Feriernersiuteqarneq feriernerlu pillugit Inatsisartut inatsisaat nr. 22, 25. oktober 1990-imeersoq.
Kapitali 1.
Inatsimmi pineqartut§ 1. Namminersortuni imaluunniit pisortani suliffeqarlutik sulinermik inuutissarsiuteqartut tamarmik feriernissamut aammalu feriernersiuteqarnissamut imaluunniit feriernermi akissarsiaqarnissamut pisinnaatitaapput inatsimmi matumani maleruaqqusat malillugit.
Imm. 2. Kalaallit Nunaanni Naalakkersuisut aalajangersinnaavaat, suliat ilaanni suliaqarfiilluunniit ilaanni sulinermik inuutissarsiuteqartunut inatsit ilaannaaluunniit atuutissanngitsoq, tamakkua malittarisassatigut imaluunniit isumaqatigiissutitigut feriernissaat aammalu feriernersiuteqarnissaat imaluunniit feriernermi akissarsiaqarnissaat isumagisaareersimatillugit, maleruagassat inatsimmi matumanisut pitsaatigisutut periarfissinneqarfigisaat malillugit.
Imm. 3. Kalaallit Nunaanni Naalakkersuisut aalajangiisinaapput inatsit tamarmi ilaannaaluunniit naalagaaffimmi sulisunut atuutissanngitsoq.§ 2. Inatsit una pisinnaatitaaffinnik annertunerusunik, inatsisinik allanik imaluunniit isumaqatigiissutinik sulisitsisut sulinermillu inuutissarsiuteqartut akornanni isumaqatigiissutinik killiliinngilaq.
§ 3. Kalaallit Nunaanni Naalakkersuisut inatsit una pillugu najoqqutassiuussissapput.
Kapitali 2.
Ukioq feriarnissamut ullunik katersiffik feriellu sivisussusissaa.§ 4. Ukioq feriarnissamut ullunik katersiffik tassaavoq qaammatisiutit ukiuat suliffigisimasaq. Ukioq ferierfik tassaavoq ukiup feriarnissamut ullunik katersiffiulluni suliffiup kingulia qaammatisiutit ukiuat.
§ 5. (Ukiumi ferierfissamut katersiffimmi) qaammatisiutit ukiuanni qaammammi ataatsimi sulinermi ullut ferierfissat 2,5 pissarsiarineqassapput. Qaammammit ataatsimit sivikinnerusumik sulisimanermi feriernissaq taamatulli naatsorsorneqartassaaq suliffiup sivisussusianut naleqqiullugu.
Imm. 2. Feriernissap sivisussusissaanik naatsorsuinermi suliffigisimasamut nallersuunneqassaaq inatsit una malillugu ferierneq aamma napparsimanermik, erninermik imaluunniit pinerlisimanermik pissuteqartumik sulinngittarsimaneq, tamatuma nalaani feriernersiuteqartitsineqarpat, tak. § 14.
Imm. 3. Suliffeqarfinni sapaatit akunnerannut ulluni 5-ini suliffiusartuni feriernermi ullut sulinngiffiit nalingi feriernermut ilaassapput.§ 6. Sulinermik inuutissarsiuteqartoq feriernersiuteqarluni ulluni 30-ni feriersinnaanermut ullunik katersaqarsimanngitsoq, ullut ferierfissani ullunut 30-nut ilassusertissinnaavai feriernersiaqarnani imaluunniit akissarsiaqarnani.
Kapitali 3.
Piffissaq ferierfissaq feriernerlu.§ 7. Ferierneq pissaaq ukiup feriernissamut ullunik katersiffiup kinguliani qaammatisiutit ukiuanni (ukioq ferierfissaq).
Imm. 2. Sulisitsisup sulisoq isumaqatiginiareerlugu feriernissap qaqugu pinissaa aalajangissavaa.§ 8. Sulisoq sivikinnerpaamik ataannartumik ulluni 18-ini feriersinnaatitaavoq piffissami ferierfissap nalaani. Ferierfissaq tassaavoq 1. februarimiit 30. septemberimut. Sinneruttuni sivikinnerpaamik ataannartumik ulluni 9-ni feriernissaq piumasarineqarsinnaavoq piffissap ferierfissap avataani. Feriernissat sinneruttut kittaarneqarsinnaapput.
