr. 4-imi taaneqartutut nunaqarfiit pilersaarusiorneqarneri aalajangersarneqartassapput nunaqarfinni ataasiakkaani makkununnga tunngasunik pilersaarusiat ataqatigiissillugit nalilerneqarnerisigut:
1) Nunaminertanik sanaartuiffinnillu atuinerit, tamatumunnga ilanngullugit sullissiviit I pisortallu sullissinerini illuutit allat inissisimaneri,
2) inissaqartitsinikkut inuussutissarsiornikkullu periarfissaqassuseq,
3) umiarsualiveqarnerit nioqqutissiorfeqarnerillu,
4) sanaartukkat pilersorneqarnermut atortorissaarusersuinermullu attuumassuteqartut, I tamakkununnga ilanngullugit aqqusernit aqqusineeqqallu.
Imm. 2. Nunaqarfiit pilersaarusiorneqarnerini aammattaaq maleruagassanik allanik nunaminertanik atuinermut sanaartuinermullu pingaaruteqartunik aalajangersaasoqarsinnaavoq.

§ 6. § 2, imm. 1, nr. 5-imi taaneqartutut kommunini illoqarfiit nunaqarfiillu iluini nunaminertanik atugassanngortitsisarnernut malittarisassat ataatsimoortillugit aalajangersaavigineqartassapput pisariaqartitsisoqartillugulu illoqarfiup nunaqarfiulluunniit immikkoortuinut ataasiakkaanut tunngasunik immikkut ittumik aalajangersagaasunik ilaneqarsinnaasunik.
Imm. 2. Malittarisassat makkuninnga mianerinnilluni aalajangersarneqartassapput:
1) Nunaminertanik atuiumalluni qinnuteqaatit assigiiaartumik suliarineqartarnissaat qulakkeerneqassaaq,
2) kommunimi pilersaarusiornermi siunertarineqartut piviusunngortinneqarnissaat,
3) sanaartuiffissiornernut pissutsinullu allanut pingaaruteqartunut illoqarfimmik nunaqarfinnillu ineriartortitsinerni aningaasartuutissanik agguataarisarnerit.

 

Kommunimi pilersaarusiat pillugit siunnersuutip tamanut takusassiarineqarnera

§ 7. Kommunimi pilersaarusiorneq pillugu siunnersuut akuersissutigineqareerpat kommunalbestyrelsip siunnersuut tamanut takusassiarissavaa. Kommunalbestyrelsi allannguutissatut siunnersuutinik tamanut takusassiisinnaavoq.
Imm. 2. Kommunalbestyrelsimi ilaasortaq kinaluunniit kommunimi pilersaarusiorneq pillugu kommunalbestyrelsip akuersissuteqarnerinik imaqarniliuisarfinnut allaasumik isummernerminik ilanngusseqqusilluni piumasaqaateqarsimasoq piumasaqaateqarsinnaavortaaq taama allaasumik isummernini, nammineq allakkaminik tamatuminnga tunngavilersuutinik naatsunnguanik ilallugit, kommunalbestyrelsimit ataatsikkoortumik tamanut takusassiarineqarnissaannik.
Imm. 3. Siunnersuut, imm. 2 naapertorlugu ikinnerussuteqartuusinnaasut oqaaseqaataannik ilassusigaq, innuttaasunut pisariitsumi inissillugu minnerpaamik sap. akunnerini 12-ni tamanut takusassiarineqassaaq. Takusassiisoqassaaq kommunimi tamanut nalunaaruteqartoqartillugu periaatsit nalinginnaasut atorlugit.
Imm. 4. Nalunaarummi siunnersuummut allannguutissanik oqaaseqaatissanillu saqqummiussinissamut piffissaliussaq imm. 3-mi taaneqartoq ilanngunneqarsimassaaq.
Imm. 5. Kommunalbestyrelsip paasisitsiniaaneq pilersaarusiornerup siunertaanik imarisaanillu tamanit oqalliffiulersitsisussaq pilersinniartussaavaa.
Imm. 6. Tamanut takusassiarinninnermut peqatigitillugu siunnersuut Naalakkersuisunut nassiunneqassaaq.
Imm. 7. Kommunimi pilersaarutitut siunnersuutit tamanut takusassiarineqarnerannut atatillugu pilersaarusiornermi atortussiat tunniunneqarnerannut akiliuteqartoqarnissaanik kommunalbestyrelsi piumasaqaateqarsinnaavoq.

 

Kommunimi pilersaarutitut siunnersuutigineqartut akuersissutigineqarnerat

§ 8. § 7, imm. 3 naapertorlugu piffissaliussaq naappat kommunimi pilersaarutitut siunnersuutit Naalakkersuisunit akuersissutigineqartussanngorlugit saqqummiunneqassapput. Siunnersuummut ilanngunneqarsimassapput tamatumunnga maalaarutaasimasinnaasut aammalu kommunalbestyrelsip tamakkununnga allannguutissatut siunnersuutai oqaaseqaataalu.
Imm. 2. Siunnersuut Naalakkersuisunut nassiunneqartinnagu siunnersuummut tamanut takusassiarineqarsimasumut kommunalbestyrelsi allannguuteqartitsisinnaavoq. Allannguutit annertuujuppata siunnersuut allannguuteqartinneqarsimasoq sap. akunnerinik 6-inik maalaaruteqarnissamut killiliivigalugu Naalakkersuisunut nassiunneqartinnagu nutaamik tamanut takusassiarineqassaaq.
Imm. 3. Siunnersuutip akuersissutigineqartinnani allanngortinneqarsimanissaa Naalakkersuisunit piumasarineqarsinnaavoq.

 

Kommunimi pilersaarutitut siunnersuutit akuersissutigineqarnerisa tamanut nalunaarutigineqarneri.

§ 9. Kommunimi pilersaarutitut siunnersuutit Naalakkersuisunit akuersissutigineqarsimanerisa tiguneqarnerata kinguninnguatigut kommunalbestyrelsi tamatuminnga tamanut ammasumik nalunaaruteqassaaq. Nalunaarummi paasinartunngortinneqassaaq immikkoortuni suni pilersaarutit siusinnerusukkut tamanut takusassiarineqarsimasumut sanilliullugit allannguuteqarsimanersut.
Imm. 2. Pilersaarut kikkunnit tamanit pissarsiarineqarsinnaasariaqarpoq.

