Kalaallit nunaanni kapisilinniarsinnaanermut akuersissutit pillugit Namminersornerullutik Oqartussat nalunaarutaat nr. 26, 19. juli 1991-imeersoq.

Inuutissarsiutigalugu aalisarneq pillugu inatsisartut inatsisaanni nr. 17 22. oktober 1990-imeersumi §§ 4, 5, 8, 11, 19, 21, 22, 28 aamma 29 naapertorlugu makku aalajangersarneqarput:

 

§ 1. Nalunaarut Kalaalliit Nunaata kujammut isuata kitaani NAFO-llu killeqarfiisa ilaasa 1-imik taaneqartartup iluani inuutissarsiutigalugu aalisarnermut tunngavoq. Tassa tassani ilaatinneqanngilaq pisanik nammineq nerisassatut aalisarneq.
Imm. 2. Tunngaviusumik killeqarfimmik (basislinien) avammut 40 sømilit avataani kapisilinniartoqaqqusaanngilaq.

§ 2. Akuersissummik tunineqarsimasut kisimik inuutissarsiutigalugu kapisilinniarsinnaatitaapput.
Imm. 2. Kapisilinniarsinnaatitaanermut akuersissut taamaallaat tunniunneqarsinnaavoq inimnut piginneqatigiinnullu il.il. taamaattumik qinnuteqarsimasunut kiisalu aamma inuutissarsiutigalugu aalisarnermik ingerlatsinermik uppernarsaatilinnut. Akuersissut angallammut qinnuteqarnermi tunuliaqutaasumut tutsinneqartassaaq.
Imm. 3. Angallatit 50 BRT/BT 50-nik taannalu qaangerlugu angissusilinnut akuersissummik tunineqarsinnaanngillat. Angallatit 30 BRT/BT 30-usut annerilluunniit rejerniarnermut atortullit kapisilinniassanngillat.
Imm. 4. Angissusaannut uuttueriaaseq inatsit nr. 203 18. maj 1977-imi siusinnerusukkullu aalajangersagaq nalunaarummi atorneqarpoq. Angallatip målebrev-ia malillugu nalunaarummi killiliussatut piumasarineqartut aalajangerneqartassapput.
Imm. 5. Nalunaarummi piumasarineqartut malillugit akuersissutinik tunineqarsinnaasut, kommunenit allagartanik tunineqartassapput, aalisarnermi suliffissuaqarnermilu naalakkersuisoq sinnerlugu, qinnuteqartullu:
1) ukiup siuliani isertitaasa 60 %-ii nammineq angallammik aalisarnermeersuussapput.
2) Nammineq kapisilinniarnermi angallat qassutillu pigissavai.
Imm. 6. Immikkut ittoqartillugu kommunep KNAPP suleqatigalugu imm. 5, l)-mi peqqussut naatsorsuutigisariaqanngilaa, pissutsit takutippassuk, pineqartut inuussutissarsiutigalugu namminersorlutik aalisartuuppata.
Imm. 7. Kommunemi kapisilittassat agguaanneqareerneratigut ullut 14-t qaangiuppata kommune Inuutissarsiornermi Pisortaqarfimmut nalunaaruteqassaaq kapisilinniarsinnaanermut akuerineqarsimasut qassiunerannik.
Imm. 8. Aalisartut akornanni naleqquttumik agguaassinissaq anguniarlugu naalakkersuisimut ilaasortap piniutinut, piniutit ilusaannut imaluunniit piniariaatsinut inerteqqutinut killilersuinernulluunniit tunngasumik aalajangiisinnaavoq. Aalajangiineq pisassaaq KNAPK-p isumaqatiginiareerneratigut, taakkimunngalu tunngasut tusagassiuutitigut nalunaarutigineqarsinnaapput.
Imm. 9. Qinnuteqaatinik itigartitsinerit aalisarnermi suliffissuaqarnermilu naalakkersuisumut maalaarutigineqarsinnaapput uunga: Inuutissarsiornermi Pisortaqarfik, Box 269, 3900 Nuuk.

§ 3. Kapisilinniarneq taamaallaat qarsorsanik qassutinillu 140 mm-inik tasillugit angitigisunik nigartalinnik ingerlanneqassaaq, nigartaasa annertussusiat 8 pct-imik nikingatinneqarsinnaatitaavoq.
Imm. 2. Qassutit nigartaasa uuttornerat pisarpoq aalisakkanik misissuisup nigartanut uuttuutaa ikkunneratigut ½ kg-mik oqimaassusilimmik ikkussiffigalugu taannalu nakkartillugu. Nigartat 20-t qimiaanut ungaseqatigiit uuttorneqassapput. Nigartat tamarmik imm. 1-imi piumasaqaat eqquutsissavaat.

