Namminersornerullutik Oqartussat nalunaarutaat nr. 11 ulloq 19. juni 1992-imeersoq arfernik angisuunik piniarnermut tunngasoq.

Inuutissarsiutigalugu piniarnermut aallaaniarnermullu inatsisartut inatsisaanni nr. 12 ulloq 22. november 1984-imeersumi § 4 aamma §§ 6 aamma 7 kiisalu §§ 9 aamma 10 naapertorlugit makku aalajangersarneqarput:

 

§ 1. Oqaaseq "Arfernik angisuunik" uani nalunaarummi imatut paasineqassaaq tikaagulliit aammalu arferit tikaagullinnik anginerit.
Imm. 2. Kalaallit Nunaata imartaani aalisarfiusumi arferit angisuut aallaarsareqqusaanatillu pisareqqusaanngillat.
Imm. 3. Tikaagulliusaat tikaagulliillu malittarisassami imm. 2-mi inerteqqussummi pineqanngillat.

 

Tikaagulliussaat

§ 2. Tikaagulliusaat 15,2 meterimik takinerit, akuersissummik peqartunit pisarineqarsiinnaapput. Tikaagulliusaat piaqqisartut piaraalluunniit aallaarsareqqusaanngillat pisareqqusaanatillu.
Imm. 2. Akuersissummik peqartut kisimik tikaagulliusaarsinnaapput.
Imm. 3. Naalakkersuisut arfanniarnermi akuersissutinik agguaassinermi piumasaqaateqarsinnaapput ukiumi pineqartumi, soorlu assersuutigalugu piniariaatsit kingunerinik naliliisinnaanissamik piumasaqaateqarsinnaallutik.

§ 3. Naalakkersuisut ukiut tamaasa nalunaarutigissavaat tikaagulliusaat amerlanerpaamik qassit ukioq taanna Kalaallit Nunaata kitaani kommuneni ataasiakkaani pisarineqarsinnaassanersut.

§ 4. Tikaagulliusaarniarnermi qamutillit 50 mm-inik taakkuluunniit sinnerlugit sulloqqortussusilinnik (kaliber) tuukkarlu qaartartortalik (Raufoss-ip arferaut qaartartuliaa) kisimik sakkugeqqusaapput.
Imm. 2. Tikaagulliusaarniarnerit tamaasa qamutilik saniatigut ataatsimik qaartartulimmik tuukkassamaateqartinneqartassaaq. Angallatit tamarmik allunaasanik aminnerpaamik 20 mm-iusunik aleqassapput puttaqutinillu arferup kivisoorutiginnginnissaanut naammattunik angallammiititaqassallutik.
Imm. 3. Tuukkaq qaartartortallip atornissaanut pikkorissarnikut tassungalu uppernarsaatillit kisimik taamakkuninnga pisisinnaapput passussisinnaallutillu.
Imm. 4. Tuukkat qaartartortallit taamaallaat tunineqarsinnaapput uppernarsaammik akuerineqarsimasumik takutitsisoqarpat, tak. imm. 3.
Imm. 5. Kommunalbestyrelsep tikaagulliusaarniarnissamut akuersissut ataaseq tunniussinnaavaa angallatinut qamutililinnut marlunnut imaluunniit akuersissut ataaseq angallammut ataatsimut minnerpaamik 36 fod-itut angitigisumut. Angallatit sipileqassapput (trawlspil).

 

Tikaagulliit

§ 5. Kalaallit Nunaata imartaani aalisarfiusumi tikaagulliit taamaallaat piffissami aprilip aallaqqaataaniit decemberip 31-iat ilanngullugu pisarineqarsinnaapput. Tikaagulliit piaqqisartut piaraalluunniit aallaarsareqqusaanngillat pisareqqusaanatillu. Tikaagulliit sassaniittut sukkulluunniit pisarineqarsinnaapput.
Imm. 2. Akuersissummik peqartut kisimik tikaagullinniarsinnaapput.
Imm. 3. Naalakkersuisut arfanniarnermi akuersissutinik agguaassinermi piumasaqaateqarsinnaapput ukiumi pineqartumi, soorlu assersuutigalugu piniariaatsit kingunerinik naliliisinnaanissamik piumasaqaateqarsinnaallutik.

§ 6. Ukiut tamaasa Naalakkersuisut tikaagulliit amerlanerpaamik qassit ukioq taanna Kalaallit Nunaata kitaani Tunullu imartaani pisarineqarsinnaassanersut nalunaarutigissavaat.
Imm. 2. Taamatuttaarlu Naalakkersuisut ukiut tamaasa Kalaallit Nunaata kitaani kommuneni ataasiakkaani ukioq taanna tikaagulliit amerlanerpaamik qassit pisarineqarsinnaassanersut nalunaarutigissavaat.
Imm. 3. Kalaallit Nunaata tunuata imartaani pisassiissutigineqartut Tasiilap Ittoqqortoormiillu kommuneesa nammineq qanoq agguataassanerlugit isumaqatigiissutigissavaat.