 

Kommunimi pilersaarutit inatsisitigut atortussanngortinneqarnerisa kinguneri

§ 10. Kommunimi pilersaarutit piviusunngortinneqarnissaat kommunalbestyrelsip suliassaraa, tamatumunnga ilanngullugit Kapitali 4 tunngavigalugu nunaminertanik atugassiissuteqarnissaq.

 

Kommunini pilersaarutit allanngortinneqartarneri.

§ 11. Pisariaqartitsineq naapertorlugu kommunimi pilersaarutit kommunalbestyrelsimit pissutsinut naleqqussarneqarsinnaapput.
Imm. 2. Kommunimi pilersaarutinik allanngortitsisoqartillugu §-ini 7, 8 aamma 9-mi pineqartut aammattaaq tunngavigineqartassapput. § 7, imm. 3-mi 4-milu piffissaliunneqartoq sap. akunnerinut 6-nut sivikillineqarsinnaavoq kommunimi pilersaarutit immikkoortuini allannguuteqartitsisoqarsimaneranut atatillugu.
Imm. 3. Kommunimi pilersaarutit kommunalbestyrelsimit naleqqussarneqartarnissaannut atatillugu Naalakkersuisut ersarinnerusunik malittarisassiornissamut aalajangersaasinnaatitaapput.

§ 12. Nuna tamakkerlugu pilersaarusiornerup piviusunngortinneqarnissaa qulakkeerniarlugu Naalakkersuisut aalajangersinnaavaat kommunalbestyrelsi ukiuni marlunnit sivikinnerunngitsumik periarfissaqarluni Naalakkersuisunit qanoq imaqarnissaanik ersarinnerusumik tikkuussisumik kommunimi pilersaarutinut allannguutissanik saqqummiussaqassasoq.
Imm. 2. Imm. 1 naapertorlugu piffissamik killiliussaq kommunalbestyrelsimit eqquutitinneqanngippat Naalakkersuisut kommunimi pilersaarutit kommunalbestyrelsimit akiligassanngorlugit allannguuteqartissinnaavaat. Naalakkersuisut tamanut takusassiissapput § 7, imm. 4-mi 5-milu kiisalu § 9-mi maleruagassat naapertorlugit.

 

Kapitali 3.
Immikkoortunut pilersaarusiorneq.

Immikkoortunut ataasiakkaanut pilersaarusiat.

§ 13. Nunaminertani pilersaarusiorfigissallugit akuersissuteqarfigineqarsimasuni immikkoortortanut ataasiakkaanut pilersaarusiorneq kommunalbestyrelsimit §-ini 15-miit 21-mut aalajangersakkat tunngavigalugit ingerlanneqarsinnaavoq (immikkoortunut ataasiakkaanut pilersaarusiornerit).
Imm. 2. Imm. 1 naapertorlugu immikkoortortanik ataasiakkaanik pilersaarusiorneq kommunalbestyrelsip isumagisassaraa pilersaarusiorfigineqartussatut akuersissuteqarfigineqarsimasut piviusunngortitsivigineqarnissaannut tamanna pisariaqartinneqaraangat. Pilersaarusiornermi qulakkeerneqarsimassapput sanaartuinissat kommunimi pilersaarutinut tunngaviusumik isummanut imarisaasunullu naapertuunnissaat.
Imm. 3. Imm. 1 naapertorlugu immikkoortortanik ataasiakkaanik pilersaarusiorneq kommunalbestyrelsip isumagissavaa nunaminertanik sanaartuiffissanik sanaartuinernut annerusunut pingaaruteqartunulluunniit atugassanik tunniussisoqartinnagu aammalu sanaartukkanik annerusunik pingaaruteqartunilluunniit ingutserinerit aallartinneqartinnagit.
Imm. 4. Illoqarfimmik ineriartortitsinermi pisariaqartitat naammassineqarnissaat pissutigalugu kommunalbestyrelsip pisussaaffigaa tamatigut illoqarfiup iluani naammattunik immikkoortunut ataasiakkaanut pilersaarusiorfigineqarsimasunik nunaminertassat pissarsiarineqarsinnaajuaannarnissaat.

§ 14. Nunaminertat kommunip nunaqarfimminik pilersaarusiorneranut ilaatinneqartut pillugit kommunalbestyrelsi tamakkimunnga immikkoortunik ataasiakkaanik pilersaarusiorsinnaavoq §-ini 15-miit 21-mut aalajangersakkat malillugit.

§ 15. Nunaminertat kommunalbestyrelsip illoqarfimmini nunaqarfimminiluunniit pilersaarusiorneranut akuerineqareersimasut pillugit kommunalbestyrelsi pissutsinut immikkoortuni ataasiakkaani pilersaarusiornermit akornutigineqarsinnaasunut inerteqquteqarsinnaavoq. Inerteqqut ukioq ataaseq atortuulersinneqarsinnaavoq. Inerteqqut tamanut nalunaarutigineqassaaq.

 

Immikkoortunut ataasiakkaanut pilersaarutit imarisaat.

§ 16. Immikkoortunut ataasiakkaanut pilersaarusiat nuna tamakkerlugu pilersaarusiornermut imaluunniit kommunemi pilersaarutinut akuersissutigineqareersimasunut aalajangersagaareersunullu akerliusunik imaqassanngillat.

§ 17. Immikkoortortanut ataasiakkaanut pilersaarusiat nassuiaatinik pilersaarutip siunertaanik aammalu kommunip pilersaarusiaanut tamanilu pilersaarusiornernut allanut naleqqiussinernik ersersitsisunik ilaqartinneqartassapput.
Imm. 2. Pilersaarutip pisinnaatitaaffiliiffii, tak. §-it 28 aamma 29, nassuiaammi takuneqarsinnaassapput.

