Kalaallit Nunaanni timmissanik eqqissisimatitsineq pillugu Namminersornerullutik Oqartussat nalunaarutaat nr. 29, 19. september 1989-imeersoq.

Kalaallit Nunaanni pinngortitamik allanngutsaaliuineq pillugu Inatsisartut inatsisaanni nr. 11-mi 12. november 1980-imeersumi § 2, imm. 1 naapertorlugu makku aalajangersarneqarput:

 

Timmissat piniarneqarsinnaasut - Piffissat eqqissisimatitsiviit.

§ 1. Timmissat makku piniarneqarsinnaapput, kisianni piffissat eqqissisimatitsiviit ataani nalunaarsorneqartut avataanni:  (*-mik nalunaaqutsikkanut piffissat immikkut taaneqartut nunat immikkoortuisa ilaanni eqqissisimatitsinermut atuupput, takuuk § 2).

Tuullik (Gavia immer) 1. juni - 15. august.
Qarsaaq (Gavia stellata) 1. juni - 15. august.
Qaqulluk (Fulmarus glacialis) 1. juni - 15. august.
Oqaatsoq (Phalacrocorax carbo) 1. april - 30. september.
Nerleq (Anser albifrons) 1. maj - 15. august.
Nerleq siggukitsoq (Anser brachyrhynchus) 1. maj - 15. august.*
Nerlernarnaq (Branta leucopsis) 1. maj - 15. august.*
Qeerlutooq (Anas platyrhynchos) 1. juni - 15. august.
Alleq (Clangula hyemalis) 1. juni - 15. august.
Miteq siorartooq (Somateria mollissima) 1. juni - 30. september.*
Miteq qingalik, sioraki (Somateria spectabilis) 1. juni - 15. august.
Paaq (Mergus serrator) 1. juni - 15. august.
Aqisseq (Lagopus mutus) 1. juni - 15. august.
Isunngaq (Stercorarius parasiticus) 1. juni - 15. august.
Isunngarsuaq (Stecorarius pomarinus) 1. juni - 15. august.
Papikkaaq (Stercorarius longicaudus) 1. juni - 15. august.
Naajarluk (Larus marinus) . 1. juni - 15. august
Naajarujussuaq (Larus hyperboreus) 1. juni - 15. august.*
Naajaannaq (Larus glaucoides) 1. juni - 15. august.
Taateraaq (Rissa tridactyla) 1. juni - 15. august.
Appaliarsuk (Alle alle) 1. juni - 15. august.*
Appa ("alk") (Uria lomvia) 15. marts - 15. oktober.*
Appa sigguttooq (Uria aalge) 15. marts - 15. oktober.*
Serfaq (Cepphus grylle) 1. juni - 15. august.
Tulugaq (Corvus corax) 1. april - 30. juni.*

Imm. 2. Timmissat allat tamarmik eqqissisimatitaalluinnarput. Timmissat eqqissisimatitaalluinnartut Kalaallit Nunaannit aallarunneqarnissaat inerteqqutaavoq, ilanngullugulu asiunaveersaganngorlugit Kalaallit Nunaannut utertinneqarnissaat siunertaralugu Kalaallit Nunaannit nassiunneqarnissaat inerteqqutaalluni. Taamatut inerteqquteqarnermi ilaapputtaaq timmissat uumasut toqungasulluunniit, qerititat, panertitat allatulluunniit asiunaveersakkat ilanngullugit, aammalu timmissat kivikkat kiisalu amii siaarlugit panertitat, niaquisa saarni manniilu.
Imm. 3. Timmissat eqqissisimatitaalluinnartut toqungasut nassaat politiinut tunniunneqartussaapput.

 

Piffissat immikkut eqqissisimatitsiviit.

