Naartunermi, erninermi qitornavissiartaarnermilu ullormusiat millisitat kiisalu qitornavissiartaarnenni sulinngiffeqarneq ullormusiaqarnerlu pillugit Namminersornerullutik Oqartussat Nalunaarutaat nr. 52 ulloq 20. december 1990-imeersoq.

Naartunermi, erninermi qitornavissiartaarnermilu sulinngiffeqarneq ullormusiaqarnerlu pillugit Inatsisartut peqqussutaanni nr. 7-imi 22. oktober 1990-imeersumi § 2 inun. 5, § 14 aamma § 17 imm. 3 naapertorlugu makku aalajangersarneqarput:

 

Ullormusiat millisitat

§ 1. Ullormusiat millisitat tunniunneqartussaatillugit ullormusiassap naatsorsornissaanut nalunaaquttap akunnermusiassarititaq ullormusiassarititamut sukkulluunniit atuuttumut apparneqartassaaq.
Imm. 2. Ullormusiat millisitat taamaallaat tunniunneqartassapput sapaatip akunneranut suliffimmit qimagusimasarneq sivikinnerpaamik nalunaaquttap akunnerinik 4-nik sivisussuseqarsimagaangat.

 

Qitornavissiartaarnermi sulinngiffeqarneq ullormusiaqarnerlu

§ 2. Nalunaarummi matumani qitornavissiartaartoq tassaavoq inuk isumaglnninnermut ataatsimiititamit meeqqamik qitornavissiassatut akuerineqarnissaq siunertaralugu qitornarsiartaartoq.

§ 3. Qitornavissiartaartut sulinngiffeqarnissamut ullormusiaqarnissamullu pisinnaatitaapput meeqqap tiguneraniit sapaatit akunnerisa 18-it qaangiunnissaannut, isumaginninnermut ataatsimiititaq aalajangersimappat qitornavissiartaarnikkut angajoqqaanngortut aappaa meeqqap tiguneranut atatillugu sulinngiffeqassasoq.
Imm. 2. Imm. 1 malillugu isumaginninnermut ataatsimiititap aalajangernerata qitornavissiartaarnikkut angajoqqaanngortut sulinngiffeqarnermut ullormusiaqarnermullu tunngatillugu angajoqqaaviusutut naatsorsuunneqartilissavai. Isumaginninnermulli ataatsimiititaq aalajangersinnaavoq qitornavissiartaarnikkut angajoqqaanngortut sapaatit akunneri 18-it tamakkerlugit aveqatigiissinnaagaat.
Imm. 3. Qitornavissiartaartut meeraq nunanit allaniit aassappassuk isuiaaginninnermut ataatsimiititaq aalajangersinnaavoq sulinngiffeqarneq ullormusiaqarnerlu nunami allamiinnerup nalaani aallartinneqassasoq, tassa ullormit meeqqap tiguneqarfianiit.

§ 4. Nalunaarut manna atortuulersinneqarpoq 1. januar 1991 aallarnerfigalugu.

Namminersornerullutik Oqartussat ulloq 20. december 1990

Moses Olsen

/

Martha Labansen