Inissianik attartortitsineq pillugu Inatsisartut peqqussutaat nr. 3, 20. juni 1989-imeersoq.

Inissialiortiterneq, illuliornermut ikiorsiissuteqartarneq, inissianik attartortitsisarneq allallu taamaaqataat pillugit Kalaallit Nunaannut inatsit nr. 944 23. december 1986-meersoq naapertorlugu makku aalajangersarneqarput:

 

Kapitel 1.
Peqqussutip siunertaa.

§ 1. Peqqussutip siunertaa tassa inissianik attartortut attartortitsisullu akornanni pissutsit malittarisassatigut tunngaviliiviginissaat.

 

Kapitel 2.
Atuuffii.

§ 2. Peqqussut atuuppoq attartortitsinernut, tamakkununnga aamma ilaatinneqarput attartukkanik allanut atukkiineq tassa illunik illulluunniit initaasa ilaannikmakkunanngaanneersunut:
1) Namminersornerullutik Oqartussat, Kommunilluunniit pigisaanni attartornerit.
2) Namminersortut pigisaanni attartornerit.
3) Atorfinitsitaanermut atatillugu inigisamik attartornerit, tamanna immikkut peqqussutip aalajangersagartaani taaneqarsimanngippat tamakkununnga atuutissangitsut, takuulli imm. 3.
Imm. 2. Attartorneq immikk. 1-imi pineqartoq peqqussummi ilaavoq apeqqutaatinnagu attartornertut akiliutissaagaluaqallatut ilusilerlugu matusissuteqartinneqartussaq, soorlu imatut: Sullissinikkut, aammalu apeqqutaatinnagu inissiaq attartorneqartup ilaannaa ineqarfittut atorneqarnersoq.
Imm. 3. Peqqussut atuutinngilaq immikkut ittumik inatsisiliat toqammavigalugit attartortitsinernut.
Imm. 4. Peqqussut atuutinngilaq hotelini, umiartortunut angerlarsimaffinni, tikeraat inaanni allanilu taamaaqataanni inissisimasartut isumaqatigiissutaanni.

 

Kapitel 3.
Attartornermut isumaqatigiissuteqarneq.

§ 3. Namminersornerullutik Oqartussat Kommunnilluunniit inissiaataannik attartorneq, naalakkersuisut akuerisimasaannik kalaallisut qallunaatullu oqaasiliorlugit naqitereerneqarsimasutigut isumaqatigiissutigineqartassaaq.
Imm. 2. Attartortitsinerni allani attartortuppiumasarisinnaavaa naalakkersuisut attartortitsisarnermut isumaatigiissusiaata akuerisaasup atorneqarnissaa.
Imm. 3. Aalajangersakkat, isumaqatigiissumi akuerisaalluni naqiterneqarsimasumut ilanngunneqartussat oqaasertaliorneqarsimassapput attartortunit attartortitsisumillu paatsoorneqarsinnaajunnaarlugit.
Imm. 4. Allaganngorlugu attartortitsinermut isumaqatigiissummi aalajangersakkat peqqussummi nalunaarsimasuniit attartortoq sukanganerusumik pisussaaffilersimappassuk imaluunniit attartortoq pisinnaatitaaffikinnerulersissimappassuk tamakkua erseqqissarneqarsimassapput.
Imm. 5. Attartortitsisoq attartortorlu allaganngorlugu oqaasiinnakkulluunniit sumik arlaannik isumaqatigiissuteqarsimagaluarpataluunniit peqqussuntmimaleruaqqusat saneqqunneqarsinnaanngitsumik atuutsinneqartassapput.
Imm. 6. Imm. 1-5-mut aalajangersakkat isumaqatigiissuteqarnermi sanioqquteriarneqarsinnaangillat attartortumut nammagassiissutitut.

 

Kapitel 4.
Attartortup attartornermini pisinnaatitaaffii.

Inissianik attartugaqalernermi.

§ 4. Inissiaq attartugassariligaq pitsaasuussaaq inigineqarsinnaallunilu, pisariaqanngilarli nutarteqqissaarneqarsimanissaa. Eqqiarneqareersimassaaq uumasuaraajarneneqarsimassalluni, tamaginnik igalaaqarluni, skaaviit tamarmik matoqarlutik, matui aseqqukuunatik parnaarsaataallu atorsinnaassallutik, kiisalu matut silarliit tamarmik immikkut marlunnik matuersaateqassallutik. Taakku saniatigut teknikikkut atortorissaarutai ajoquteqassanngillat.
Imm. 2. Attartulernissaq pilersinnagu attartortussaq inissiamik takusaasinnaatitaavoq attartortitsisup sinniisigisaanik ilaqarluni. Attartortussaq piumasarisinnaavaa takusaanermi iluarsisariaqartut malugineqartut allaganngorlugit uppernarsarneqarnissaat.
Imm. 3. Kiisalu attartulernermi amigaataasut attartortup qularnaatsumik tikkuaavigiumasai iserternermiit sap. ak. marluk qaangiutsinnagit attartortitsisumut nalunaarutigineqassapput. Tamannali atuutsinneqassanngilaq amigaataasoq pisarnertut misissuataarinermi takuneqarsinnaanngippat imaluunniit attartortitsisoq peqqusersusaarsimappat.
Imm. 4. Immikk. 2 aamma 3-mi aalajangersakkat isumaqatigiissuteqarnikkut sanioqquteriarneqarsinnaanngillat attartortumut nammagassiissutitut.

