Imigassanik aalakoornartulinnik nioqquteqarneq sassaallertarnerlu pillugit Inatsisartut inatsisaat nr. 13, 26. oktober 1989-imeersoq.
Kapitali 1
Aallaqqaasiut§ 1. Imigassanik aalakoornartulinnik nioqquteqarnermi sassaallertarnermilu makku piumasarineqarput
1) Niuernermik, assassorissanik suliffissuarnillu, imaluunniit sutorniartarfiuteqarnermik akunnittarfiuteqarnermillu inuutissarsiuteqarsinnaanermut allagartaq,
2) imigassanik nioqquteqarsinnaanermut akuersissut §§ 5 aamma 6 malillugit kommunalbestyrelsimit nalunaarutigineqartoq.§ 2. § 1-imi aalajangersakkat pisortat suliffiutaanni niuertarfinnut, akunnittarfinnut, sutorniartarfinnut umiarsuarnullu atuutinngillat.
Imm. 2. Taamaattorli imigassanik aalakoornartulinnik nioqquteqarneq sassaallertarnerlu nioqquteqarfinni imm. 1-imi pineqartut kapitali 4-mi 5-imilu killilersuinermut aalajangersakkanut ilaatinneqarput. Kommunalbestyrelsip § 8, imm. 4 tunngavigalugu nioqquteqarneq sassaallertarnerlu inerteqqutaagallartilersinnaavaat pisortat suliffiutaanni niuertarfinnut, akunnittarfinnut, sutorniartarfinnut umiarsuarnullu, malittarisassanik suliffiup ingerlanneqarnerani sumiginnaasoqarsimatillugu.§ 3. Umiarsuarni umiarsulivinniittuni imigassanik aalakoornartulinnik umiarsuarmi ilaasunngitsunut nioqquteqartoqaranilu sassaallertoqassanngilaq.
§ 4. Inatsimmi matumani imigassat aalakoornartullit pineqartut makkuupput
1) immiaaqqap oqimaassusiata 1 3/4 %-ia sinnerlugu aalakoornartulik (ethanol),
2) viinnit, paarnanit viinniliat allallu aalakoornartulimmik qapperlugit sananeqarsimasut imartussusiisa 2%-ii sinnerlugit aalakoornartullit,
3) imigassat aalakoornartullit akuiaqqissaakkat (ethanol-illit), aammalu
4) imigassat l)-imiit 3)-mut pineqartunik akusat.
Kapitali 2
Imigassanik nioqquteqarsinnaanermut akuersissut.§ 5. Imigassanik nioqquteqarsinnaanermut akuersissut kommunalbestyrelsimit tunniunneqartassaaq. Pissutsit suliffimmut piginnittumulluunniit tunngasut annertuumik allannguuteqarsimappata kommunalbestyrelsip akuersissutaareeraluartoq piffissap akuersiviusup iluani isummerfigeqqinniarsinnaavaa. Akuersissutaareersoq kommunalbestyrelsip arsaarinnissutigigallarsinnaavaa piffissamut aalajangersimasumut imaluunniit arsaarinnissutigivissinnaallugu; tamannalu pisinnaavoq malittarisassanik annertuumik arlaleriartumilluunniit sumiginnaasoqarsimagaangat, takuuk § 8.
Imm. 2. Kommunalbestyrelsip imigassanik nioqquteqarsinnaanermut akuersissummik tunniussaqarnerminut atatillugu inuiaqatigiinnut ataqatigiissumik iminngernaveersaarnissamik periarfissaqartitsinerunissaq eqqarsaatigisariaqarpaa. Kommunalbestyrelsi aamma pissutsit atuuttut tunngavigalugit immikkut aalajangersaasinnaavoq iminngernaveersaarnissap periarfissaqarnerulernissaa anguniarlugu, imaluunniit avatangiisinut inuiaqatigiinnullu akornutaasut killilersimaarniarlugit.
