Inissianik attartortut sinniisoqartitaanerat pillugu Namminersornerullutik Oqartussat nalunaarutaat nr. 37, 21. december 1989-imeersoq.

Inissianik attartortitsineq pillugu Inatsisartut peqqussutaanni nr. 3-mi 20. juni 1989-imeersumi § 15, imm. 7, naapertorlugu makku aalajangersarneqarput:

 

§ 1. Inissianik attartortut sinniisoqartitaanerat pillugu malittarisassiornikkut siunertarineqarpoq attartortut najugaqartullu inigisamik taakkununngalu atasumik atortorisat ataatsimoorussat ingerlanneqarnerannut aserfallatsaalinerannullu soqutiginninnerulernissat. Taamaattumik najugaqartut sinniisissamittut qinigaat apeqqutit inissiat ingerlanneqarnerannut tunngassuteqartut suulluunniit pillugit attartortitsisumik oqaloqateqarnissaamut aammalu taanna suleqatigalugu suliassat ilaannik aalajangersimasunik suliaqartarnissaannut.

§ 2. Ineqartut aatsaat sinniiseqarsinnaatitaapput inissiaqarfinni inissiarsuarniluunniit ikinnerpaamik arfinilinnik ataatsimik piginnittulinnik inissiartalinni, aammalu kiassarnikkut, errorsisarfeqarnikkut, ininik katerisimaartarfeqarnikkut, ineqartunutilluuteqarnikkut, pinnguartarfeqarnikkut il.il. ataatsimoorussiviusuni najugaqarunik.

§ 3. Inissiani najugaqartoq kinaluunniit ineqartunik ataatsimiigiaqqusisinnaavoq attartortut sinniisissannik qinersisitsiniarluni.
Imm. 2. Ataatsimiigiaqqusineq minnerpaamik ullunik arfineq marlunnik piffissaliilluni pisassaaq naleqquttukkut allagarsiinikkut, atuagassiatigut takoqqusaarummik ilanngussinikkut imaluunniit inissiarsuarmi inissiarsuarniluunniit najugaqartunut tamanut allagaqarnikkut. Tamanna peqatigalugu inissiamik attartortitsisoq allakkatigut ataatsimiigiaqquneqassaaq.
Imm. 3. Najugaqartut ataatsimiinneranni peqataasinnaapput inissiarsuarmi najugaqartut, inissianik attartortut allagartamik piginnaatitsissummik nassartillugit sinniisigisaat attartortitsisullu sinniisai. Attartortoq napparsimanini, aallarsimanini suliaminulluunniit tunngasut pissutigalugit najuussinnaanhngikkuni allagartaq piginnaatitsissut atorlugu sinniiseqarsinnaavoq.
Imm. 4. Ineqartut ataatsimiittut aqutsisussartik namminneq toqqassavaat.
Imm. 5. Ineqartut attatsimiittut ineqartut sinniisissaannik qinersinissamut tunngatillugu allajangiisinnaassuseqassapput inissiat attartortinneqartut ikinnerpaamik sisamararterutaat ataatsimiinnermi najuutsitaqarpata.

§ 4. Ineqartut ataatsimiinneranni inissianik attartortut aalajangissavaat ineqartut sinniisaannik pilersitsisoqassanersoq, aammalu pilersitsisoqassappat ineqartut sinniisaat taakkualu sinniisussaat qassiussanersut.
Imm. 2. Ineqartut sinniisaat ikinnerpaamik pingasuussapput amerlanerpaamillu tallimaassallutik. Inissianik attartortut najuuttut amerlanerussuteqartut aalajangiisuussapput. Inissiaq attartugaq ataaseq taasinermik ataatsimik naleqarpoq.
Imm. 3. Kinaluunniit nammineerluni aalajangiisinnaalersimasoq inissiarsuarmi, attartortuisa attartortitsisup tungaanut sinniisuutitaqalernissaminnik kissaateqarfigisaanni inissiat arlaanni najugalik ineqartut sinniisaattut qinigaasinnaavoq, inissiamik attartorneq pillugu isumaqatigiissummi taaneqarsimanngikkaluarunilluunniit. Qinigaaffik ukiumik attatsimik sivisussuseqarpoq. Qinigaaqqittoqarsinnaavoq.

§ 5. Ineqartut sinniisissaasa qinigaareerunik attartortitsisoq qinersinerup inerneranik nalunaarfigissavaat ilisimatillugulu apeqqutit ineqartut sinniisaannik oqaloqatiginnissutigiumasani pillugit kimut saaffiginnissinnaasoq.