 

Attartortup aserfallatsaaliinissamut pisinnaatitaaffii.

§ 5. Namminersornerullutik Oqartussat Kommunillu attartortittakkatut illuutaanni taakkununnga aamma ilaatinneqarput illorsuarni quleriinni inissiallit, illuni uigulukuttuni, illuni affarleriinni, illuni ataasiakkaani ineeqqanilu attartortitani ineqartut, nanunineerlutik naqqit lakkersinnaavaat, init qilaavi qalipassinnaallugit, iikkat qalipallugit ungalisalersorlugillu tamakkununngalu atortussatik akeqanngitsumik pisinnaallugit naalakkersuisut maleruagassatut aalajangersagaat tunngavigalugit.

 

Attartornermut akiliutissap annertussusiligaanera.

§ 6. NamminersornerullutikOqartussatinissiaataannut attartortakkanut akiliutigitittakkat naatsorsorneqartarnerat aningaasaat pillugit inatsimmi nassuiarlugu ilanngunneqarsimassaaq.
Imm. 2. Attartornermi akiliutissaq, Kalaallit Nunaani kommuneqarfiit attartortitassatut sanatissimasaanni imaluunniit naalagaaffinunit Namminersornerullutik Oqartussanilluunniit ikiorsiissuteqarnikkut sanatissimasaanni annertussusilerneqartassaaq periaatsit Namminersornerullutik Oqartussat attartortitsisarnerminnut atugarisaat malillugit.
Imm. 3. Attartornermut akiliut qaffanneqarsinnaavoq attartortoq qaanunatinik pingasunik sioqqutsisumik ilisimatereerlugu. Ilisimatitsissut allaganngorlugu saqqummiunneqassaaq.

§ 7. Namminersortut pigisaanni attartornermut akiliut ingerlatsinermut aningaasartuutit pisariaqavissut, tak. immikk. 2, aammalu sanaartornermi aningaasaliissu taasimasunit iluanaarutit, tak. imm. 3, 4 aamma 5, sinnersimassanngilaat.
Imm. 2. Pisariaqavissumik ingerlatsinermi aningaasartuutinut ilaapput innaallagissamut, imermut, eqqiaanermut, allaffeqarfikkut ingerlatsinermut sillinunasiinermut kiisalu aserfallatsaaliinermut aningaasartuutaasimasutut uppernasarneqarsinnaasut aammalu teknikikkut atortorissaarutit nutartertarnissaannut toqqortikkat inissiap attartortitallu pitsaasuunissaa eqqarsaatigalugu naammaginartumik annertussuseqartut.
Imm. 3. Illu qanorluunniit akilersugassanngorsimagaluarpat aningaasaliissutaasimasunit iluanaarutit annerpaamik angeqatigisariaqarpaat illup sananeqarneranut aningaasartuutinut uppernarsaatissalinnut akilersuutit, taakkua iluaniillutik illup sananissaa aningaasaaliiffiginiarlugu akissaajaatit realkredit atorlugu ernialikkanik taarsigassarsianut akilersuutit imm. 4-mi tapiutit
taaneqartut ilanngullugit.
Imm. 4. Aningaasanut imm. 3-mi taaneqartunut ilanngunneqarsinnaapput imm. 3-mi aningaasartuutit taaneqartut sinnerisa erniaat aningaasaalersuinerup nalaani Københavns Fondsbørs-ip qaffasinnerpaamik erniaritinneqartussatut avammut tusarliussimasaata angeqataanik angissuligaq. Aningaasat taakkua ukiut tamaasa januarip aallaqqaataani iluarsiissuteqarfigineqartassapput ukiup siuliani 1. julimi erniat qaffasinnerpaaffiata qaffariarnera appariarneralu najoqqutaralugu.
Imm. 5. Illut januarip aallaqqaataa 1990 sioqqullugu atorneqalersimappata attartortitsisup aningaasaliissutaasimasunut iluanaarutissatut imm. 3-mi 4-milu naatsorsuinermut taarsiullugu angissusiliussinnaavaa annerpaamik illup nalingata imm. 4 malillugu erniaritinneqartussat qaffasinnerpaaffissaata angeqqataa. Illup nalinga aalajangerneqartassaaq nalileeriaatsinut malittarisassat Nuna-Tekimit atorneqartartutmalillugit, tassanili pineqanngillat illumut pitsanngorsaataasimasut attartortitsisup attartornermut akiliummik qaffaassissutigisimasai.
Imm. 6. Attartornermut akiliut, taakkulu qaffaataat illunut agguataarneqartassapput illut angissusii naapertorlugit. Naalakkersuisut illut angissusiisa uuttortarneqarnissaannut malittarisat aalajangigassaraat.
Imm. 7. Ineqarnermut akiliutip qaffannissaa ukiumut ataasiarluni piumasarineqarsinnaavoq, piumasaqaallu inissiami inissianik attartortunut tamanut ataatsikkut saqqummiunneqassalluni.
Imm. 8. Attartornermut akiliummik qaffaaneq qaammatinik pingasunik sioqqutsilluni ilimasaarereernikkut atorneqalersinnaavoq. Qaffaanissamik piumasaqaat allaganngorlugu saqqummiunneqartassaaq imaqassallunilu qaffaataasup annertussusianik kiisalu attartortup naammagittaalliorsinnaaneranut paasissutissanik. Maleruaqqusat tamakku eqqortinneqanngippata piumasaqaat atortuutinneqarsinnaanngilaq.
Imm. 9. Attartortup akiliummut qaffaat akuersaarsinnaanngikkuniuk, qaffaatissamik piumasagaatip tiguneranit kingusinnerpaamik sap. akunneri arfinillit qaangiutsinnagit allakkatigut naammagittaalliuteqassaaq, attartortullu piumasaqaammut suut akuersaarsinnaanngikkini nalunaarsimassavai. Attartortitsisup ineqarnermut akiliutip qaffaatissaa kissaatigisamisut aalajangiukkumaannaruniuk suli aamma sap. akunneri arfinillit ingerlaneranni eqqartuussisunut suliassiissutigisinnaavaa.
Imm. 10. Suliassaq eqqartuussisunut suliassanngortinneqarsimappat, attartortitsisup eqqartuussisut aalajangiinissaasa tungaannut qaffaanissamik ilimasaarutaareersoq utaqqiisaagallartumik attartornermut qaffaatitut akilersittarsinnaavaa. Attartornermut akiliut eqqartuussisut aalajangiinerat naapertorlugu iluarsiivigineqassaaq.
Imm. 11. Naalakkersuisut maleruagassiorsinnaapput imm. 2 malillugu ingerlatsinermut aningaasartuutit qanoq ilillugit naatsorsorneqassanersut, aamma tassunga ilanngunneqassapput allaffissornermut, aserfallatsaaliinermut aningaasartuutissatut aalajangikkat kiisalu nutarterisarnissaq eqqarsaatigalugu toqqorterneqartussat.
Imm. 12. Imm. 1-10-mut aalajangersakkat isumaqatigiissuteqarnikkut sanioqquteriarneqarsinnaanngillat attartortumut ajoqutaasussanngorlugit.