Imm. 3. Imigassanik nioqquteqarsinnaanermut akuersissut inimut ininulluunniit aalajangersimasunut tunngatinneqassaaq. Akuersissummi init suut pineqarnersut allassimassaaq. Akuersissut imigassanik nioqquteqarsinnaanermut akuersissummik pigisaqartup inississavaa nioqquteqarfimmi sassaallertarfimmiluunniit isersimasunut tamanut takuneqarsinnaanngorlugu.
Imm. 4. Akuersissut ukiuni pingasuni atuuttussanngorlugu tunniunneqartassaaq. Immikkut ittunik pissutissaqartillugu kommunalbestyrelsi piffissamut sivikitsuinnarmut akuersissuteqarsinnaavoq, soorlu ukiuunerani aasaaneraniluunniit atuuttussamik.
Imm. 5. Imigassanik nioqquteqarsinnaanermut qinnuteqaat tunniunneqarpat kommunalbestyrelsip imigassat aalakoornartullit nioqqutigineqarsinnaalersillugillu sassaallerneqarsinnaanngortissinnaavaat. Akuersissut taamaattoq piffissami killilikkami atuutissaaq, sivisunerpaamilli kommunalbestyrelsip akuersissuteqarnissamik aalajangernissaata tungaanut atuussinnaalluni.§ 6. Imigassanik nioqquteqarsinnaanermut akuersissummik piniassagaanni inuutissarsiorsinnaanermut allagartamik peqareertariaqarpoq, §§ 1 aamma 2 malillugit.
Aammalu imaassalluni
1) 25-t inorlugit ukioqartuussanatik,
2) nammineersinnaajunnaarsitaasimassanatik imaluunniit nammineersinnaajunnaarsillugit sinniisoqartitaassanatik,
3) akiliisinnaajunnaarsimasuussanatik akileraanerminnilluunniit unitsitsisimassanatik,
4) pissusilersornermikkut ingerlatassaminnik eqqortumik ingerlatsinissamut tutsuiginanngitsutut takutitsisimassanatik, imaluunniit
5) imm. 5-imi taaneqartutut ikiorserneqarsimasuussanatik imminnulluunniit pisussaaffeqartilersimasuussanatik.
Imm. 2. Ingerlatseqatigiiffiit assigisaallu akuersissummik piniarunik inuutissarsiorsinnaanermut allagartamik pigisaqassapput, takukkit Kalaallit Nunanni sutorniartarfinnik akunnittarfinnillu ingerlatsinermut Inatsisartut inatsisaat kiisalu Kalaallit Nunaanni inuutissarsiorsinnaanermut allagartaqarneq pillugu Inatsisartut inatsisaat. Kiisalu pisortat (direktørit) siulersuisunullu ilaasortat imm. 1-imi piumasarineqartut eqqortissimassavaat. Pissutsit immikkut illuinnartut atuutsillugit piumasaq taanna Naalakkersuisut atortinngitsoorsinnaavaat. Ingerlatseqatigiiffiit pisortaqarfiannut (direktionimut) siulersuisunulluunniit ilaasortamik nutaamik ikkuttoqarpat tamanna kommunalbestyrelsimut nalunaarutigineqassaaq.
Imm. 3. Ingerlatseqatigiiffinnut assigisaannullu imigassanik nioqquteqarsinnaanermut akuersissutit Naalakkersuisunit akuerineqarani taamaallaat tunniunneqarsinnaavoq aatsaat taakku ileqqoreqqusaanni aalajangersagaqarpat piginneqataassutit allagartaannik (aktienik andelsbevisinillu) imigassanillu aalakoornartulinnik tunisassiornermik nioqquteqarnermillu ingerlataqartunut pigisassatut allanneqarsinnaanngitsut tunineqarsinnaanatilluunniit, piginneqataassutit allagartaat tamarmik piginneqataasup aqqanik allanneqarsimassasut aammalu allanut tunniunneqassatillugit siulersuisut akuersitinneqartussaasut.
