Ilinniartitsisut rådii aamma kommunemi ilinniartitsisut siunnersuisoqatigiivi pillugit Namminersornerullutik Oqartussat nalunaarutaat nr. 18 16. maj 1989-i-meersoq.

Kulturimut atuartitsinermullu tunngasut siulersorneqarnerat pillugu inatsisartut peqqussutaanni nr. 8-mi 7. maj 1988-imeersumi § 59, imm. 4, § 62, imm. 2 aamma § 63 naapertorlugit ilinniartitsisut rådii aamma kommunemi ilinniartitsisut siunnersuisoqatigiivi pillugit maleruagassat makku matumuuna aalajangersarneqarput.

 

I. Rådit inuttalersorneqarnerat.

Ilinniartitsisut rådii.

§ 1. Meeqqat atuarfiinni tamani marluk sinnerlugit aalajangersimasumik atorfeqarlutik ilinniartitsisulinni ilinniartitsisut rådiannik pilersitsineqassaaq. Taakku tassaassapput atuarfiup pisortaa, viceskoleinspektørit, sunngiffimmi sammisassaqartitsinermi inspektørit, ilinniartitsisut tjenestemandiusut, ilinniartitsisut kontrakteqarlutik atorfiliusut, timelærerit aamma ukioq kaajallallugu vikariusut. Skolepsykologit, konsulentit aamma perorsaanermut tunngasumik suliallit atuarfimmi aalajangersimasumik nal. akunnerinik atuartitsiffeqartut ilinniartitsisut rådianni ilaatinneqassapput. Ilinniartitsisut atuarfinni arlalinni nal. akunnerinik aalajangersimasumik atuartitsiffeqartut ilinniartitsisut rådianni ataasiinnarmi ilaasortaasinnaapput. Ukiumi atuarfiusumi atuarfik nal. ak. amerlanernik atuartitsivik ilaasortaaffiussaaq. Nalornisoortoqartillugu kommunalbestyrelsep taassumaluuniit aalajangiisussanngortitaata aalajangertassavaa atuarfiup sorliup ilinniartitsisuisa rådianni ukiumi atuarfiusumi pineqartumi ilaasortaanissaq.
Imm. 2. Atuarfinni aalajangersimasumik atorfilimmik ataasiinnarmik marlunnilluunniit ilinniartitsisulinni taakku ilinniartitsisut rådiattut sulissapput.
Imm. 3. Ilinniartitsisut rådiannik pilersitsineqassaaq Namminersornerullutik Oqartussat atuarfiutaanni, inoqarfinni kommunet arlaannaalluunniit atasuunngitsuniittuni, aamma atuarfinni ineqarfigalugillu nerisaqarfiusuni landstingip peqqussutaani nr. 6-imi 16. oktober 1979-imeersumi § 11, imm. 3 naapertorlugu pilersinneqarsimasuni.

 

Kommunemi ilinniartitsisut siunnersuisoqatigiivi.

§ 2. Kommuneni ataatsimit amerlanerusunik meeqqanut atuarfeqartuni kommunemi ilinniartitsisut siunnersuisoqatigiivinik pilersitsineqassaaq. Taakku tassaassapput atuarfiup pisortaa ataaseq, viceskoleinspektøri ataaseq imaluunniit sunngiffimmi sammisassaqartitsinermi inspektøri kommunemi atuarfimmi taamaattumik atorfileqarsimappat, aamma kommunep atuarfiinit tamanit ilinniartitsisunut sinniisoq ataaseq.
Imm. 2. Kommunemi ilinniartitsisut siunnersuisoqatigiivinut qinersineq ukioq atuarfiusoq ataaseq atortuusarpoq. Kommunemi ilinniartitsisut siunnersuisoqatigiivi ilaasortaaffigineqassapput skolepsykologimit, kommunemi skolepsykologeqarpat meeqqat atuarfiani aalajangersimasumik nal. akunnerinik atuartitsiffeqartumik.

