Inuussutissarsiutigalugu piniarnermut aallaaniarnermullu akuersissuteqartarneq (inuussutissarsiutigalugu piniartunut) pillugu Namminersornerullutik Oqartussat nalunaarutaat nr. 14, 16. juli 1992-imeersoq.

Inuussutissarsiutigalugu piniarneq aallaaniarnerlu pillugit Inatsisartut Inatsisaanni nr. 12, 22. oktober 1984-imeersumi, kingullermik inatsisartut inatsisaatigut nr. 10-kkut 29. april 1992-imeersukkut allannguuteqartinneqartumi, § 3-mi, imm. 3 4-lu, aamma § 9 naapertorlugit aalajangersarneqarput:

 

§ 1. Kalaallit Nunaata oqartussaaffigisaani nunami imaanilu inuussutissarsiutigalugu piniarneq aallaaniarlu taamaallaat ingerlaaneqarsinnaavoq inunnit tamatumunnga akuersissuteqarfigineqarsimasunit.
Imm. 2. Akuersissuteqartoqartassaaq inuussutissarsiutigalugu aallaaniarsinnaanermut uppernarsaammik tunniussinikkut.

§ 2. Qinnuteqareernermi inuussutissarsiutigalugu aallaaniarsinnaanermut uppernarsaat tunniunneqartassaaq inunnut:
1) inuiaqatigiinnut kalaallinut aalajangersimasumik attuumassuteqartunut,
2) Kalaallit Nunaanni najugaqartutut inuit aqqisa allattorsimaffíanni nalunaarsorsimasunut, Kalaallit Nunaannilu inuit aqqisa allattorsimaffianni ukiuni kingullerni marlunni nalunaarsorsimasimasunut,
3) Kalaallit Nunaannut tamakkiisumik akileraartartussaasunut, Kalaallit Nunaannullu ukiuni kingullerni marlunni tamakkiisumik akileraartartuusimasunut, aammalu
4) a) pingaarnerutillugu ukiup siuliani minnerpaamik ulluni 125-ini piniarnermik aallaaniarnermillu inuussutissarsiuteqarsimasunut, imaluunniit
b) qinnuteqarnissamut piffissarititaasoq tikillugu minnerpaamik ulluni 125-ini ataannartumik aalajangersimasumik inuussutissarsiuteqartutut isertitaqarsimanngitsunut.

§ 3. Inuussutissarsiutigalugu aallaaniarsinnaanermut uppernarsaammik qinnuteqaat najukkami kommunimut tunniunneqartassaaq.
Imm. 2. Najukkami kommunip, KNAPP-imut tusarniaareernermigut, misissussavaa § 2-mi aalajangersakkat naammassineqarsimanersut, taamaattoqarpallu qinnuteqaat atsiorneqassaaq.
Imm. 3. Imm. 2 naapertorlugu najukkami kommunip aalajangiinera Naalakkersuisunut maalaarutigineqarsinnaavoq.
Imm. 4. Ukiut tamaasa 15. august nallertinnagu inuussutissarsiutigalugu piniartut § 2-mi piumasaqaatinik suli naammassinnissimasut allattorsimaffiannik kommuni Naalakkersuisunut nassiussissaaq.

§ 4. Inuussutissarsiutigalugu aallaaniarsinnaanermut uppernarsaatip § 1-imi, imm. 2-mi taaneqartup tunniunneqarneranut 30 kr.-imik akiliisitsisoqartassaaq.
Imm, 2. Inuussutissarsiutigalugu aallaaniarsinnaanermut uppernarsaat tassaavoq Naalakkersuisut giro atorlugu immikkut akiliiffissiaata akiliisimanermut uppernarsaatitaa.
Imm. 3. Inuussutissarsiutitalugu aallaaniarsinnaanermut uppernarsaat aatsaat atorsinnaavoq allakkerisarfîmmit naqissuserneqarsimaguni, atuutissallunilu aallaaniarsinnaanermut uppernarsaatip ukiup atuuffissaata naanissaata tungaanut.

§ 5. Inuussutissarsiutigalugu aallaaniarsinnaanermut uppernarsaat inummut namminermut tunngasuuvoq, allamullu tunniuteqqusaanani, tuneqqusaanani, atukkiuteqqusaanani assigisaanilluunniit peqqusaanani.
Imm. 2. Meeqqat 16-it inorlugit ukiullit angajoqqaamik sernissuisumilluunniit inuussutissarsiutigalugu aallaaniarsinnaanermut uppernarsaataannut ilaatinneqarput.
Imm. 3. Inuussutissarsiutigalugu aallaaniarsinnaanermut uppernarsaat piniarnermi nassarneqartassaaq, misissuinermilu politiit allalluunniit taamaaliornissamut piginnaatitaasut piumasaqarnerisigut takutinneqartassalluni.

§ 6. Inuussutissarsiutigalugu aallaaniarsinnaanermut uppernarsaatilik kinaluunniit pisussaavoq pisaminik allattuissalluni. Qaammatit tamaasa naanerini pisarisimasat naatsorsuusiorneqassapput. Ukiumut pisarisimasat naatsorsuutaasa inerneri piffissap pisanik nalunaarsuiffiusussap naanerani, tak. imm. 3, pisanik nalunaarsuiffissamut Naalakkersuisunit suliarineqarsimasumut nuunneqassapput, oktoberillu 15-iat tikitsinnagu akeqanngitsumik utertinneqassallutik.
Imm. 2. Meeqqat 16-it inorlugit ukiullit pisarisimasatik angajoqqaamik sernissuisumilluunniit pisanik nalunaarsuiffissaannut § 5-imi, imm. 2-mi, taaneqartumut nalunaarutigissavaat.
Imm. 3. Piffissaq pisanik nalunaarsuiffiusussaq tassaavoq oktoberip aallaqqaataaniit septemberip 30-ianut.
Imm. 4. Taamaakkaluartorli piffissaq pisanik nalunaarsuiffmsussaq siulleq tassaavoq 1. januar 1993-imiit 30. september 1993-imut.
Imm. 5. Inuussutissarsiutigalugu aallaaniarsinnaanermut upernarsaatip nutarsarneqarnissaanut piumasaqaatigineqarpoq pisanik nalunaarsuiffissiap piffissap pisanik nalunaarsuiffiusussap siulianut tunngassuteqartup piffissaq eqqorlugu nassiunneqarsimanissaa.

§ 7. §-inik 1-imik 5-imilu imm.-inik 1-imik 3-millu unioqqutitsinerit akiliisussanngortitsissutaasinnaapput, pisallu imaluunniit taakku nalingi arsaarinnissutaasinnaallutik.

§ 8. Nalunaarut atulissaaq januarip aallaqqaataani 1993.
Imm. 2. Tamatumunnga peqatigitillugu atorunnaarput aalisarnermik piniarnermillu ingerlatsinnaanissamut piumasarineqartunik naammassinnissimanermut uppernarsaatit suliarineqartarnerat pillugu Namminersornerullutik Oqartussat nalunaarutaat nr. 1, 19. januar 1981-imeersoq aamma Namminersornerullutik Oqartussat nalunaarutaat nr. 38, ulloq 30. december 1991-imeersoq piniarnermut aallaaniarnermullu allagartanut tunngasoq.
Imm. 3. § 4-mi, imm. 1 naapertorlugu akiliut 1. november 1992-imiit akileqquneqarsinnaavoq.

Namminersornerullutik Oqartussat, ulloq 16. juli 1992.

Hans Iversen

/

Henrik Leth