Radiumi fjernsynimilu reklamit aningaasalersuinerlu pillugit Namminersornerullutik Oqartussat nalunaarutaat nr. 3, ulloq 25. januar 1991-imeersoq.
Radiukkut fjernsynikkullu aallakaatitsisarneq pillugu Inatsisartut peqqussutaanni nr. 3-mi 17. maj 1990-imeersumi §§ 27, 29 aamma 34, imm. 2 aamma 3 naapertorlugit aalajangersarneqarput:
Kapitali 1
Reklamit§ 1. Nalunaarummi uani reklamit paasineqassapput tassaasut nioqqutissanut, sullissiumanernut suliffinnullu niuerneq siunertaralugu innersuussinerit, aallakaatitsinermut akiliuteqartoqanngikkaluarpalluunniit.
Imm. 2. Aningaasanut tunngasutigut soqutigisaqaqatigiit, soorlu inuussutissarsiuteqartut peqatigiiffii sulisartullu peqatigiiffii, pillugit paasissutissanik isummanillu tusartitsineq aamma upperisarsiornermut imaluunniit politikkimut tunngasutigut isummanik tusartitsineq, siunertaqartoq pineqartut tamakkua isumaannik siaruarterinissamik/malinneqqusinissamik, tusartitsineq nalunaarut una malillugu reklamiupputtaaq, aallakaatitsinermut akiliuteqartoqanngikkaluarpalluunniit.§ 2. Reklamit taamaattuunerat erseqqissumik paasineqarsinnaasariaqarpoq, tassa imarisamikkut takutinneqarnermikkullu aallakaatitanit allanit ilisimatitsissutaareersunit immikkoortinneqartariaqarlutik.
Reklamit inissinneri annertussusiilu
§ 3. Reklamit fjernsynimi aallakaatinneqartariaqarput taamaallaat blokkinngorlugit annerpaamik minutsinik tallimanik sivisussusilimmik. Blokkit tamakku inissinneqassapput aallakaatitat akorninut.
Imm. 2. KNR-p radiukkut aallakaatitsinerata iluani reklamit aallakaatinneqartassapput taamaallaat blokkinngorlugit annerpaamik minutsinik tallimanik sivisussusilimmik aallakaatitallu akorninut inissillugit. Nunaqarfigisami radiukkut aallakaatitsinerup iluani reklamit inissinneqartarsinnaapput aallakaatitat akorninut sumulluunniit.§ 4. Reklaminik aallakaatitat sivisussutsimikkut/annertussutsimikkut sinnersimassanngilaat:
1) KNR-p fjernsynikkut aallakaatitsinerani piffissap ullormut aallakaatitsiviusup 10 procentia.
2) Nunaqarfigisami fjernsynikkut aallakaatitsinermi piffissap ullormut aallakaatitsiviusup, nammineq aallakaatitassianik aallakaatitsinernut imaluunniit aallakaatitassianik nunaqarfigisamut tunngassuteqartunik aallakaatitsinernut atorneqartup 10 procentia. Akuersissummik pigisaqartut tamarmik annerpaamik reklamit blokkiat ataaseq ullormut aallakaatittassavaat.
3) Radiukkut aallakaatitsinermi piffissap ullormut aallakaatitsiviusup 10 procentia.
Radiukkut fjernsynikkullu reklamit imaat
§ 5. Radiumi fjernsynimilu reklamit inatsisinut naapertuuttuussapput, isornaatsuussallutik, assuarnaatsuussallutik eqqortuussallutillu aammalu inoqatinut akisussaassusermik pisariaqartumik misigissuseqarluni ilusilerneqarsimassallutik.
Imm. 2. Radiumi fjernsynimilu reklamit ilanngunneqartut nioqquteqarnermi kusanartumik ileqqulersortarnermut, tamatumunnga ilanngullugu reklamit paatsuungatitsisuunnginnissaannik periaaseqartarnermut, naapertuutissapput, tak. atuisartunut pisisartunullu siunnersuisartoqatigiit, tuniniaasarneq, nalunaaqutsersuisarneq, akit aamma atuisartunut pisisartunullu maalaaruteqartarfittut ataatsimiititaliat pillugit Inatsisartut inatsisaat aamma reklaminik pitsaasuutitsinissamik ileqqussat amerlanernit akuerineqartut.§ 6. Radiumi fjernsynimilu reklamit kalaallisuujussapput imaluunniit kalaallisut allagartaqassallutik.