§ 8. Pisortat nanuninersortulluunniit illuutaanni ineeqqanik inuinnarnut attartortitsinermi akiliutigititassaq annerpaamik angissuseqartinneqassaaq inigisamut aningaasartuutit tamarmiusut, tassa ineqarnermut akiliut, taarsigassarsianut akilersuutit, kiassarnermut, innaallagissamut, imermut allanullu aningaasartuutit, ineeqqat amerlassusii najoqqutaralugit agguarlugit inip atukkap angissusianut naleqquttunngorlugit angissusiliussaq sinnernagu.
Imm. 2. Attartortitsisup inigisaata iluani ineeqqanut nut attartortitanut akiliut qaffaaffigineqarsinnaavoq qaffaanissaq qaammammik ataatsimik sioqqullugu ilimasaarutigalugu. Ineeqanut allanut akiliummik gaffaanissaq qaammatinik pingasunik sioqqutsilluni ilimasaarutigineqartassaaq ilimasaarinerlu allaganngorlugu saqqummiunneqartassalluni.

§ 9. § 6-mit § 8-mut maleruagassat isumaqatigiissuteqarnikkut sanioqquteriarneqarsinnaanngillat attartortumut nammagassiissutitut.

 

Kiassarnermut naatsorsuutit.

§ 10. Illuliani arlalinnik inissiartalinni ataatsimut kiassagaasuni kiassarnermut aammalu imermut kissartoqartitsinermut kiisalu ininut ataatsimoorussanut aningaasartuutit attartortunit akilerneqartassapput kiassarnermut naatsorsuutit attartortitsisumit suliarineqarsimasut tunngavigalugit. Attartortitsisup piumasarisinnaavaa attartortut kiassarnermut aningaasartuutinut akileeqataassutissaasa matusissutissaannik attartortut utaqqiisaasumik siumut akiliuteqartarnissaat.
Imm. 2. Kiassarnermut naatsorsuutini attartortitsisup taamaallaat kissamik atuinermi aningaasartuutit kiassarnermut naatsorsuutini ilangussinnaavai. Namminersornerullutik Oqartussat kommunillu inissiaataanni attartortakkani kiassarnermut naatsorsuutit ukiuat ukiup qaammatai malillugit ingerlanneqassapput.
Imm. 3. Kiassarnermut naatsorsuutit saqqummiunneqartassapput ukiup naatsorsuuteqarfiup naaneranit kingusinnerpaamik qaammatit sisamat qaangiunneranni. Saqqummiunneqarneri tamanut nalunaarutigineqartassapput.
Imm. 4. Naatsorsuutit piffissaq imm. 3-mi aalajangersagaq nallertinnagu saqqummiunneqarsimanngippata, attartortitsisoq utaqqiisaasumik akiliutigitittakkat akimorlugit akiliisitsiniarsinnaanngilaq.
Imm. 5. Naatsorsuutit kiassarnermut naatsorsuiffiusup naareerneranit kingusinnerpaamik qaammatit arfinillit qaangiunneranni saqqummiunneqarsimmanngippata, attartortup naatsorsuutit tamakkerlugit inereerneranni utertitassani Kalaallit Nunaanni aningaaseriviit uninngasuutinut erniaritittagaat annerpaaq atorlugu utertitassat tunniunneqarnissaasa tungaannut ernialersortinnissaat pisinnaatitaaffigaa.
Imm 6. Kiassarnermut naatsorsuutit saqqummiutereernerannit kingusinnerpaamik sapaatit akunneri arfineq pingasut qaangiunneranni attartortoq allakkatigut nalunaarfigineqassaaq akileeqqissanersoqimaluunniit utertitassaqarnersoq. Nalunaarut ilaqartineqassaaaq attartortup imm. 8 malillugu akerliliinissamut pisinnaatitaaffiinut paasissutissanik.
Imm. 7. Attartortoq imm. 6-imi oqaatigineqartutut piffissap taaneqartup ingerlanerani nalunaarfigineqarsimanngippat, attartortoq akileeqqinnissaanik piumasaqarfigineqarsinnaanngilaq.
Imm. 8. Attartortup naatsorsuutit pillugit naammagittaalliuutai allaganngorlugit attartortitsisumut saqqummiunneqassapput imm. 6 malillugu nalunaarfigineqarnermit sap. akunneri arfinillit qaangiutsinnagit. Naammagittaalliummi allassimassaaq naatsorsuutit suatungaatigut akuerineqarsinnaanngitsut.
Imm. 9. Kiassarnermut naatsorsuutit qanoq ilillugit suliaralugillu saqqummiunissaat, aningaasartuutit qanoq ilillugit agguataarneqarnissaat kiisalu kiassarnermut akiliutip qanoq ilillugu akilerneqarnissaa iluarsiivigineqarnissaalu pillugit erseqqinnerusumik maleruagassat naalakkersuisut aalajangersarsinnaavaat.
Imm. 10. Aalajangersakkat imm. 1-mit 8-mut allassimasut isumaqatigiissuteqarnikkut attartortumut akornutissanngorlugit sanioqquteriarneqarsinnaanngillat.

