Aningaasarsianit akileraarutit pillugit Inatsisartut inatsisaata allannguutissaatut Inatsisartut inatsisaat nr. 5, 23. oktober 1991-imeersoq.

 

§ 1

Aningaasarsianit akileraarutit pillugit Inatsisartut inatsisaanni nr. 5, 19. maj 1979-imeersumi, kingullermillu Inatsisartut inatsisaatigut nr. 1, 18. april 1991-imeersukkut allanngortinneqartumi makku allannguutigitinneqarput:

 

1. § 26 imatut allanneqassaaq:
"§ 26. Kapitalimi uani malittarisassat naapertorlugit inuit piginneqatigiiffiillu il.il. tamakkiisumik ilaannakortumillu akileraartussaasut nuna tamakkerlugu akileraarummik, kommunenut ataatsimut akileraarummik, kommunemut akileraarummik, nuna tamakkerlugu akileraarummik immikkut ittumik, iluanaarutisianit akileraarummik piginneqatigiiffiillu akileraarutaannik akiliisartussaapput."

2. § 26-p kingornatigut ilanngunneqassaaq:
"§ 26 A. Piginneqatigiiffiit il.il. tamakkiisumik ilaannakortumillu akileraartussaasut aningaasarsiamik akileraarusigassat 35 pct.-iinik piginneqatigiiffiit akileraarutaannik akiliisassapput."

3. § 31, imm. 2 imatut allanneqassaaq:
"Imm. 2. Piginneqatigiiffiit il.il. akileraartussaasut inuillu killilimmik akileraartussaasut imm. 1-imi pineqanngitsut aningaasarsiaat akileraarusigassat tassaapput aningaasarsiat akileraaruteqaataasussat koruuninut 100-mik agguataarneqarsinnaasunut qaninnernut ammut akunnaallisat."

4. § 54, imm. 4, oqaaseqatigiit aappaanni allassimasoq "aningaasarsianit akileraarutit" allanngortinneqassaaq imaalillugu: "piginneqatigiiffiit akileraarutaat"

5. § 79, imm. 1, oqaaseqatigiinni siullerni allassimasoq "aningaasarsianit akileraarutit" allanngortinneqassaaq imaalillugu: "piginneqatigiiffiit akileraarutaat"

6. § 82, imm. 6 imatut allanneqassaaq:
^"Imm. 6. Landskarsip suliffeqarfiutaasa aktie- imaluunniit anpartsselskabinngortinneqarsimasut piginneqatigiiffiillu Akileraartarnermi Pisortaqarfimmik kommunetut akileraarfeqartut akileraarutaat, tassani ilaallutik iluanaarutisianit akileraarutit, landskarsimut nakkartassapput. §§-it 65 aamma 68 naapertorlugit erniat tapiliussallu piginneqatigiiffiit akileraarutaannut iluanaarutisianillu akileraarutinut attuumassuteqartut taamatulli landskarsimut nakkartarlutillu landskarsimit akilerneqartassapput."

8. § 82-imi imm. 7-itut ilanngunneqassaaq:
"Imm. 7. Piginneqatigiiffiit akileraarutaat landskarsimut, kommunemut akileraarfimmut kommunenullu tamanut nakkartassapput, taamaattorli takukkit imm. 5 aamma 6, § 27 naapertorlugu ukiumi aningaasarsiorfiusumi akileraarusiissutigineqarsimasup, tassa § 28 naapertorlugu ukiumi aningaasarsiorfiusumi 1. januar-imi innuttaasut amerlassusaat malillugu akileraarusiissutigineqarsimasup, aammalu § 28 A naapertorlugu ukiumut aningaasarsiorfiusumut akileraarusiissutigineqarsimasup assigiinngissutaat naapertorlugu."

 

§ 2

Inatsisartut inatsisaat 1. december 1991-imi atuutilissaaq, atortuulissallunilu ukioq aningaasarsiorfiusoq 1992 aallarnerfigalugu.

Namminersornerullutik Oqartussat, ulloq 23. oktober 1991.

Lars Emil Johansen

/

Emil Abelsen