Kommunekkaartumik pilersaarusiornermi allanngutsaaliuisussaanermik nakkutiginnittussaaneq pillugu Namminersornerullutik Oqartussat nalunaarutaat nr. 31, 30.oktober 1991-imeersoq.
Nunaminertat atorneqarnerat pilersaarusiornerlu pillugit Inatsisartut peqqussutaanni nr. 6-imi 19. december 1986-imeersumi, Inatsisartut peqqussutaatigut nr. 1-ikkut 18. juni 1987-imeersukkut allanngortinneqartumi, paragraf 3 malillugu aalajangersarneqarpoq:
§ 1. Nalunaarummi matumani maleruagassat malillugit kommunalbestyrelsep pisussaaffigaa peqataaffigissallugu kommunemi illoqarfinnik nunaqarfinillu pilersaarusiornermi allaffissornikkullu aqutsinermi nuna tamakkerlugu allanngutsaaliuinissamik soqutigisat pingaartinneqarnissaat.
Imm. 2. Kommunalbestyrelsep pisussaaffigaa isumannaassallugu nuna tamakkerlugu eriaginninnissamik soqutigisat kommunemi pilersaarusiornermut ilanngutissallugit, aamma kommimemi illoqarfimmi nunaqarfinnilu nunani eriagisariaqartuni allanngutsaaliuisussaanermik suliaqarnerup pingaartinneqarnissaa.§ 2. Immikkut eriagalugit allanngutsaaliortariaqartuni, tamakkununnga ilaallutik illoqarfimmi illoqarfiup immikkoortortai oqaluttuarisaaneq piorsarsimassuserlu eqqarsaatigalugit eriagisariaqarnerpaajusut, illoqarfiit/nunaqarfiit pilersaarusiorneranni atuinissamik pilersaarusiornermi killissarititaasuni aalajangersakkat naammattumik assigiimmik paasineqarsinnaasut aalajangersarneqassapput, nuna tamakkerlugu allanngutsaaliuinissamik soqutigisat pingaartinneqarnerannik isumannaarisut.
Imm. 2. Allanngutsaaliugassat erseqqinnerusumik killilerneqarnerat siumoortumik kommunalbestyrelsemik isumaqatiginninniareernikkut Naalakkersuisunit aalajangerneqassaaq.§ 3. Illoqarfimmi illoqarfiup ilaani allanngutsaaliugassat allat pillugit, taakkunimnga ilaallutik illuliat 1950-ikkunniit 1960-ikkut naalernerannut sananeqarsimasut, kommunemi pilersaarusiornermi isummerfigineqassaaq qanoq annertutigisumik tamakku pigiinnarneqassanersut, taamaalilluni sananeqarsimasut immikkut ilusaat allanngortikkumanagu.
Imm. 2. Imm. 1-imi allanngutsaaliuiffissat taaneqarsimasut kommunemik isumaqatiginninniareernikkut Naalakkersuisunit erseqqinnerusumik aalajangiiffigineqassapput.§ 4. Nunaqarfinni allanilu sanaartorfigineqarsimasuni illoqarfiit avataanniittuni allanngutsaaliugassaasunik kommunalbestyrelse nunap assiliortitsissaaq uppernarsaasiortitsillunilu. Allanngutsaaliugassaatitaasut tamakku kommunemi pilersaarusiap nassuiaatitaani allaaserineqassapput ilanngunneqarlutillu, Namminersornerullutik Oqartussat nalunaarutaanni nr. 25-mi 9. november 1987-imeersumi kommunit aamma immikkoortut pilersaarusiorneqartarnerannut tunngasumi § 2, imm. 2, nr. 3 takuuk.
§ 5. Nalimaarut atuutilerpoq ulloq 15. november 1991.
§ 6. Tamatumunnga peqatigitillugu kommunekkaartumik pilersaarusiornermi allanngutsaaliuisussaanermik nakkutiginnittuussaaneq pillugu namminersornerullutik Oqartussat nalunaarutaat nr. 28 6. august 1991-imeersoq atorunnaarsinneqarpoq.
Namminersornerullutik Oqartussat ulloq 30. oktober 1991
Lars Emil Johansen/
Emil Abelsen