Kalaallit Nunaanni umimmaat eqqissisimatitaanerat pillugu Namminersornerullutik Oqartussat nalunaarutaat nr. 18, 21. juli 1992-imeersoq.

Inuussutissarsiutigalugu piniarnermut aallaaniarnerullu inatsisartut inatsisaanni nr. 12-imi 22. november 1984-imeersumi kingusinnerusukkullu inatsisartut inatsisaatigut nr. 10-kkut 29. april 1992-imeersukkut allanngortinneqarsimasumi § 4, § 7 aamma § 9 naapertorlugit makku aalajangersarneqarput:

 

Piffissat eqqissisimatitsiviit nunallu immikkoortui eqqissisimatitat.

§ 1. Umimmak (Ovibus moschatus) Kalaallit Nunaanni eqqissisimatitaavoq.
Imm. 2. Imm. 1-imi maleruagassamut ilaatinneqanngillat
1) Ittoqqortoormiit kommuniat, piffîssani 20. augustimiit 20. septemberimut aamma 20. novemberimiit 20 decemberimut umimmanniarnissamut akuersissuteqarfîgineqarsinnaasoq, aamma
2) Angujaartorfiup Nunaa (Maniitsup kommunia), piffissami 1. augustimiit 25. septemberimut umimmanniarnissamut akuersissuteqarfigineqarsinnaasoq.
Imm. 3. Piffissap piniarfiusussap aallartiffiatut naaneratullu ullut taameqartut piniarfissamut ilaapput.
Imm. 4. Kalaallit Nunaata Avannaani Tunumilu nunami eqissisimatitami umimmaat eqqissisimatitaanerannut aalajangersakkat immikkut ittut atuupput.

 

Pisassat amerlassusissaasa aalajangersarneqartarnerat

§ 2. Ittoqqortoormiit kommunianni Angujaartorfiullu Nunaani (Maniitsup Kommuniani) umimmattarineqarsinnaasut amerlassusissaat (kvota) ukiut tamaasa Naalakkersuisut taakkunani kommunalbestyrelsit isumasioreerlugit aalajangertassavaat.
Imm. 2. Pisassiissutaasut taakku (kvota) angutivissanut arnavissanullu aammalu qanoq utoqqaassuseqarnissaata aalajangerneratigut killiliiffigineqarsinnaapput.

§ 3. Naalakkersuisut aalajangersaasinnaapput § 2-mi amerlassusiliunneqartut kommuninut aalajangersimasunut agguaanneqarnissaat pillugu.
Imm. 2. Ukiumut pisassiissutit kiisalu taakkununnga piumasaqaataasut piffissap piniarfiusinnaasup aallartinnginnerani tusagassiutitigut nuna tamakkerlugu saqqummersartutigut radiokkullu saqqummiunneqartassapput.

 

Piniarnissamut piumasaqaatit.

§ 4. Inuit tamatumunnga akuersissummik pigisaqartut kisimik umimmassinnaatitaapput.
Imm. 2. § 2-mi amerlassusissatut killiliunneqartut iluannit Naalakkersuisut akuersissutinik tunniussisinnaapput inunnut
1) Kalaallit Nunaanni najugaqartunut inuiaqatigiinnullu kalaallinut attuumassuteqartunut, aamma
2) inuussutissarsiutigalugu piniarsinnaanermut aallaaniarsinnaanermullu akuersissutaasumik atuuttumik uppernarsaateqartunut (uppernarsaat qorsuk).
Imm. 3. Akuersissummi umimmattarineqarsinnaasut amerlassusii kiisalu sumi piffissallu qanoq ilinerani pisarineqarsinnaanersut allanneqarsimassapput.
Imm. 4. Naalakkersuisut § 3-mi pisassiissutaasut iluanni imm. 2-mi imm. 3-milu pisassiinissamut piumasaqaataasut malillugit uppernarsaasiorsinnaanermut oqartussaassuseq kommunalbestyrelsinut ataasiakkaanut tunniussisinnaavaat.