Imm. 2. Naalakkersuisut imm. 1-imi aalajangersakkamik sanioqqutitsisinnaapput.§ 7. Reklamit nakuuserumalernermut pissutaasinnaasunik imaqassanngillat. Imaqassanngillat toqutsinernik, nakuusernernik imaluunniit naalliutsitsinernik, aamma upperisapalaanik imaluunniit ersinermik tunngavilersorneqassanngillat.
Imm. 2. Reklamit imaqassanngillat angerlarsimaffimmi, suliffimmi imaluunniit aqqusinermi isumannaatsuutitsiniarnermut akerliusunik, imaluunniit ulorianartorsiortitsinialernissamut akisussaassuseqanngitsutulluunniit iliulernissamut pissutaasinnaasunik.§ 8. Reklamit inuit privatimik imaluunniit naalakkersuinermik suliaqarlutik inuunerannik oqaluttuassanngillat, taamaaliornissamut akuersisoqareersimanngippat. Reklamit aamma akuersisoqaqqaarsimatinnagu inummut allamut atasoq oqaluttuarissanngilaat taamaaliornissamut pisamik inuttaanit akuerineqarsimasutut isikkoqalersillugu.
Nioqqutissiat sullissinerillu il.il immikkut ittut
§ 9. Reklaminut ilanngunneqartassanngillat imigassat silaarunnartullit (baajat, viinnit, imigassat kimittuut nioqqutissiallu tamakkua assigisaat).
Imm. 2. Reklaminut ilanngunneqartassanngillat tupanik nioqqutissiat.
Imm. 3. Reklaminut ilanngunneqartassanngillat nakorsaatit.§ 10. Fjernsynimi reklaminut ilanngunneqartassanngillat aningaasanut tunngasutigut soqutigisaqaqatigiinnermut, soorlu inuussutissarsiuteqartut peqatigiiffiinut sulisartullu peqatigiiffiinut, tunngasut.
§ 11. Fjernsynimi reklaminut ilanngunneqartassanngillat upperisarsiornermut politikkimullu tunngasutigut isummat.
Imm. 2. Taamaattorli imm. 1-imi aalajangersagaq akornutissaanngilaq qinersineq pillugu aallakaatitsisarnissanut, aamma akornutissaassanani qinersineq pillugu aallakaatitsinermi ilanngussisarnissaq politikkikkut partiit ilanngutassiaannik akiligaannillu.§ 12. Iluaqutissaq siunertaralugu imaluunniit siunertaq tamanut soqutiginartoq tapersersorlugu katersuiniarneq pillugu reklamit aallakaatinneqassapput aatsaat katersuiniarneq tamanut ammasuussappat, katersuiniartitsisorlu suliffeqarfik, peqatigiiffik imaluunniit komité politiitut oqartussaasunit susassaqartunit katersuiniarnerup nalunaarutigineqarnerata akuerineqarneranut allakkamik takutitaqarpat.
Meeqqanik inuusuttunillu 18-it inorlugit úkiulinnik illersuineq
§ 13. Reklamit meeqqanut inuusuttunullu saaffiginnittut ilusilerneqartassanngillat eqqarsartaatsikkut ileqqorissaarnerulu tungaatigut taakkununnga ajoqutaasussamik. Tamakku ilusilerneqartassanngillat meeqqat inuusuttullu uppiassusiinik allanullu ilimoortuunerinik atornerluissutaasumik. Angajoqqaat perorsaasullu allat oqaasissaqartuunerannut akisussaanerannullu ajoqutaalersinneqassanngillat.
§ 14. Reklamit meeqqanut inuusuttunullu kajumissaarisuussanngilluinnarput najukkani navianartuniittarnissaannut tamakkununngartarnissaannulluunniit, nioqqutissanik ulorianartunik atuisarnissaannut imaluunniit allatut navialiffiusinnaasuniittarnissaannut.
