Isumaginninnikkut siusinaartumik pensionit, inummut tapiutit isumaginninnikkullu pensionit akiligassanut ilanngarneqartarnerat pillugu Namminersornerullutik Oqartussat Nalunaarutaat nr. 48 ulloq 29. november 1990-imeersoq.

Isumaginninnikkut pensionit, utoqqarnik paaqqinniffiit il.il. pillugit inatsisartut peqqussutaanni nr. 8-mi 22. oktober 1990-imeersuni § 6, § 16 aamma § 20 imm. 2 tunngavigalugit makku aalajangersarneqarput:

 

Isumaginninnikkut siusinaartumik pensionit

§ 1. Inuit inuuniarnerminni aningaasartuutinut naleqquttunut pisariaqartunullu matusissutissanik qulakkeerissunneqarsimanngitsut taamaattumillu pilersorneqarnissamik ataavartumik pisariaqartitsisut, isumaginninnikkut siusinaartumik pensionisiaqartinneqalersinnaapput:
1) qinnuteqartup inuutissarsiorsinnaassusia ataavartumik appariaateqarsimagaangat,
2) qinnuteqartoq inuttut atukkat pissutigalugit suliffissamik naleqquttumik ukiui, peqqissusia sumiiffimmilu pissutsit apeqqutaatillugit suliffissarsissunneqarsinnaanngippat, tassa sivisuumik suliffissaqarsimannginneq imaluunniit ulluinnarni inuttut atugarliuuteqarneq aammalu ilaqutariissutsimut tunngassuteqartut atugarliuutigineqarnerat ilanngullugit naatsorsuutigineqartassapput, imaluunniit
3) qinnuteqartup toqusoqarneranut inooqatigiinnerulluunniit taamaatinneranut attuumassutilinnik inuttut atukkat allanngorsimaneri pissutigalugit pilersorneqarnissamut tunngavissarititaasut annaasimappagit.

§ 2. Isumaginninnikkut siusinaartumik pensionisiaqartitsisalernissami aamma patsisissaatitaavoq makku iluaqutigalugit qinnuteqartoq najukkamini suliffissamik naleqquttumik neqeroorfigineqarsinnaassanngitsoq:
1) ilinniagaqartitaaneq nangitsiviusumilluunniit ilinniartitaaneq, imaluunniit
2) suliamut allamut ilinniartitaaneq, imaluunniit
3) innarluutigisinnaasat ajoqusersimanerisinnaasalluunniit kingunerinik iluaqusiisinnaasumik sungiusarneqarneq.
Imm. 2. Qinnuteqartuppiginnaanngorsaaqqiinissamut pilersaarusiaq pimoorussilluni suleqataaffigissavaa. Pilersaarusiaq qinnuteqartup peqqissusia kingusinnerusukkullu sulilernissamik periarf issiisinnaasutut naleqqussagaassaaq.
Imm. 3. Qinnuteqartuppiginnaanngorsaaqqiinissamut pimoorussilluni suleqataassaaq, naak piginnaanngorsaaqqiinissaq taassumaluunniit ilaa najukkap avataani pissagaluarpat, najukkalli avataani piginnaanngorsaaqqiinermut naaggaartoqarsinr.aavoq tamanna inuttut atukkat ilaquttanullu tunngassuteqartut pissutigalugit naleqquttuusorineqanngippat. Qinnuteqartorli katsorsartinnissamut peqataajumanngissinnaavoq peqqissutsiminut taamaaliornissaq angisuumik aarlerinaateqarsinnaasutut isigiguniuk.