§ 5. Inuit § 4, imm. 2 imaluunniit 4 naapertorlugit Angujaartorfiup Nunaani umimmanniarnissamut akuerineqarsimasut akuersissummut ilanngullugu nalunaaqutsersuutinik marlunnik ataasiaannarlugit atugassanik normulikkanik tunineqassapput umimmaat pisarineqartut kingusinnerusukkut uppernarsineqarnissaannut atugassanik.
Imm. 2. Umimmaap pisarineqarnerata kinguninngua nalunaaqutsiutassaq katassinnaajunnaarlugu takulertorneqarsinnaasumillu quttoraanut ikkunneqassaaq.
Imm. 3. Nalunaaqutsiussaq umimmaap tunineqarnissaata nerineqarnissaataluunniit tungsaanut quttoraani atatinneqassaaq.
Imm. 4. Nalunaaqutsiussassat tunniunneqarsimasut atorneqanngitsut piffissaq umimmanniarsinnaatitaaffik naaniariarpat kommunimut utertinneqassapput.

 

Piniariaatsit.

§ 6. Umimmanniarnermi qoorortooq kisimi atoqqusaavoq. Kaliberi atoqqusaasoq minnerpaat 6,5 mm-iuvoq. Aqerlut aqitsumik nuullit atorneqassapput. Qoorortuut eqqarasuartaatit aamma eqittaannarissat atoqqusaanngillat.
Imm. 2. Kitaani umimmanniarnermi qimmilisarnissaq inerteqqutaavoq.
Imm. 3. Timmisartut, helikopterit kiisalu qamutit motorillit suulluunniit umimmanniarnermi imaluunniit piniarfissamukarnermut utimulluunniit atoqqusaanngillat.
Imm. 4. Umimmattarineqartut neqaat tamaarmi pisarineqarfîani atorneqassaaq angerlaanneqassalluniluunniit.

 

Uumatíllugit tigusisarneq aamma umimmaliisarneq.

§ 7. Kalaallit Nunaanni Namminersornerullutik Oqartussat akuersiseqqaarsimatinnagit umimmaat ilisimajunnaarsinnissaat uumatillugillu tiguniarnissaat aammalu ungalusaniitinnissaat inerteqqutaavoq.
Imm. 2. Umimmannik uumasunik nujuartanik allammut nuussineq taamaallaat Kalaallit Nunaanni Namminersornerullutik Oqartussat akuersiseqqaarlugit pisinnaavoq.

§ 8. Umimmaat unioqqutitsinikkut pisarineqartut neqaannik amiinillu kiisalu umimmaap ilaanik allamik sumilluunniit pisineq imaluunniit pissarsineq inerteqqutaavoq.

 

Immikkut akuersisoqarneratigut aalajangersakkanik sanioqqutsisinnaaneq

§ 9. Siunertanut ilisimatuussutsikkut misissuinernut allanullu tunngasunut Nalakkersuisut nalunaarummi aalajangersakkat immikkut ittumik sanioqqunnissaannut aalajangiisinnaapput.

 

Pineqaatissiisarnerit

§ 10. § 1-imi aamma §§ 4-miit 8-mut aalajangersakkanik unioqqutitsinerit akiliisitsissutaasinnaapput.
Imm. 2. § 1-imi aamma §§ 4-miit 8-mut aalajangersakkanik unioqqutitsinermi umimmaat unioqqutitsinikkut pisarineqartut pisiarineqartulluunniit neqaat, amii, niaquisa saarngi kiisalu umimmaat ilaat suulluunniit kiisalu sakkut angallatillugu unioqqutitsinermi atorneqartut inuussutissarsiutigalugu piniarneq aallaaniarnerlu pillugit inatsimmi § 10 naapertorlugu arsaarinnissutaasinnaapput.
Imm. 3. Arsaarinnissutit Kalaallit Nunaanni Namminersornerullutik Oqartussanit oqartussaaffigineqassapput.
Imm. 4. §§-it 1, 4, 6 aamma 7 unioqqutinneqarnerini piniartut ataasiakkaat kisimik akisussaatinneqassanngillat, aammali angallammik piginnittoq, qamutinik imaluunniit allanik piniarnermut atorneqarsimasunik piginnittoq piniarnermut peqataasimaguni, imaluunniit piniarnermut atortut taaneqartut unioqqutitsilluni piniarnermut atorneqartussaanerinik ilisimannissimaguni akisussaaqataatinneqassaaq.

§ 11. Nalunaarut 31. juli 1992-imi atulerpoq. Tamatumunnga peqatigitillugu Kalaallit Nunaanni umimmaat eqqissisimatinneqarnissaannik nalunaarut nr. 8, 5. maj 1988-imeersoq atorunnaarsinneqarpoq.

Namminersornerullutik Oqartussat, 21. juli 1992.

Hans Iversen

/

Henrik Leth