§ 18. Immikkoortunut ataasiakkaanut pilersaarusiat siunertaat pilersaarusiami takuneqarsinnaapput.
Imm. 2. Immikkoortunut ataasiakkaanut pilersaarummi pissutsinut makkununnga tunngasunut aalajangersaasoqarsinnaavoq:
1) Immikkoortup qanoq atoraeqarnera,
2) sanaartukkat atorneqarneri, annertussusii sumiissusiilu, tamakkununnga ilaatigut ilanngullugit illut akulikissusiisa, portussusiisa imminnullu ungasissusiisa iluarsiivigineqartarneri aammalu sanaartuiffissanngortitat aalajangersarneqarneri,
3) sanaartukkat ilusilersorneqarneri, tamakkununnga ilaatigut ilanngullugit qaliaasa ilusilersorneqarneri aammalu atortui qalipaasersorneqarnerilu pillugit aalajangersakkat,
4) sanaartuiffiit pioreersut taakkualu eqqaasa qaninnerpaat allanngutsaalineqarnissaannut iliuusissat, tassalu taamaallaat kommunalbestyrelsip akuersissuteqarneratigut sanaartukkanik ingutserisinnaanerit allanngortiterisinnaanerillu imaluunniit allatut iliorluni allannguisinnaanerit,
5) pissutsit aqqusineqarnermut aqqusineeqqanullu aammalu angallassinernut allanut tunngasut, tamakkununnga ilanngullugit aqqusineqarfinnut avalassaariartarfiit angallassissutillu suussusiisa immikkoortinneqarneri,
6) aqqusersuutit inissisimaffii, tamakkununnga ilanngullugit kallerup inneranik imermillu pilersuinerit,
7) immikkoortortat pilersaarummi ilaasut iluanni avataaniluunniit ataatsimoorussamik atassusiinissap imaluunniit pioreersunut ilassusiinissap nutaamik sanaartuiffiup atorneqalernissaanut piumasaqaatitassai,
8) ataatsimoorussamik sanaartugassat il.il. pilersinneqarnerannut atatillugu aningaasalersuinikkut pissutsit iluarsiivigineqartarneri,
9) nunaminertat sanaartuiffigineqanngitsut ilusilersugaanerat, atorneqarnerat aserfallatsaalineqarnerallu, tamakkununnga ilanngullugit nunaminertat sanaartuiffigeqqusaanngitsut, nunagissaasarneq, ungalulersuisarnerit, nunap naasuisa pigiinnarneqarnissaannut iliuutsit aammalu aqqusernit nunaminertallu allat qaammaqqusersugaaneri,
10) nunap ilusiisa pigiinnarneqarnissaannut iliuutsit, ilaatigut nunaminertanut illoqarfiup I sanaartuiffigineqarneranut ilanngutitinneqartunut tunngasut,
11) nunaminertat inissiaqarfiit inuussutissarsiuteqarfiillu atorneqarnissaannut piginnaatitaasut peqatigiiffinnik pilersitsinerinut tunngasut, tamakkununnga ilanngullugit ilaasortaasussaaneq aammalu peqatigiiffiit nunaminertat ataatsimoorussat aamma ataatsimoorussanik sanaartukkat pilersinneqarnissaannut, ingerlatsivigineqarnerinut aserfallatsaalineqarnerinullu pisinnaatitaanerit pisussaatitaanerillu,
12) avatangiisit nipiliornikkut, saligaassutsikkut, tipiliornikkut allatigullu akornusersorneqarsinnaanerinut killissarititaasut.
Imm. 3. Immikkoortunut ataasiakkaanut pilersaarusiani erseqqissarneqassaaq piviusunngortinneqarsinnaanerannut akuersissutit imaluunniit immikkut akuersissutissat oqartussaasunit allanit kommunalbestyrelsiunngitsunit oqartussaaffigineqarnersut.

 

Immikkoortunut ataasiakkaanut pilersaarutinik tamanut takusassiisarneq.

§ 19. Immikkoortunut ataasiakkaanut pilersaarutinut siunnersuutit akuersissutigineqareernerisigut kommunalbestyrelsip siunnersuutinut imaritinneqartut naatsumik allaaseralugit aammalu § 17-imi taaneqartutut nassuiaatitalerlugit tamanut takusassiarissavai. Allannguutissatut siunnersuutit kommunalbestyrelsip tamanut takusassiarisinnaavai.
Imm. 2. Kommunalbestyrelsimut ilaasortaq kinaluunniit immikkoortunut ataasiakkaanut pilersaarutinut siunnersuutigineqarsimallutik akuersissutigineqarsimasunut tunngasunik kommunalbestyrelsip aalajangigaanik imaqarniliuiffimmi allatut isumaqarnerminik ilanngusseqqusilluni piumasaqarsimasoq piumasaqarsinnaavoq taama allaasumik isummernini nammineq allakkaminik tamatuminnga tunngavilersuutinik naatsunnguanik ilallugit kommunalbestyrelsimit ataatsikkoortumik tamanut takusassiarineqarnissaannik.
Imm. 3. Siunnersuut, imm. 2 naapertorlugu ikinnerussuteqarsinnaasut oqaaseqaataannik ilassusigaq, innuttaasunut pisariitsumi inissillugu minnerpaamik sap. akunnerini 6-ini tamanut takusassiarineqassaaq. Tamanut takusassiinissaq nalunaarutigineqassaaq kommunimi tamanit naatsorsuutigineqarsinnaasumik.
Imm. 4. Nalunaarummi siunnersuutini immikkoortoq pineqartoq nalunaarneqarsimassaaq aammalu aalajangersarneqarsimassalluni imm. 3-mi maalaaruteqarnissanut allannguutissanillu siunnersuuteqarnissamut periarfissap sivisussusia.

§ 20. Siunnersuutit tamanut takusassiarineqarnerannut peqatigitillugu kommunalbestyrelsi Naalakkersuisunut oqartussaasunullu allanut siunnersuutinut immikkut pingaartitsisunut allakkatigut ilisimatitsissuteqassaaq.
Imm. 2. Ilisimatitsissummi § 19, imm. 4-mi maalaaruteqarnissamut allannguutissanillu siunnersuuteqarnissamut piffissaliussaq ilanngullugu nalunaarutigineqassaaq.
Imm. 3. Ilisimatitsissut siunnersuummik namminermik ilaqartinneqassaaq.