 

Toqusoqartillugu, averusertoqartillugu, avittoqartillugu, inooqatigiikkunnaartoqartillugu il.il. pisinnaatitaaffiit.

§ 11. Attartortoq toquppat uillarnerata nuleernerataluunniit attartorneq nangeqqiinnarsinnaavaa piumasaqaataareersut allanngortinnagit.
Imm. 2. Aamma pisinnaatitaaffik tamanna atuutissaaq attartortuusimasumik sivikinnerpaamik ukiuni marlunni illoqateqarsimasumut.
Imm. 3. Attartortoq averuserpat imaluunniit avippat imaluunniit attartortup aappariinnera atorunnaarsinneqarpat pisariaqarnera naapertorlugu avinnermut allagartami akuersissununi eqqartuussummiluunniit aalajangerneqassaaq nuliaasoq uiusorluunniit sorleq attartornermik ingerlatsiinnarsinnaassanersoq.
Imm. 4. Attartortup nulii uiniluunniit qimassimappagu, qimataasoq pisinnaatitaavoq attartorneq ingerlatiinnassallugu.
Imm. 5. Attartortoq utoqqalinini nappaateqarniniluunniit pissutigalugit paaqqinnittarfimmut allamulluunniit tassunga assingusumut nuutsinneqarpat imm. 1 aamma 2-mi aalajangersakkat atuutsinneqassapput.

§ 12. Inuit sivikinnerpaamik ukiuni marlunni najugaqatigeereersimasut inooqatigiikkunnaarnerminni isumaqatigiissutigisinnaavaat attartorneq kiarliup ingerlatilissaneraa. Attartortitsisorli patsisissaqarluinnaruni isumaqatigiissutigineqartumut itigartitsissuteqarsinnaavoq.
Imm. 2. Pineqartut isumaqatigiissinnaanngippata eqqartuussinikkut aalajangiivigineqarsinnaavoq maannamut ataatsimut inigisimasaq sorliup attartuinnarnissaa pisinnaatitaaffigissaneraa. Eqqartuussutikkut aalajangiinermi pingaartumik isiginiarneqassapput meeqqat suli imminnut oqartussaaffigilersimanngitsut.

§ 13. § 11 aamma § 12, tamaallaalli takuuk imm. 2 malillugit attartortup allalluunniit pisinnaatitaaffii attartortup taamaatisinnaanngilai.
Imm. 2. Inigisaq atorfeqarneq naapertorlugu inigititaappat §§ 11 aamma 12-imi aalajangersakkat toqqammaviginiarneqarsinnaanngillat, tak. § 2, imm. 1, nr. 3.

 

Attartukkamik allamut attartortitsineq.

§ 14. Namminersornerullutik Oqartussat Kommunillu inissiani attartortittagaanni attartortoq pisinnaatitaavoqinisimasunut ineeqqanik attartortitsinissamut maleruagassat naalakkersuisunit aalajangersarneqarsimasut naapertorlugit, takuulli § 8.

 

Attartortut sinniisoqartitaanerat.

