Namminersornerullutik Oqartussat imigassanik aalakoornartulinnik nioqquteqarnermut sassaallertarnermullu piffissarititaq pillugu nalunaarutaat nr. 5 29. maj 1992-imeersoq.

Imigassanik aalakoornartulinnik nioqquteqarneq sassaallertarnerlu pillugit Inatsisartut inatsisaanni, inatsisartut inatsisaatigut nr. 8-kut 17. maj 1990-imi aanuna nr. 9-kut 9. april 1992-imi allanngortinneqarsimasumi, § 23-mi imm.1 1) aamma § 24, malillugu aalajangersarneqarput:

 

§ 1. Imigassanik aalakoornartulinnik nioqquteqarneq pisassaaq ataasinngornermiit tallimanngorneq ilanngullugu nal. 12.00-imiit nal. 18.00-imut, arfininngornikkut nal. 11.00-imiit 13.00-imut.
Imm. 2. Imm. 1-imi aalajangersakkat taamaakkaluartut nalliuttuni, juulliaqqami, ukiutoqqami, Kunngit pingasuni kiisalu Kalaallit Inuiattut Nalliuttorsiortarfianni imigassanik aalakoornartulinnik nioqquteqartoqassanngilaq.

§ 2. Imigassanik aalakoornartulinnik sassaallerneq pisassaaq ullut tamaasa nal. 12.00-p nal. 24.00-llu akornanni, taamaattorli tallimanngornikkut arfininngornikkullu kiisalu ukiutoqqami, Sisamanngorneq illernartoq sioqqullugu unnummi kingullermi, Tussiarfissuaq sioqqullugu unnummi kingullermi aamma Qilaliarfik sioqqullugu unnummi kingullermi 03.00-ip tungaanut.
Imm. 2. Imm. 1-imili aalajangersagaq taamaakkaluartoq juullerujussuarmi, tallimanngornermi tannaartumi, pĺskip aamma pinsip ulluani sassaallertoqartassanngilaq. Ukiutoqqami, Kunngit pingasuni kiisalu ullormi Kalaallit Inuiattut Nalliuttorsiortarfianni sassaallerneq nal. 18.00-imiit aatsaat aallartittassaaq. Juulliaqqami taamaallaat sassaallertoqartassaaq nal. 18.00-imiit nal. 21.00-imut.
Imm. 3. Imm. 1-imi aamma imm. 2-mi aalajangersakkat atuupput aalajangersimasumik imigassallernissamut akuersissummik pigisaqarneq, tak. inatsimmi § 5, imaluunniit ullormut aalajangersimasumut akuersissuteqarfigineqarsimaneq, tak. inatsimmi § 15, apeqqutaatinnagit.
Imm. 4. Qinnuteqartoqarsimatillugu kommunalbestyrelsi sapaammiit sisamanngorneq ilanngullugu ullormi aalajangersimasumi imigassanik aalakoornartulinnik 03.00-ip tungaanut sassaallernissamut akuersissuteqarsinnaavoq, akunnaatsuliilluni inuuissiortoqarneranut, katittoqarneranut, atatillugu (matumani aamma aappariinnermi ukiunik 25-ngortorsiorluni 50-inngortorsiorlunilu il.il. nalliuttorsiornerni), peqatigiiffiit atasimanerannut tunngatillugu nalliuttorsiornernut aamma Inatsisartunut qinersisoqarneranut atatillugu. Taamaattoqartillugu illoqarfimmi nalliuttorsiorfiusumi politiit akuersissuteqarsimanermik ilisimatinneqassapput kingusinnerpaamik nalliuttorsiorfissaq ullormik ataatsimik sioqqullugu.

§ 3. Nerisassanik annissassanik pisinermut atatillugu imigassanik aalakoornartulinnik nioqquteqarneq ullut tamaasa pisinnaavoq nal. 11.00-ip aamma 20.00-ip akornanni.

§ 4. Nalunaarununi matumani aalajangersakkanik unioqqutitsineq akiliisitsissutaasinnaavoq.

§ 5. Nalunaarut manna atulerpoq 1. juni 1992 aallarnerfigalugu atuutissallunilu 1. juni 1993 tikillugu. Atortuulersitsinermut peqatigitillugu Namminersornerullutik Oqartussat imigassanik aalakoornartulinnik nioqquteqarnermut sassaallernermullu piffissarititaq pillugu nalunaarutaat nr. 36 19. december 1991-imeersoq atorunnaarsinneqarpoq.

Namminersornerullutik Oqartussat, ulloq 29. maj 1992.

Henriette Rasmussen

/

Nukákuluk Kreutzmann