§ 3. Oqartussaasoqarfiit assigiinngitsunik suliallit isumaginninnermi suliassat pillugit suleqatigiinnissaannut inatsisartut peqqussutaat malillugu isumaginninnermut allaffiup siusinaartumik pensioneqalernissaq pillugu inassutigisaa oqartussaasoqarfiit assigiinngitsunik suliallit suleqatigiiffianni suliarineqartassaaq, suliassaq isumaginninnermut ataatsimiititami aalajangiiffigineqartinnagu.
Imm. 2. Isumaginninnikkut siusinaartumik pensioneqalerniarnermut atatillugu suliassat suliarineqarneranni peqqinnissamut isumaginnittoqarfik suliffissarsiuussisarfillu ilaatitaqartassapput. Oqartussaasoqarfiit allat suliamut attuumassuteqartut, matumani aamma atuarfiit, ilinniarfiit, politiit imaluunniit pinerluuteqarsimasunik isumaginnittoqarfik pisariaqartitsineq naapertorlugu eqqartukkap oqaluuserineranut peqataaqquneqarsinnaapput.

§ 4. Isumaginninnermut ataatsimiititap isumaginninnikkut siusinaartumik pensioneqalernissamut qinnutigisamik ataatsimiissuteqarneranni makku ilanngullugit paasissutissiarineqarsimasassapput:
1) nakorsapnalunaarutaa, isumaginninnermut ataatsimiititamit akilerneqartussaq,
2) suliffissarsiuussisarfimmit nalunaarut,
3) isumaginninnermi (ulluinnarni) atukkat pillugit nalunaarut, aamma
4) oqartussaasoqarfiit assigiinngitsunik suliallit inassutaat.
Imm. 2. Suliani ataasiakkaani oqartussaasoqarfiit allat peqataaffigisimasaat pineqartillugit taakkunannga oqaaseqaatit aamma saqquntmiussassanut ilanngunneqartassapput.

 

Inummut tapiutit

§ 5. Inummut tapiutinik akuersissuteqartoqartassaaq inuit qinnuteqartut ataasiakkaat pisariaqartitaasa nalilersornerisigut aningaasartuutinut aalajangersimasunut imaluunniit aningaasartuutinut ataasiaannakkanut tamakkiisumik ilaannakortumilluunniit matusissutissanik, matusissutissiinnginnikkut pensionisiallip aningaasartuutit nammineq akilissasuugunigit aningaasatigut amikkisaalernissaa ilimanaateqassasorinarpat.

§ 6. Inuk isumaginninnikkut pensioninik pisartagaqalersinneqaraangat isumaginninnermut ataatsimiititap pensionisiaqalersoq tamakkiisumik naliliiffiginiartassavaa isummerfiginiarlugu aningaasartuutinut aalajangersimasunut ingerlaavartunullu matusissutissanik inummut tapiutinik aningaasaliisoqartariaqarnersoq. Naliliineq pisassaaq qinnuteqarto- qanngikkaluaraangalluunniit, qularnaarniarneqartassaarlu pensionisiallip ulluinnarni pisariaqartitaminut ulloq manna tikillugu inuunermini atukkaminut naleqquttunik naammaginartunillu kiisalu sumiiffimmi pissutsinut naapertuuttumik atugassaqarnissaa.
Imm. 2. Inummut tapiutit ataavartumik tunniuttagarineqartussanngorlugit sivisunerpaamik ukiumut ataatsimut akuersissutigineqaisinnaapput illup attartorneranut aningaasartuutinut aalajangersimasunut ikiorsiissutitut, attartornermi aningaasartuutinut (kiassarneq, innaallagiaq, telefoni il.il.), sillimmasiissutinut, inunnik angallassissutinut (buskortinut, taxarnermulluunniit), angerlarsimaffimmi ikiorteqarnermut il.il..