§ 15. Reklamit inooqatigiinnermi eriaginartitanik aserorsaasuussanngillat, soorlu isumaqalersitsissanngillat nioqqutissamik pigisaqarneq imaluunniit atuisarneq meeqqat inuusuttullu meeqqanit allanit imaluunniit inuusuttunit allanit timikkut, inuttut isigineqarnikkut imaluunniit tarnimut tunngasutigut iluaqutiginerussagaat, imaluunniit nioqqutissamik pigisaqarneq atuisarnerluunniit paarlattuanik sunniuteqarsinnaasoq.
§ 16. Pingaartumik mianersortariaqarpoq reklamit meeqqanik inuusuttunillu paatsuungatitsisunngoqqunagit nioqqutissap pilerisaarutigineqartup angissusia, naleqassusia, suussusia, piunertussusia imaluunniit sunniisarnera pillugit.
§ 17. Sukkulaatit, mamakujuit, imerusuersaatit, snacks-it assigisaallu oqaasertaqartinneqassanngillat nerinivimmut taarsiullugit atorneqarsinnaanerannik.
§ 18. Meeqqat 14-it inorlugit ukiullit TV-kkut reklamini peqataatinneqartassapput peqataatinneqarnissaat avatangiisini pissusiviusunik ersersitsiniarnermut naaleqquttuussappat imaluunniit nioqqutit meeqqanut tunngasut atorneqartarnerisa nassuiarnissaannut imaluunniit takutinnissaannut pisariaqarpat aatsaat.
Kapitali 2
Aaningaasalersuineq§ 19. Nalunaarut una naapertorlugu toqqaannartumik imaluunniit toqqaannanngitsumik tapiinikkut aningaasalersugassat tassaapput radiukkut imaluunniit fjernsynikkut aallakaatitassiat, filmit, oqaluttartup nuutaanut immiussat il.il., ilanngussisup aqqata, mærkiata (logo), qanoq ittuunerata, suliarisartagaasa imaluunniit nioqqutaasa ilisîmaneqarnerulernissaat anguniarlugu.
§ 20. Aallakaatitaq taamatut aningaasalersorneqartoq erseqqissumik paasisinnaasariaqarpoq aningaasaliisup aqqata imaluunniit mærkiata (logo-p) aallakaatitap aallaqqaataanut imaluunniit naggataanut imaluunniit taakkununnga tamanut ilanngunneratigut. Tamakkuli aallakaatitap ingerlanerani ilaatinneqartariaqanngillat.
Imm. 2. Aningaasaliisup aqqa radiumi taaneqassaaq ativia suussusialu ersersinnagit. Tusartitsinerlu taanna tunuliaqutaqartinneqassanngilaq nipimik aningaasaliisup ilannguteqqusaanik.
Imm. 3. Aningaasaliisup aqqa mærkialu fjernsynimi takutinneqassapput aningaasaliisup aqqa mærkialuunniit (logo) atorlugit kisianni angalasuunngitsunik. Takutitsineq taanna tunuliaqutaqartinneqassanngilaq nipimik aningaasaliisup ilannguteqqusaanik.§ 21. Aallakaatitap aningaasalersorneqartup imarisaa inissinneralu aningaasaliisumit ima sunniuteqarfigineqassanngilaq radioqarnermik fjernsyneqarnermillu ingerlatsiviup aallakaatitanut akisussaassusia tamakkuninngalu aaqqissuinikkut nammineersinnaassusia attorlugit.
§ 22. Aallakaatitaq aningaasalersorneqartoq pilerilersitsissuussanngilaq aningaasalersuisup imaluunniit allat nioqqusiaannik pisinissamut attartornissamulluunniit imaluunniit tamakkunannga sullinneqalerumanissamut, pingaartumik tamakku immikkut ittumik erseqqissarneqassanngillat tunisaqarnerulerumanissaq siunertaralugu.
Imm. 2. Unamminerni il.il., aningaasaliisup allalluunniit nioqqusiaannik sullissiumanerinilluunniit akissarsiassartaqartuni, akissarsiassanik oqaluuserinninneq takutitsinerluunniit unammisitsinissamut il.il. piumasarineqartumit annertunerusumik paasisitsiniutigineqassanngillat.§ 23. Aallakaatitassat aningaasalersorneqassanngillat inunnit imaluunniit suliffinnit, pingaarnerutillugu tupanik imaluunniit nakorsaatinik nioqqusiortartunit.