§ 2. Piffissat nalinginnaasumik eqqissisimatitsiviit § 1, imm. 1-imi taaneqartut saniatigut aalajangersakkat immikkut ittut makku atuupput:
a) Ittoqqortoormiit kommuneani nerlerit siggukitsut aamma nerlernat piniaqqusaanngillat 1. juni - 31. august, taamaattorli sikup sinaavaniit julip aallaqqaataata tungaanut piniarneqarinnaallutik.
b) Kangaatsiap kommuneata avannaani mitit eqqissisitaapput piffissami 1. juni - 15. august.
c) Kangaatsiap kommuneata avannaani Nunatta Kitaani appat eqqissisitaapput piffissami 1. juni - 31. august.
d) Avanersuup aamma Ittoqqortoormiit kommuniini naajat, appaliarsuit, appat tulukkallu ukioq kaajallallugu piniarneqarsinnaapput.
Imm. 2. Qeerlutuut nerlerillu isat, mitit siorartuut, mitit qingallit siorakit, allerit aammalu nerlerit, nerlerit siggukitsut kiisalu nerlernarnat isat ataatsimut ungoornissaat inerteqqutaavoq.

 

Timmissat ineqarfii.

§ 3. Sumiiffiit suulluunniit timmissat imarmiut aappariikkuutaat ikinnerpaamik qulit piaqqiorfigisaat timmissat ineqarfiisut isigineqassapput.
Imm. 2. Timmissat ineqarfiiniitillugit eqqarneq allatulluunniit pisorpalutsitsineq inerteqqutaavoq, taamaattorli Avanersuup aamma Ittoqqortoormiit kommuniini julip aallaqqaataaniit, timmissat ineqarfiannit ungasissutsip matuma iluani:
a) 5 km, innaq timmissat ineqarfiat timmissanit ukunannga inigineqarpat: appat, apparluit, serfat, appaliarsuit, taateraat, qaqulluit imaluunniit oqaatsut.
b) 200 m, timmissat ineqarfiat qeqertaasimappat mikisoq pukkitsukujooq miternit siorartuunit, miternit siorakinit, serfanit, imeqqutaallanit imaluunniit naajanit allanit taateraajunngitsunit inigineqartoq.

 

Mannissarneq il.il.

§ 4. Mannissarneq inerteqqutaavoq.
Imm. 2. Kisianni 1. julip tungaanut makku mannii mannissarneqarsinnaatitaapput: Qaqulluit, imeqqutaallat, isunngat, naajarluit, naajaannaat, naajarujussuit, taateraat, serfat kiisalu appaliarsuit. Avanersuup aamma Ittoqqortoormiit kommuniini 25. junip tungaanut mitit siorartuut mannii mannissarneqarsinnaatitaapput kiisalu naajarujussuup tulukkallu mannii ukioq kaajallallugu mannissarneqarsinnaallutik.
Imm. 3. Manniit imm. 2-mi aalajangersakkat malillugit mannissaat nammineq atorneqassapput, inuussutissarsiutigalugulu tuniniarneqassanatik allatulluunniit iluanaarniutigineqassanatik.

§ 5. Timmissat suulluunniit piaraasa timmisinnaalersimanngitsut ullunit taakkuluunniit eqqaannit peernissaat inerteqqutaavoq, aammalu piaqqat uumasuutigeqqusaanatik. Taamaattorli Avanersuup aamma Ittoqqortuummiit kommuniini appaliarsuit piaraat timmisinnaanngitsut piniarneqarsinnaatitaapput.

 

Inuussutissarsiutigalugu aallaaniarneq.