Imm. 4. Suliffimmi imigassanik nioqquteqarnissamut akuerineqarsimasuni pisortaatitaasut (bestyrerit) imm. 1, l)-5)-imi taaneqarsimasut eqqortissimassavaat kommunalbestyrelsimillu akuerineqassallutik.
Imm. 5. Imigassanik nioqquteqarsinnaanermut akuersissummik pigisaqartut suliffinniluunniit akuersissummik pigisaqartuni pisortaatitaasut Naalakkersuisunit akuerineqaratik immiornermik imigassanilluunniit aalakoornartulinnik nioqquteqarnermik ingerlatalinnittaarsigassarsisinnaanngillat; matumani aamma pineqarput pequtinut, aallaqqaasiutissanut imaluunniit nalinginnaanngitsumik akiligassarsinerit. Aammattaarlu qulaani pineqartut Naalakkersuisunit akuerineqaratik imigassanik aalakoornartulinnik tunisassiortuullutilluunniit nioqquteqartunit qularnaveeqqusikkanik imminnut pisussaaffilersinnaanngillat.
Imm. 6. Imm. 5-imi oqaaseqatigiinni siullerni piumasaqaataasut tunissutinut nalikitsuunngitsunut akuersissummik pigisaqartup suliffiutaani atorneqartussanut aamma atuupput.
Imm. 7. Imm. 5-imi aalajangersakkat aningaaserivinnit taarsigassarsianut, aallaqqaasiutissat aningaasaateqarfinnulluunniit qularnaveeqqusiussatut taarsigassarsianut atuutsinneqassanngillat aningaasaateqarfinnut ileqqoreqqusamikkut imigassanik aalakoornartulinnik nioqqutissanik piniartarfinnut qilersorneqannginnermik qulakkeerisimasunut, taamaattumillu aalajangersagaq manna malillugu Naalakkersuisunit akuerineqarsinnaasimasunut.
Imm. 8. Naalakkersuisut akuersisimatinnagit inuit, ingerlatseqatigiiffiit assigisaallu imigassanik aalakoornartulinnik sanasartut nioqquteqartulluunniit imigassanik aalakoornartulinnik nioqquteqarsinnaanermut akuersissummik tunineqarsinnaanngillat, kiisalu ingerlatseqatigiiffiit assigisaasalu pisortaqarfiini siulersuisuiniluunniit ilaasortaasut ilaannik imigassanik aalakoornartulinnik sanasartunik nioqquteqartartunilluunniit ilaasortallit aamma imigassanik aalakoornartulinnik nioqquteqarsinnaanermut akuersissummik tunineqarsinnaanatik.§ 7. Imigassanik nioqquteqarsinnaanermut akuersissut atorunnaassaaq
1) akuersissummik pigisaqartoq toquppat, takuuk imm. 2,
2) akuersissutip atuuffiata naanerani nutaanngortinneqarnissaanik qinnuteqaammik kommunalbestyrelsimut tunniussaqartoqarsimanngippat, aammalu
3) akuersissummik pigisaqartup § 6-imi piumasaqataasut naammassisinnaajunnaarsimappagit.
Imm. 2. Toqusup qimatai, toqusup nulia uialuunniit pigisat nikisinnagit ingerlatseqqittoq, akiligassanik akiliisinnaajunnaartup suliffiutaa, imaluunniit nammineersinnaajunnaarsitaasimasumut sinniisuusoq, toqusup suliffiutaa, akiliisinnaajunnaartumut sinniisuusup akiliisinnaajunnaartup suliffiutaa, imaluunniit nammineersinnaajunnaarsitaasup suliffiutaanut sinniisup nammineersinnaajunnaarsitaasup suliffiutaa, ingerlateqqissinnaavaa imigassanik nioqquteqarsinnaanermut akuerineqanngikkaluarluni kommunimut nalunaaruteqareernikkut suliffiup nungutikkiartornerani, tuniniarnerani assigisaaniluunniit.