 

Immikkoortunut ataasiakkaanut pilersaarutinik siunnersuutip akuersissutigineqavinnera.

§ 21. § 19, imm. 4-mi piffissaliussaq qaangiuppat kommunalbestyrelsip immikkoortunut ataasiakkaanut pilersaarutinut siunnersuut oqaluusereqqillugu naggataarutaasumik akuersissutigivissinnaavaa.
Imm. 2. Imm. 1. naapertorlugu immikkoortunut ataasiakkaanut pilersaarutitut siunnersuutip naggataarutaasumik akuersissutigineqarnerani kommunalbestyrelsi siunnersuummik tamanut takusassiarineqarsimasumik allannguuteqartitsisinnaavoq. Allannguutit ima annertutigippata, oqartoqarsinnaalluni siunnersuummik nutaamik saqqummersoqartoq, taava siunnersuut allanngortitaq §-ini 19-mi 20-imilu maleruagassat malillugit tamanut takusassiarineqassaaq.

 

Nunaannaat pilersaarusiorneri

§ 22. Nunaannarnut kommunip illoqarfianut nunaqarfiinullu pilersaarusiat avataanniittunut kommunalbestyrelsi pilersaarusiorsinnaavoq (frilandsplaner) §-ini 16-imiit 19-imut aammalu § 23-imi aalajangersakkat naapertorlugit.

§ 23. Nunaannaat pilersaarusiorneri Naalakkersuisunit akuersissutigineqassapput.
Imm. 2. §19, imm. 4-mi piffissaliussaq qaangiuppat siunnersuut Naalakkersuisunut nassiunneqassaaq. Siunnersuummut ilanngunneqassapput maalaarutigineqarsimasinnaasut allannguutissatullu siunnersuutaasimasinnaasut aammalu kommunalbestyrelsip tamakkununnga oqaaseriumasai.
Imm. 3. Naalakkersuisut siunnersuummik akuersissuteqarnerminni siunnersuummut tamanut takusassiarineqarsimasumut allannguuteqartitsisinnaapput.

 

Nuna tamakkerlugu pilersaarusiornerup qulakkeerneqarnissaa.

§ 24. Namminersornerullutik Oqartussat naalagaaffiulluunniit oqartussaatitaasa ilaannit, taakua suliaasa mianerisassartaat immikkut ittut aallaavigalugit, maalaaruteqarnissamut piffissarititaq qaangiutsinnagu immikkoortunut ataasiakkaanut pilersaarutinut siunnersuummut maalaaruteqartoqarpat kommunalbestyrelsip siunnersuut naggataarutaasumik akuersissutigisinnaanngilaa pilersaarutip imarisai pillugit kommunalbestyrelsi oqartussaatitarlu pineqartoq isumaqatigeereersimanngippata. Taama isumaqatigiittoqarsimanngippat apeqqut naggataarutaasumik aalajangiiffigisassanngorlugu Naalakkersuisunut saqqummiunneqassaaq.

§ 25. Naalakkersuisut aalajangersinnaapput immikkoortortanut ataasiakkaanut pilersaarutinut siunnersuut § 21 malillugu kommunalbestyrelsimit naggataarutaasumik akuersissutigineqarsinnaanngitsoq. Taamaalilluni pilersaarut taamaallaat nalunaarut manna tunngavigalugu inatsisitigut malittarisassaqalissaaq, pilersaarutinut siunnersuut Naalakkersuisunit akuersissutigineqassappat. Taama aalajangernermut peqatigitillugu Naalakkersuisut kommunalbestyrelsimut tamatuminnga nalunaaruteqassapput § 19, imm. 4-mi piffissatut aalajangersakkap qaangiutinnginnerani.
Imm. 2. Imm. 1 malillugu aalajangernermut peqatigitillugu Naalakkersuisut aalajangersinnaapput siunnersuut imaluunniit siunnersuutit tamanut takusassiarineqarsimasut § 28, imm. 1-mi 2-milu taaneqartutut kommunalbestyrelsip siunnersuummik tamanut takusassiarinninneraniit ukiut marluk tikillugit atortussaatinneqassasoq. Tamatumunnga peqatigitillugu Naalakkersuisut aalajangersinnaapput § 28, imm. 2-mi pisinnaatitaaffik Naalakkersuisunit tigummineqassasoq. Imm. 1 aamma 2 malillugit aalajangernerit Naalakkersuisunit nalunaarutigineqartassapput.
Imm. 3. Imm. 1 malillugu akuersissuteqarnermut peqatigitillugu Naalakkersuisut pilersaarummut siunnersuummut tamanut takusassiarineqarsimasumut allannguuteqartitsisinnaallutillu ilassuteqarsinnaapput.

§ 26. Nuna tamakkerlugu pilersaarusiornerup piviusunngortinneqarnissaa qulakkeerumallugu, aammalu immikkoortunut ataasiakkaanut pilersaarusianik pissarsisoqarnissaa allanngortitsisoqarnissaaluunniit pisariaqartutut isigineqarpat, Naalakkersuisut aalajangersinnaavaat piffissaliussartik nallertinnagu kommunalbestyrelsi immikkoortortanut ataasiakkaanut erseqqinnerusunik imalinnik pilersaarusiussasoq.
Imm. 2. Naalakkersuisut aalajangersinnaapput namminneerlutik immikkoortortanut ataasiakkaanut pilersaarusiussallutik. Taama pisoqartillugu §-ini 13-mi, 15-mi, 21-mi aammalu 28, imm. 2-mi kommunalbestyrelsip pisinnaatitaaffii Naalakkersuisunit tigummineqalissapput. Naalakkersuisut tamanut takusassiissapput §-it 19 aamma 27 malillugit.

 

Immikkoortunut pilersaarutit aalajangiivigineqarnerisa/akuersissutigineqarnerisa tamanut takusassiarineqarnerat.