§ 15. Eqimasunik illuliortiterfiusimasuni imaluunniit illumi ikinnerpaamik arfinilinnik inissiartalimmi piginnittumit ataatsimit pigineqartuni, ataatsimoorussamillu kiassagaasuni, ataatsimuterrorsisarfeqartuni, katersuuttarfeqartuni, najugaqartunut illutaqartuni allatulluunniit aaqqissuussanik ininik ataatsimoorutassalinni attartortut pisinnaatitaapput najugaqartut sinniisaannik qinersinissamut.
Imm. 2. Najugaqartut sinniisaannik qinersineqartassaaq najugaqartut ataatsimiinneranni inissianik attartortut ikinnerpaamik sisamararterutaasa najuunnerisigut. Attartortoq napparsimanini, aallarsimanini sulininiluunniit peqqutigalugit najuussinnaanngikkuni allagartaq piginnaatitsissut atorlugu inuk alla sinnerluni taaseqataasussanngortissinnaavaa.
Imm. 3. Attartortnt ataatsimiinnerminni aalajangissavaat sinniisorisassatik qassiussanersut. Aalajangiineq pisassaaq attartortut najuuttut amerlanerit isumaat malillugu. Sinniisut ikinnerpaamik pingasuussapput, amerlanerpaagunillu tallimaassallutik. Sinniisussatut qinigaasinnaatitaapput kikkulluunniit inersimasutut imminnut oqartussaaffigisut, inissiani najugaqartut attartortitsisumut sinniiseqarusuttut ineqarfigisaanni najugaqartut, apeqqutaatinnagu attartortutut isumaqatigiissummi aqqi allassimanersut allassimannginnersulluuniit. Qinigaaffiup sivisussusia ukioq ataasiussaaq.
Imm. 4. Attartortut sinniisaat pisinnaatitaapput illup ingerlatitaaneranut tunngasut suugaluilluunniit attartortitsisumut oqaloqatiginnissutigisinnaallugit. Namminersornerullutik Oqartussat Kommunillu inissiaataanni sinniisorisat pisinnaatitaapput aningaasanik akuersissutaasimasunik ilisimatinneqarnissamut, taamaalillutik aningaasat aserfallatsaaliinermut, eqqiaanermut, allilerinissamut allanullu atugassat immikkoortitaasimasut pillugit siunnersuisinnaaniassammata. Illuni namminersortunit pigineqartuni attartortut sinniisaat pisinnaatitaapput ingerlatsinermi naatsorsuutinik takusassinneqarnissamut aammalu pitsanngorsaanissamik siunnersuuteqarnissamut, peqatigitillugu periarfissiineqarpat pitsanngorsaanerup kinguneranik ingerlatsinermut aningaasartuutaalersussat aningaasalersorneqarsinnaallutillu matuneqarsinnaasut.
Imm. 5. Attartortut ataatsimeeqatigiinnerminni aalajangiisinnaapput torersaarnissaq siunertaralugumaleruarneqartussanik tamanna attartortitsisup pissutissaqavissumik akerlerissanngippagu.
Imm. 6. Attartortoq najukkaminit aneqquneqarsinnaanngilaq, takuuk § 26, attartortut sinniisaattut qinigaasimatilluni.
Imm. 7. Attartortutsinniisoqartarnerannutmaleruaqqusat naalakkersuisut aalajangersartassavaat.
Imm. 8. Maleruaqqusat imm. 1-6-mut isumaqatigiissuteqarnikkut sanioqquteriarneqarsinnaanngillat attartortumut nanunagassiissutitut.

 

Kapitel 5.
Attartortup attartornermini pisussaaffii.

Ineqarnermut kiassarnermullu akiliutit.

§ 16. Attartortoq pisussaavoq attartortitsinermi isumaqatigiissummi piffissaliussat nalleraangata ineqarnermut kiassarnermullu akiliisassalluni. Akiliisoqassaaq kingusinnerpaamik akiliiffissatut killiliussamiit ulluinnaat pingasut qaangiunneranni.

 

Inissiamik atuineq.

§ 17. Attartortup attartukkani paarilluagassaraa. Takusaanermi paarsinerlunneq qularnaarneqarpat, attartortitsisup piumasarippagu innarligarineqartut ingerlatiinnarlugit iluarsineqartassapput.
Imm. 2. Attartortup attartortitsisoq akuersiseqqaartinnagu illoqatigisami saniatigut allanut attartortitsissanngilaq, kisianni takuuk § 14.
Imm. 3. Attartortup attartortitsisoq akuersiseqqaartinnagu attartukkani siunertarineqareersumit allaasumut atussanngilaa.

§ 18. Attartortup taassumalu inoqutaasa aammalu inuit attartortup inini attartukkaniissinnaatitaasa illumi torersaarnissamik maleruaqqusat atuuttut maleruassavaat.

 

Maanaannakkut qimatsineq.

§ 19. Attartortup attartortitsisoq isumaqatiginiareersimatinnagu attartukkani maanaannakkut qimattariaqanngilaa.

 

Attartortumut ornigussinnaaneq.

§ 20. Inissiaq attartortinneqartoq qanoq aserfallassimatiginersoq paaserusullugu kiisalu iluarsagassaqalersimatillugu imaluunniit attartoqqitassanngorsimatillugu attartortitsisoq iserniarpat attartortup patsisissaqavinngikkuni itigartissinnaanngilaa.

 

Kapitel 6.
Attartortitsisup pisussaaffii pisinnaatitaaffiilu.

Aserfallatsaaliineq.

§ 21. Namminersornerullutik Oqartussat Kommunillu inissiatut attartortittagaanni attartortitsisoq pisussaaffeqarpoq illuutit attartortitallu naammaginartumik aserfallatsaalinissaannut. Teknikikkut atortorissaarutit tamarmik kuuffeqarfinnut, kiassarnermut, innaallagissamut, gas-mut erngullu aqqutaannut tunngasut ajoquteqassanngilat atorsinnaajuassallutillu. Taamatut attartortitsisup pisussaaffigaa qilaat, iikkat, naqqit, innaallagissamut ikittaatit, naqqup killingisa listii, matserfiit, kiassaatit, ruujorit, sikaaviit atavissut, pisattat taamaaqqataallu aserfallatsaalinissaat. Nungullarnikkut pisoqalisoornikkulluunniit nutarterisariaqalerneritiluarsaassisariaqalernerilluunniit allat sapinngisamik pisariaqalernerit tamaasaisumagineqartassapput illuutigisap attartortitalluunniit pissusia naatsorsuutigalugu.
Imm. 2. Inissiaqarfinni imm. 1-mi taaneqartuni attartortitsisoq ineqarnermut akiliutip ilaanik aserfallatsaalisassat ilaannut ataasiakkaanut toqqorterisitsinikkut aserfallatsaaliinissamik aaqqissuussisinnaavoq, taamaalilluni illup iluani aserfallatsaaliinerit ilaat (qilaanik qalipaanerit, iikkat qalipanneqarlutilluunniit ungalitsersorneqarneri, naqqillu lakkerneri) attartortumit suliarineqarsinnaasunngorlugit. Attartornerup ingerlanerani aserfallatsaaliinermut aaqqissuussineq taanna allanngortittariaqalersimappat attartortitsisup attartortoq ilisimatissavaa attartornermi isumaqatigiissummi ilimasaarinernut piffissarititaasut malillugit.
Imm. 3. Namminersornerullutik Oqartussat Kommunillu inissiaatasa iluinikattartortut aserfallatsaaliinissamik isumagisassarinnilersinnaanerat pillugu Naalakkersuisut erseqqarinnerusumik malittarisassiorsinnaapput.

