Kalaallit Nunaanni aalisagartanik Tunisinermi akit nikerarnerinut nalimmassaatissanut Aningaasaateqarfik pillugu Inatsisartut inatsisaat nr. 11, 4. november 1991-meersoq.
§ 1. Tunisinermi akit nikerarnerinut nalimmassaatissanut Aningaasaateqarfik sullissiviuvoq imminut pigisoq Kalaallit Nunaanni tunisassiorfmnut aalisakkanik, peqqunnik qituttunillu imarmiunik tunisinermi kalaallinut aalisariutaatilinnut akit minnerpaaffissaat anguniarlugit akit aalajaatsuutinnissaannut tapiissuteqartartussaq.
§ 2. Akit minnerpaaffissaat tassaavoq akigititaq angissutsinut suussutsinullu allanngorartoq siulersuisunit § 5-imi taaneqartunit aalajangersarneqarsimasoq.
Imm. 2. Niuernermi aki tassaavoq Royal Greenland A/S-ip aalisarnermillu inuussutissarsiuteqartut kattuuffiisa akornanni isumaqatigiinniutigineqartartoq naatsorsorneqartartussarlu tunngaviit pingaartitat siumut aalajangeriikkat pissutsillu qularnaavillugit paasisat naapertorlugit, imaluunniit tassaalluni aalisakkanut aalajangersimasunut akigitissallugu illua-tungeriit taaneqareersut kisimik isumaqatigiinniarnerisigut aalajangersarneqartoq.
Imm. 3. Kiilumut akit aalajaatsuunissaannut tapiissut naatsorsorneqartassaaq tunisat aalajangersimasumik pitsaassusillit angissusillillu minnerpaamik akissaasa niuernernermi akigititamit qaffasinnerussutaattut.
Imm. 4. Aningaasaateqarfimmut akiliutissatut pisussaaffík naatsorsorneqartassaaq niuernermi akigititap akit minnerpaaffiannit qaffasinnerussutaata procentianik aalajangersakkamik tunngaveqarluni.§ 3. Tunisinermi akit nikerarnerannut nalimmassaatissanut Aningaasaateqarfimmut akiliuteqartartussatut pisussaasut tassaapput kalaallit aalisariutaatillit aalisarnermi inatsisit tunngavigalugit Kalaallit Nunaata imartaani aalisarnermik ingerlataqartut Kalaallit Nunaannilu tunisassiorfinnut tunisisartut.
Imm. 2. Naalakkersuisut Aningaasanut Inatsisini ukiumoortumik aalajangersarneqartartuni amerlassusilikkanik Tunisinermi akit nikerarnerannut nalimmassaatissanut Aningaasaateqarfimmut aningaasaliisinnaapput.§ 4. Akit aalajaatsuunissaannut tapiissutinik tunniussisoqartassaaq tunisassiorfmni ataasiakkaani, malittarisassat ersarinnerusut Aningaasaateqarfiup siulersuisuinit aalajangersarneqartut malillugit.
Imm. 2. Aningaasaateqarfimmut akiliuteqartitsisoqartassaaq tunisassiorfinni ataasiakkaani, malittarisassat ersarinnerusut Aningaasaateqarfiup siulersuisuinit aalajangersarneqartut malillugit.
Imm. 3. Siulersuisut aalajangersinnaavaat umiarsuarnut tunitsivinnut tunisinermi akit aalajaatsuunissaannut tapiissutinik tunniussisoqartassasoq akiliutissanillu akiliisitsisoqartassasoq.§ 5. Tunisinermi akit nikerarnerannut nalimmassaatissanut Aningaasaateqarfik siulersorneqassaaq siulersuisunit tallimanik ilaasortalinnit Naalakkersuisunit toqqarneqarsimasunit. Ilaasortat pingasut Naalakkersuisunut sinniisuussapput. Ilaasortat marluk APK-mut KNAPK-mullu sinniisuussapput, kattuffiit pineqartut innersuussuteqareernerisigut toqqarneqarsimasunik. Ilaasortat sinniisussaallu ukiunut marlukkaartunut toqqarneqartassapput.
Imm. 2. Aningaasaateqarfiup ukiumut kingullermut naatsorsuutaani erserpat ukiumi naatsorsuiffimmi Naalakkersuisut aningaasaliissutaannit aalisartunit akiliutaasimasut amerlanerusut, taava siulersuisussanik toqqaanermi APK-p KNAPK-llu sinniisaat pingasunngortinneqassapput Naalakkersuisullu sinniisaat marlunngortinneqassallutik.§ 6. Aningaasaateqarfiup malittarisassai suleriaasissaanullu aalajangersakkat taakkununngalu allannguutit Naalakkersuisunit akuerineqarsimassapput.
Imm. 2. Malittarisassat Aningaasaateqarfiup aningaasaataasa qanoq inissinneqarnissaannut, atorneqarnissaannut aammalu amerliartortikkumallugit toqqorterisarnissanut aalajangersakkanik imaqassapput.
Imm. 3. Malittarisassani aalajangersarneqarsimassaaq Royal Greenland A/S Aningaasaateqaarfimmiit tapiissutinik pissarsisinneqartassanngitsoq aammalu Aningaasaateqarfimmut akiliuteqartarnissamut pisussaaffeqartinneqanngitsoq.§ 7. Siulersuisut akit minnerpaaffissaat akiliutissallu procentiata annertussusissaa aalajangertassavaat Aningaasaateqarfmp isertissamaagai, toqqugassai pisariaqartut tunisallu amerlassusissaasut missingersuusiat tunngavigalugit.
§ 8. Siulersuisut pisariaqartitaminnik ikiorteqartassapput qaammatisiutillu malillugit ukiup naaneraniit qaammatit pingasut qaangiutsinnagit ukiumut qaangiuttumut naatsorsuutitik Aningaasaateqarfiup sulisimaneranik nalunaarutitallit Naalakkersuisunut tunniutereersimassallugit.
Imm. 2. Ukiumut qaangiuttumut naatsorsuutit suliarineqassapput naatsorsuuserinermi ileqquusut ajunngitsut naapertorlugit siulersuisunilu ilaasortanit atsiorneqassallutik.
Imm. 3. Aningaasaateqarfik Namminersornerullutik Oqartussat kukkunersiuisuinit Inatsimmi malittarisassat, Inatsimmik aallaaveqarluni malittarisassiarineqarsimasut Aningaassaateqarfiullu malittarisassaasa eqqortinneqarnissaannut qulakkeerinissamut paasissutissanik pisariaqartunik tamanik piumasaqarsinnaasunit qulangersimaneqarpoq .§ 9. Tunisinermi tapiissutit Aningaasaateqarfimmullu akiliutit naatsorsorneqarnissaannut eqqunngitsunik paatsoorutissanilluunniit paasissutissiineq imaluunniit paasissutissanik pingaaruteqartunik nipangiussineq akiliisitsinermik kinguneqarsinnaapput.
Imm. 2. Aktieselskabinit, anpartsselskabinit andelsselskabinit assigisaannillu unioqqutitsisoqartillugu ingerlatsivik nammineq akiliisussanngortinneqarsinnaavoq.§ 10. Inatsisartut Inatsisaat 1. januar 1992-imi atuutilerpoq.
Namminersornerullutik Oqartussat, ulloq 4. november 1991
Lars Emil Johansen/
Kaj Egede