Imm. 2. Ataatsimoortumik isumaqatigiissutit malillugit allatut isumaqatigiissut&qartoqanngippat, sulinermik inuutissarsiuteqartoq akuersisinnagu, sulisitsisup ferierfissap tamarmiusup ilaani ullut ataannartumik ferierfissat 18-it, tak. imm. 1, piffissami sulisitsisup soraarsitsinerata ullullu suliunnaarfiup akornanni inississinnaanngilai. Sulisitsisoq soraarsitsiguni taassuma tamatigut piumasarisinnaavaa soraarsitaasup feriessat sinneri piffissami soraarnissap tungaanut pissagai.§ 9. Pisariaqarpat, suliffeqarfiup ingerlannera eqqarsaatigalugu, sulisitsisup ataannartumik feriernissaq piffissap ferierfissap avataanut inississinnaavaa.
Imm. 2. Immikkoortoq 1 malillugu feriernissamik allanngortitsineq ullunik ferierfissanik ilasiffiussaaq, feriernissap allanngortitaasup 1/5-anik nalilimmik. Allanngortitsinermi aammattaaq feriernersiummut ilassut tunniunneqassaaq feriernersiutissat katersat 1,5%-annut naapertuuttoq.§ 10. Sulisitsisup sapinngisamik piaarnerpaamik, aammalu feriernissaq kingusinnerpaamik qaammatinik marlunnik sioqqullugu, sulinermik inuutissarsiuteqartoq nalunaarfigissavaa feriernissami ataannartumik feriernissartaa qaqugu pissaneraa. Feriessat sinneruttut atornissaat kingusinnerpaamik qaammat ataaseq sioqqullugu nalunaarutigineqassaaq.
Imm. 2. Immikkoortoq 1-imi taaneqartunik piffissaliinerit aatsaat saneqqunneqarsinnaapput, tamanna suliffeqarfiup ingerlannerata pisariaqavissumik pisariaqartippagu. Tamatuma assinganik sulisitsisup feriernissamik pilersaarut aalajangeriigaq allanngortissinnaavaa.§ 11. Sulisitsisumut allakkatigut isumaqatigiissuteqarnikkut sulinermik inuutissarsiuteqartoq feriessanik katersisinnaatitaasinnaavoq amerlanerpaamik ullunik 30-nik. Piffissaq katersivissaq annerpaamik ukiunik 3-nik sivisussuseqarsinnaavoq. Isumaqatigiissuteqarnermi katersivissap sivisussusissaa, katersat qanoq amerlatiginissaat aammalu feriessanik katersat qaqugu atornissaat aalajangersareerneqartassaaq.
§ 12. Sulinermik inuutissarsiuteqartoq, ferie sioqqullugu napparsimalersoq, feriep taarsernissaanik piumasaqarsinnaatitaavoq.
Imm. 2. Sulinermik inuutissarsiuteqartoq, feriernermini napparsimalersoq, feriep taartissaanik piumasaqarsinnaavoq, feriernermi nalaani minnerpaamik ulluni 6-ni napparsimasimaguni tamannalu Peqqinnissaqarfimmit sulisitsisumut uppernarsarneqarsimappat.
Kapitali 4.
Feriernersiutit imaluunniit akissarsiaqarluni ferierneq.§ 13. Sulisitsisup feriernersiut pissaritissavaa akissarsiat tamarmiusut 12,0%-at.
§ 14. Sulisitsisup aammattaaq feriernersiutissat pissaritissavai sulinermik inuutissarsiuteqartup napparsimanermik, erninermik imaluunniit sullivimmi pinerlinermik pissuteqartumik sulinngiffiata nalaani, taamaalilluni feriernersiut naatsorsorneqassalluni sulinermik inuutissarsiuteqartup sulinnginnera sioqqullugu sapaatit akunnerini 4-ni akissarsiai tunngavigalugit.
Imm. 2. Napparsimanermik pissuteqartumik sulinnginnerup nalaani feriernersiuteqarnissamut pisinnaatitaanermi tunngaviussaaq, sulinermik inuutissarsiuteqartup napparsimalertinnani sivikinnerpaamik qaammatini 12-ini sulisitsisumini suliffeqarsimanissaa. Tassani siusinnerusukkut qaammatini kingullerni 24-ni suliffigisimasaq ilaatinneqassaaq, suliunnaarsimaneq sulinermik inuutissarsiuteqartup nammineq pisuussutigisimanngippagu.