§ 7. Tikaagullinniaraermi qamutillit 50 mm taakkuluunniit sinnerlugit sulloqqortussusilinnit (kaliber) tuukkarlu qaartartortalik (Raufoss-ip arfernut qaartartuliaa) kisimik sakkugeqqusaapput. Angallat qamutililik sipileqassaaq (trawlspil).
Imm. 2. Arfeq pissataq, tuukkarmik qaartartortalimmik toqunneqanngitsoq, piaartumik toqunneqassaaq. Toqutsineq pisinnaavoq arferup niaquatigut aallaallugu tuukkarmik qaartartortalimmik imaluunniit qoorortuunik 7,62 mm-inik qaangerluguluunniit sulloqqortussusilinnik. Aallaasit eqqarasuartartut eqittaannakkallu arfanniarnermi atorneqassanngillat.
Imm. 3. Tuukkaq qaartartortallip atornissaanut pikkorissarnikut tassungalu upperaarsaatillit kisimik taamakkuninnga pisisinnaapput passussisinnaallutillu.
Imm. 4. Tuukkat qaartartortallit taamaallaat tunineqarsinnaapput uppernarsaammik akuerineqarsimasumik takutitsisoqarpat, tak. imm. 3.

 

Piniariaatsit aamma pisap atorneqarnissaa

§ 8. Qamutillit tikaagulliusaarniarnermi tikaagullinniarnermilu atorneqartartut ima pitsaatigissapput paarilluagaatigissallutillu atorneqarnerini inunnik ajoqusertoqarsinnaassanani. Taamatuttaaq arfanniarnermi atortut ima pitsaatigissapput toqusaaneq sukkanerpaamik pisinnaassalluni.
Imm. 2. Qamutillit tamarmik misissorneqariissapput atorsinnaasutullu akuerineqarsimassallutik KJS-imit (Angallatinut siunnersuisoqarfik) kingusinnerpaamik ulloq 31. marts 1994.

§ 9. Naalakkersuisut amerlassusissai aalajangikkanik ataatsimoorluni piniarnermi qamutilimmik tuukkartalimmik sakkoqanngikkaluarluni tikaagullittassiisinnaapput. Taamatut akuersissuteqartoqarsinnaavoq pisaqarnissaq mmaqqatigiinnut pingaaruteqarluinnarpat, kiisalu kutterit tukkartalinnik qamutilillit neqinik naammattunik pissarsisinnaanngippata.
Imm. 2. Naalakkersuisut arfanniarnermi akuersissutinik agguaassinermi piumasaqaateqarsinnaapput ukiumi pineqartumi, soorlu assersuutigalugu piniariaatsit kingunerinik naliliisinnaanissamik piumasaqaateqarsinnaallutik.
Imm. 3. Naalakkersuisut umiatsiaararsorluni tikaagullinniarnissamik immikkut akuersissutit kommunenut agguaatissavai KNAPK KANUKOKA-lu suleqatigalugit, nuna tamakkerlugu arfattassat agguaanneqarneri ilutigalugit.
Imm. 4. Naalakkersuisut akuersissuteqarnissaanni piumasaqaatigineqarput,
1) piniarneq ataatsimoorluni piniarnerussasoq piniarnermi ataatsimi ikinnerpaamik angallatinit tallimanit peqataaffigineqartoq,
2) piniarneq ingerlanneqassaaq § 7, imm. 2-imi aallaasit taaneqartut sakkugalugit,
3) angallatit tamarmik unaaqassapput tuukkartalinnik, aleqassallutik aminnerpaamik 12 mm-iusunik puttaqutaateqassallutillu arferup kivisoorutiginnginnissaanut naammattunik,
4) piniarneq aallartinneqassanngilaq peqataasussat akuersissummik piginneqataasut tamarmik piniarnerup aallartinneranik nalunaarfigineqareersinnagit,
5) piaarnerpaamik tikaagullik toqusarneqassasoq.

§ 10. Kinaluunnit tikaagullimmik tikaagulliusaamilluunniit pisaqartoq peqquneqarpoq pisap nerineqarsinnaasortai tamaasa atussallugit. Pisaq tamarmi akuersissummik piginnittumit atorneqarsinnaanngippat tunineqarsinnaanngippalluunnit, pisaqartoq peqqusaavoq nunaqarfigisami inui pisamik agguagarsitissallugit.
Imm. 2. Pisap perlukuinik kivisitsineq pissaaq kivisitsiviup eqqaani angallanneq, aalisarneq imaluunniit piniarneq akornusersinnaajunnaarlugu.

