STI malillugu ilinniartut sungiusaammik sulinerminni akissarsiaqartitaanerat il. il. pillugit Namminersornerullutik Oqartussat nalunaarutaat nr. 27 ulloq 20. juli 1989-imeersoq.
Kalaallit Nunaanni inuussutissarsiutitigut ilinniagaqartut sulianillu sungiusagaqarnermi sulliviit akornanni pisussaaffiit pillugit Inatsisartut inatsisaanni nr. 4-mi ulloq 23. april 1988-imeersumi § 2, imm. 2 naapertorlugu makku aalajangersarneqarput:
§ 1. Nalunaarummi matumani ilaatinneqarput ilinniartut Siamasissumik Tunngaviusumik Ilinniartitaaneq (STI) malillugu tunngaviusumik inuutissarsiutitigut ilinniarnermi ukiumik siullermik naammassinnissimasut, aammalu Kalaallit Nunaanni naalagaaffimmi, Namminersornerullutik Oqartussani imaluunniit kommuneni sungiusaammik sulisut.
Imm. 2. Sungiusaammik sulinerup nalaani atuarfimmiinnerit nalunaarummi aalajangersakkanut ilaatinneqanngillat.§ 2. STI malillugu ilinniartut qaammammut imatut akissarsiaqartitaassapput:
Ukioq ilinniarfik Akissaateqarfimmi inissisimaneq 1.8.1989 akissarsiat Ukiut aappaat Inissisimaffik 1 Kr. 5.065,02 Ukiut pingajuat Inissisimaffik 2 Kr. 7.165,02 Ukiut sisamaat Inissisimaffik 3 Kr. 7.665,02 Imm. 2. STI malillugu aalisakkanik suliffissuarni sulisussatut ilinniartut ukiup ilinniarfigisamik aappaaniilli inissisimaffik 2 malillugu akissaasersorneqartussanngorlugit inissinneqassapput.
§ 3. STI malillugu ilinniartut najukkamik avataanut suliartortinneqarallarunik Kalaallit Nunaanni tjenestemandit ullormusiaqartitaanerat pillugu aalajangersakkat naapertorlugit ullormusiaqartinneqassapput.
Imm. 2. Suliamut atatillugu angalanermi piffissaq angalaffiusoq piffissap suliffiup/suliffiup sivisussusiata affaatut naatsorsorneqassaaq, tassami piffissamut angalaffiusumut tunngatillugu piffissaq suliffik/suliffiup sivisussusia taamatut naatsorsugaq kinguneqarsinnaanngimmat ullormut pineqartumut tunngatillugu suliffimmut sivisussusissaatitaasup naammassineqartutut isigineqarsinnaannginneranik.
Imm. 3. Taamaattoq nal. 22.00-ip aammalu 08.00-ip akornanni piffissaq angalaffiusoq suliffiup sivisussusiatut naatsorsorneqassanngilaq sulisuusoq siniffissaqartinneqarsimappat.§ 4. STI malillugu ilinniartut nalunaarummi matumani aalajangersakkat malillugit sungiusaammik sulinerminni ukiumi sulinngiffeqarsinnaatitaaffimmi ataatsimi tamakkiisumik sulinngiffeqarsinnaatitaapput (ullut sulinngiffeqarfissat 30-t).
Imm. 2. Ilinniagaqartoq sungiusaammik sulinermi tapiissutisiaqartarneq pillugu aalajangersakkat naapertorlugit sulinngiffeqarsimappat, tassa nalinginnaasumik julip qaammataani, ukiumi sulinngiffeqarfissami ukiup ilinniarnermik ingerlatsiviit aappaata aallartiffiani sulinngiffeqarsinnaatitaanerugaluaq atorunnaassaaq.