Imm. 3. Suliffimmi pisortaatitaasup akuerineqarnera, takuuk § 6, imm. 4, atorunnaassaaq taassuma inuutissarsiornermi allagartaqarnissamut imigassanillu nioqquteqarsinnaanermik akuersissummik tunineqarsinnaanermut piumasaqaataasut eqqortissinnaajunnaarpagit.§ 8. Suliffiup ingerlanneqarnerata imernipalaaq, atoqatigiinnikkut ileqqorluttuliornerit kanngunartuliornerillu, nakuuserneq pinerlunniarnerilluunniit annertusaavigippagit, ingerlataqartorlu siornatigut politiinit mianersoqquneqarsimappat, kommunalbestyrelsi pissutsit taamaattut unitsinneqarnissaat anguniarlugu piumasaqaateqarsinnaavoq. Anguniagassatut piumasarineqartut taamaattut unioqqutinneqarpata kommunalbestyrelsip akuersissut arsaarinnissutigigallarsinnaalluguluunniit arsaarinnissutigivissinnaavaa, takuuk imm. 2.
Imm. 2. Akuersissummik pigisaqartoq aalajangersakkanik annertuumik suliffimmi unioqqutitsisimappat kommunalbestyrelsip akuersissut qaammantmi ataatsimi arsaarinnissutigigallarsinnaavaa. Piffissap akuersissuteqarfiusup iluani qalleqqiisumik unioqqutitsisoqarpat, pissutsillu tamakku suliffiup siunissami illersorneqarsinnaasumik ingerlanneqarsinnaanissaa qularnarsisippassuk, kommunalbestyrelsip akuersissut arsaarinnissutigivissinnaavaa.
Imm. 3. Imigassanik nioqquteqarsinnaanermik akuersissutinik arsaarinninnissat imm. 1 aamma imm. 2 malillugit aalajangerneqarsimasut piginnittumut nalunaarutigineqarnerisa kingorna sapaatip akunneri sisamat qaangiutsinnagit Naalakkersuisunut naammagittaalliuutigineqarsinnaappuut, takukkit § 26, imm. 1 aamma imm. 3.
Imm. 4. Kommunalbestyrelsip akuersissutinik arsaarinnikkallarsinnaanermut periarfissaqartitaanera eqqarsaatigalugu imm. 1-iml aamma imm. 2-mi aalajangersakkat pisortat niuertarfiutaannut, akunnittarfiutaannut umiarsuaataannullu aamma atuutsinneqarput, soorlu kommunalbestyrelsi akuersissummik arsaarinnikkallarsinnaasoq. Kommunalbestyrelsi pissutsinik suliffinni taakkunani uparuartariaqartunik Naalakkersuisunut nalunaaruteqartassaaq, taakkulu suliniutit pisariaqartut aalajangiiffigisassavaat.
Imm. 5. Pissutsit tamanna periarfissaqartippassuk Naalakkersuisut kommunalbestyrelsi qaqutigooraluartumik naalakkersinnaavaa akuersissummik pigisaqartup akuersissummik arsaarneqarnissaanik, takuuk imm. 1 aamma imm. 2.
Imm. 6. Politiit nioqquteqarneq sassaallernerluunniit ullup sinneranut unitseqqullugit naalakkiisimappata, takuuk § 19, tamanna piaarnerpaamik kommunalbestyrelsimut nalunaarutigineqassaaq.§ 9. Imigassanik nioqquteqarsinnaanermut akuersissut §§ 7 imaluunniit 8 malillugit atorunnaarsinneqarsimappat akuersinermut allagartaq piaartumik kommunalbestyrelsimut utertinneqassaaq.