 

Akuersissutit nakkutilliinerlu

§ 11. Kommunalbestyrelse, pîsassat qanoq amerlatiginissaannut tunngatillugu Naalakkersuisut aalajangiisimanerisa iluanni akuersissummik normuleriikkamik pigisalimmut ataatsimik tikaagulliusaarsinnaatitsisumik imaluunniit ataatsimik tikaagullissinnaatitsisumik, tunniussissaaq.
Imm. 2. Akuersissutit qinnuteqareernikkut, aatsaallu aalisartut piniartullu peqatigiiffiannik isumasioqatiginnereernerup kingorna tunniunneqartassapput. Akuersissutit allanneqartassapput allaffissianut normulersukkanut Aalisarnermut, piniarnermut nunaateqarnermullu pisortaqarfiup kommunenut nassiussimasaanut.

§ 12. Kommunemut arfattassiissutit tamarmik ataatsikkut agguaanneqassapput.
Imm. 2. Kommunalbestyrelse akuersissutinik tunniussisinnaavoq inunnut makkununnga
1) Kalaallit Nunaanni najugaqartunut inuiaqatigiinnullu kalaallinut aalajangersimasumik attuumassuteqartunut,
2) piniarsinnaanermut, piniarnermik aallaaniarnermillu pingaarnerutillugu inuutissarsiornermik ingerlatsisinnaanermut kommunalbestyrelsep tunniussaanik allagartalinnut, aammalu
3) tuukkartalimmik qamutililimmik angallatilinnut.
Imm. 3. Ataatsimoorluni arfanniarsinnaanermut akuersissut, piniarnermi akisussaasutut (aquttumut) toqqaraeqarsimasumut, tunniunneqassaaq. Piniaqataasut aqqi akuersissutip tunuanut allanneqassapput.
Imm. 4. Akuersissutit ukiup aallartinneraniit naaneranut taamaallaat atuupput.

§ 13. Kommunalbestyrelsep akuersissutit, pisassiissutigineqarsimasunut naapertuuttut, tunniussimalereeraangagit, kommunalbestyrelsep akuersissutinik tunineqarsimasut aqqi, akuersissutaasa normui angallatillu GR-normui Aalisarnerrnut, piniarnermut nunaateqarnermullu pisortaqarfimmut ilisimatitsissutigissavai, kingusinnerpaamik 1. marts.
Imm. 2. Akuersissut tunniunneqarsimasoq atortussaajunnaassaaq, tikaagulliusaap tikaagulliulluunniit pisarineratigut imaluunnit tikaagulliup aallaarsarineratigut.
Imm. 3. Naalakkersuisut paasissagaluarunikku kommunemi akuersissutitaqanngitsumik tikaagulliusaartoqarsimasoq tikaagullimmik pisaqartoqarsimasoq pissaasoqarsimasorluunniit, imaluunniit ukiumut tikaagulliusaartassiisutinik tikaagullittassiissutinilluunniit amerlanerusunit pisaqartoqarsimasoq pissaasoqarsimasorluunniit, taava Naalakkersuisut ukioq taanna imaluunniit ukiumi tullermi pisassiissutigineqartut ikilisissinnaavaat. Ikilisitsineq tikaagullinnut tikaagulliusaanulluunniit pisinnaavoq, apeqqutaatinnagu pisassani sorlerni akuersissutitaqanngitsumik pisaqartoqarsimaneranik sinniisoqarsimaneranilluunnit.
Imm. 4. Arfernik eqqissisimatitanik pisaqartoqartillugu pissaasimasoqartilluguluunniit ukioq taanna imaluunniit ukiumi tullermi kommunemi unioqqutitsiviusumi pisassiissutigineqartut ikilisinneqarsinnaapput.

§ 14. Tikaagulliusaartat imaluunniit tikaagullittat tuniniarlugit aallartinneqarsinnaanngillat pisaqarsimaneq kommunep allaffianiit imaluunniit taassuma immikkoortortaqarfianiit akuersissummi naqissuserlugu uppernarsarneqartinnagu.
Imm. 2. Allaffilli matoqqappat tuniniaaneq aallartinneqarsinnaavoq allaffik ammarpat erngiinnaartumik akuersissut pisaqarsimanermut uppernarsaatitut naqissusertikkiartussagaanni.
Imm. 3. Akuersissummik pigisaqartoq akuersissuteqarsinnaavoq akuersissutip assilineqarneratigut pisamik taassumaluunniit ilaanik tuniniaasinnaanermut. Assilineqarnerani takuneqarsinnaassaaq pisarineqarsimasoq kommunemi oqartussaasunit uppernarsarneqarsimasoq.