§ 22. Namminersortut illuutaannik attartornermi maleruaqqusat § 21-mi taaneqartut atorneqassapput, attartortup attartortitsisullu akunnerminni isumaqatigiissutigereersimanngikkaangassuk attartortup tamakkiisumik ilaannaasumilluunniit aserfallatsaaliinissamik pisussaaneq isumagissagaa.

 

Illuni nanuninersortunit pigineqartuni pitsanngorsaanerit.

§ 23. Attartortitsisoq pisinnaatitaavoq illu imaluunniit attartortitani pitsanngorsassallugu.
Imm. 2. Attartortitsisup attartortitani pitsanngorsareerunigit ineqarnermut akiliut qaffatsissinnaavaa aningaasartuutigisani pitsanngorsaanerminut naleqquttut tulluuttumik ernialersornissaat aallaavigalugu. Akiliutip qaffannerata aamma matussutissaqartissavai teknikimut atortorissaarutitnutarternissaannut, nalinginnaasumik aserfallatsaaliinernut aningaasartuutinut, sillimmasersuutinut assigisaannullu aningaasat illuaatitikkat.
Imm. 3. § 7-mi, imm. 8-miit 10-mut, aalajangersakkat aammattaaq uani atuupput.

 

Attartornermut isumaqatigiissummik atorunaarsitsiniarneq pillugu siumut ilisimatitsineq.

§ 24. Attartortitsineq piffissami qanoq sivisutigisumi atuutissasoq isumaqatigiissutigineqareersimappat, piffissap isumaqatigiissutigisimasap naanerani siumulluunniit ilisimatitseqqaarani attartorneqatorunnaassaaq. Piffissamik aalajangersimasumik isumaqatigiilluni attartorneq attartorfissatut isumaqatigiissutaasimasup ingerlanerani atorunnaarsinneqarsinnaanngilaq isumaqatigiissutigineqareersimanngippat attartornissamik isumaqatigiissut siumut nalunaaruteqarnikkut atorunnaarsinneqarsinnaasoq, imaluunniit isumaqatigiissutip attartortitsisumit attartortumilluunniit maleruarneqannginnera pissutigalugu attartorneq atorunnaarsinneqartariaqalersimanngippat.
Imm. 2. Attartornissamik isumaqatigiissut aalajangersimasumik piffissaligaasimanngippat attartortitsisup attartortitsineq taamaallaat atortussaajunnaartinniarsinnaavaa §§ 25-27-mut aalajangersakkat toqqammavigalugit. Atorunnaarsitsinissaq sivikinnerpaamik qaammatinik pingasunik sioqqullugu ilisimatitsissutigineqareerluni qaammatip naanerani pisassaaq, kisiannni tak. imm. 4. Attartortup attaartorunnaarniarnini qaammatip naaneratigut pisussaq aallakkatigut ilisimatitsissutigissavaa sivikinnerpaamik qaammammik ataatsimik sioqqutsilluni.
Imm. 3. Attartortup inigisani attartorunnaarnissamik ilisimatitsereersimaneq suli qaangiutinngitsoq qimappagu, attartortitsisup attartugaq qimanneqartoq allanut attartorteqqinniassavaa. Attartortitsisup attartortitseqqinnermini akiliutigititai akiliutigititassaraluiluunniit qimatsisup akiliutissaraluinut ilanngaatigineqassaput.
Imm. 4. Suliffimmi atorfeqarneq naapertorlugu inigisaq suliffimmit tunuarnermi qimanneqassaaq, tak. § 2, imm. 1, nr. 3.

§ 25. Attartortitsisup sukkulluunniit makkuninnga attartorneq atorunnaarsissinnaavaa:
1) Ineeqqanik attartortitsisup inisiami najugaaniittunik imaluunniit illuni ilaqutariinnut ataatsinut marlunnulluunniit inissiani attartortitsisup najugarisaaniittunik.
2) Inissiamik illumi attartorunnaarnissamik nalunaaruteqarnerup nalaani marluinnarnik inissiaqartumiittumik inissiallu aappaa piginnittumit najugaqarineqartumi.