§ 10. Naalakkersuisut akuersissuteqartarnermut arsaarinnittarnermullu malittarisassat aammalu § 5, imm. 2-mi oqaaseqatigiit aappaat malillugu immikkut piumasaqaateqarsinnaanermut malittarisassat erseqqinnerusut aalajangersassavaat.
Imm. 2. Isumaginninnermi Naalakkersuisup matumani nakkutilliisuussaaq.
Kapitali 3
Imigassaq pillugu politikkikkut ataatsimiititaq§ 11. Inatsisartut ilaasortaasa akornanni tallimanik ilaasortaqartussamik inatsisartut ataatsimiititamik ataavartumik pilersitsissapput Isumaginninnermi Naalakkersuisup ilaasortaaffigisinnaanngisaanik. Ataatsimiititap nammineerluni siulittaasussani taassumalu tullissaa toqqassavai, sulinerminilu periaasissani nammineerluni aalajangersassallugu.
Imm. 2. Apeqqutit suulluunniit suliarinerini ataatsimiititaq suliassat oqaluuserineqartut pillugit immikkut paasisimasaqarluarsorisaminik naammaasersinnaavoq. Inuit taamaattut ataatsimiititami taaseqataasinnaanngillat.
Imm. 3. Isumaginninnermi Nalakkersuisoqarfik ataatsimiititamut allatseqarfiussaaq.§ 12. Ataatsimiititap imigassanik, ikiaroornartunik assigisaannillu atornerluinermi pissutsit allanngorarneri malinnaaffigissallugit pisussaaffigai.
Imm. 2. Imigassap, ikiaroornartut assigisaasalu atornerlugaanerat pillugu suliassat Inatsisartunit isummerfigineqartussat tamaasa ataatsimiititap inatsisartunut oqaaseqaateqarfigisassavai. Suliassanilu inatsisartunit pingasoriarlugit suliarisarialinni ataatsimiititap ilaasortaata kialuunniit piumasarisinnaavaa suliassat inatsisartuni suliarineqarnerisa akornini ataatsimiititaq oqaaseqarnissaminut periarfissaqassasoq.
Kapitali 4
Aalajangersakkat immikkut pingaaruteqartut§ 13. Inuutissarsiutigalugu imigassanik aalakoornartulinnik sassaallerneq inini sutorniartarfittut aaqqissuunneqarsimasuni akuerineqarsimasunilu taamaallaat pisinnaavoq. Kommunalbestyrelsilli immikkut ittunik patsisissaqartillugu tamanna atortinngitsoorsinnaavaa.
§ 14. Sutorniartarfinni sassaalliiviusunilu allani imigassanik aalakoornartulinnik annitassanik nioqquteqartoqassanngilaq.
§ 15. Peqatigiiffiit katerisimaarnerini katersortarfinni, filmertarfinni ininiluunniit allani kikkunnilluunniit orninneqarsinnaasuni ingerlanneqartuni imigassanik aalakoornartulinnik akilersillugit sassaallerneq sassaallernermulluunniit assingusumik imertitsineq kommunalbestyrelsimit pisinnaatitsissummik peqqaarluni aatsaat pisinnaavoq, taamatullu pisinnaatitsineq kommunalbestyrelsip katerisimaarnissaq sioqqullugu politiinut ilisimatitsissutigissavaa.
§ 16. Akilersillugit sassaallernerup pissuseqataanik inini namminerisani imigassanik aalakoornartulinnik sassaallerneq imernerlu inerteqqutaapput, matumani automatinik, nillataartitsivinnik imigassanik aalakoornartulinnik imalinnik assigisaannilluunniit akunnittarfiit inaataanni ingerlatsinerit ilaatinneqarput.