§ 15. Kommunalbestyrelsep aalajangersinnaavaa akuersissut imaluunniit akuersissutit tunniunneqarsimasut tamarmik kommunep iluani nuunneqassasut imaluunniit atortuujunnaarsinneqarsimasut allakkatigut, telefaxikkut, radiokkut, aviisitigut imaluunniit tamakku assigisaasigut nalunaarutigineqarsimanerisa kingorna. Naalakkersuisut tamanna pillugu immikkut nalunaarfigineqassapput.
Imm. 2. Nalunaaruteqartoqareerpat akuersissummik pigisalik pigisallilluunniit akuersissut kommunalbestyrelsemut utertissavaat.
Imm. 3. Naalakkersuisut kommunalbestyrelse piumaffigisinnaavaat akuersissutit tunniunneqarsimasut atortuujunnaarseqqullugit, imm. 1 naapertorlugu, kommunalbestyrelsep piffissaq eqqorlugu arfattat pissatallu Naalakkersuisunut nalunaarutigisimanngippagit, Namminersornerullutik Oqartussat nalunaarutaat arfattat pissatallu nalunaarutigineqartarnerannut tunngasoq malillugu.
Imm. 4. Naalakkersuisut KNAPK-mik KANUKOKA-millu tusarniaaqqaareernermikkut radiokkut tusagassiuutitigullu allatigut nalunaarutigisinnaavaat, akuersissutit tunniunneqarsimasut nalunaaruteqartoqarniariartoq kommunenut allanut nuunneqartut imaluunniit atortuujunnaartut. Tamatuma kingorna akuersissutit utertinneqassapput, tak. imm. 2.

§ 16. Aalisarnermi, piniarnermi nunalerinermilu pisortaqarfiup KNAPK KANUKOKA-lu suleqatigalugit tikaagulliusaat tikaagulliillu pisassat sinneruttut agguaateqqissavai. Taamaatut agguaassinissaq sulissutigineqassaaq kingusinnerpaamik oktoberip 15-iat. Pisassat sinneruttut agguaateqqinneqassapput taamaallaat kommunenut Sisimiuniit Nanortalik ilanngullugu.
Imm. 2. Agguaasseqqinnerup ineraera nalunaarutigineqassaaq sapinngisamik radio tusagassiuutillu allat aqqutigalugit.

§ 17. Kinaluunniit arfassimasoq pisussaavoq mattaminermik neqiminermilluunniit misissugassamik kommunemut tunniussissalluni, nalunaarutigalugulu pisap suussusaa, ulloq pisaqarfiullu sumiissusaa. Misissugassaq puussiamut aanaveersaatitalimmik imalimmut immiunneqassaaq Grønlands Fiskeriundersøgelse-p tunniussimasaanut.
Imm. 2. Kommunep taanna misissugassaq paasissutissat piumasarineqartut ilanngullugit Grønlands Fiskeriundersøgelser-mut nassiutissavaa.

 

Immikkut akuersissut

§ 18. Naalakkersuisut ilisimatusaatigalugu misissuineraut nalunaarummi aalajangersakkaniit immikkut akuersissuteqarsinnaapput.

 

Avammut annissinissaq píllaasinnaanerlu

§ 19. Aningaasarsiutiginiarlugu arferup neqaanik avammut annisseqqusaanngilaq. § 18 malillugu arferit pisat ilamernganit avammut annisseqqusaavoq.

§ 20. Akiliisitaasinnavoq,
1) §§ 1 aamma 2 aamma §§ 4 aamma 5 aamma §§ 7 aamma 8 aamma § 10 aamma §§ 13, 14 aamma 15, imm. 2 aamma § 17 kiisalu § 19 aamma
2) § 9, imm. 4-imi piumasaqaatinik eqqaaneqartunik naammassinnissimanngitsut, pisamiillu pissarsiat arsaarinnissutigineqassallutik.
Imm. 2. § 8-mik unioqqutitsisut aatsaat akiliisitaasinnaapput 31. marts 1994-ip kingorna.

§ 21. Nalunaarut atortuulissaaq julip aallaqqaataa 1992.
Imm. 2. Tamanna ilutigalugu nalunaarut nr. 49 ulloq 18. december 1990-imeersoq arfernik angisuunik piniarnermut tunngasoq atortuujunnaarsinneqarput.

Namminersornerullutik Oqartussat, ulloq 19. juni 1992.

Hans Iversen

/

Jørn Birk Olsen