§ 26. § 25-imi pineqartut saniatigut attartortitsinerni allani attartortitsisoq taamaallaat attartorunnaarnissamik nalunaaruteqarsinnaavoq pissutsit imaassimappata:
1) Attartortitsisup attartortitani nammineq inissatut atorniarlerpagu, aammalu pissutsit illuatungeriinnut tunngasut naliliivigereerlugit attartorunnaarsitsinissaq pissusissamisuuginnartussatut isiginarpat.
2) Attartortitsisup uppernarsaatissaqartippagu illup isaterneqarnerata allanngortiterneqarnerataluunniit nassatarisussaagaa attartukkat qimanneqartariaqalerneri.
3) Attartortoq illup ingerlatitaaneranut atatillugu atorfeqartitaasimappat, soraarneranilu kingoraartissaata inigisimasaralua inigisariaqalersimappagu.
4) Attartortitsisup pissuserissaarnissamik peqqissaarnissamillu eqqaasitsissutai attartortup maleruanngippagit imaluunniit illumut ineqartunulluunniit allanut akornutaappat, kisiannili pissutsit ima ajortiginngippata attartornissamik isumaqatigiissutip atorunnaarsinnissaanut pissutissaqarani.
5) Pissutissaasuttaaq pingaaruteqartut allat immikkut pisariaqartikkaangassuk attartortitsisup attartornermik atorunnaarsitsinissaa.

§ 27. Attartortitsisup § 25, nr. 2, aamma § 26 naapertorlugit attartorunnaarsitsiniarnera allaganngorlugu nalunaarutigineqassaaq allakkamilu erseqqissarneqarsimassalluni imm. 2 naapertorlugu attartortup isorinninnissamut periarfissaqarnera. § 26 naapertorlugu attartorunnaarsitsiniarnermi aammttaaq erseqqissarneqassaaq attartorunnaarsitsiniarnermut suna patsisaatinneqarnersoq.
Imm. 2. Attartorunnaarsitsiniarneqattartortup akueriumanngikkuniuk, nalunaarfigineqarnerminiit sap. akunneri arfinillit qaangiutsinnagit akerliunini allaganngorlugu saqqummiutissavaa. Attartortitsisup attartorunnaartitsinissaq aalajangiussimaannarniaruniuk suli aamma sapaatit akunneri arfinillit qaangiutsinnagit suliassaq eqqartuussivimmut suliassiissutigisariaqarpaa.

§. 28. Aalajangersakkat §§ 24-27-mut isumaqatigiissuteqarnikkut sanioqquteriarneqarsinnaanngillat attartortumut nammagassiissutitut.

 

Attartortitsisup attartornissamik isumaqatigiissummik atorunnaarsitsisinnaanermut pisinnaatitaaffii.

§. 29. §§ 16 - 20-mut aamma § 30, imm. 3-mi, aalajangersakkat unioqqutinneqarpata attartortitsisup attartortitsineq atorunnaarsissinnaavaa, attartortorlu inissiamiit anisinneqassaaq, unioqqutitsineq pingaannginnerusuunngippat.
Imm. 2. Attartorneq atorunnaarsinneqartinnagu attartortitsisup attartortoq inassuteqarfigissavaa assuarlernermut pissutaasut aaqqeqqullugit. Pissutsit §§ 16-20-mut amma § 30, imm. 3-mi, taaneqartut unioqqutinneqartutut attartortitsisumit patsisiginiarneqarsinnaanngillat attartortitsisup attartornermut isumaqatigiissummik atorunnaarsitsinnginnerani aaqqiivigineqarsimappata.
Imm. 3. §§ 16-20-mut aamma § 30, imm. 3-imi, taaneqartut pissutigalugit attartorneq atorunnaarsinneqarpat attartortoq pisussaavoq attartukkani piaartumik qimassallugu aammalu attartornermut akiliutissani akiliutissanilu attartornermut tunngassuteqartut allat akilissallugit nalinginnaasumik attartorunnaarsitsiniarluni piffissaliussaasartup naanerani qimatsinissaagaluami tungaanut. Aammattaaq attartortoq pisussaavoq unioqqutitsinerup kingunerisaanik attartortitsisup annaasai taarsiivigissallugit, tassunga atallutik attartukkamit anisitsinermut aningaasartuutit.
Imm. 4. Attartortitsisup sapinngisaminik attartukkat allanut attartorteqqiniassavai. Attartortitsisup attartortitseqqinnerminut akiliutigititai akiliutigititassaraluiluunniit qimatsisup akiliutissaraluinut piffissami imm. 3-mi taaneqartumi ilanngaatigineqassapput.
Imm. 5. Imm. 2-4-mut aalajangersakkat isumaqatigiissuteqarnikkut sanioqquteriarneqarsinnaanngillat attartortumut nammagassiissutitut.

 

Kapitel 7.
Qularnaveeqqusiissuteqarneq.

