Qilalukkanik qaqortanik qernertanillu piniarneq pillugu Namminersornerullutik Oqartussat nalunaarutaat nr. 10, 19. juni 1992-imeersoq.
Inuutissarsiutigalugu piniarnermut aallaaniarnermullu inatsisartut inatsisaanni nr. 12-imi 22. november 1984-imeersumi § 4, §§ 6 aamma 7 kiisalu §§ 9 aamma 10 naapertorlugit aalajangersaraeqarput:
Inuit piniarsinnaatitaasut
§ 1. Qilalugaq qaqortaq (Delphinapterus leucas) aamma qilalugaq qernertaq (Monodon monoceros) inunnit Kalaallit Nunaanni najugaqavissunit aamma inuiaqatigiit iluanni aalajangersimasumik attuumassuteqartunit piniarneqarneqarsinnaapput.
Kalaallit Nunaata avannaarsuani tunuanílu nunamik uumasuinillu eqqissisimatitsivik Qimusseriarsuarlu
§ 2. Qilalukkat qaqortat qernertallu eqqissisimatitaapput Kalaallit Nunaata avannaarsuani tunuanilu nunamik uumasuinillu eqqissisimatitsiviup imartaani kiisalu Qimusseriarsuarmi uumasunik eqqissisimatitsiviup imartaani.
Imm. 2. Inuit Upernaviup, Avanersuup aamma Ittoqqortoormiit kommuneeni najugaqavissut, inuiaqatigiinnullu aalajangersimasumik attuumassuteqartut, piniarnermik aallaaniarnermillu ingerlatsisinnaatitaapput, Qimusseriarsuarmi aamma Kalaallit Nunaata avannaarsuani tunuanilu nunanik uumasuinillu eqqissisimatitsiviit pillugit maliitarisassat atuuttut malillugit.
Piniariaatsit
§ 3. Qaqortanik qernertanillu qilalugarniarnermi imaluunniit piniarfissamukarnermi tassanngaaniillu angerlarnermi timmisartut, helikopterit kiisalu qamutit motoorillit suulluunniit atorneqassanngillat.
Imm. 2. Kisiannili immikkut ittunik pisoqartillugu pisanik angerlaassuinissamut snescooterit atorneqarnissaat kommunalbestyrelsip immikkut akuerisinnaavaa, tassa siku silalu pissutigalugit pisat tuaviortumik angerlaannissaat pisariaqaleraangat.§ 4. Qoorortuut atussagaanni akuerisaapput minnerpaamik 7,62-imik kaliberillit, taamaattorli qilalukkamut qaqortamut qernertamulluunniit naalitamut, qassutinik pisamut imaluunniit pisarinissaa qulakkiikkamut qanittunnguullugu toqutsissutigissallugu 5,64 mm-inik kaliberilik (cal. 222) atorneqarsinnaavoq. Patruunit tamakkerlugit puukkanik aqerlullit taamaallaat qaqortanik qernertanillu qilalugarniarnermi atorneqassapput.
Imm. 2. Ungusisarnermi qilalukkat qaqortat qernertallu pisat tamarmik najukkamut angerlaanneqassapput. Ungusinermi pisanik pilaffik torersarneqassaaq, sinnikut atorneqarsinnaanngitsut peerneqarnerisigut.
Imm. 3. Qaqortanik qernertanillu qilalugarniarnermi qaartartut, qamutillit tuukkartallit, timmiarsiutit aammalu qoorortuuaqqat aallaasillu eqqarasuartaatit atorneqarnissaat inerteqqutaavoq.§ 5. Kommunalbestyrelse kommunimi ileqqoreqqusaliatigut qilalugarniartarneq annertunerusumik killilersorsinnaavaa, immikkut pisariaqartitsisoqartillugu. Kommunemi ileqqoreqqusaq atortussanngortinneqarsinnaavoq taamaallaat Naalakkersuisunit akuerineqarpat.
Sassat
§ 6. Sassanik nassaartoqarpat sumiiffiat nunaqarfinnut/illoqarfinnut eqqaanniittunut tuaviornerpaamik, VHF-radio-luunniit atorlugu nalunaarutigineqassaaq.
Imm. 2. Najugarisami KNAPP sassisarnermi akisussaasussamik (aquttussamik) toqqaassaaq. Aqutsisup isumagisassavaa sassinermi pisat amerlassusai § 8, imm. 1 malillugu nalunaarutigissallugit.
Imm. 3. Ikiligaq sapinngisamik pilertortumik toqunneqassaaq. Qilalugaq sikup qaanut qaqinneqarniariartoq pilallugu aallartinneqassaaq.