Imm. 2. Inini nioqquteqarfinni nioqquteqarfinnullu assingusuni sassaallernerup pissuseqataanik imigassanik aalakoornartulinnik tunniussisoqassanngilaq.§ 17. Inatsisartut inatsisaanni matumani init assigisaasalu pineqartut aaqqissugaanerisa atorneqarnerisalu malittarisassaat erseqqinnerusut Naalakkersuisunit aalajangersarneqarsinnaapput. Makku malittarisassiuunneqarsinnaapput
1) init nioqquteqarfiit, sassaallertarfiit, igaffiit perusuersartarfiillu amerlassusii, angissusii inissisimanerilu,
2) eqqissisimanissamut torersuunissamullu iliuusissat, taamatullu suliffiup ingerlanneqarnerata pisariaqanngitsumik allanut akornutaannginnissaanut qularnaarutit, aammalu
3) sutorniartarfiup qassinik ataatsikkut isersimasoqarsinnaanera.
Imm. 2. Init atorneqalinnginnerminni akuerineqassapput.
Imm. 3. Oqartussaasut sorliit init atorneqarnissaannut akuersisartuussanersut taamatullu malittarisassat aalajangersarneqarsimasut malinneqarnerinik nakkutiginnittussaanersut Naalakkersuisut aalajangersinnaavaat.§ 18. Imigassanik aalakoornartulinnik nioqquteqarfinni sassaallerfinniluunniit 18-inik ukioqalersimanngitsunut aammalu aalakoortunut sassaallerneq inerteqqutaavoq.
Imm. 2. Imigassanik aalakoornartulinnik nioqquteqarneq sassaallernerluunnit, matumani automatit ilanngullugit, inerteqqutaavoq.
Imm. 3. Akuersissummik pigisaqartup isersimasunut tamanut saqqumisumi imm. 1-imi inerteqqutit allagarsiissutigissavai.
Imm. 4. Akuersissummik pigisaqartup tassungaluunniit taartaagallartup pisiniartup ilumut 18-inik ukioqalereersimanera nalornissutigiguniuk uppernarsaatinik pisariaqartunik pissarsiniarnissaq akisussaaffigaa.
Imm. 5. Nalunaaqutaq 20.00-ip kingorna inuit 18-inik ukioqalersimanngitsut sutorniartarfinnut imigassanillu aalakdornartulinnik sassaallertarfinnut iseqqusaanngillat, aatsaalli isertinneqarsinnaallutik angajoqqaaminnit, sinniisuminnit inersimasumilluunniit allamit nammineersinnaassusiiagaasimanngitsumit immikkut akisussaassusilimmik ingiaqateqarunik.§ 19. Nioqquteqarfimmi sassaallerfimmiluunniit imaluunniit taakku eqqaanni kamaattoqarsimappat annertuumilluunniit eqqissiviilliortoqarsimappat politiit imigassanik aalakoornartulinnik nioqquteqarneq sassaallernerlu ullup sinneranut matoqqullugit naalakkiutigisinnaavaat. Taamatut matusineq kommunalbestyrelsimut piaarnerpaamik nalunaarutigineqassaaq.
§ 20. Sutorniartarfiit sassaallertarfiillu allat nalunaaqutaq 01.00-imiit nalunaaqutaq 06.00-imut matoqqasassapput.
Imm. 2. Matoqqanerup nalaani minutsit 15-it taamaallaat pinnagu politiinit akuerineqarsimatinnani sutorniartarfimmiittoqassanngilaq, tamanna ullormut tunisanik naatsorsuinerup, eqqiaanerup nakkutilliinerulluunniit pisariaqartinngippagu.§ 21. Akuersissummik pigisaqartup sutorniartarfimmilu sulisut isersimasunik imigassanik aalakoornartulinnik imeqateqarnissaat politiit inerteqqutigisinnaavaat.