Imm. 3. STI malillugu ilinniagaqartut qaammatit sungiusaammik suliffigisatik tamaasa ullut 2 ½ akissarsiaqarlutik sulinngiffeqarsinnaatitaapput. Piffissaq suliffigisimasaq qaammammit ataatsimit sivikinnerusimappat akissarsiaqarluni sulinngiffeqarsinnaatitaaneq piffissap suliffigisimasap sivisussusianut naleqqiullugu sivisussusilerneqassaaq. Aammattaaq piffissami sulinngiffeqarfiusimasumi akissarsiaqarluni sulinngiffeqarsinnaaneq ilanngullugu naatsorsorneqartassaaq.
Imm. 4. STI malillugu ilinniagaqartoq ullunut sulinngiffeqarfissanut tamanut akissarsiaqarsinnaatitaanermik katersisisimanngippat sulisitsisuata ullunut sulinngiffeqarfiinut akissarsiaqarsinnaatitaanermik katersivigisimanngisaanut akissarsiaqartissavaa.
Imm. 5. Ukiumoortumik sulinngiffeqarnissaq qaammatisiutit ukiuata (ukiup katersiffiusup) ingerlanerani pissarsiarineqartassaaq, nalinginnaasumillu sulinngiffeqartoqartassaaq ukiup sulinngiffeqarfissanik katersuiffiup naanerata kingornagut ukiumi tulliuttumi, 1.
februarimiit 31. januarimut naatsorsorlugu (ukioq sulinngiffeqarfik).
Imm. 6. Ulluni sulinngiffeqarfinni akissarsiat saniatigut ukioq sulinngiffeqarfik sioqqullugu qaammatisiutit ukiuanni (ukiumi katersiffimmi) sungiusaammik sulinermi akissarsiarisimasat 1 ½ %-iannik immikkut ittumik sulinngiffeqarnersiutisiaqartitsisoqassaaq.
Imm. 7. STI malillugu ilinniagaqartoq suli akissarsiaqarluni sulinngiffeqarsimanani suliffimmi allami sungiusaammik sulilerpat sungiusaammik suliffigiligaata imm. 2-miit imm. 6 ilanngullugu aalajangersakkat naapertorlugit akissarsiaqartillugu sulinngiffeqartissavaa.
Imm. 8. Sulisitsisumik allamik sungiusaammik suliffeqarnissamik isumaqatigiissuteqartoqanngitsoq aammalu akissarsiaqarluni sulinngiffeqarneq sioqqullugu sungiusaammik suliffeqarnissamik isumaqatigiissut atorunnaarsinneqarpat inuup pineqartup ukiup katersiffiup kingornagut 1. februarimiit sulinngiffeqarfissap sioqqutitsiarnerata tungaanut piumasarisinnaavaa akissarsiarisimasami 12 ½ %-ii tigujumallugit. Tamatuma kingorna nutaamik sungiusaammik suliffeqarnissamik isumaqatigiissuteqartoqarneratigut ilinniarneq nanginneqarpat sungiusaammik suliffimmi tassani ukiumut sulinngiffeqarfissamut siullermut tunngatillugu imm. 4-mi aalajangersakkat atuutissanngillat.
Imm. 9. STI malillugu ilinniagaqartup akissarsiaqarluni sulinngiffeqarnissani sioqqullugu branchearbejderitut imaluunniit suliamik ilinniagalittut ilinniarsimanerminut uppernarsaatitaarsimaguni ukiup katersiffiup kingornagut 1. februarimiit sulinngiffeqarfissap sioqqutitsiarnerata tungaanut piumasarisinnaavaa akissarsiarisimasami 12 ½ %-ii tigujumallugit. Aammattaaq sungiusaammik suliffik ukiup katersiffiup ilaanut inuup ilinniarfimmi atuarfigisimasaanut taamatut sulinngiffeqarnersiaqartitsissaaq.
Imm. 10. Napparsimaneq pissutigalugu sulinngitsoornermi akissarsiaqarluni sulinngiffeqarsinnaatitaanermik/sulinngiffeqarnersiutisiaqartitaanermik ilanngaassisoqassanngilaq.
