Aningaasarsiat A-t pillugit Namminersornerullutik Oqartussat nalunaarutaat nr. 45, 1. november 1990-imeersoq.

Aningaasarsianit akileraarutit pillugit Inatsisartut inatsisaanni nr. 5-imi 19. maj 1979-imeersumi, kingusinnerpaamik Inatsisartut inatsisaatigut nr. 15-ikkut 18. oktober 1990-imeersukkut allanngortinneqartumi, § 37, imm. 2 aamma imm. 4, § 38, imm. 1 aammalu § 91 naapertorlugit makku aalajangerneqarput:

 

Aningaasarsiat A-t

§ 1. Inatsisartut inatsisaanni § 37, imm. 1-imi taaneqartut saniatigut makku aningaasarsiatut A-tut naatsorsuunneqarput:
1) soraarnerussutisiat, aningaasat utaqqiisit akiliutaasartullu akileraaruteqaataasussat taakku assigisaat, taakku siusinnerusukkut atorfeqarsimanermut atasuuppata,
2) isumaginninnermi pisartakkat utoqqarnillu paaqqinniffiit il.il. pillugit Inatsisartut peqqussutaat naapertorlugu isumaginninnermi tunngaviusumik pisartakkat,
3) soraarnerussutisiat (pisartakkatigoortumik akiliutisiat) akileraaruteqaataasussat § 17, nr. 4-imi taaneqartutut ittut,
4) naartunermut, erninermut meerarsiartaarnermullu atatillugu sulinngiffeqartarneq ullormusiaqartarnerlu pillugit Inatsisartut peqqussutaat naapertorlugu ullormusiat tunniunneqartartut,
5) aningaasarsianut annaasanut imaluunniit suliffissaagaluanut annaasanut taartisiat,
6) kisimiilluni erinarsortartutut nipilersortartutullu, timersornikkut aliikkusersuisartutut, nipilersortartutut, atuakkiortutut, allatut tamatigut eqqumiitsuliortutut, timersortartutut, aviisitigut allaaserinnittarnikkut, dommeritut, eqqartuusseqataasutut aamma illersuisutut free-lancetullu nutserisartutut akissarsiat aammalu
7) Kalaallit Nunaanni sulinermi ajutoornermi sillimmasiinissamut peqqussut, tak. Kalaallit Nunaanni sulinermi ajutoornermi sillimmasiinissamut peqqussut, naapertorlugu akiliutisiat makku:
a) inatsisitigut piumasaasut malillugit ajunaarnissamut sillimmasiineq najoqqutaralugu sulliveqarluni akissarsiortunut ullormusiat,
b) innarluuteqarnermut taartisiat aamma qimataasunut taartisiat, taartisiat ukiumut pisassarititatut tunniunneqarpata,
8) Aalisarnermit, piniarnermit, aallaaniarnermit, savaateqarnermit tuttuuteqarnermillu tunisassianik Kalaallit Nunaanni tunisinermi isertitat, piginneqatigiiffiit, peqatigiiffiit assigisaasaluunniit tunisarinngippatigit.

 

Aningaasarsiat aningaasarsiatut A-tut isigineqanngitsut

§ 2. Aningaasarsiaasartut ilaat makku aningaasarsiatut A-tut isigineqanngillat:
1) kiffartuussinermi kajumissaatissiissutit (drikkepenge) aamma
2) inuinnaat illumi ikiortiminnut ikiortiminnullu allanut aningaasarsiarititaat, suli.sitsisoq taassumaluunniit aapparisaa aningaasarsiat akileraaruteqaataasussat naatsorsorneranni pineqartumut akissarsiarititat ilaannik sumilluunniit ilanngaateqarsinnaanngippata.

 

Feriarnersiutit aamma nalliuttuni sapaataanngitsuni akissarsiat

§ 3. Akileraarutinik A-nik feriarnersiutinit sapaataanngitsunilu nalliuttuni akissarsianit unerartitsinermut piffissaq aamma akissarsiat taakkua akileraarusigaanerat pillugu makku atuupput:
1) Akissarsiortup feriaqarnerani sulisitsisoq akissarsianik akiliisarpat akissaatinit taakkunannga akileraarutinik unerartitsineqassaaq maleruagassiat aningaasarsianut A-nut allanut atuuttut malillugit, tak. inatsiartut inatsisaanni § 38, imm. 1, oqaaseqatigiit siulliit. Feriarnersiat akissarsiortut atorfeqarnenkinni akissarsiaqarlutik feriartussaatitaasimasut atorfimminnit soraarnerminni pisassaasa tungaasigut unerartitsineqassaaq maleruagassiat ataani 2)-mi, oqaaseqatigiinni siullerni allassimasut malillugit.
2) Sulisitsisup atorfilik feriaqarnerani akissarsiaqartinnagu, taamaattorli ukiup feriarnersiaqaataasussanik aningaasarsiorfiup tulliani ukiumi feriarfissami akiligassanngorlugit toqqorneqartunik feriarnersiaqartippagu, taava feriarnersiat feriemæirket atuagaasamut nipititerivissamut nipititerneqarnerannut, feriarnissamut allagartap (feriekortip) tunniunneqarneranut il.il. atasumik akileraarutinik unerartitsineqassaaq. Taamaattoq akileraarutinik unerartitsineq kingusinnerpaamik ukiumi feriarnersiaqaataasussanik aningaasarsiorfimmi 31. december pissaaq. Taamaakkujortaaq sapaataanngitsuni nalliuttuni akissarsiarisassat ukiup feriarnersiaqaataasussanik aningaasarsiorfiup ingerlanerani tunniunneqarsimanngitsut tungaasigut.
3) Feriarnersiat aamma sapaataanngitsuni nalliuttuni akissarsiat akileraarutigineqas?apput qaammatisiutit malillugit ukiumi, siuliini 1) aamma 2) malillugit unerartitsiviusussaasumi. Akileraarusiinermut akileraarutillu naatsorsorneqarneranni paasissutissat Inatsisartut inatsisaanni § 88, imm. 1 malillugu atugassat ukiumut aningaasarsiorfimmut taannaasumut tunngasumik tunniunneqassapput.

§ 4. Akissarsiortoq akileraartussaajunnaarppat aningaasarsiat A-t § 3-mi taaneqartut, tassani ilaallutik akileraartussaajunnaarneq sioqqullugu feriassat katersat, akileraaruteqaataasussaapput kingusinnerpaamik piffissami akileraartussaajunnaarfimmi. Akileraarutinik A-nik unerartitsisoqassaaq kingusinnerpaamik piffissami tassani.

§ 5. Nalunaarut atuutilerpoq 1. januar 1991-imiit.
Imm. 2. Aningaasarsiat A-t pillugit Namminersornerullutik Oqartussat nalunaarutaat nr. 34, 20. december 1985-imeersoq peqatigitillugu atorunnaarsinneqarpoq.

Namminersornerullutik Oqartussat, ulloq 1. november 1990.

Emil Abelsen

/

Kaare Hagemann