§ 6. Taamaallaat appanniarsinnaatitaapput Danmarkip naalagaaffiani innuttaasut Kalaallit Nunaanni najugaqavissut.
Imm. 2. Appat pisarineqartut inuussutissarsiornermi nioqqutissiarineqassanngillat, inuussutissarsiornermi tunisassiaassanatik tunisassiassatullu qerititassiarineqassanatik, taamaallaalli kommunemi najugaqarfigisami "Kalaalimineerniarfimmi" tuniniagaasinnaallutik, taamaattoq tak. imm. 4.
Imm. 3. Kommunalbestyrelsemit qinnuteqartoqarpat nunaqarfiit isorliillu tunisassiorfiini killilimmik erseqqissumik tunngavilersukkamik tunisassiornissaq Naalakkersuisut akuerisinnaavaat.
Imm. 4. Sunngiffimmi imaluunniit aliikkutaralugu aallaaniartartut aallaaniarnermi ataatsimi taamaallaat amerlanerpaamik appat qulit pisarisinnaavaat aamma namminneq ilaquttatillu atugassaannatik. Aallaaniarnermi pisat tuniniarneqassanatillu assigisaanik iliuuseqarfigineqassanngillat.

§ 7. Timmissat pisarineqartut inuussutissatut atorneqassapput, Naalakkersuisunit allamut atuinissamut akuersissummik tunniussisoqarsimanngippat. Taamatuttaaq timmissat pisarineqartut taakkualuunniit ilaat inuussutissarsiornermi avammut tuniniaqqusanngillat.

 

Angallatit.

§ 8. Angallatit sukkasuuliat (aallaaniarnermut atatillugu) angallatigineqarnissaat ajornartinneqanngilaq. Taamaattorli aallaaniarnermi timmissat timmisut malersornissaat, timmisullu aallaanissaat imaluunniit angallatip sukkasuujunera pissutigalugu ajornannginnerusumik angullugit pisarinissaat inerteqqutaavoq.

§ 9. Angallatit silaannakkoorutit, nunakkut angallatit motoorillit aamma snescooterit aallaaniarnermi atoqqusaanngillat.
Imm. 2. Immikkut pissutissaqartillugu kommunet ileqqoreqqusaliornerisigut aalajangerneqarsinnaavoq snescooterit piniariarfimmukarnermi utimullu atorneqarsinnaasut.

 

Piniutit.

§ 10. Timmiarsiutit (kaliber 12 tikillugu), qoorortuuaqqat (kaliber 22) kiisalu qoorortuut nalinginnaasut piniarnermi sakkutut atoqqusaapput. Qoorortuut eqqarasuartaatit qoorortuullu eqittaannartakkat kiisalu timmiarsiutit eqittaannartakkat atornissaat inerteqqutaavoq. Timmiarsiutit singissaartullit ("Pump guns") marluinnarnik patroneqarsinnaanngorlugit aaqqinneqarsimagunik atorneqarsinnaatitaapput.
Imm. 2. Pisissit qarsullu aamma nuffit atorneqarsinnaatitaapput.
Imm. 3. Nigartuutit, pullatit (kiisartut, nippuffissiat, pullatit karsit il.il.), aallaasit namminneq igittussiat, timmissat uumasut ussassaarutit kiisalu toqunartut ilisimajunnaarsitsissutilluunniit atornissaat inerteqqutaavoq.
Imm. 4. Qassutit suulluunniit (aalisakkanut qassutit, qassutit silaannarmi nigarsiniutit, immap iluani pullaviliat il.il.) immap iluani silaannarmiluunniit timmiarniutitut ivertinneqassanngillat atorneqassanatillu. Taamaattorli Avanersuup aamma Ittoqqortoormiit kommuniini appaliarsunniarnermi qalut ipullit qassutaasallit atoqqusaapput.

 

Sumiiffiit eqqissisimatitsiviit.