Imm. 11. Piffissaq sulinngiffeqarfissaq sulisitsisumit aalajangerneqartassaaq, kisiannili piffissap ilinniarfimmi atuarfissap nalaani sulinngiffeqartitsisoqartassanngilaq. Immikkut ittumik akornutissaqartinnagu sulisitsisoq piffissami sumi sulinngiffeqartoqarnissaanik kalerriussisassaaq sulinngiffeqarnissaq kingusinnerpaamik qaammammik ataatsimik sioqqullugu. Ullut sulinngiffeqarfissat ilaat 18-it piffissami 1. februarip 31. oktoberillu akornanni (piffissami sulinngiffeqarfissami) ataatsimoortillugit sulinngiffeqarfigitinneqassapput. Ullut sulinngiffeqarfissat sinneri aqqaneq-marluk aamma ataatsimoortillugit sulinngiffeqarfigitinneqassapput, kisianniliukiupsulinngiffeqarfissap ilaani piffissap sulinngiffeqarfissap avataaniittumi inissinneqarsinnaallutik. Kisiannili sungiusaammik suliffimmut pitsaanerusussaq eqqarsaatigalugu kissaatiginartinneqarpatpiffissapsulinngiffeqarfissap ilaa taanna sulisitsisup aalajangiineratigut ullut ataasiakkaarlugit sulinngiffeqarfigitinneqarsinnaavoq.
Imm. 12. STI malillugu ilinniartut sulinngiffeqarfigisassatik atorsinnaanngippatigik sulinngiffeqarnersiutinik tunniussinissaq ukiumut tullermut kinguartinneqassaaq.§ 5. STI malillugu ilinniagaqartoq sunngiusaammik sulinermi nalaani napparsimanini pissutigalugu sulinnginnermini akissarsiaqarsinnaatitaavoq. Taamatut pisinnaatitaaffeqarneq atorunnaassaaq STI malillugu ilinniagaqartoq malittuinnarmik qaammatini pingasuni napparsimasimappat.
Imm. 2. Napparsimaneq pissutigalugu sulinngitsoorneq nakorsap allagartaliineratigut uppernarsaaseqquneqarsinnaavoq.
Imm. 3. STI malillugu ilinniagaqartoq napparsimasarnini pissutigalugit ullut 120-t sinnerlugit sulinngitsoortarsimappat STI malillugu ilinniartup imaluunniit sulisitsisup piumasarisinnaavaa piffissaq sungiusaammik suliffiusoq piffissamik sivisussusissaa brancheudvalgimit imaluunniit najukkami inuussutissarsiutitigut ilinniartitaanermi ataatsimiititaliamit akuersissutigineqarsimasumik sivitsorneqassasoq, tak. inuussutissarsiutitigut ilinniagaqartut pisussaaffii pillugit Namminersornerullutik Oqartussat nalunaarutaanni nr. 19-imi ulloq 24. juni 1988-imeersumi § 11, imm. 3.§ 6. STI malillugu ilinniartoq naartuguni sungiusaammik suliffigisaminut naartunerminik nalunaaruteqassaaq ernivissatut naatsorsuutigisaq kingusinnerpaamik qaammatinik pingasunik sioqqullugu.
Imm. 2. STI malillugu ilinniagaqartoq naartunerminut erninerminullu atatillugu aalajangersakkat matuma kinguliiniittut naapertorlugit sungiusaammik sulinerminik unitsitsigallarnissaminut pisinnaatitaavoq. Taama pisoqartillugu piffissaq sungiusaammik suliffiusoq unitsitsigallarnerup sivisussusiata sivisoqataanik sivitsorneqassaaq, tak. inuussutissarsiutitigut ilinniagaqartut pisussaaffii pillugit Namminersornerullutik Oqartussat nalunaarutaanni nr. 19-imi ulloq 24. juni 1988-imeersumi § 11, imm. 2.
Imm. 3. STI malillugu ilinniagaqartoq naartunini ernininilu pissutigalugit sungiusaammik suliffigisamini sulinnginnermini erninissap tungaanut ullut 14-it missiliulerneriniit katillugit sapaatip akunnerini 14-ini nalinginnaasumik akissarsiaqarsinnaatitaavoq.