§ 30. Attartornissaq isumaqatigiissutigineqartinnagu Namminersornerullutik Oqartussat Konununillu inissiaataannik attartortussap takussutissaqartissavaa, Kalaallit Nunaanni aningaaseriviit arlaanni konto-mi tigusiffigineqarsinnaanngitsumi qaammatinut pingasunut ineqarnermut akiliutissat nalinginik aningaasanik toqqortaqarnini, takuulli imm. 2. Attartornerup atuunnerani attartortitsisoq akuersiseqqaartinnagu aningaasat attartortup tigusiffigisinnaanngilai. Attartornerup nalaani imaluunniit attartortup attartukkamik qimatsineranut atatillugu attartortitsisup aningaasat uninngasuutit tigusiffigisinnaavai attartortup aserugarisimasaanut misissuinermi uppernarsineqartunut attartortumllu akiligassanngortinneqarsinnaasunut kiisalu attartortup attartorunnaarnermini ineqarnermut akiliutissaraluaminut kinguaattoorutaanuut matusissutissatut.
Imm. 2. Attartortoq attartornissap isumaqatigiissugip tigineqarnerani qularnaveeqqutinik akiliuteqarsinnaanngippat, attartornissamik isumaqatigiissuteqarnermi kingusinnerusukkulluunniit attartortoq qaammatini qulingiluani naafferartumik akilersuinissamik periarfissinneqarsinnaavoq, taamaalilluni qaammatikkaartumik qularnaveeqqusiussassaq akilersorneqartussanngorlugu kontomut tamakkerluni akilerneqarnissaata tungaanut.
Imm. 3. Naafferartumik toqqortuisussaatitaanik attartortup maleruannippagu, tamanna ineqarnermut akiliutissat piffissaq eqqorlugu akilerneqannginnerattulli, takuuk § 16, isumaqatigiissummik atornerluinertut isigineqassaaq.
Imm. 4. Attartortitsinerup atorunnaarnerani attartortuusimasoq aserukkanik taarsiissutissaqartitaanngippat imaluunniit ineqarnermut akiliutissanik akiitsoqanngippat attartortitsisup aningaaserivik ilisimatissavaa imm. 1-imi taaneqartut qularnaveeqqutitut uninngasuutigineqartut taakkulu erniarisimasinnaasaat inuttaanut tunniunneqarsinnaasut.
Imm. 5. Qularnaveeqqut pillugu maleruagassat erseqqinnerusut naalakkersuisut aalajangersaavigissavaat, tamatumani aamma ilanngunneqassallutik inunnut ikiuutisisartunut, utoqqalinersiutisisartunut inuutissarsiorsinnaajunnaarnersiuteqartunulluunniit tunngasut.

§ 31. Namminersortut attartortittaganni qularnaveeqqusiussassap, aallarniutissap ineqarnermullu siumoortumik akiliutissap qaanunatini arfinilinni ineqarnermut akiliutissat annertoqataat sinnersimasariaqanngilaat.

 

Kapitel 8.
Inissianit nuunneq utertitsinerlu.

§ 32. Attartortup inissiamit nuunnermi attartukkani tunniutissavaa iserterfigeqqaaramiuk pissusaatut itillugu, naatsorsuutigineqassanngillalli inissiap nammineq aserfallassimanera pisoqaliartornermik nungullariartornermillu pissuteqartut, kiisalu suut amigaatigineqartut attartortitsisup nammineerluni isumagisassai.
Imm. 2. Attartorunnaarnissaq ilisimatitsissutigineqareersimappat imaluunniit allamik patsiseqartumik inissiaq qimanneqartussanngorsimappat attartortitsisup attartortullu isumaqatigiissutigissavaat ulloq suna inissiaq qimanneqassanersoq aammalu inissiap misissorneqarnissaa qaquguussanersoq. Attartortoq misissuinermi najuussinnaatitaavoq, piumagunilu paasisimasaqartumik ilaqarsinnaatitaalluni. Attartortoq misissuinissamut peqataaqqullugu allakkatigut ullunik marlunnik sioqqullugu qinnuigineqassaaq.
Imm. 3. Misissuinermi attartortitsisoq takusaanermut nalunaarusiussaaq, tassanilu nalunaarsorneqassapput amigaatit paarinerlutallu attartortitsisup isumaa malillugu attartortumut akisussaaffigitinneqartussat. Attartortoq isumaqataanngippat isumaqataannginnera nalunaarusiami allanneqassaaq, taamatullu attartortup qanoq isumaqarnera nalunaarneqassalluni. Attartortoq pisinnaatitaavoq nalunaarusiap assilineranik tunineqassalluni ingerlaannartumillu allakkatigut nalunaarfigineqassaaq attattortitsisup isumaa malillugu iluarseqqusat suut attartortumut akiligassanngortinneqarnersut. Attartortup inissiamik qimatsinissani ullunik arfineq pingasunik sioqqullugu ilisimatitsissutigissavaa inuninut nalunaarutigineqartartussat sumut nassiunneqartassanersut.
Imm. 4. Misissuinissamut attartortoq taassumaluunniit piginnaatissimasaa takkutinngippat attartortitsisoq pisinnaatitaavoq nalunaarusiaq tunngavissaatissallugu aammalu attartortup qularnaveeqqutitut uninngatitai tigussallugit amigaatit paarinerlukkallu iluarsineqarneranni aningaasartuutinut matusissutissatut.
Imm. 5. Attartortoqqoqassiilluniiliuuseqarsimanngippat amigaatit nalinginnaasumik sissuerluni misissuinermi malugineqarsimasariaqaraluartut attartortitsisup kingusiinnakkut pisuutitsiniutigisinnaanngilai.
Imm. 6. Imm. 1-5-mut aalajangersakkat isumaqatigiissuteqarnikkut sanioqquteriarneqarsinnaanngillat attartortumut nammagassiissutitut.

 

Kapitel 9.
Peqqussutip atuutilerfia.

§ 33. Peqqussut atuutilerpoq 1. januar 1990.
Imm. 2. Peqqussut attartortitsinernut peqqussutip atuutilerfia sioqqullugu isumaqatigiissutigineqarsimasunut atunngilaq. Maleruaqqusalli kapitel 4-miit-tut Namminersornerullutik Oqartussat aamma Kommunit inissiaataanni attartortittakkani attartortinneqareersunut atortinneqassapput.

Namminersornerullutik Oqartussat, Ulloq 20. juni 1989.

Jonathan Motzfeldt

/

Moses Olsen