§ 3. Atuarfiit pisortaat, viceskoleinspektørit aamma sunngiffimmi sammisassaqartitsinermi inspektørit meeqqat atuarfianni aalajangersimasumik tiimeqartut ukiut tamaasa 1. maj nallertinnagu kommunemi atuarfinni pisortat tamarmik, taamatullu viceskoleinspektørit sunngiffimmilu sammisassaqartitsinermi inspektørit tamarmik akornanni sinniisutut aallartitassaminnik qinersissapput. Qinersinissaat taaneqartut kommunemi ilinniartitsisut siunnersuisoqatigiivini siulittaasup isumagissavai
a) atuarfimmi pisortat, viceskoleinspektørit sunngiffimmilu sammisassaqartitsinermi inspektørit qinersiartorlutik ataatsimiigiaqqullugit imaluunniit taamaaliornissaq ajornarpat
b) qinigassanngortitassanik telegrammikkut imaluunniit allakkatigut siunnersuuteqaqqusilluni. Siunnersuutit siulittaasumit tiguneqareersimassapput 1. april nallertinnagu. Tamatuma kingorna allakkatigut telegrammitigulluunniit taasineqassaaq § 4 naapertorlugu.
Imm. 2. Kommunemi atuarfinni tamani ilinniartitsisut ukiut tamaasa 1. maj nallertinnagu sinniisutut aallartitassaminnik akunnerminni qinersissapput. Atuarfik ataasiinnarmik marlunnilluunniit aalajangersimasumik atorfilinnik ilinniartitsisoqarpat taanna ataaseq marluugunillu aappaa kommunemi ilinniartitsisut siunnersuisoqatigiivini atuarfiup sinniisaatut ilaasortanngussaaq.
Imm. 3. Kommunemi ilinniartitsisut siunnersuisoqatigiivini siulittaasoq ilinniartitsisut akornannit qinigaappat atuarfimmi, kommunemi ilinniartitsisut siunnersuisoqatigiivisa siulittaasuata suliffigisaani, ilinniartitsisoqatigiit kommunemi ilinniartitsisut siunnersuisoqatigiivini ilaasortassaminnik ataatsimik qinerseqqissapput.

§ 4. § 3 naapertorlugu qinersineq allalluni taasinikkut pissaaq.
Imm. 2. Taaseqqaarnermi qinigaasoqassappat taassuma taasisinnaasunit najuuttunit amerlanerulluartunit taaneqarsimanissaa piumasarineqarpoq. Taamatut amerlanerussuteqarnissaq anguneqanngippat taasineqaqqissaaq. Aappassaaneerluni taasinermi qinigassanngortittoq amerlanerussuteqarluartumik taaneqarsimasoq imaluunniit qinersinermi qinigassanngortittoq ataasiinnaq taagorneqarsimasoq qinigaassaaq. Aappassaaneerluni taasinermi aamma aalajangiineqanngippat taasinermi tassani amerlanerpaanik taaguunneqarsimasut marluk kisiisa qinigassanngortillugit pinngitsoorani aalajangiiffiusussamik qinersineqaqqissaaq. Aappassaaneerluni taasinermi taaneqartut amerlaqatigiinnik taaneqarsimappata makitsisitsinikkut aalajangerneqassaaq kikkut marluk aalajangiiffiusussamik qinersinissami (pingajussaaneerluni taasinissami) qinigassanngortinneqassannersut. Pingajussaaneerluni taasinermi qinigassanngortittut amerlaqatigiinnik taaneqarsimappata makitsisitsinikkut aalajangiineqassaaq.
Imm. 3. Sinniisussanik qinersineq immikkut pisassaaq sinniisutut aallartitassanik qinersinermi maleruagassat atorneqartut malillugit.
Imm. 4. Qinersinerit ukiumi atuarfiusumi tulliuttumi atuutissapput.

§ 5. Kommunemi ilinniartitsisut siunnersuisoqatigiivini siulittaasup kommunemi ilinniartitsisut siunnersuisoqatigiivi nutaamik qinigaasut ataatsimiigiaqqussavai, tassanilu qinersineqassaaq § 9, imm. 1, naapertorlugu ukiumi atuarfiusumi tulliuttumi atuuttussanik. Rådi ataatsimiigiaqquneqaqqissanngilaq ukioq atuarfiusoq qinersiviusimasoq naareertinnagu.
Imm. 2. Nunap immikkoortuini pissutsit immikkut illuinnartut pisariaqalersippassuk periaaseq § 3, imm. 1, litra b-mi allassimasoq atorneqarsinnaavoq.