§ 27. § 21 imaluunniit § 23 malillugit immikkoortunut pilersaarusiap naggataarutaasumik aalajangiiffigineqarnerata akuersissutigineqarnerataluunniit kingunitsiannguagut tamanna pillugu kommunalbestyrelsi tamanut takusassiissaaq. Nalunaarummi ilaatigut ilisimatitsissutigineqassaaq pilersaarut siusinnerusukkut siunnersuummit tamanut takusassiarineqarsimasumit allaanerussuteqarnersoq.
Imm. 2. Kommunalbestyrelsip nalunaarutip tamanut takusassiarineqartup assinga aammattaaq Naalakkersuisunut aammalu oqartussaasunut § 20, imm. 1 malillugu siunnersuutip tamanut takusassiarineqarnissaanik allakkatigut ilisimatinneqarsimasunut nassiutissavaa.
Imm. 3. Kommunalbestyrelsip piaarnerpaamik immikkoortunut siunnersuutip aalajangiunneqarsimasup akuersissutigineqarsimasulluunniit assinga Naalakkersuisunut oqartussaasunullu imm. 2-mi taaneqartunut nassiutissavaa.

 

Immikkoortortanut pilersaarutit inatsisitigut atuutilernissaasa kinguneri.

§ 28. Immikkoortortanut pilersaarutitut siunnersuut tamanut takusassiarineqareerpat nunaminertat sanaartukkallu, siunnersuummi ilaatinneqartut, sanaartuiffigineqassanngillat imaluunniit ima iluaqutiginiarneqassanatik pilersaarutip naammassineqarnissaanut imarisassaanik siorngiilluni akornusiisinnaasunik.
Imm. 2. § 19, imm. 4-mi taaneqartutut piffissaliussap qaangiunneratigut §-it 19 aamma 20 malillugit piffissaagallartillugu maalaaruteqartoqarsimanngippat kommunalbestyrelsip akuersissutigisinnaavaa nunaminertaq pilersaarummut siunnersuummi ilaatinneqartoq sanaartuiffigineqalissasoq imaluunniit pilersaammmut naapertuuttumik allatigut iluaqutiginiarneqassasoq.
Imm. 3. Imm. 1-mi aamma 2-mi aalajangersakkat atuutissapput pilersaarummut siunnersuutip aalajangiutivinneqarnissaata akuersissutigineqavinnissaataluunniit tamanut takusassiarineqarnissaata tungaanut, tak. § 27, taamaattorli siunnersuutip saqqummiunneqarneraniit sivisunerpaamik ukioq ataaseq qaangernagu.

§ 29. Immikkoortortanut pilersaarutitut siunnersuummik aalajangiussisimaneq imaluunniit akuersissutiginnissimaneq tamanut takusassiarineqareerpat inatsisinik pissutsinilluunniit piviusunik tunngaveqarluni pilersaarummi aalajangersakkanut akerliusunik pilersitsisoqassanngilaq § 45 naapertorlugu immikkut akuersissummik nalunaaruteqartoqarsimanngippat.

§ 30. Immikkoortortanut pilersaarusiornerup piviusunngortinneqarnissaanut tamanna pisariaqartinneqarpat Pigisanik aalaakkaasunik arsaarinnissuteqartarneq pillugu Inatsisartut inatsisaanni nr. 25-imi, 30. oktober 1992-imeersumi malittarisassat malillugit piginnittussanngortitsisoqarsinnaavoq.

§ 31. Immikkoortumut pilersaarusiami aalajangiunneqarsimappat sanaartugaq piiarneqassanngitsoq, allanngortiterneqassanngitsoq imaluunniit allatut iliorluni allannguuteqartinneqassanngitsoq, tamanna kommunalbestyrelsimit akuersissutigineqartinnagu, akuersissuteqarfigiumaneqanngippallu, taava piginnittup piumasarisinnaavaa sanaartugaq kommuneqarfiup tamakkiisumik ilaannakortumilluunniit taarsiissuteqarluni pigilissagaa.
Imm. 2. Imm. 1 malillugu piginnittuulersinnaanermut pisussaaffik taamaallaat kommunimut tutsinneqarsinnaavoq sanaartukkap aningaasatigut iluaqutigineqarsinnaanerani aammalu sanaartukkamik taassumunnga assingusumik atuinermi aningaasatigut iluaquteqarnermi annertuumik nikingassuteqartoqarpat, kisiannili sanaartukkap piiarneqarnissaanut imaluunniit allanngortiterneqarnissaanut inerteqqummi pineqanngitsunik.
Imm. 3. Akaareqatigiilluni isumaqatigiittoqarsinnaanngippat tamanna piginnittussanngortitsisarneq pillugu kommissionimit aalajangersaavigineqassaaq, tak. piginnittussanngortitsisarneq pillugu Kalaallit Nunaanni inatsit.

 

Kapitali 4.
Nunaminertanik atugassanngortitsisarneq.

Nunaminertat atorneqarnissaannut akuersissutit.

§ 32. Nunaminertanik atugassanngortitsisarnermi oqartussaasunit akuerineqarsimatinnani nunaminertanik nalinginnaasumik allatulluunniit atuisoqalersinnaanngilaq.
Imm. 2. Nunaminertanik atugassanngortitsisarnermi oqartussaasunit akuerineqarsimatinnani nunaminertamik atuineq allanngortinneqarsinnaanngilaq.
Imm. 3. Nunaminertamik atuinissaq inummut namminermut tunngatitaavoq. Nunaminertamut tunngasumik pisinnaatitaaffiit allamut tunniunneqassappata tamanna nunaminertanik atugassanngortitsisarnermi oqartussaasunit akuersissutigineqassaaq.

 

Nunaminertanik atugassanngortitsisarnermi oqartussaasut.

§ 33. Nunaminertanik atuinissaq kommunalbestyrelsimit akuersissutigineqassaaq kommunip illoqarfiata nunaqarfiisalu iluanni pilersaarusiornermi aalajangersakkat malillugit (tak. § 2, imm. 1, nr. 2).

§ 34. Kommunit illoqarfiisa nunaqarfiisalu iluini pilersaarusiornernut ilaatinneqanngitsuni nunaannarmik atuinissamut Naalakkersuisut akuersissuteqartussaapput (frilandsplan), tamatumani ilanngullugit nunaminertat nunatani pilersaarusiornermi ilaatinneqartut, tak. §22.
Imm. 2. Nunaannarmik pilersaarusiap (frilandsplan) akuersissutigineqarneranut ilanngullugu, imaluunniit tamanna tulluartuusorineqaraangat, pilersaarusiorfigisami nunaminertanik atugassanngortitsisarnermik oqartussaaneq Naalakkersuisunit kommunalbestyrelsimut tunniunneqarsinnaavoq.