Imm. 4. Piffissamit ernivimmiit qaammatit pingasut qaangiutinngitsut sapaatip akunneri 14-it naasimappata - STI malillugu ilinniagaqartup kissaatigippagu - erninermiit qaammatit pingasut qaangiunnissaata tungaanut akissarsiaqarani sulinngiffeqartitsisoqassaaq.
Imm. 5. STI malillugu ilinniagaqartoq sungiusaammik sulinngiffeqarfigisinnaasani sapaatip akunneri 14-it qaangiutinngitsut meeqqami napparsimmavimmiinnerata nalaani suleqqilersimaguni meeraq erniunerminiit qaammatit arfinillit qaangiutinngitsut napparsimmavimmiit angerlarsimappat angerlarneranut atatillugu sungiusaammik suliffimminit sulinngiffeqarsinnaatitaavoq ullut sulileqqissimanermigut pinngitsoorsimasami sivisoqataannik.
Imm. 6. Piumasarineqarpat piffissaq ernivissatut naatsorsuutigisaq uppernarsarneqassaaq, assersuutigalugu naartunermut atatillugu misissortinnermut allagartamik takutitsinikkut.
Imm. 7. Immikkoortoq 3 malillugu STI malillugu ilinniagaqartup akissarsiani pigiinnarlugit sulinngiffigisimasaa napparsimaffiusutut naatsorsuutigineqassanngilaq, aatsaalli taamaassalluni nakorsap allagarsiussaatigut uppernarsaatissaqarpat sulisimannginneq naartunerunngitsumik aamma/imaluunniit erninerunngitsumik pissuteqartoq. Napparsimanerup kingunerisaanik sulinnginneq immikkoortoq 3 malillugu erninerup kingorna sapaatip akunneri 14-it sinnerlugit sulinngiffeqarnissamut sivitsuutaasinnaanngilaq.
Imm. 8. Piffissaq immikkoortoq 3 malillugu piffissaliusaq sinnerlugu sulinngiffigisaq napparsimanermi sulinngiffeqarnertut naatsorsuunneqarpoq, nalunaarsorneqassallunilu aalajangersakkat tamatumunnga tunngasut naapertorlugit.
Imm. 9. Nakorsap allagarsiineri immikkoortoq 6 naapertorlugu piumasarineqartut sulisitsisumit akilerneqartassapput.§ 7. Sungiusaammik sulinerit atorunnaarsinneqarnerini inuussutissarsiutitigut ilinniagaqartut pisussaaffii pillugit Namminersornerullutik Oqartussat nalunaarutaanni nr. 19-imi ulloq 24. juni 1988-imeersumi kapitali 4-mi aalajangersakkat malinneqartassapput.
§ 8. STI malillugu ilinniagaqartoq qitornami napparsimanerani ullormi siullermi sulinngiffeqarsinnaatitaavoq SIK-p aamma Pisortat Isumaqatigiinniartartoqatigiivisa isumaqatigiissutaannut tapiliussami ulloq 6. februar 1987-imeersumi qitornat napparsimaneranni ullormi siullermi sulinngiffeqarsinnaatitaanermut tunngasumi aalajangersakkat naapertorlugit.
Imm. 2. STI malillugu ilinniagaqartoq ilaquttami qanigisami ilisaanerinut atatillugu sulinngiffeqarsinnaatitaallunilu akiliunneqarluni angalasinnaatitaavoq SIK-p aamma Pisortat Isumaqatigiinniartartoqatigiivisa isumaqatigiissutaannut tapiliussami ulloq 6. februar 1987-imeersumi ilaquttat qanigisat ilisaanerinut atatillugu sulinngiffeqarsinnaatitaanermut akiliunneqarlunilu angalasinnaatitaanermut tunngasumi aalajangersakkat naapertorlugit.§ 9. Nalunaarut una 1. august 1989 atortuulissaaq.
Namminersornerullutik Oqartussat, ulloq 20. juli 1989
Emil Abelsen/
Jakob Janussen