 

II. Rådit pisinnaatitaanerat.

Ilinniartitsisut rådiat.

§ 6. Ilinniartitsisut rådiata aalajangertussaavaa atuartoq immikkut ittumik atuartinneqassanersoq. Aalajangiineq pissaaq ilinniartitsisut atuartumik atuartitsisuusimasut inassuteqarneratigut aammalu atuartup angajoqqaallu isumasioqatigereernerisigut.
Imm. 2. Aalajangiineq atuarfiup atuartup angajoqqaavinut nalunaarutigissavaa, taakkualu aalajangiineq atuarfeqarnermut ataatsimiititanut ingerlateqqissinnaavaat allanngortitassaanngitsumik aalajangiiffigisassanngorlugu.

§ 7. Atuarfeqarnermut ataatsimiititat makku pillugit oqaaseqaatit ilinniartitsisut rådiannit pissarsiariniassavaat:
1) Atuarfimmi ilinniartitsinissamut pilersaarummut tassanilu allannguutissanut missiliuut,
2) suliap ilinniartitsisut akornanni agguataarneqarnerani periusissat kiisalu sapaatip akunneranut suliassanut pilersaarut,
3) atuarfimmi atuartitsinermut atortut nutaat atorneqarnissaat,
4) init atuartitsiviusut atortulersorneqarnissaannik pequtilersorneqarnissaannillu siunnersuut,
5) aningaasartuutissat atuarfimmut tunngasut pillugit atuarfeqarnermut ataatsimiititat siunnersuutaat,
6) atuarfiup atuartuinut atuarnerup nalaani atuarnerullu avataani iliuusissanut siunnersuut aamma
7) atuarfimmi malittarisassanut siunnersuutit.
Imm. 2. Ilinniartitsisut rådiat maleruagassiat erseqqinnerusumik aalajangersarneqartut malillugit atuarfimmi pineqartumi sanaartugassanut tunngasut suliarineqarneranni suleqataassaaq.
Imm. 3. Ilinniartitsisut rådiat apeqqutit atuarfimmut pineqartumut tunngasut tamaasa pillugit oqaaseqaateqarsinnaavoq aammalu atuarfeqarnermut ataatsimiititanut imaluunniit kulturimut atuartitsinermullu udvalgimut siunnersuuteqarsinnaalluni.
Imm. 4. Ilinniartitsisut rådiat suliassanut sunulluunniit siulittaasumit, atuarfiup pisortaanit imaluunniit kommunemi atuarfeqarnermut oqartussaasunit taakkununnga ilanngullugit skoleinspektøriunermit imaluunniit skoledirektørimit imminut saqqummiunneqartunut oqaaseqartassaaq.
Imm. 5. Ilinniartitsisut rådiata oqaaseqaatai siunnersuutaalu, immaqa ikinnerussuteqartunit oqaaseqaatinik ilaqartillugit, atuarfimmi pisortaq aqqutigalugu taassuma oqaaseqaataanik ilallugit ingerlateqqinneqartassapput. Suliami atuarfiup pisortaata oqaaseqaataasa assilineri ilinniartitsisut rådinnut nassiunneqartassapput. Ilinniartitsisut rådiannit oqaaseqaatit ilaatinneqassapput suliassap pisortanut qulliunerusunut saqqummiunneqarnerani.
Imm. 6. Inoqarfinni kommunet arlaannaalluunniit atasuunngitsuniittuni aamma atuarfinni ineqarfigalugillu nerisaqarfiusuni landstingip peqqussutaani nr. 6-imi 16. oktober 1979-imeersumi § 11, imm. 3 naapertorlugu pilersinneqarsimasuni kommunemi oqartussaasut sinnerlugit naalakkersuisut oqaaseqartussaassaapput.