Imm. 4. Piniartut sasseqataasut kikkulluunniit sassinerup inerneratigut qimussimik erniinnaq assartorsinnaasorisatik akimorlugit pisaqartassanngillat, imaluunniit § 4, imm. 2 naapertorlugu.
Imm. 5. Piniaqataasut pisussaapput sinnikut inunnit qimminillu atorneqarsinnaanngitsut tamaasa piniarfik qimatsinnagu piiarnissaannut.
Imm. 6. Neqit, mattaat orsullu piginnittumit nalunaaqqutsikkat kiisalu qilalukkat pitutat piginnittui akuersisimatinnagit nikisinneqassanngillat, kommunimi oqartussaasut piniarnermi pissarsiat tamakkua sila pissutigalugu assartorneqarnissaat ullormik killiliiffigisimanngippassuk killiliussarlu taanna qaangerneqarsimanngippat.
Nalunaartarneq nakkutilliinerlu
§ 7. Qilalukkanik qaqortanik qernertanillu pisaqartut tamarmik pisatik kommuneqarfimminnut qaammatit tamaasa nalunaarutigisassavaat, nalunaarlugit pisamik qassiuneri, qanga sumilu. Nalunaarutigineqassaartaaq pisat qoorortuumik, unaamik tuukkartalimmik, qassutinik, ungusinermi imaluunniit sassani pisarineqarsimanersut. Ataatsimoorussamik pisat, soorlu ungusinermi, qassutinik imaluunniit sassinermi pisat ittuusup kisimi nalunaarutigisassavai, pisaqaqataasut aqqi tamaasa ilanngullugit.
Imm. 2. Pisat allattuiffissamut nalunaarsuutini ilanngussatut I qup. 1 2-lu ilanngunneqartukkut allattorneqassapput. Allattuiffissaq kommunep imaluunnit nunaqarfiup allaffianiit pineqarsinnaavoq.
Imm. 3. Kommunep pisaqarnermik allattorsimaffiit tigusani Aalisarnermi, Piniarnermi Nunalerinermilu Pisortaqarfimmut nassiutissavai kingusinnerpaamik qaammatip qeqqani.
Imm. 4. Piniartut qilalukkamik qaqortamik qernertamilluunniit pisaqartut tamarmik pisussaapput allerui angerlaatissallugit, tak. nalimaarsuutit ilanngussaq 2, taakkulu KNI-mut imaluunniit RGP-mut tunniutissalugit qanga sumilu pisaqarnini nalunaarutigalugit.
Imm. 5. Alleqqut tunniunneqartut KNI-p imaluunniit RGP-p ingerlateqqissavai uunga: Biologstationen, Box 570, 3900 Nuuk.
Immikkut akuersineq
§ 8. Ilisimatusarnermut allanullu tunngatillugu naalakkersuisut aalajangersinnaavaat nalunaarummi aalajangersakkat sanioqqunneqarnissaat.
Avammut annissineq
§ 9. Qilalukkap qaqortap qernertallu ilamerninik taamaallaat nunanut allanut annissisoqarsinnaavoq Namminersornerullutik Oqartussat akuersereernerisigut, tamakkuninngali annissisoqarsinnaavoq § 10 tunngavigalugu.
Pineqaatissunerit
§ 10. Maleruagassanik §§ 1-4, §§ 6 aamma 7 kiisalu § 9-mik unioqqutitsineq akiliisitsissutaassaaq. Ilutigalugu qilalukkat qaqortat qernertallu inatsisinik unioqqutitsilluni pisarineqartut pissarsiarineqartulluunniit neqaat, mattaat, niaquisa saarni, tuugaavi ilamernilu allat arsaarinnissutigineqarumaarlutik.
§ 11. Nalunaarut una ulloq 1. juli 1992 atortuulerpoq, peqatigitillugulu Sassat pillugit landsrådip ileqqoreqqusaa 18. januar 1958-imeersoq atorunnaarsinneqarpoq.
Imm. 2. Sassat pillugit landsrådip ileqqoreqqusaa 18. januar 1958-imeersoq naapertorlugu kommunini ileqqoreqqusaliat atortussanngortinneqarsimasut imaluunniit allakkiat atortuuinnassapput, qilalugarniarnermi malittarisassat sakkortunerusimappata, Inuutissarsiutigalugu piniarnermut aallaaniarnermullu inatsisartut inatsisaat unalu nalunaarut naapertorlugu atorunnaarnissartik allanngortinneqarnissartilluunniit tikillugu.
Namminersornerullutik Oqartussat, ulloq 19. juni 1992.
Hans Iversen/
Jørn Birk Olsen