 

Nunaminertamik atuisinnaanermut qinnuteqaat.

§ 35. Nunaminertanik atuisinnaaneq qinnuteqaateqareernikkut inunnut ataasiakkaanut, suliffeqarfinnut, ingerlatseqatigiiffinnut, peqatigiiffinnut assigisaannullu akuersissutigineqarsinnaavoq.

§ 36. Nunaminertamik atuisinnaanermut qinnuteqaat nammineq kommunerisamut nassiunneqassaaq.
Imm. 2. Nunaannarmi nunaminertamik atuisinnaanermut qinnuteqaat kommunalbestyrelsip oqaaseqaataanik ilallugu Naalakkersuisunut ingerlateqqinneqassaaq.
Imm. 3. Qinnuteqaatip iluseqarnissaanut imarisassaanullu maleruagassat erseqqinnerusut Naalakkersuisunit aalajangersarneqarsinnaapput.

 

Illoqarfiup nunaqarfiillu iluini nunaminertanik atugassanngortitsisarneq.

§ 37. Kommunalbestyrelsip maluginiagassaraa nunaminertamik atugassanngortitsineq kommunimi imaluunniit immikkoortuni pilersaarutinut nalunaarummi matumani maleruagassat malillugit aammalu § 53 malillugu pilersaarutigineqartuartunut akerliunnginnersoq.
Imm. 2. Nunaminertamik atugassanngortitsineq aammattaaq nunaminertanik atuisitsinermi maleruagassanut, kommunimi pilersaarutinik aalajangersakkani, tak. § 6, naapertuutissaaq.
Imm. 3. § 15 malillugu inerteqquteqarnissamik aalajangertoqanngippat tamatumalu kingunerisaanik immikkoortunut pilersaarusiortoqarluni nunaminertamik atuinissamut qinnuteqaammik unitsitsisumik, taava kommunalbestyrelsi nunaminertamik atuinissamut akuersissuteqassaaq, qinnuteqaammi imm. 1-mi 2-milu piumasaqaatit naammassineqarsimappata.

 

Akuersissutinut atatillugu piumasaqaatit.

§ 38. Nunaminertamik atuinissamut akuersissuteqarnermut atatillugu kommunalbestyrelsi pissutsinut makkununnga tunngasunik piumasaqaateqassaaq:
1) Nunaminertap qanoq atorneqarnissaanut,
2) akuersissutip iluaqutigilernissaanut sivisunerpaamik ukiuni marlunni periarfissiinissaq,
3) sanaartuiffissiornermi aningaasartuutissat akilerneqarnissaannut iluarsartuussinerit,
4) ataatsimoortumik sanaartukkanut atassusiinissamut pisussaatinneqarsinnaaneq,
5) atuinissamut pisinnaatitaanerup atorunnaarsinneqarsinnaanera.
Imm. 2. Immikkoortunut pilersaarusiornermi nunaminertamut tunngasut naammattumik suliarineqarsimanngikkaangata kommunalbestyrelsi aammattaaq makkununnga tunngasunik ilassutitut piumasaqaateqarsinnaavoq:
1) Angallassinermut angallaffiusunullu appakaaffinnut tunngasunik,
2) ruujorit atassuteqaatillu ledningiusut sumiissusiinut tunngasunik,
3) pissutsinik allanik kommunimi pilersaarusiornerup piviusunngortinneqarnissaanut pingaaruteqartunik.

 

Nunaminertanik atugassanngortitsinerit tamanut takusassiarineqarnerat.

§ 39. Nunaminertamik atuisinnaanermut akuersissuteqarnissamik naggataarutaasumik aalajangiisoqartinnagu kommunalbestyrelsi pisussaavoq tamatumunnga qinnuteqaat tamanut takusassiarissallugu.
Imm. 2. Imm. 1-mi ilisimatitsissuteqarnissamik pisussaaffik pinngitsoortinneqarsinnaavoq qinnuteqaammi pineqartoq nunaqarfinnik immikkoortortanilluunniit pilersaarusiornermut atuuttumut naapertuuppat.

§ 40. Qinnuteqarnermut atatillugu ilisimatitsissuteqarnermi qinnuteqarfigineqartoq pillugu maalaaruteqarsinnaanermut ullunit 14-nit sivikinnerunngitsumik sivisussuseqartussamik aalajangersaasoqassaaq.
Imm. 2. Qinnuteqaat maalaaruteqarfigineqarpat maalaarutit kommunalbestyrelsip qinnuteqaammik suliarinninnermini ilanngutissavai.

§ 41. Kommunalbestyrelsi pisussaavoq kommunimi pilersaarusiorneq sanaartuiffissiornerlu malillugit nunaminertat sorliit pillugit atugassiisinnaanerit nalunaarutigineqarsinnaanerisa naatsorsuutigineqarsinnaanerat ingerlaavartumik tamanut takusassiarissallugu.

§ 42. Atuisinnaanermut pisinnaatitsissutit, tamakkununnga ilanngullugit piumasaqaatit assigiinngitsut, tamanit takuneqarsinnaassapput, tak. § 38.
Imm. 2. Imm. 1-mi ilisimatitsinissamut pisussaaffik pinngitsoortinneqarsinnaavoq nunaminertat aamma/imaluunniit sanaartukkat minnerit pineqarpata kiisalu nunaminertanik allatut atuinissaq, tamatumunnga ilanngullugit atuinissamik allanngortitsinerit aammalu sanaartukkanik tunisaqarnermut atatillugu atuisinnaanermut pisinnaatitsissutinik allamut tunniussisinnaanerit il.il., pineqarpata.

 

Nunaannarmi nunaminertanik atugassanngortitsisarneq.