 

Kommunemi ilinniartitsisut siunnersuisoqatigiivi.

§ 8. Kulturimut atuartitsinermullu udvalgip kommunemi ilinniartitsisut siunnersuisoqatigiivi kommunep atuarfeqarneranut tunngasut makku pillugit oqaaseqartittassavai:
1) Kommunep atuarfik pillugu pilersaarusiaanut tassungalu allannguutissatut missingersuusiat kiisalu kommunemi atuarfinnik allilerinissamut missingersuusiat.
2) kommunep atuarfiini ilinniartitsinissamut pilersaarutinut taakkunanilu allannguutissanut missiliuut,
3) kommunep atuarfiini atuarfimmi nakorsaqartitsineq, meeqqat kigutit nakorsaqartitaanerat atuarfimmilu nerisaqartitsineq pillugit siunnersuutit.
Imm. 2. Kommunemi ataasiinnarmik atuarfilimmi oqaaseqaatit imm. 1-imi taaneqartut atuarfimmi ilinniartitsisut rådiannit tunniunneqartassapput.
Imm. 3. Kommunemi ilinniartitsisut siunnersuisoqatigiivi atuarfinnut kiisalu kommunemi atuarfeqarnermut tunngasut tamaasa pillugit oqaaseqaateqarsinnaapput aammalu atuarfeqarnermut ataatsimiititanut imaluunniit kulturimut atuartitsinermullu udvalgimut siunnersuuteqarsinnaallutik.
Imm. 4. Kommunemi ilinniartitsisut siunnersuisoqatigiivi suliassat siulittaasumit, kulturimut atuartitsinermullu udvalgimit, kommunalbestyrelsemit imaluunniit skoleinspektøriunermit imaluunniit skoledirektørimit imminut saqqummiunneqartut tamaasa pillugit oqaaseqaateqartussaapput.
Imm. 5. Kommunemi ilinniartitsisut siunnersuisoqatigiivisa oqaaseqaataat siunnersuutaallu, immaqa ikinnerussuteqartunit oqaaseqaatinik ilaqartillugit, skoleinspektøriuneq imaluunniit skoledirektøri aqqutigalugit taassuma oqaaseqaataanik ilallugit ingerlateqqinneqartassapput. Suliami skoleinspektøriunerup imaluunniit skoledirektørip oqaaseqaataasa assilineri kommunemi ilinniartitsisut siunnersuisoqatigiivinut nassiunneqartassapput. Kommunemi ilinniartitsisut siunnersuisoqatigiivinit oqaaseqaatit ilaatinnneqassapput suliassap pisortanut qulliunersunut saqqummiunneqarnerani.

 

III. Aalajangersakkat nalinginnaasut.

§ 9. Ilinniartitsisut rådiat kommunemilu ilinniartitsisut siunnersuisoqatigiivi ukiut atuarfiusut tamaasa siulittaasussaminnik siulittaasumillu tullissaanik ilaasortamik akornannit qinersisassapput suleriaasissatillu namminneq aalajangersartassallugit. Allagassanik isumaginnittussamik allatsimik qinersisoqarsinnaavoq. Qinigaaqqittoqarsinnaavoq.
Imm. 2. Ilinniartitsisut rådiat kommunemilu ilinniartitsisut siunnersuisoqatigiivi ulluinnartigut ingerlatsisussanik udvalgiliorsinnaapput sinnerlutik oqaaseqartartussanik maleruagassat suleriaasissatut aalajangersarneqarsimasuniittut naapertorlugit. Udvalgimik ulluinnartigut ingerlatsisussamik qinersineq ukiumi atuarfiusumi ataatsimi atortuussaaq. Qinigaaqqittoqarsinnaavoq.
Imm. 3. Imm. 1 aamma 2 naapertorlugit qinersinerit tamarmik pisassapput atuarfiit aasaanerani ferielersinnagit atortuussallutillu ukiup atuarfiusup tulliani.
Imm. 4. Ilinniartitsisut rådiata siulittaasua atuarfeqarnermut ataatsimiititat ataatsimiinnerini, kiisalu kommunemi ilinniartitsisut siunnersuisoqatigiivisa siulittaasuat kulturimut atuartitsinermullu udvalgip ataatsimiinnerini peqataasassapput taaseqataasinnaanatik.

