Namminersornerullutik Oqartussat nalunaarutaat nr. 22 ulloq 18. maj 1989-imeersoq aallaaniarsinnaanermut aalisarsinnaanermullu allagartanik tunniussisarnermut tunngasoq.

Kalaallit Nunaanni aallaaniartarneq aamma kuunni tatsinilu aalisartarneq pillugu inatsimmi nr. 72-imi 29. marts 1957-imeersumi § 1 imm. 2 naapertorlugu makku aalajangersarneqarput:

 

§ 1. Aallaaniarnermut aalisarnermullu pisinnaatitaaneq inunnut danskisut innuttaassuseqartuunngitsunut Kalaallit Nunaanni aalajangersimasumik najugaqartunut, aammalu inunnut, Kalaallit Nunaanni aalajangersimasumik najugaqartunut, sivikinnerpaamillu qaammatini malittuinnarni arfilinni najugaqarsimasunut, pissaaq aallaaniarsinnaanermut aalisarsinnaanermullu allagartanik tunniussinikkut.
Imm. 2. Allagartat tulleriinnik normulersukkatut Naalakkersuisunit atortussanngortinneqarlutillu Naalakkersuisunit, politiinit, kikkunnillu Naalakkersuisunit taamaaliornissamut piginnaatitaasunit, tuniniarneqassapput.

§ 2. Maleruaqqusat tulliiniittut naapertorlugit allagartat inuutissarsiutiginagu aallaaniarnissamut aalisarnissamullu pisinnaatitsissutaapput:
1) Aalisarsinnaanermut allagartaq A (akiliut kr. 200) pisinnaatitsissutaavoq Kalaallit Nunaata nunataani imartaanilu qissattaamik nalluummilluunniit aalisarnissamut. Qassutit qoornortuut, qassutit natersiutit, qassutit imaluunniit allatut amerlasooraarniutit suulluunniit atorneqarnissaat inerteqqutaavoq. Allagartaq qaammammut ataatsimut atortussaavoq.
2) Aalisarsinnaanermut allagartaq B (Akiliut kr. 500) l)-mi taaneqartutut annertutigisumik aalisarsinnaatitsivoq, taamaattorli qaammatinut pingasunut atortussaalluni.
3) Aallaaniarsinnaanermut- aalisarsinnaanermullu allagartaq C (akiliut kr. 1.000) l)-mi taaneqartutut annertutigisumik aalisarsinnaatitsivoq kiisalu ukallinik, teriannissanik, natsernik, aataanik imaluunniit natsersuarnik kiisalu timmissanik aallaaniarsinnaatitsilluni. Mannissarneq inerteqqutaavoq. Allagartaq qaammatinut pingasunut atortussaavoq.
4) Aallaaniarsinnaanermut aalisarsinnaanermullu allagartaq D (akiliut kr. 3.000) l)-mi aamma 3)-mi taaneqartutut aallaaniarsinnaatitsillunilu aalisarsinnaatitsivoq aammalu ataatsimik tuttussinnaatitsilluni. Tuttu pannerussanngilaq. Allagartaq qaammatinut pingasunut atortussaavoq.
5) Aallaaniarsinnaanermut aalisarsinnaanermullu allagartaq E (akiliut kr. 4.000) l)-mi aamma 3)-mi taaneqartutut aallaaniarsinnaatitsillunilu aalisarsinnaatitsivoq aammalu ataatsimik tuttussinnaatitsilluni. Tuttu pannerusinnaavoq. Allagartaq qaammatinut pingasunut atortussaavoq.

§ 3. § 2 naapertorlugu akiliutit landskassemut nakkartartussaapput.

§ 4. Aallaasit eqqarasuartaatit aallaasillu eqittaannartakkat atoqqusaanngillat.
Imm. 2. Aallaaniarnermi timmisaatit imaluunniit qamutit motorillit, taakkununnga ilaallutik qamuteralaat, atoqqusaanngillat.

§ 5. Siunertanut ilisimatuujussutsimut tunngasunut siunertanullu allanut tunngasumik Naalakkersuisut §§-it 1-ip 2-llu sanioqqunneqarsinnaanissaannut akuersissuteqarsinnaatitaapput.

§ 6. Aallaaniarneq aalisarnerlu tamarmi eqqissisimatitsinermut aalajangersakkat atuuttut malillugit ingerlanneqassaaq.
Imm. 2. Aallaaniarsinnaanermut aalisarsinnaanermullu allagartamik pigisaqartup aalajangersakkat § 2-miittut aamma § 4-miittut imaluunniit eqqissisimatitsinermut aalajangersakkat qanoq ilisukkulluunniit atuuttut unioqqutippagit allagartaq arsaarinnissutigineqarsinnaavoq.
Imm. 3. Aammattaaq eqqissisimatitsinermut aalajangersakkanik unioqqutitsinerit malittarisassat atuutut tunngavigalugit inatsisitigut suliassanngortinneqarsinnaapput.

§ 7. Naalakkersuisut aalajangiisinnaapput, aallaaniarsinnaanermut imaluunniit aalisarsinnaanermut allagartamik pigisaqartoq, taassuma atorunnaarneratigut, aallaaniarnerup imaluunniit aalisarnerup annertussusaa pillugu nalunaarusiussasoq.

§ 8. Aalajangersakkanik § 2-miittunik aamma § 4-miittunik unioqqutitsineq akiliisitsinermik kinguneqarsinnaavoq. Angallassissutit, aallaaniarnermi aamma aalisarnermi atortut kiisalu pisat aalisagartalluunniit nalingi arsaarinnissutigineqarsinnaapput.
Imm. 2. Naalakkersuisut aalajangiissapput arsaarinnissutigineqartut qanoq pineqassanersut.

§ 9. Nalunaarut 1. juni 1989 atuutilerpoq, tamatumunngalu peqatigitillugu Kalaallit Nunaanni aallaaniarsinnaanermut aalisarsinnaanermullu allagartat pillugit nalunaarut nr. 543 11. november 1976-imeersoq, nalunaarutikkut 3. december 1981-imeersukkut allanngortinneqartoq, atorunnaarsinneqarpoq.

Namminersornerullutik Oqartussat, ulloq 18. maj 1989

Jonathan Motzfeldt

/

Aqigssiaq Møller