Iliveqarfiit ungaloqartinneqarneri, avatangiisaat il.il pillugit Namminersornerullutik Oqartussat nalunaarutaat nr. 47, 28. november 1990-imeersoq.
Iliveqarfiit pillugit Inatsisartut peqqussutaanni nr. 6-imi 17. oktober 1990-imeersumi § 5 malillugu makku aalajangersarneqarput:
§ 1. Iliveqarfiit avataat erseqqissumik nalunaarneqarsimassapput, taamalalilluni sumut killeqarneri erseqqissumik takuneqarsinnaaqqullugit.
Imm. 2. Iliveqarfiliornermi iliveqarfiulluunniit allineqarnerani iliveqarfimmiit kuuffiit najugaqarfinnut najugaqarfissatulluunniit pilersaarutigineqartunut kuunnginnissaat isumannaarneqassaaq, taamaatullu kuuffiit taakku iifteqarfimmut imeqarfissatulluunniit pilersaarutigineqartunut imaluunniit taakku avaqqullugit isumannaallisaanermi killissarititaasunut kuunnginnissaat aamma isumannaarneqassalluni.
Imm. 3. Iliveqarfiliassatut iliveqarfiulluunniit allineqarnissaanut pilersaatutit peqqinnissakkut oqartussanut akuerisassanngorlugit saqqummiunneqassapput.§ 2. Ungalut killeqarfittulluunniit nalunaarsuutit pinngortitap atortussarititaanit sapinngisamik sanaajussapput, soorlu ujaqqanik issuntilluunniit qarmagaallutik, ujaqqanilluunniit inussuliaallutik. Pisariaqarfiatigut ungalut qisunnit ungerutissianilluunniit sanaajusinnaapput iliveqarfiup pissusianut naleqquttunngorsakkat.
§ 3. Iliveqarfiit allineqarnerini nutaartaasa ungaluisa pisoqqat ungalui sapinngisamik assiginiassavaat.
§ 4. Ungalutoqqat ujaqqat qarmakkalluunniit piiarneqaratilluunniit, nuunneqaratilluunniit atortussanik allanik taarserneqassanngillat Ilagiit kalaallit Siulersuisui akuersissuteqaqqaarsimatinnagit.
§ 5. Innaallagissap aqqutaanut napparutit assigisaalluunniit iliveqarfimmut ungaluinulluunniit inissinneqassanngillat, innaallagissallu aqqutai iliveqarfik qulaallugu aamma ikaartisimaneqassanatik.
§ 6. Inissap sapinngisamik atorluarneqarnissaa siunertaralugu ilerfit inissitsiterneqassapput, sapinngisarlu naapertorlugu torersumik tulleriiarlugit aqqusineerannguanik amitsunik akunnilersorneqarlutik.
Imm. 2. Ilerfit pioreersut aatsaat allanngortinneqassanngippata iliveqarfik aaqqivigineqarsinnaallunilu allineqarsinnaavoq.§ 7. Ilivissat ataasiakkaat inissaasa qanoq tulleriinnilimmik atorneqarnissaat ilagiit sinniisaasa pilersaarusiussavaat.
§ 8. Ukiakkut apisalersinnagu ukiup ingerlanerani ilerfiorfigineqartussat naammattut napasunik assigisaannilluunnit nalunaaqutserneqartussat ilagiit sinniisaannit togqarneqassapput.
Imm. 2. Naleqquttuutinneqarpat iliveqarfiup ilaani immikkoortortalersuisoqarsinnaavoq timip arsaasa, meeqqat ilerfisa timilluunniit asiusimagaluartut amiakkuisa ilineqarfigisinnaasaannik.§ 9. Ilerfit ataasiakkaat pilersinneqaraangata iliveqarfimmi tassani ileqquusut malinneqartassapput. Tamatumali atortinngitsoorneqarnissaanut ilagiit sinniisaat akuersissuteqarsinnaapput.
§ 10. Sanningasut qisuit, ilerfup ungalui, ujarattaat assigisaalluunniit eqqaassutissat angissutsimikkut ilutsimikkulluunniit iliveqarfimmut kusanaallisaataasinnaasut, allagartaalluunniit atortuiluunniit naleqqutinngitsutut isigineqarsinnaasut iliveqarfimmi inissinneqassanngillat, ilagiillu sinniisaat aalajangersinnaapput eqqaassutissat taamaattut peerneqassasut.
Imm. 2. Eqqaassutissap peerneqarnissaanik ilagiit sinniisaasa aalajangiinerat sap. ak. sisamat qaangiutsinnagit Ilagiit kalaallit Siulersuisuinut naammagittaalliuutigineqarsinnaavoq.§ 11. Ilerfit torersuutinneqarnissaannik aalajangersakkat eqqortinneqarnissaat siunertaralugu ilerfit tamarmik napasumik normulerfeeralerneqassapput, atortussamillu aserujaatsumik erseqqissumik normulerneqarsimassallutik, allatulluunniit erseqqissumik nalunaarneqarsimassallutik.
§ 12. Qinnuteqartoqarnera naapertorlugu, pissutsillu taamaliornissamut periarfissaqartitsippata, soorlu utoqqaassuseq, inissaqartitsineq assigisaalluunniit tunngavigalugit ilagiit sinniisaat toqusup aappaanut inooqataanulluunniit toqusup ilerfata saniani ilivissaqartitsisinnaapput. Ilivissatut inissaq immikkoortinneqartoq iliveqarfiit pillugit allattaavinnut allanneqassaaq, normussamillu suli napparneqanngitsumik allatulluunniit nalunaaqutserneqassalluni.
Imm. 2. Aappaq inooqataasorluunniit toqukkut qimataasoq toqusup iliverneqarneraniit ukiut 50-it qaangiunnissaasa tungaannut ilivissamitut innersuussutigineqarsintasuni ilineqarsinnaatitaavoq.
Imm. 3. Aappap inooqataasulluunniit toqukkut qimaguteqqaartup saniani ilineqarsinnaatitaaneq iliveqarfiup iliveqarfittut atorneqarsinnaaffia sinnerlugu sivisussuseqarsinnaanngilaq, takuuk iliveqarfiit pillugit Inatsisartut peqqunsutaanni § 10, imm. 1.§ 13. Iliveq toqusup ilaqutaanit aserfallatsaalineqassaaq.
Imm. 2. Ilerfit pisoqqat aserfallatsaalinerlukkallu torersarneqarnis?aat ilagiit sinniisaasa akisussaaffigaat.§ 14. Nalunaarummi matumani aalajangersakkat malillugit iliveqarfiup ingerlanneqarnerata nakkutigineqarnissaa ilagiit sinniisaasa pisussaaffigaat.
§ 15. Nalunaarut atortuulersinneqarpoq 1. januar 1991 aallarnerfigalugu.
Namminersornerullutik Oqartussat, 28. november 1990
Jonathan Motzfeldt/
Kristian Mørch