Aningaasarsianit akileraarutit pillugit Inatsisartut inatsisaata allannguutissaatut Inatsisartut inatsisaat nr. 15, 18. oktober 1990-imeersoq.

 

§ 1

Aningaasarsianit akileraarutit pillugit Inatsisartut inatsisaanni nr. 5-imi 19. maj 1979-imeersumi, kingullermik Inatsisartut inatsisaatigut nr. 2-kkut 17. maj 1990-imeersukkut allanngoirtinneqartumi, makkua allannguutigitinneqassapput:

1. § 17-imi imm. 2-p kingornagut immikkoortutut nutaatut ivertinneqassaaq:
"Imm. 3. Eqqugassat, eqquiniutissatut ileqqaakkat pillugit inatsit naapertorlugu eqquiniutissatut kontolinnut aningaaserivinnit eqqugassiissutigineqartartut, aningaaseriviup aningaasairsiaasa akileraaruteqaataasussat naatsorsornerini ilanngaatigineqarsinnaanngillat."

2. § 24-imi imm. 1-ip kingornagut immikkoortutut nutaatut ivertinneqassapput:
"Imm. 2. Aningaasarsiat akileraaruteqaataasussat naatsorsorneqarneranni danskit aningaaseriviini il.il. soraarnerussutisiaqalernissamut ileqqaarutitigut kiisalu Lønmodtagernes Dyrtidsfond-imi uninngasuutinit erniasiat ilanngunneqartassanngillat.
Imm. 3. Sulisartup pisortani atorfeqartup aningaasarsiaasa akileraaruteqaataasussat naatsorsorneqarneranni ilanngunneqartassanngillat soraarnerussutisiaqalernissamut ileqqaakkanut sulisitsisup akiliutai, soraarnerussutisiaqalernissamut ileqqaakkat makkunatut iluseqartinneqarpata: naafferartumik akilersuilluni sillimmasiinerit, soraarnerussutisiaqalernissaq siunertaralugu naafferartumik akilersuilluni ileqqaakkat naafferartumik tunniunneqartussat, sillimmasiinerit akit nikerarneri najoqqutaralugit iluarsineqartartut, akit nikerarneri najoqqutaralugit ileqqaakkat, ataatsikkut akiliilluni sillimmasiinerit aammalu soraarnerussutisiaqalernissamut ileqqaakkat ataatsikkut tunniunneqartussat, aaqqissuussineq sulisumut pinngitsoorani illeqqaartitsissutaappat akileraartussaanerullu siornatigut pilersinneqarsimappat. Taamaattorli aaqqissuussineq soraarnerussutisiaqalernissamut ileqqaakkat akileraaruserneqarnissaannut inatsimmi § 50 naapertorlugu akileraarusigassanngortinneqarsimappata, sulisitsisup akiliutai aningaasarsiat akileraaruteqaataasussat naatsorsorneqarneranni ilanngunneqartassapput.
Imm. 4. Aningaasarsiat akileraaruteqaataasussat naatsorsorneqarneranni soraarnerussutisiaqalernissamut aaqqissuussinerit ataavartumík tunniunneqartartussat maanaannaq atorunnaarsinneqartut nalingat il.il. ilanngunneqartassanngillat, takuuk § 17, imm. 1, nr. 4."

 

§ 2

Imm. 1. Inatsisartut inatsisaat 1. januar 1991-imi atuutilissaaq.
Imm. 2. § 1, nr. 1-imi aalajangersagaq ukioq aningaasarsiorfiusoq 1990 aallarnerfigalugu atuutilerpoq.

Namminersornerullutik Oqartussat, ulloq 18. oktober 1990.

Jonathan Motzfeldt

/

Emil Abelsen