Imm. 3. Feriernersiut imm. 1 malillugu pisassaritinneqassaaq ukiumi feriessanik katersinerup iluani katillugit annerpaamik qaammatit 4-nik sivisussusillit nalingat. Sulinnginneq ukiumit katersiffimmit sivisuneruppat nappaat pinerlisimanerluunniit ataaseq pissutigalugu feriernersiutisiaq annerpaamik qaammatit 4 nalingat tunniunneqassaaq.
Imm. 4. Sulisitsisup piumasarisinnaavaa, sulisimannginneq napparsimanermik pinerlinermilluunniit pissuteqarnersoq sulinermik inuutissarsiortup uppernarsassagaa.§ 15. Sulinermik inuutissarsiuteqartut, qaammatikkuutaartunik imaluunniit sivisunerusumik atorfeqartut taamalu sapaatini nalliuttunilu, napparsimanerni assigisaanniluunniit akissarsianit ilanngaanneqarneq ajortut feriernersiummut taarsiullugu feriernerminni akissarsiaqarsinnaapput, nerisat nalingi ilanngunneqarsinnaallutik § 17-imi imm. 2 maleruagassat malillugit naatsorneqartumik. Kiisalu aamma feriernermi tapisiaq pisassaritinneqarsinnaavoq ukiumi feriessanik katersivimmi akissarsiat 1,5 %-at.
Imm. 2. Taamaattoq sulinermik inuutissarsiuteqartut immikkoortoq 1-imi taaneqartut ukiup feriessanik katersiffiup aallartinnginnerani, kingusinnerpaamilli 1. oktober ukioq feriessanik katersivik sioqqullugu, ukiumi feriassanik katersivimmi tassani akissarsiat tunngavigalugit feriernersiassat piumasinnaavaat.
Imm. 3. Suliunnaarnermi § 13 malillugu feriernersiut pisassaritinneqassaaq uklumi feriessanik katersivinngortumut ingerlasumut tunngasoq kiisalu siusinnerusukkut ukiumut feriessanik katersivimmut tunngasoq, sulinermik inuutissarsiuteqartup suliunnaarnermini feriessanik suli pisimanngisaanut tunngasoq.
Imm. 4. Napparsimanermut imaluunniit erninerup nalaani sulinngiffeqarnermut, §§ 13 - 15 malillugu feriernermi akissarsiaqarnissamut katersiffiusumut feriernermi akissarsiassaq imaluunniit feriernersiutissaq naatsorsorneqassaaq sulinngiffeqalernerup siorna sapaatit akunnerini 4-ni akissarsiaq tunngavigalugu. Piffissami tassani akissarsiat naatsorsorneqarsinnaajunnaarpata, imaluunniit isumaqatigiissutaappata, feriernermi akissarsiassaq imaluunniit feriernersiutissat naatsorsorneqarsinnaapput ukiumi feriessanik katersiffiusumi pineqartumi akissarsiat agguaqatigiissinnerat tunngavigalugu.§ 16. Feriernersiutinik feriernermilu tapisianik naatsorsuinermi, feriernerup nalaani akissarsiaq tunniunneqartoq, feriernersiarititaasoq imaluunniit feriernermi tapisiaq tunniunneqarsimasoq naatsorsuutigineqassanngilaq.
§ 17. Feriernersiutip aamma feriernermi tapisiap naatsorsornerani akissarsianut tapisiat imaluunniit akissarsiat ilaat isertitatut akileraarutaasussaanngitsut ilanngunneqassanngillat. Sulisitsisulli pisassaritissavai feriernersiutit aamma feriernermi tapisiat soraarnerussutisiassanut il.il. sulinermik inuutissarsiuteqartup akiliutaaneersut.