§ 43. Naalakkersuisut nakkutigisassaraat, kommunalbestyrelsimiit oqaaseqaammik pissarsiniareernikkut, nunaminertamik atugassanngortitsineq nuna tamakkerlugu pilersaarusiornermi soqutigisanut akerliunnginnersoq, tamatumunnga ilanngullugit nunaannarmut pilersaarutini atuuttuni aalajangersakkat.
Imm. 2. Nunaannarmi nunaminertamik atugassanngortitsinermut atatillugu Naalakkersuisut piumasaqaateqarsinnaapput nuna tamakkerlugu pilersaarusiornermi mianerisariaqartut qulakkeerniarlugit, tamakkununnga ilanngullugit nunaannarmik pilersaarusiornermut aalajangersakkat atuuttut.

 

Nalunaarsuineq.

§ 44. Kommunalbestyrelsip pisussaaffigaa kommunip iluani nunaminertat atugassanngortitat nalunaarsussallugit, tamatumunnga ilanngullugit nunaminertat nunaannarmiittut.
Imm. 2. Kommunalbestyrelsip pisussaaffigaa pisinnaatitaaffinnik atuuttunik misissuinissaq nalunaarsuinissarlu, taamaaliornikkut kommunimi atuinissanut pisinnaatitaaffiit atuuttut ataatsimoortumik nalunaarsuiffeqartilersinnaajumallugit.
Imm. 3. Namminersornerullutik Oqartussat nunaminertat nalunaarsorneqarfissaasa erseqqinnerusumik malittarisassiuunneqarnissaannut aalajangersaasinnaapput, tamakkununnga ilanngullugit kommunalbestyrelsip Namminersornerullutik Oqartussanut nalunaaruteqartussaaneranik maleruagassat.

 

Kapitali 5.
Ingerlatsinermut aalajangersakkat il.il.

Nakkutilliineq.

§ 45. Kommunalbestyrelsip nakkutigisassarai nunaminertat atorneqarnerat pilersaarusioraerlu pillugit Inatsisartut peqqussutaata nr. 6-ip 19. december 1986-imeersup, Inatsisartut peqqussutaatigut nr. 1-ikkut 18. juli 1987-imeersukkut allanngortinneqartup, aammalu nalunaarummi matumani immikkoortortani pilersaarusiornermi aalajangersakkani kiisalu § 53 malillugu pilersaarutini ingerlaannartussani aalajangersakkat atortuutinneqarnissaat.
Imm. 2. Kommunalbestyrelsip nakkutigisassarai peqqussummi inassutit inerteqqutillu imm. 1-mi nalunaarummilu matumani taaneqartutut malinneqarnissaat, kiisalu akuersissuteqartarnerni piumasaqaatissatut aalajangersakkat eqqortinneqarnissaat.
Imm. 3. Kommunalbestyrelsi pissutsinik inatsisinik unioqqutitsinertalinnik malugisaqaruni, tak. imm. 1 aamma 2, pisussaavoq tamanna inatsisinut naapertuuttunngortinniassallugu. Naalakkersuisut kommunalbestyrelsi piumaffigisinnaavaat pissuseq inatsisinik unioqqutitsiviusoq inatsisinut naapertuuttunngortinniaqqullugu, tamatumunnga ilanngullugit sumiiffimmi pissutsit tunngavigalugit imaluunniit eqqartuussivikkoortumik inatsisinut naapertuuttunngortitsisoqarnissaanik aalajangernissat.
Imm. 4. Kommunalbestyrelsip nakkutilliinermini maleruagassaanik erseqqinnerusunik Namminersornerullutik Oqartussat aalajangersaasinnaapput.

§ 46. Naalakkersuisut § 48 malillugu maalaarummik suliaqarnerminni inatsisinik unioqqutitsinermik ilisimasaqalerunik kommunalbestyrelsi pisussanngortissinnaavaat pissutsip inatsisinut naapertuuttunngortinneqarnissaanik. Naalakkersuisut aalajangersinnaavaat sumiiffimmi pissutsit tunngavigalugit imaluunniit eqqartuussivikkoortumik inatsisinut naapertuuttunngortitsisoqassanersoq.
Imm. 2. Inatsisinik unioqqutitsinertalimmik iliuuseqartoqareersimappat, tamannalu pilersaarusiornermi mianerisassanut aammalu nunaminertanik atuisitsinermi kikkut tamarmik peqataatinneqarnissaannut mianerinninnissamut akerliunngippat, Naalakkersuisut kommuneqarfimmi aammalu immikkoortortani pilersaarusiornermut immikkullu akuersissuteqartarnermut maleruagassat atortinngitsoorsinnaavaat.

 

Immikkut akuersissutit

§ 47. Immikkoortuni ataasiakkaani pilersaarutit pillugit imaluunniit pilersaarutinut § 53 malillugu ingerlateqqitassanut aalajangersakkanut tamanna akerliunngippat kommunalbestyrelsimiit immikkut akuersissuteqartoqarsinnaavoq, immikkut akuersissut pilersaarusiornermi tunngavigisanut akerliunngippat.
Imm. 2. Immikkoortunut ataasiakkaanut pilersaarusiami aalajangersagaq, imarisamigut Namminersornerullutik Oqartussat naalagaaffiulluunniit oqartussaatitaanut isumaqatigiissuteqarnikkut aalajangersaavigineqarsimasoq, aammalu Naalakkersuisunit akuerisaasumik nunaannarmik pilersaarusiami aalajangersagaq, aatsaat saneqqunneqarsinnaavoq oqartussaasut pineqartut akuersissuteqarnerisigut.
Imm. 3. Imm. 1-mi taaneqartunit annerusumik allannguuteqartitsinissat immikkoortunut ataasiakkaanut nutaamik pilersaarusiornikkut ingerlanneqarsinnaapput.
Imm. 4. Aalajangersakkaniit immikkut akuersissutit sanilerisanut eqqaamiunulluunniit pingaaruteqartut aatsaat nalunaarutigineqarsinnaapput kommunalbestyrelsip sanilerisanik ilisimatitsisineraniit sap. akunnerisa marluk qaangiunneranni. Ilisimatitsissummi nalunaarsimassapput sumi immikkut akuersissuteqarfigineqarnissamut qinnuteqartoqarsimanersoq aammalu tamatumunnga oqaaseqaatigiumasat sivikinnerpaamik sap. akunnerisa marluk qaangiutinnginneranni tunniunneqarsimassasut.
Imm. 5. Pilersaarutinut § 53 malillugu ingerlateqqitassanut imm. 1-miit 4-mut pineqartut aamma atuupput.
Imm. 6. Namminersornerullutik Oqartussat imm. 4-mi maleruagassanut ilassuteqaatissanik aalajangersaasinnaapput.