Imm. 2. Sutorniartarfinni imigassanik aalakoornartulinnik sassaallerfiusartuni akuersissummik pigisaqartup isumagissavaa imerneqarsinnaasunik allanik aamma sassaallertoqarsinnaasariaqartoq, matumani immiaaqqat kimikitsut, viinnit aalakoornartortaqanngitsut, sodavandit assigiinngitsut ilanngullugit, taamaattoqarneralu erseqqissumik takuneqarsinnaasariaqarluni akit viinnillu allattorsimaffiini. Imeq sikulik akeqanngitsoq isersimasunit pineqarsinnaanngorlugu saqqumitinneqassaaq.
Imm. 3. Akuersissummik pigisaqartup imerneqarsinnaasut tamaasa aalaakkaasumik akeqartissavai. Akit allattorsimaffiini akigitinneqartut tamanit takuneqarsinnaasumi inissinneqarsimassapput.§ 22. Angerlarsimaffintmi aalakoornartulinnik imigassaliorneq inerteqqutaavoq.
Imm. 2. Immiassat, sungarnitsussat akuutissallu allat angerlarsimaffimmi aalakoornartulinnik imigassaliornermi atorneqakkajuttut Kalaallit Nunaannut eqqunnissaat inerteqqutaavoq.§ 23. Naalakkersuisut makku pillugit immikkut maleruagassiorsinnaapput
1) aalajangersimasumik piffissaatitaasup avataani imigassanik aalakoornartulinnik nioqquteqartoqaranilu sassaallertoqassanngitsoq,
2) imigassanik aalakoornartulinnik nioqquteqarneq sassaallernerlu tamarmi unitsinneqassasoq, aammalu
3) kommunalbestyrelsit peqqusinnaallugit aaqqissuussinerit immikkut ittut aqoqqullugit, matumani nuna tamakkerlugu najukkaniluunniit ataasiakkaani killilersuinerit, imaluunniit kommunip nunaqarfiiniinnaq siumoortumik allatsitseqqaarluni aalakoornartulinnik imigassarsisinnaanerit ilanngullugit.
Imm. 2. Naalakkersuisut imigassanik aalakoornartulinnik nioqquteqarnermi sassaallernermilu akit iluanaarutillu angissusii qummut qaangeqqusaanngitsut aalajangersarsinnaavaat.
Imm. 3. Suliffinni imigassanik aalakoornartulinnik imeqqusaannginneq pillugu Naalakkersuisut immikkut ittunik malittarisassaliorsinnaapput.
Kapitali 5
Unioqqutitsinerit§ 24. § 1, § 3, § 5 imm. 3, § 6 intm. 5, § 9, §§ 13-18-imi aalajangersakkanik unioqqutitsinerit, § 19-imi piumasaqaatinik, § 5 imm. 2-mi oqaaseqatigiit aappaanni imaluunniit § 8 imm. 1-imi oqaaseqatigiinni siullerni piumasaqaatinik unioqqutitsinerit aammalu §§ 20-23-imi inerteqqutinik unioqqutitsinerit akiliisitsissutaasinnaapput. Kiisalu unioqqutitsinerit pineqaatissiissutaasinnaasut § 8-mi aalajangersakkani pineqarpata aamma imigassanik nioqquteqarsinnaanermut akuersissummik arsaarinnittoqarsinnaavoq.
Imm. 2. Kinaluunniit inatsisip matuma aalajangersagaanut akerliusumik imigassanik aalakoornartulinnik imertoq, pisisoq allanilluunniit pisissussisoq akiliisinneqarsinnaavoq.
Imm. 3. Inatsit manna tunngavigalugu maleruaqqusat piumasaqaatilluunniit unioqqutinneqarneri akiliisitsinermik aalajangersaavigineqarsinnaapput.
Imm. 4. Unioqqutitsineq pappiaranik aningaasanik nalilinnik ingerlatseqatigiiffimmit, piginneqatigiiffimmit assigisaanilluunnit piliarineqarpat taaneqartut taakku suliffeqarfiutaat akisussaasutut akiliisussanngortinneqassaaq.