§ 6. Ineqartut sinniisaasa isumagisassaraat ineqartut attartortitsisup tungaanut soqutigisaasa sulissutiginissaat taakkua inissiarsuit pillugit isumaasa siunnersuutaasalu attartortitsisumut saqqummiuttarnerisigut.
Imm. 2. Ineqartut sinniisaat pisinnaatitaapput aserfallatsaaliinissamut, eqqiluisaartitsinissamut il.il. aningaasaliissutaasimasunik ilisimatinneqarnissamut, taamaalillutik aningaasaliissutaasimasut qanoq atorneqarnissaannut siunersuisinnaassallutik.
Imm. 3. Illuni namminersortunit pigineqartuni attartortut sinniisaat pisinnaatitaapput ingerlatsinermi naatsorsuutinik takusassinneqarnissaminnut aammalu pitsanngorsaatissanik siunnersuuteqarsinnaatitaallutik, tamanna peqatigalugu innersuuteqarsinnaagunik pitsannguutigitinniakkat piviusunngortinnissaannut sutigut aningaasaliisoqarsinnaasoq tamakkulu ingerlatinnerannut aningaasartuutissat qanoq ililluni matussutissinneqarsinnaasut.
Imm. 4. Namminersornerullutik Oqartussat kontmunellu inissiaataanni attartortittakkani Namminersornerullutik Oqartussat kommunalbestyrelseluunniit inissaqartitsinermut ataatsimiititaliap inassuteqarneratigut akuersisinnaapput inissiarsuarni suliassanut atortorissaarutaannullu aalajangersimasunut aningaasanik atugassanngortitsisoqassasoq. Ineqartut sinniisaasa suliassap tamatuma
isumagineqarnissaa suliassamittut tigusinnaavaat.

§ 7. Ineqartut sinniisaat ineqartut ataatsimiinneranni siunnersuuteqarsinnaapput inissiani maleruagassanik isumaqatigiissutigineqarunik atortinneqartussanik, inissianik attartotitsisup peqquteqavilluni tamanna akerlilissanngippagu.
Imm. 2. Inissiani maleruagassatut siunnersuutit akuersissutigineqarsinnaassappata inissianik attartortut tamakkerlutik amerlanersaat ineqartut ataatsimiinneranni akuersillutik taasisimasariaqarput.
Imm. 3. Siunnersuut imm. 2-mi aalajangersagaqmalillugu akuersissutigineqanngikkaluarluni attartortut ataatsimiinnermi najuuttut ikinnerpaamik affaannit tapersersorneqarpat qaammat ataaseq qaangiutsinnagu ineqartut ataatsimiiteqqinneqassapput. Ataatsimiinnermi tamatumani siunnersuut taasinerit affaanniit akuersissutigineqarsinnaavoq ataatsimiigiarsimasut amerlassusiat apeqqutaatinnagu.

§ 8. Ineqartut sinniisaasa qaammatisiutit malillugit ukiut taamaasa majip ulluisa siulliat nallersinnagu ineqartut pisarnertut ataatsimiitinniartassavaat.
Imm. 2. Ataatsimiinnermi ullormut oqaluuserisassat minnerpaamik makku ilagisassavaat:
1) Ukioq qaangiuttoq pillugu nalunaarummik saqqummiussineq.
2) Ineqartut sinniisissaannik qinersineq.
Imm. 3. § 3-mi aalajangersakkat taamatulli malinneqassapput. Ineqartut ataatsimiittut aalajangiisinnaassuseqassapput inissianik attartortut sisamararterutaat ataatsimiinnermi najuutsitaqanngikkaluarpataluunniit, taamaattorli tak. § 7, imm. 2 aamma 3 aammalu § 11.
Imm. 4. Ineqartut ataatsimiinneranni attartortut najuuttut akornanni amerlanerullutik taasisut aalajangiisuusassapput. Attartortut ataatsit ataatsimik taasisinnaapput. Taasisinnaatitaaneq inoqutigiit ilaannit imaluunniit allagartamik pisinnaatitsissuimnik tiguimniartunit atorneqarsinnaavoq.

§ 9. Ineqartut immikkut ittumik ataatsimiitinneqarsinnaapput ineqartut sinniisaasa tamanna pisariaqarsorippassuk, inissianik attartortut ikinnerpaamik sisamararterutaasa tamanna kissaatigippassuk, imaluunniit siusinnerusukkut ineqartut attaatsimiinneranni taamaaliornissaq aalajangiunneqarsimappat.
Imm. 2. § 8, imm. 3-mi aalajangersakkat taamatulli malinneqassapput.

§ 10. Inissiamik attartortoq ineqartunut sinniisaatilluni inigisaminit aneqquneqarsinnaanngilaq, akerlianilli attartortitsisup attartornissamik isumaqatigiissut atorunnaarsissinnaajuassallugu inissianik attartortitsineq pillugu peqqussummi §§ 16-imit 20-mut aammalu § 30, imm. 3-mi aalajangersakkat attartortup unioqqutissimappagit.

§ 11. Ineqartut ataatsimiinneranni § 3, imm. 5-imi taaneqartutut amerlatigisunik peqataasoqanngippat, attartortitsisup taassumaluunniit sinniisaata ataatsimiinnermi tamanna piumasarippagu, aammalu kingusinnerpaamik qaammatip ataatsip kingornagut ikinnerpaamik attartortut sisamararterutaasa peqataaffigisaannik ineqartut ataatsimiitinneqanngippata ineqartut sinniiseqartitaanerat atorunnaassaaq.

§ 12. Nalunaarut 1. januar 1990 atuutilissaaq.

Namminersornerullutik Oqartussat, 21. december 1989

Moses Olsen

/

Dorthe Johannsen