§ 4. Naalakkersuisut nunatsinni ukiumi pineqartumi kapisilittassat annertussusissaat aalajangertassavaat ukiut tamaasa. Kapisilittassiineq nunani allani isumaqatigiissutit malillugit aalajangiiffigineqartassaaq kiisalu KNAPK aamma KANUKOKA isumasioreernerisigut. Ilutigalugu paggatassat kommunekkaartumillu pisassat annertussusilerneqartassapput kiisalu kapisilinniarnermi ulloq aallartiffissaq aalajangerneqassalluni. Taamatut aalajangiinerit kommunenut ataasiakkaanut, KNAPK-mut aammalu KANUKOKA-mut nalunaarutigineqartassapput.
Imm. 2. Kapisilinniarneq aamma kapisilinniarluni atortunik ningitsineq aallartinneqassanngilaq ulloq aalajangiussaq sioqqullugu.
Imm. 3. Kapisilinniarnissami pisassatut aalajangikkat taamaallaat iluaniittut pisareqqusaapput, aalisakkat ilivitsukkaarlugit.
Imm. 4. Akuersissummik pigisaqartut § 2-milu imm. 1-imiit 5 ilanngullugu piumasarisaasunik naammassinnissimasut tamarmik paggatassanik aalisarsinnaapput. Paggatassanik aalisarneq unippat kapisilinniutit qaqinneqassapput. Paggatassanik aalisarnerup uninneraniit ulloq unnuarlu qaangiuppat inuit angallatinillu ingerlatseqatigiiffiit angallatinik nalunaarummi § 2-mi imm. 1-imiit 5 ilanngullugu piumasarisaasunik naammassinnissinnaasut kommunemi pisassatut taaneqarsimasunik aalisarsinnaapput, aalisarneq taakku nungunnissaata tungaanut ingerlanneqassaaq imaluunniit § 5, imm. 4-imisut allanneqarsimasutut nalileeqqinnissap tungaanut. Kommuneni pisassanik kapisilinniarnermi angallatit kapisilinniartussat annerpaamik 30 fodsiussapput.
Imm. 5. Pisat Kalaallit Nunaanni tunitsivinnut tulaanneqassapput. Tunitsivik imatut paasineqassaaq, tassa oqartussaniit aalisagartanik timitsivittut immikkut akuerineqarsimasoq (autoriseret).

§ 5. Pisassaritinneqartut paggatassat pisarineqarlutik nungungajalerpata naalakkersuisunut ilaasortap taakku aalisarnerat timitsivinnullu tulaanneqartarnerat qaqugu unissanersoq nalunaarutigissavaa.
Imm. 2. Paggatassat qaangerlugit imaluunniit ataallugit pisarineqarsimappata naalakkersuisunut ilaasortap kommunekkuutaartumikpisassarititat aqqutigalugit aaqqiissaaq.
Imm. 3. Kommunekkuutaartumik pisassarititat aalisarlugit nungungajalerpata naalakkersuisunut ilaasortap taakku aalisarnerat tunitsivinnullu tulaanneqartarnerat qaqugu unissanersoq nalunaarutigissavaa. Naalakkersuisunut ilaasortap imm. 1-mi aamma 3-mi pisinnaaffik taaneqartoq Kalaallit Nunaanni akuersissutinik Nakkutilliisoqarfimmut tunniussinnaavaa.
Imm. 4. Naalakkersuisunut ilaasortap KNAPK isumasioqatigeriarlugu kommunekkuutaartumik pisassarititat pisarineqanngitsut kommunenut allanut nuussinnaavai. Allannguineq aatsaat pisinnaavoq naalakkersuisut ullormik taamaasiorfissamik aalajangeereerpata. Pisassat taakkua nungungajalerpata naalakkersuisunut ilaasortap qaqugu aalisarneq tunisinerlu unissanersut nalunaarutigissavai.
Imm. 5. Kapisilinniarneq tunisinerlu ulluni naliliffiusuni imm. 4-imi taaneqartuni inerteqqutaavoq.
Imm. 6. Pisariaqartillugu nalunaarutigisassat imm. 1-5-imi taaneqartut tusagassiuutitigut tusarliunneqartassapput. Piffissani aalisarnerup unitsiffissaasa kingornisigut arlaannaatigulluunniit inuutissarsiutigalugu kapisilinniarneq inerteqqutaavoq, tassunga nammineq atugassatut pisat ilanngullugit.

§ 6. Akuersissummik pigisaqartoq timisiffissamut allamut kapisileersimasoq paasineqaraangat ukiup tulliani akuersissummik arsaarneqarsinnaavoq aammalu akuersissut killilerneqarsinnaalluni.

§ 7. Nalunaarummi aalajangersakkanik unioqqutitsineq akiliisitsinermik kinguneqarsinnaavoq. Suliassallu tassunga tunngassuteqartut Inatsisartut inatsisaanni inuutissarsiutigalugu aalisarnermut tunngasumi maleruagassat malillugit suliarineqartussaapput. Akiliisitsinerit aningaasartai naalagaaffiup karsianut nakkartinneqassapput.

§ 8. Nalunaarut 22. juli 1991 atuutilissaaq. Ilutigalugulu Namminersornerullutik Oqartussat nalunaarutaat nr. 28 7. juni 1990-imeersoq kapisilinniarsinnaatitaanermut akuersissutinut tunngasoq aamma nr. 39 10. september 1990-imeersoq nalunaarummik nr. 28 7. juni 1990-imeersumik kapisilinniarsinnaanermut tunngasumik allannguinermut tunngasoq atortuujunnaarsinneqarput.

Namminersornerullutik Oqartussat, ulloq 19. juli 1991.

Kaj Egede

/

Jacob Poulsen