Nammmersornerullutik Oqartussat nalunaarutaat nr. 39, 10. september 1990-imeersoq nalunaarummik nr. 28, 7. juni 1990-imeersumik 1990-imi kapisilinniarsinnaanerniut tunngasumik allannguinermut tunngasoq.

Inuutissarsiutigalugu aalisarneq pillugu inatsisartut inatsisaanni nr. 11, 21. november 1984-imeersumi §§ 7, 8, 9, 12 aamma 14 naapertorlugu makku aalajangersarneqarput:

 

§ 1. Nalunaarut Kalaalliit Nunaata kujammut isuata kitaani NAFO-llu killeqarfiisa ilaasa 1-imik taaneqartartup iluani inuutissarsiutigalugu aalisarnermut tunngavoq. Tassa tassani ilaatinneqanngilaq pisanik nammineq nerisassatut atugassanik aalisarneq.
Imm. 2. Tunngaviusumik killeqarfimmik (basislinien) avammut 40 sømilit avataani kapisilinniartoqaqqusaanngilaq.

§ 2. Angallatit 50 BRT/BT 50-nik taannalu qaangerlugu angissusilinnut kapisilinniarneq inerteqqutaavoq. Angallatit 30 BRT/BT 30-usut annerilluunniit rejerniarnermut atortullit kapisilinniassanngillat.
Imm. 2. Angissusaannut uuttueriaaseq inatsit nr. 203 18. maj 1977-imi siusinnerusukkullu aalajangeniagaq nalunaarummi atorneqarpoq. Angallatip målebrev-ia malillugu nalunaarummi killiliussatut piumasarineqartut aalajangerneqartassapput.

§ 3. Kapisilinniarneq taamaallaat qarsorsanik qassutinillu 140 mm-inik angitigisunik nigartalinnik, tasillugit, ingerlanneqassaaq. Nigartaasa annertussusiat 8 pct-imik nikingatinneqarsinnaatitaavoq.
Imm. 2. Qassutit nigartaasa uuttornerat pisarpoq aalisakkanik misissuisup nigartanut uuttuutaa ikkunneratigut ½ kg-mik oqimaassusilimmik ikkussiffigalugu taannalu nakkartillugu. Nigartat 20-t qimiaanut ungaseqatigiit uuttorneqassapput. Nigartat tamarmik imm. 1-imi piumasaqaat eqquutsissavaat.

§ 4. Kapisilinniarnermi pisassaritinneqartut 924 tonsit qaangerneqassanngillat, aalisakkat ilivitsukkaarlugit.
Imm. 2. Pisat Kalaallit Nunaanni tunitsivinnut tulaanneqassapput. Tunitsivik imatut paasineqassaaq, tassa oqartussaniit aalisagartanik tunitsivittut immikkut akuerineqarsimasoq (autoriseret).
Imm. 3. Pisassaritinneqartut tamarmik pisarineqarlutik nungungajalerpata naalakkersuisunut ilaasortap aalisarneq tunitsivinnullu tulaassuineq qaqugu unissanersoq nalu naarutigissavaa. Naalakkersuisunut ilaasortap pisinnaaffik Kalaallit Nunaanni akuersissutinik Nakkutilliisoqarfimmut tunniussinnaavaa.
Imm. 4. Piffissani aalisarnerup unitsiffissaasa kingornisigut arlaannaatigulluunniit inuutissarsiutigalugu kapisilinniarneq inerteqqutaavoq, tassunga ilanngunneqarpoq kapisilinniarneq, nunatta iluani tuniniagassatut pisat.

§ 5. Kapisilinniarsinnaatitaarieq arsaarinnissutigineqarsinnaavoq aammalu ukiup tulliani kapisilinniarsinnaatitaaneq killilerneqarsinnaavoq tunitsiviit avaqqullugit allamut kapisileersimasoq paasineqaraangat.

§ 6. Nalunaarummi aalajangersakkanik unioqqutitsineq akiliisitsinermik kinguneqarsinnaavoq. Suliassallu tassunga tunngassuteqartut Inatsisartut inatsisaanni inuutissarsiutigalugu aalisarnermut tunngasumi maleruagassat malillugit suliarineqartussaapput.
Imm. 2. Akiliisitsinerit aningaasartaasa affai naalagaaffiup karsianut nakkartinneqassapput, affai Namminersornerullutik Oqartussanut taakkulu KNAPK-p ikiorsiisarnermi aningaasaateqarfianut - Carl Egedes fond-imut nakkartinneqassallutik aalisartunut atugarliortunut aalisartullu qimataannut ikiuutitut agguaatassanngorlugit.

§ 7. Nalunaarut 10. september 1990 atuutilissaaq. Ilutigalugulu Namminersornerullutik Oqartussat nalunaarutaat nr. 28 7. juni 1990-imeersoq kapisilinniarsinnaatitaariermut akuersissutinut tunngasoq atortuujunnaarsinneqarput.

Namminersornerullutik Oqartussat,, ulloq 6. september 1990

Kaj Egede

/

Jørn Graversen