Qularnaveeqqusiissuteqartarneq pillugu Namminersornerullutik Oqartussat nalunaarutaat nr. 38, 21. december 1989-imeersoq.
Inissianik attartortitsineq pillugu Inatsisartut peqqussutaanni nr. 3-mi 20. juni 1989-imeersumi § 30, imm. 5, naapertorlugu makku aalajangersarneqarput:
§ 1. Attartortumut akiligassanngortinneqarsinnaasunik aserortoqarsimatillugu imaluunniit anisernermi ineqarnermut akiliummik akiitsoqartoqartillugu attartortitsisup attartortumit pisassai qularnaveeqquserniarlugit Namminersornerullutik Oqartussat Kommunillu attartortittagaanni attartortussat attartulinnginnerminni qularnaveeqqusiissummik qaammatini pingasuni ineqarnermut akiliutip nalinganik Kalaallit Nunaanni aningaaseriviit arlaannut tigusiffigineqarsinnaanngitsunik toqqorsisassapput.
Imm. 2. Qularnaveeqqusiissutissaq naatsorsorneqartassaaq iserternermi ineqarnermut akiliutip angissusia tunngavigalugu, kiassarnermut akiliut immaqalu ineqarnermut meeqqanut tapiissut ilanngunnagit.§ 2. Namminersornerullutik Oqartussat kommunellu attartortittagaanni 1. januar 1990-ip kingornagut initaartussat tamarmik qularnaveeqqusiissummik akiliisimanerminnut uppernarsaammik isertertinnatik takutitsisassapput.
Imm. 2. Attartortussap qularnaveeqqusiissutissaq tamaat ataatsikkut akilersinnaangippagu, qaammatini qulingiluani akileraasinnaanissaa isumaqatigiissutigineqarsinnaavoq.
Imm. 3. Qularnaveeqqusiissutip qanoq ililluni akilerneqarnissaa tamatigut inissiamik attartornermut isumaqatigiissummi allaqqasassaaq.
Imm. 4. Akileraasussaatitaanermik eqqortitsinnginneq attartornissamut isumaqatigiissummik naammassinninnginneruvoq, tamannalu naapertorlugu attartorneq atorunnaarsinneqarsinnaalluni.§ 3. Attartortoq ataavartumik pisortanit ikiorsiivigineqartarpat ineqarnermut kiassarnermullu tamakkiisumik ilaannakortumilluunniit akiliunneqartarluni, qularnaveeqqusiissummik akiliinissaa kinguartinneqarsinnaavoq, tamanna inunnik isumaginninnermut allaffeqqarfimmit attartortitsisumut uppernarsarneqarpat.
Imm. 2. Pisortatigoortumik ikiorsiissutit unitsinneqarpata inunnik isumaginninnermut allaffeqarfimmiit tamanna attartortitsisumut nalunaarutigineqassaaq, tamatumalu kingornagut attartortup qularnaveeqqussiissutissaq akilissavaa, takuuk § 2.§ 4. Inissiamik attartortup nammineerluni toqqagaanut Kalaallit Nunaanni aningaaseriviit arlaanni konto-mut matoqqasumut qularnaveeqqusiissut toqqorneqassaaq.
Imm. 2. Immersugassaq Namminersornerullutik Oqartussanit akuerisaasoq atorlugu konto-mik matoqqasumik pilersitsineqartassaaq.
Imm. 3. Konto qularnaveeqqusiissummik toqqortaqarfik sillimmasiissutitut, taarsigassarsianut qularnaveeqqusiissutitut il. il. atorneqarsinnaanngilaq.§ 5. Qularnaveeqqusiissummik taamaallaat ammaassineqarsinnaavoq attartornerup taamaatinneqarnerani attartortitsisullu akuersineratigut, tassalu attartortup akiligassaanik aserortoqarsimanngippat ineqarnermullu akiliut akiitsoqarfiginngippagu.
Imm. 2. Aserorterinerup, paarinerluinerup assigisaasaluunniit kingunerisaanik aserukkat/iluarsagassat attartortumut akiligassanngortinneqarsinnaasut matussutissinniarlugit attartotitsisoq attartornerup nalaani qularnaveeqqusiissutinut toqqortaqarfimmit tigusisinnaavoq.§ 6. Nalunaarut atulerpoq 1. januar 1990.
Namminersornerullutik Oqartussat, 21. december 1989.
Moses Olsen/
Dorthe Johannsen