Imm. 2. Fjernsynimi aallakaatitassat aningaasalersorneqassanngillat aningaasanut tunngasutigut soqutigisaqaqatigiinnit, soorlu sulisitsisut peqatigiiffiinit imaluunniit sulisartut peqatigiiffiinit imaluunniit politikkikkut partiinit imaluunniit peqatigiinnit upperisarsiornermut tunngasunik sammisalinnit.§ 24. Aallakaatitassiat nutaarsiassaqartitsinermut soqutiginartunullu tunngasut siuliini pineqartutut aningaasalersorneqassanngillat.
Imm. 2. Aallakaatitat soqutiginartunut tunngasut nalunaarummi uani paasineqassapput tassaasut aallakaatitat, nutaarsiassanut politikkikkut imaluunniit inuiaqatigiinnut tunngasutigut pingaaruteqartunut tunngasut, soorlu aallakaatitat nutaarsianut oqaaseqaataasut, nutaarsiat ineriartornerinik imaluunniit nutaarsianut, pisimasunut oqaluuserineqartunut il.il. politikkikkut isummanik misissuinerusut.
Kapitali 3
Nakkutilliineq, unioqqutitsineq il.il.§ 25. Nalunaarummi §§2-4 nunaqarfigisami radiukkut fjernsynikkullu aallakaatitsinermut tunngasut eqqortinneqarnissaat Kultureqarnermi, Ilinniartitaanermi Suliffeqarnermilu Pisortaqarfiup nakkutigissavaa, maleruagassanillu taakkuninnga unioqqutitsinerit assuarliutigisassallugit, tak. Kalaallit Nunaanni radiukkut fjernsynikkullu aallakaatitsisarneq pillugu Inatsisartut peqqussutaanni § 23.
§ 26. Radiukkut TV-kkullu reklamit imarisaat pillugit suliani Radiumut TV-mullu maalaaruteqartarfik aalajangiisinnaavoq, tak. nalunaarummi §§5-18.
Imm. 2. Aalajangersakkanik unioqqutitsinerit maalaaruteqartarfiup assuarliutigisinnaavai aammalu KNR imaluunniit nunaqarfigisami aallakaatitsisarnissamut akuersissummik piginnittoq peqqusinnaallugit aalajangiineq tamanut tusagassiareqqullugu, tak. Kalaallit Nunaanni radiukkut fjernsynikkullu aallakaatitsisarneq pillugu Inatsisartut peqqussutaat, § 32.§ 27. Nalunaarummi §§ 2-mit 18-imut, §§ 20-mit 24-mut unioqqutitsinerit akiliisitsissutaasinnaapput. Aammattaaq Radiumut TV-mullu maalaaruteqartarfiup peqqussutaanik sumiginnaanermut radiukkut f jernsynikkullu aallakaatitsisarneq pillugu Inatsisartut peqqusutaanni § 34, imm. 1, nr. 4, naapertorlugu akiliisitsissutaasinnaavoq.
Imm. 2. Aktieselskabit, anpartsselskabit, andelsselskabit, peqatigiif fiit assigisaalluunniit unioqutitsisimappata radiukkut fjernsynikkullu aallakaatitsisarneq pillugu Inatsisartut peqqussutaanni § 34, imm. 3, malillugu taakku pillaammik akiliisussanngortinneqarsinnaapput. Kommune imaluunniit kommunit ataatsimoortut, tak. kommunalbestyrelsit bygderådillu il.il. Inatsisartut inatsisaanni § 57, unioqqutitsisuusimappata, aalajangersagaq taanna malillugu kommune imaluunniit kommunit ataatsimoortut akiliisitassanngortinneqarsinnaapput.
Kapitali 4
Atulersitsineq il.il.§ 28. Nalunaarut atulissaaq 1. februar 1991.
§ 29. Nunaqarfigisami radiukkut TV-kkullu reklameqartarneq pillugu misiliinermik aaqqissuussineq maannakkut atuuttoq piumasarineqartut allanngortinnagit piffissami misileraaffiusumi atuutiinnassaaq (1. juni 1991-ip tungaanut).
Namminersornerullutik Oqartussat, ulloq 25. januar 1991
Jens Lyberth/
Kaj Kleist