§ 7. Inununut tapiutit ataasiaannakkanik ikiorsiissutitut aningaasaliissutigineqarsinnaapput ataasiaannakkanik aningaasartuutinut tamakkiisumik ilaannakortumilluunniit akiliutissatut, isarussanut, atisanut, pisattanut, ikiorsiiniutinut immikkut ittunut, illup iluarsagassartaanut pisariaqartunut, angalanermut aningaasartuutinut naleqquttunut, ilisinermi aningaasartuutinut il.il.
Imm. 2. Malittarisatut pingaarnertut inummut tapiutit akiitsunut kinguaattoorutinut aningaasaliissutigineqarsinnaanngillat. Isumaginninnermulli ataatsimiititap inummut tapiutit akiitsunut kinguaattoorutinut aningaasaliissutigisassavai aningaasartuutinut aalajangersimasunut akiitsut pensioneqartitsinerup nalaani tamakkiisumik akiliisinnaannginnerup kinguneranik pilersimappata.
Imm. 3. Illup attartorneranut akiitsut kinguaattoorutit,attartornermut akiligassanut aalajangersimasunut akiitsut il.il. isumakkeertinniarneqartassapput imaluunniit pisortanit ikiorsiissutit atorlugit aningaasaliiffiginiarneqartassallutik, tamakku pisortanit allakkut pilersorneqarnerup nalaani tamakkiisumik akiliisinaannginnerup nalaani pilersimagaangata.
Imm. 4. Isumaginninnermut ataatsimiititap pensionisialik akiitsuulersimasut isumakkeertinniarneqartarneranni ikiortassavaa.

§ 8. Isumaginninnermut ataatsimiititap pensionisiallip inununut tapiutinik pisinnaatitaaneranik apeqqut nalileqqinniartassavaa paasigaangamiuk pissutsit allannguuteqarsimasut.

§ 9. Inummut tapiutinik pisarnissamik aalajangiisoqarsinnaavoq, naak pensionisialik isertitarisartakkat pissutigalugit pensionit tunngaviusumik aningaasartaannik pisanngikkaluarpalluunniit.
Imm. 2. Pensionisiallit isumaginninnikkut paaqqinniffinnut nuussimasut inummut tapiutinik pensionisialinnut angerlarsimaffimminniittunut najoqqutassiat malillugit pisinnaatitaapput.

 

Isumaginninnikkut pensioninit ilanngaassisarneq

§ 10. Isumaginninnikkut pensioninit piumasaqaatit eqqartuussisarnermi inatsisip akissarsianit tunniuttakkanilluunniit allanit arsaarinnittarneq ilanngaassisarnerluunniit pillugu aalajangersagai malillugit arsaarinnissutitut ilanngaassissutitullu akiliutigitinneqarsinnaanngillat. Isumaginninnermulli ataatsimiititap pensionit amerlanaarlugit tunniunneqartarsimatillugit, pensionisiallip eqqunngitsumik paasissutissiisimaneranik pissuteqartut imaluunniit nammineq inuttut aningaasaqarnerminiluunniit annertuumik allannguutit nalunaarutiginngitsoorsimanerinik pissuteqartut, tunniussassanit peersinnaavai.
Imm. 2. Tunngaviusumilli aningaasartanik amerlanaarinnissutit tunniussassanit aatsaat peerneqartassapput amerlanaarinnissutit amerlasimagaangata, imaappoq minnerpaamik 10%-iusimagaangata. Inummut tapiutit tunniussassaagaluit tunngaviusumik aningaasartanut amerlanaarlugit utertitsissutinsat matusissutissaattut tamakkerlugit peerneqarsinnaapput, eqqortumik paasissutissiisoqarsimagaluarpat taakku akuersissutaasimanavianngikkaluartut oqaatigineqarsinnaappat.

§ 11. § 9 malillugu tunniussassanit utertitsissutissat matusissutissaannik peersisinnaassagaanni imatut iliortoqartassaaq:
1) Isumaginninnikkut pensionit saniatigut allanik isertitaqartoqartanngippat qaammammut pensionisiassat akileraarutinut ilannjarneqareernerisa kingorna annerpaamik 10%-ii peerneqartarsinnaapput.
2) Isumaginninnikkut pensionit saniatigut allanik isertitaqartoqartarpat qaammammut pensionisiassat akileraarutinut ilanngarneqareernerisa kingorna annerpaamik 15%-ii peerneqartarsinnaapput.

 

Atortuulersitsineq

§ 12. Nalunaarut manna atortussanngortinneqarpoq ulloq 1. januar 1991 aallarnerfigalugu.

Namminersornerullutik Oqartussat ulloq 29.11.1990

Moses Olsen

/

Martha Labansen