 

Maalaaruteqarneq.

§ 48. Kommunalbestyrelsip aalajangerneri pissutsinut nunaminertat atorneqarnerat pilersaarusiornerlu pillugit Inatsisartut peqqussutaata nr. 6-ip, 19. december 1986-imeersup, Inatsisartut peqqussutaatigut nr. 1-ikkut 18. juni 1987-imeersukkut allanngortinneqartup aammalu nalunaarummi matumani ilanngunneqartunut attuumassuteqartut Naalakkersuisunut ingerlateqqinneqarsinnaapput. Kommunalbestyrelsip aalajangernerminik nalunaaruteqarneraniit kingusinnerpaamik qaammatit marluk qaangiunneranni maalaarut tunniunneqareersimassaaq.
Imm. 2. Kommunalbestyrelsip akuersissuteqarfigisimasaa maalaarummik ilisimatinneqartassaaq.
Imm. 3. Imm. 1 malillugu maalaaruteqartoqarneratigut Naalakkersuisut aalajangersinnaavaat kommunalbestyrelsip akuersissuteqarsimanera atorsinnaajunnaartoq. Sanaartuineq aallartinneqareersimappat Naalakkersuisut tamatuminnga unitsitseqqusisinnaapput.

 

Aalajangersakkat assigiinngitsut.

§ 49. Namminersornerullutik Oqartussat ilitsersuinermikkut kommunalbestyrelsit ikiorsertassavaat nalunaarullu manna malillugu kommunit pilersaarusiorneranni nunaminertanillu atuisitsineranni maleruagassanik erseqqinnerusunik aalajangersaasinnaallutik.

§ 50. Naalakkersuisut kommunalbestyrelsilu atuinissamut pisinnaatitaaffeqartunik imaluunniit piginnittunik siumut ilisimatitsereernikkut piumasaqarsinnaapput nunaminertanut suugaluartunulluunniit aamma namminerisamik pigisamut appakaannissamik (adgang), nalunaarut manna naapertorlugu pilersaarusiornermut atatillugu uuttortaanissat aammalu suliareriigassat allat atortorissaarusersuinermut (teknikkimut) tunngassuteqartut naammassiumallugit.

 

Pineqaatissiinissamut periarfissat.

§ 51. Sanaartukkamik piginnittoq imaluunniit nunaminertamik atuisoq piffissap qanorluunniit ilineratigut pisussaavoq pissutsinik inatsisinik uniuisunik iluarsiissuteqarnissaminut.
Imm. 2. Piginnittoq atuisorluunniit pissutsinik inatsisinik uniuisunik iluarseeqqusilluni nalunaarfigineqareersimagaluarluni malinninngitsoq eqqartuussisut aalajangernerisigut piffissap aalajangikkap iluani pinngitsaalineqarluni naafferaartumik akiliisinneqartarnermigut pissutsinik aaqqeeqqullugu pisussanngortinneqarsinnaavoq.
Imm. 3. Eqqartuussisut aalajangernerisigut pissutsinik inatsisinik uniuisunik iluarseeqqusilluni peqqussut eqqartuussinermi piffissaliussap iluani malinneqarsimanngippat aammalu pinngitsaaliilluni akilersortinneqartut pineqartup peqquneqarnerminik malinninnissaanut iluaqutaanngitsutut nalilerneqarpata, kommunalbestyrelsi piginnittup akiligassaanik pissutsit iluarsineqarnissaanut pisariaqartitaminik qanoq iliuuseqarsinnaavoq.

§ 52. Kinaluunniit mianersoqquneqarluniluunniit akiliisussanngortinneqassaaq:
1) § 28., imm. 1-mik, immikkoortunik ataasiakkaanik pilersaarusiatut siunnersuutit inatsisitigut atuutileraerannik unioqqutitsisoq,
2) nunaminertap nalinginnaasumik atorneqarnissaanik atuisitsinngitsoortoq imaluunniit nunaminertamik atorneqartussatut tunniussamik atuinermi akuerineqaqqaarani allanngortitsisoq, tak. § 32,
3) immikkoortunik ataasiakkaanik pilersaarusiornerit pillugit imaluunniit § 53 malillugu pilersaarummik ingerlatsiinnarnissamik unioqqutitsisoq, tak. § 29,
4) nunaminertanik atuinissanut akuersissuteqartarnermi piumasaqaatinik sumiginnaasoq, tak. § 38.

 

Ikaarsaariarnermut atortuulersitsinissamullu aalajangersakkat.

§ 53. Illoqarfinnut, immikkoortunut aammalu immikkoortunut ataasiakkaanut maleruagassat maannamut atuuttut malillugit pilersaarusiat atortuuginnassapput pilersaarutit tamakkua nalunaarummi matumani maleruagassanik taarserneqarnissaasa tungaanut.
Imm. 2. Illoqarfimmut allamulluunniit pilersaarusiaq immikkoortunut allamulluunniit pilersaarusiaq immikkoortunut ataasiakkaanut pilersaarusiat imarisaasa iluanniittoq aammalu nunaminertanik atuinissamut akuersissuteqartarnerup tunngavigisaasa iluanniittoq kommunimi pilersaarusiornerup akuersissutigineqarnissaata tungaanut Naalakkersuisunit akuersissuteqarfigineqarsinnaavoq.

§ 54. Nalunaarut maannakkorpiaq atuutilissaaq, tamatumunngalu peqatigitillugu Namminersornerullutik Oqartussat kommuneqarfinni immikkoortunilu pilersaarusiornerit pillugit nalunaarutaat nr. 25, 9. november 1987-imeersoq atorunnaarpoq.

Namminersornerullutik Oqartussat, ulloq 18. november 1992

Emil Abelsen

/

Peter Beck