Imm. 5. § 18-ip, § 21 imm. 1-ip aalajangersagartai piaaraluniinngikkaluartumik mianersuaalliunngikkaluartumilluunniit sulisunit unioqqutinneqarpata nioqquteqarfiup, sutorniartarfiup akunnittarfiulluunniit piginnittua pisortaatitaalu akisussaasutut akiliisussanngortinneqarsinnaapput.§ 25. Immikkut nakkutilliisuutitat ininut suliffinnut inatsimmi matumani pineqartunut atasunut ataasiakkaanut isernissaat itigartitsissutigineqarsinnaanngilaq.
Kapitali 6
Naammagittaalliorsinnaaneq§ 26. Kommunalbestyrelsi akuersissummik tunniussinissamik akuersissutilluunniit nutarteqarneqarnissaanik itigartitslppat, imaluunniit pissutsit annertuumik allanngornerat patsisigalugu akuersissummik piginnittoq arsaarneqassasoq aalajangerpat, imaluunniit piumasaqaataasunik sumiginnaaneq patsisigalugu akuersissummik arsaarinnikkallarnissamik arsaarinnivinnissamilluunniit aalajangerpat, kommunalbestyrelsip aalajangernera tamatuma nalunaarutigineqarnerata kingorna sapaatip akunnerisa sisamat qaangiutinnginnerini Naalakkersuisunut naammagittaalliuutigineqarsinnaavoq.
Imm. 2. Kommunalbestyrelsip aalajangernera allaganngorlugu nalunaarutigineqassaaq. Itigartitsinermut allakkiap imarissavai itigartitsinermut patsisaasut, naammagittaalliuuteqarsinnaanerup periarfissamullu tassunga killissarititaasup paasissutissartai. Kommunalbestyrelsip aalajangigaanik naammagittaalliuuteqarnerup suliarineqarnerata nalaani aalajangigaq atorunnaarsikkallarneqarsinnaanngilaq.
Imm. 3. Naalakkersuisut aalajangigaat aqutsinikkut oqartussanut allanut naammagittaalliuutigineqarsinnaanngillat.
Kapitali 7
Atortuulersitsinermut ikaarsaariarnermilu aalajangersakkat.§ 27. Inatsisartut inatsisaat manna atortuulersinneqarpoq 1. april 1990 aallarnerfigalugu. Tamatumunnga peqatigitillugu imigassanik aalakoornartulinnik nioqquteqarneq sassaallertarnerlu pillugit Inatsisartut inatsisaat rir. 13. 29. oktober 1985-imeersoq atorunnaarsinneqarpoq.
Imm. 2. Nalunaarutit maleruaqqusallu allat imigassanik aalakoornartulinnik nioqquteqarneq sassaallertarnerlu pillugit Inatsisartut inatsisaat nr. 13 29. oktober 1985-imeersoq tunngavigalugu aalajangersarneqarsimasut atuukkallassapput.
Imm. 3. § 5, imm. 2-mi oqaaseqatigiit aappaanni aalajangersakkat malillugit kommunalbestyrelsip immikkut ittunik piumasaqaatai inatsisip atulernerata kingorna ukioq ataaseq qaangiutsinnagu naammassineqarsimassapput; tassani pineqarput sutorniartarfiit pioreersut ingerlanneqarnerini annertuumik allannguutissat, aammalu init nioqquteqarfiusut sassaallerfiusullu pioreersut aaqqissuunneqarnissaannut piumasaqaatit immikkut ittut.§ 28. Inatsisartut inatsisaat manna Kalaallit Nunaanni illersornissaq pillugu 27. april 1951-imi isumaqatigiissutigineqarsimasoq kingusinnerusukkullu allannguuteqarsimasoq malillugu illersornissaq pillugu najukkani suliffeqarfiusuni atuutinngilaq.
Namminersornerullutik Oqartussat, ulloq 26/10-1989
Jonathan Motzfeldt/
Moses Olsen