Aningaaserivinni ileqqaakkat akileraarutitigut oqilisaaffigineqarnissaat pillugu Inatsisartut inatsisaat nr. 2, 6. maj 1989-imeersoq.
§ 1. Ileqqaakkanut konto-ni ileqqaakkat akileraarutitigut oqilisaaffigineqartut ernialersorneqassapput tunngaviusumik ernianik akileraaruteqaataasussanik kiisalu ajunngitsorsiatut eriianik akileraaruteqaataasussaanngitsunik.
Imm. 2. Ajunngitsorsiatut erniat akileraarusernagit aatsaat tunniunneqassapput ileqqaakkat ataavartumik Kalaallit Nunaanni makku ilaannut ataatsimut arlalinnulluunniit atorneqarpata:
1) Namminerisamik illussamik sananermi pisinermiluunniit, aammalu piginneqatigiilluni illuliornermi.
2) Inimik attartornermut atatillugu aallarniutitut siumulluunniit akiliutitui. Tamakkununngali atugassatut annerpaamik qaammammut akiliutissatut isumaqatigiissutigineqarsimasup pingasoriaataa tunniunneqarsinnaavoq.
3) Inigisap pitsanngorsarneranut allilerneranulluunniit.
4) Allamik initaarnermut atatillugu illumi atortorissaarutinik innaallagissamoortunik, pequtinik natersuarnillu pisinermut.
5) Namminersorluni ingerlatsivimmik pilersitsinermi, ingerlatsivimmi atugassat pisiarineranni akiusut 40.000 koruunit sinnersimappatigit. Ileqqaakkat akileraarutitigut oqilisaaffigineqarsimasut bilinik inunnik angallassissutinik pisinermut atorneqarsinnaanngillat. Aningaasaliissuteqarfimmik assigisaaniluunniit ingerlatseqataaneq pilersitsinertut isigineqanngilaq.
6) Selskabini inuussutissarsiornermik ingerlatalinni piginneqatigiissutinik (aktienik anpartinillu) pisinermut. Tamatumani aningaasaliissuteqartarfiit inuussutissarsiornermik ingerlatsisutut isigineqanngillat.§ 2. Tunngaviusumik erniat ajunngitsorsiatullu erniat akileraaruteqaataasussaanngitsut annertussusaat,takuuk § 1, imm. 1, naalakkersuisunit nunatsinnilu aningaaserivinnit isumaqatigiinnikkut aalajangerneqartassapput.
§ 3. Akileraarutitigut oqilisaaffigineqartunik ileqqaaruteqarsinnaapput inuit tamakkiisumik akileraartussaatitaasut.
Imm. 2. Inuit toqqaannartumik kinguaaminnut, tamakkiisumik akileraartussaatitaasumut, akileraarutitigut oqilisaaffigineqartumik ileqqaaruteqarsinnaapput. Meerarsiat, aappaasup meerai aammalu tigummisatut meeqqat toqqaannartumik kinguaatut isigineqarput.
Imm. 3. Tunngaviusumik erniat ajunngitsorsiatullu erniat akileraaruserneqassatillugit konto-mik piginnittumut akileraaruserneqartassapput, imm. 2 naapertorlugu allat konto-mut ikisisarsimagaluarpataluunniit.§ 4. § 1, imm. 2-mi, nr. 1-imiit 6-imut taaneqartuni atugassanut inuk ataatsimut konto-liorsinnaavoq imaluunniit atugassaqarfiit ataasiakkaat immikkut kontoqartissinnaallugit.
Imm. 2. Imm. 1-imi konto-ni taaneqartuni uninngasuutit inummit ataatsimit pigineqartut konto-ni nuttarneqarsinnaapput.
Imm. 3. Ileqqaarutit akileraarutitigut oqilisaaffigineqartut Kalaallit Nunaanni aningaaserivinni taamaallaat pilersinneqarsinnaapput.§ 5. Ileqqaarutinut akileraarutitigut oqilisaaffigineqartunut aningaasat taarsigassarsiat atorneqarsinnaanngillat.
Imm. 2. Inuup ataatsip ileqqaarutai akileraarutitigut oqilisaaffigíneqartut ukiumut annerpaamik 50.000 koruuniusinnaapput.§ 6. Uninngasuutit konto-ni akileraarutitigut oqilisaaffigineqartuni piginnittumit allanut tunniunneqarsinnaanatillu qularnaveeqqusiunneqarsinnaanngillat.
Imm. 2. Aningaasat uninngasuutit arsaarinnissutigineqarsinnaanngillat, akillisitsissutigineqarsinnaanngillat attoqqusaajunnaarsinnaanatilluunniit, konto-mik piginnittup ikisisulluunniit aningaasat konto-mut ikisai taassuma aningaasarsiorneranut pisuussutaanulluunniit annertuumik nikingassuteqartitsinngippata.§ 7. Akiliisinneqarsinnaavoq piaaraluneerluni mianersuaalliorujussuarluniluunniit:
1) aningaasat tunniunneqartut, ajunngitsorsiatut erniat ilanngullugit, sumut atorneqartussaanerannut eqqunngitsunik paasinerluutaasinnaasunilluunniit paasissutissiisoq,
2) § 5, imm. 1-imik 2-milluunniit unioqqutitsisoq.
Imm. 2. Najoqqutassiani, inatsit manna naapertorlugu aalajangersarneqartuni aklliisitsilluni pineqaatissiisinnaanerit aalajangersarneqarsinnaapput.§ 8. Naalakkersuisut, Naalakkersuisulluunniit tamatumunnga piginnaatitaasa inatsimmi matumani aalajangersakkanik unioqqutitsisoq nalunaarfigisinnaavaat, suliassaq eqqartuussisutigoortuunngitsumik aalajangiivigineqarsinnaasoq, unioqqutitsisoq unioqqutitsinerminik nassuerpat, akiligassiissutigineqartorlu nalunaarummi allassimasoq piffissap aalajangersimasup, qinnuteqarnikkut sivitsorneqarsinnaasup, iluani akilerumassappagu.
Imm. 2. Nalunaarutiginninnermut, imm. 1-imi taaneqartumut atatillugu inatsisinik atortitsinermut inatsimmi aalajangersakkani unnerluutiginninnermut allassimasut atuutissapputtaaq.
Imm. 3. Akiligassiissutigineqartoq piffissaagallartillugu akilerneqarsimappat imaluunniit akiligassiissutigineqareernermini akilersinneqarpat, qanoq iliuuseqartoqaqqissanngilaq.§ 9. Akiligassiissutit, § 7 aamma § 8 naapertorlugu akiligassiissutigineqartut landskassemut nakkartassapput.
§ 10. Naalakkersuisut inatsisip matuma atortinnissaanut sukumiinerusunik malittarisassiorsinnaapput, kiisalu § 1, imm. 2-mi aalajangersakkanit immikkut akuersissuteqarsinnaallutik, pissutsit immikkut ittut atuutsillugit.
§ 11. Inatsisartut inatsisaat atuutilissaaq 21. juni 1989 aallarnerfigalugu.
Namminersornerullutik Oqartussat, ulloq 6. maj 1989.
Jonathan Motzfeldt/
Emil Abelsen