Nunaqqatigiit siunnersuisoqatigiivinut qinersineq pillugu nalunaarutip allannguutaa pillugu Namminersornerullutik Oqartussat nalunaarutaat nr. 5 ulloq 27. marts 1991-imeersoq.
Kommunet aggorneqarnerisa avataanniittut nunaqqatigiit siunnersui soqatigiivi pillugit Inatsisartut inatsisaanni nr. 13 ulloq 20. oktober 1988-imeersumi § 2, imm. 2 malillugu aalajangersarneqarpoq:
§ 1.
Nunaqqatigiit siunnersuisoqatigiivinut qinersineq pillugu Namminersornerullutik Oqartussat nalunaarutaanni nr. 11 ulloq 7. april 1989-imeersumi imaattunik allannguuteqartitsisoqassaaq:
§ 2, imm. 3 imaalillugu allanngortinneqarpoq:
"Imm. 3. Nunaqqatigiit siunnersuisoqatigiivinut ilaasortat ukiunut sisamanut atuuttussatut qinerneqassapput, tamatumunngalu peqatigitillugu ilaasortat tamarmik atorunnaassapput. Qinikkatut atuuffik junip aallaqqaataaniit naatsorsorneqassaaq. Naalakkersuisut ulloq qinersivissaq aalajangissavaat."
§ 2.
Nunaqqatigiit qinikkatut 1. juni 1989-imiit 31. maj 1991-imut atuuffiat sivitsorneqarpoq, atuutilissallunilu 1. juni 1989-imiit 31. maj 1993-imut.
§ 3.
Nalunaarut atortuulerpoq 1. maj 1991.
Namminersornerullutik Oqartussat, ulloq 27. marts 1991
Jonathan Motzfeldt/
Aqigssiaq Møller