Imm. 2. Akissarsiaq tamakkiisumik ilaannakortumilluunniit nerisaqarnermit ineqarnermillu pippat, taakku nalingi naatsorsorneqassapput Akileraartarnermut pisortaqarfiup ukiumut feriessartik katersivimmut tunngasumik angissutsinut aalajangersagai tunngavigalugit, taakku nalingat illugiit isumaqatigiissuteqarnerisigut anginerusussatut aalajangersagaanngippat.§ 18. Suliffeqarfik feriernerup nalaani matoqqatinneqarpat, sulinermik inuutissarsiuteqartut, suliffeqarfiup matoqqanerani ulluni tamani feriernissamut pisinnaatitaanngitsut, matoqqaneq pissutigalugu, feriernersiassanik siuliini aalajangersakkat malillugit pisassamik saniatigut immikkut feriernersiaqarnissamik piumasaqarsinnaanngillat.
Kapitali 5.
Aningaasat tunniunneqarneri§ 19. Feriernersiassaq katersaq tunniunneqarsinnaalissaaq ulloq ferialerfik siulleq sioqqutilaannguarlugu.
Imm. 2. Feriernersiassaq tamakkerlugu tunniunneqarsinnaavoq, ullut ferierfissat ataatsimut ataannartumik sivikinnerpaamik ullut 16-iuppata.§ 20. Ukiumut feriessanik katersivimmi feriernersiassaq tunniunneqarsinnaavoq ukiup feriarfiusup aallartinnerani, sulinermik inuutissarsiuteqartoq ferielinngikkaluarpalluunniit,
1) feriessanik katersinikkut feriernersiassaq 1000 kr.-nit mikineruppat,
2) sulinermik inuutissarsiuteqartoq 60-nik ukioqalereersimappat, aammalu inuutissarsiorfimmit qimagutereersimappat.§ 21. Suliffeqarfiup ingerlanera pillugu feriernissaq pisinnaasimanngippat, taamalu feriernersiassat tunniunneqanngitsoorsimappata, feriernersiassat tunniunneqarsinnaapput ukiup ferierfissap tulliup aallartinnerani, tak. §§ 9 - 11.
§ 22. Sulinermik inuutissarsiuteqartut, nunanut allanut nuuttut tassani sivisuumik nunassillutik, nuulernerminni feriessanik katersamikkut feriernersiassatik tigusinnaavaat, ferielinngikkaluarunilluunniit. Danmarkimi Savalimmiunilu nunassinneq nunani allani nunassinnermut sanilliunneqarpoq.
Kapitali 6.
Nalinginnaasumik aalajangersakkat§ 23. Isumaqatigiissut sunaluunniit, feriernersiassanik atorunnaarsitsiffiusoq, atorsinnaanngilaq.
Imm. 2. Feriernersiassanik allanut nuutitsinermik isumaqatigiissut sunaluunniit atorsinnaanngilaq, taamaaqataanillu piumasarineqartoq eqqartuussivikkut malersorneqartussanngortitaasinnaanani.§ 24. Feriernersiassaq, feriernermi akissarsiassaq imaluunniit feriernermi tapisiassaq ukiup ferierfissaagaluup naanerani ukiut 5-it qaaniunnerini pisoqalereersimassaaq, tak. inatsit nr. 274 22. december 1908-imeersoq.
Imm. 2. Pisassaq pisoqalisoortoq feriefondimut nakkartussaavoq.
Imm. 3. Immikkoortoq 1 atorneqarsinnaassanngilaq, sulinermik inuutissarsiuteqartoq sulisitsisumut isumaqatigiissuteqarnikkut feriessanik katersisinnaatitaasimappat aammalu tamanna fericfondimut uppernarsarneqarsinnaappat.§ 25. Kalaallit Nunaanni Inatsisartut feriefondi pillugu erseqqinnerusunik malittarisassiussapput.
Kapitali 7
Isumaqatigiinngissutit.§ 26. Inatsit una malillugu isumaqatigiinngissutaalersut nunagisami kredsret aqqutigalugu aalajangiiffigine qartassapput.
§ 27. Inatsisip §§-iinik 8 - 10 aamma §§-iinik 19 - 22 mik unioqqutitsinerit akiliisataanermik kinguneqartussaapput.
Kapitali 8.
Atulersitsineq.§ 28. Inatsit atulerpoq ulloq 1. april 1991. Taamaattorli § 24-mi imm. 2-p aamma 3-p aammalu § 25-p atulerfissaat Kalaallit Nunaanni Naalakkersuisut immikkut aalajangissavaat.
Kalaallit Nunaanni Namminersornerullutik Oqartussat, ulloq 25. oktober 1990.
Jonathan Motzfeldt/
Emil Abelsen