§ 11. Piffissami 1. juni - 31. august sumiiffinni ukunani taakkunanngalu 500 meterisut ungasitsigisumi nunamut niunissaq allatullu angallannissaq inerteqqutaavoq:
1) Lion Øer Qeqertat kujataaniittut (Avanersuup kommunea),
2) Kuup apparsuit (Kap Schackleton, Upernaviup kommunea),
3) Toqqusaq (Upernaviup kommunea),
4) Kingittuarsuk (Upernaviup kommunea),
5) Apparsuit, Sanderson's Hope (Upernaviup kommunea),
6) Salleq (Uummannap kommunea),
7) Assissut (ikkarluit Imerissut eqqaanniittut) (Qeqertarsuup kommuneani),
8) Nunatsiaq (Kitsissuarsuit eqqaaniittoq, Aasiaat kommuneani),
9) Saattuarsuit (Kitsissuarsuit eqqaani Qeqertaq (Aasiaat kommuneani),
10) Naternap tunuani kangerluup affarlia Tasiusarsuaq Nordenskiolds Bræp iluaniittoq (Kangaatsiap Qasigiannguillu kommuniini),
11) Appat (Ritenbenk, Ilulissat kommuneat) kiisalu
12) Kitsissut avalliit (Qaqortup kommunea). Taamaattoq Upernaviup eqqaani Apparsuit silarluttumi aqqutigineqarsinnaavoq.

 

Miternut ivaffiliat.

§ 12. Miternut ivaffiliat mitit nalinginnaasut piaqqiorfiisa paarineqarnissaat siunertaralugu sumiiffinni toqqakkani akuerineqarsinnaapput.
Imm. 2. Angallannermut, aallaaniarnermut mannissarnermut il.il. malittarisassat kiisalu ivaffilianik atuinissamut akuerisaasut pisinnaatitaaffii pisussaaffiilu allat kommunep ileqqoreqqusaatigut aalajangersarneqarsimassapput.

 

Eqqussineq timmialiinerlu.

§ 13. Timmissanik nujuartanik uumasunik Kalaallit Nunaanni nalinginnaasumik timmiaariinngitsunik eqqussinissaq timmialiinissarlu inerteqqutaavoq.

 

Immikkut akuersissuteqartarneq.

§ 14. Naalakkersuisut siunertanut ilisimatusaatinut allanullu tunngassuteqartunut aalajangersakkanit ukunannga immikkut akuersissuteqarsinnaapput: § 1, imm. 1-2, § 2, imm. 1 a-c, § 4, imm. 1-2, § 5, § 7, § 10, imm. 4, § 11 aamma § 13.

 

Ileqqoreqqusamik atortuulersitsineq.

§ 15. Kommuneni ileqqoreqqusat nalunaarut manna tunngavigalugu akuersissutigineqartut atuutilinnginnerinni Naalakkersuisunit aalajangersarneqaqqaartassapput.

 

Akiliisitsineq arsaarinninnerlu.

§ 16. Aalajangersakkanik ukuninnga: §§ 1-2, § 3, imm. 2, §§ 4-5, § 6, imm. 1, 2 aamma 4, §§ 7-8, § 9, imm. 1, § 10, imm. 1, 3, aamma 4, § 11 aamma § 13 unioqqutitsinerit akiliisitsissutaallutillu pisaqarsimagaanni pisanik arsaarinnissutaasinnaapput. Akiliisitsissutit naalagaaffiup karsianut nakkartussaapput, arsaarinnissutillu landskassemut nakkartussaallutik.
Imm. 2. Unioqqutitseqqikkaanni piniutit arsaarinnissutigineqarsinnaapput.
Imm. 3. Naalakkersuisut aalajangertassavaat pisat arsaarinnissutit kiisalu timmissat toqungasut nassaat § 1, imm. 3-mi taaneqartut sumut atorneqassanersut.

§ 17. Nalunaarut una atortuulerpoq 16. oktober 1989, tassungalu peqatigitillugu atortuujunnaarsinneqarpoq Kalaallit Nunaanni timmissanik eqqissisimatitsineq pillugu Namminersornerullutik Oqartussat nalunaarutaat nr. 6 5. maj 1988-imeersoq.




Kalaallit Nunaanni Namminersornerullutik Oqartussat, 19. september 1989.




Jonathan Motzfeldt

/

Aqigssiaq Møller