Immiaaqqat imeruersaatillu kulsyrimik akullit puui pillugit Namminersornerullutik Oqartussat nalunaarutaat nr. 32, 23. november 1989-imeersoq.
Immiaaqqat imeruersaatillu kulsyrimik akullit puui pillugit inatsimmi nr. 293-imi 9. juni 1971-imeersumi § 1, imm. 2 naapertorlugu aalajangersarneqarpoq:
§ 1. Immiaaqqat imeruersaatillu kulsyrimik akullit Kalaallit Nunaanni taamaallaat nioqqutigineqaqqusaapput utertittakkanik, nalunaarummut bilagimi immikkut nalunaarsukkanik eqqortitsisunik, pooqartillugit.
Imm. 2. Puut utertittakkat nalunaarummi uani pineqartut tassaapput puut utertitsisarnermi atorneqartut, atuisumit imaarneqareernermikkut poorineqartut annersaat immeqqitassanngorlugit utertinneqartartut.§ 2. Kinaluunniit immiaaqqanik imeruersaatinillu kulsyrimik akulinnik sunilluunniit nioqquteqartoq pisussaavoq, suut poorineqarnersut, puukunik utertitsisarnerup qanoq ingerlaneranik, tassunga ilanngullugu puukut utertinneqartartut procenti qassiunersut aamma puukut utertinneqartut qanoq akilerneqartarnersut naalakkersuisut piumasaqarneratigut paasissutissiissalluni, aamma poorineqartunut misiligutinik tunniussissalluni.
Imm. 2. Imm. 1 naapertorlugu paasissutissiissutigineqartut il.il. takutippassuk, avatangiisit mingutsinneqannginnissaat aamma eqqaavilerisut persaqusersorneqannginnissaat suusupagineqarsimasut, taava naalakkersuisut piumasaqaatissanut immikkut maleruagassiorsinnaapput, soorlu puukut utertinneqartut qanoq akilerneqartarnissaat aamma puukunik utertitsisarnermi periaaseq pillugit.§ 3. Teknikkikkut aningaasatigullu naleqquttumik periarfissaqanngippat Tunup Avannaatalu ilaat imaluunniit Tunu Avannaalu tamakkerlugit puukunik utertitsisarnermut peqataalersissallugit, taava naalakkersuisut akuersissutigisinnaavaat immiaaqqat aamma imeruersaatit kulsyrimik akullit ataasiaannarluni atorneqarsinnaasunik pooqartillugit Tunup Avannaatalu ilaanni imaluunnit Tunu Avannaalu tamakkerlugit nioqqutigineqarnissaat.
Imm. 2. Imm. 1 naapertorlugu akuersissut sivisunerpaamik atuussinnaavoq ukioq ataaseq.§ 4. Pilersuinerup tungaatigut ajornartorsiortoqalerpat, imaluunniit pissutsit immikkut ittut allat naatsorsuutigisariaqalerpata, naalakkersuisut akuersissutigisinnaavaat immiaaqqat aamma imeruersaatit kulsyrimik akullit ataasiaannarluni atorneqarsinnaasunik pooqartillugit nioqqutigineqarnissaat.
§ 5. Nalunaarut una atuutinngilaq Kalaallit Nunaata illersornissaa pillugu isumaqatigiissut 27. april 1951-imeersoq naapertorlugu danskit amerikkamiullu illersorfissatut pilersitaanni.
§ 6. § 1, imm. 1-imi aamma § 2, imm. 1-imi aalajangersakkanik kiisalu § 2, imm. 2 naapertorlugu piumasaqaatitut aalajangersakkanik unioqqutitsinerit akiliisitaanermik kinguneqarsinnaapput.
§ 7. Nalunaarut atortuulissaaq 1. januar 1990, tassungalu peqatigitillugu atorunnaarsinneqarpoq Statsministereqarfiup nalunaarutaa nr. 901 29. december 1987-imeersoq.
Namminersornerullutik Oqartussat , ulloq 23. november 1989.
Jonathan Motzfeldt/
Aqigssiaq Møller
Ilanngussaq 1 (pdf-format)
Ilanngussaq 2 (JPG-format)