§ 10. Ilinniartitsisut rådiat kommunemilu ilinniartitsisut siunnersuisoqatigiivi ataatsimiittassapput siulittaasup imaluunniit kommunemi atuarfeqarnermut oqartussaasut tamanna pisariaqartikkaangassuk. Ilinniartitsisut rådiannut tunngatillugu atuarfiup pisortaatattaaq tamanna piumasarigaangagu. Suleriaasissatut aalajangersakkani allatut aalajangiineqarsimanngippat rådi aamma ataatsimiiaqquneqartassaaq ilaasortaasa sisamararterutaasa tamanna piumasarigaangassuk.
Imm. 2. Siulittaasup ataatsimiinnissap sumi pinissaa piffissarlu aalajangertassavai kiisalu ullormut oqaluuserisassat aalajangertassallugit.
Imm. 3. Suleriaasissatut aalajangersakkani allatut aalajangiineqarsimanngippat ilinniartitsisut rådiat atuarfimmi allagarsiinikkut ataatsimiigiaqquneqassaaq, kommunemilu ilinniartitsisut siunnersuisoqatigiivinut ataatsimiigiaqqusineq allaganngorlugu ilaasortanut tamanut nalunaarutigineqartassaaq. Ataatsimiigiaqqusineq amerlanertigut nalunaarutigineqartariaqartassaaq ataatsimiinnissaq ullunik 14-nik sioqqullugu, kisiannili pissutsit tamanna pisariartikkaangassuk sivikinnerusumik piffissalerlugu pisinnaalluni, taamaattorli kommunemi ilinniartitsisut siunnersuisoqatigiivinik ataatsimiigiaqqusinerit ullunit sisamanit sivikinnerusumik piffissalernagit.
Imm. 4. Rådit ilaasortaasa sisamararterutaat piumasaqarsinnaapput apeqqutit suulluunniit atuarfinnut tunngassuteqartut pillugit siunnersuutit oqaluuserinissaasa ullormut oqaluuserisassanut ilanngunneqarnissaannik, kommunemi ilinniartitsisut siunnersuisoqatigiivisa ataatsimiinnerini aamma kommunemi atuarfeqarnermut tamarmiusumut tunngassuteqartut. Ullormut oqaluuserisassatut siunnersuutit ilinniartitsisut rådii ataatsimiissatillugit ullunik sisamanik imaluunniit kommunemi ilinniartitsisut siunnersuisoqatigiivi ataatsimiissatillugit ullunik qulinik sioqqutsisumik siulittaasumut tunniunneqassapput. Ullormut oqaluuserisassat nivinngarneqassapput atuarfimmi, kommunemi ilinniartitsisut siunnersuisoqatigiivi eqqarsaatigalugit atuarfinni amerlanertigut taaneqartut tulleriinneri malillugit ataatsimiinnissaq ullunik marlunnik ullunillu sisamanik sioqqullugu. Ullormut oqaluuserisassani allassimassaaq inimi sumi piffissamilu sumi allakkiat ullormut oqaluuserisassanut tunngassuteqartut, ullormut oqaluuserisassanut ilanngullugit ilaasortanut nassiunneqarsimanngitsut, qimerluugassanngorlugit saqqumitinneqassanersut.

§ 11. Ilaasortat ataatsimiinnerni peqataassapput. Peqataasinnaannginneq sumik patseqarnera oqaatigalugu ataatsimiinnissaq sioqqullugu allakkatigut siulittaasumut nalunaarutigineqassaaq.
Imm. 2. Ataatsimiinnerit amerlanertigut atuarnerup naliginngisaani pisassapput.

§ 12. Ilinniartitsisut rådiat kommunemilu ilinniartitsisut siunnersuisoqatigiivi aalajangiisinnaassuseqarput ilaasortat ikinnerpaamik affaat najuuppata. Aalajangiinerit taasinerit amerlanerussuteqarnerisigut pisassapput. Oqaaseqaateqarnerni siunnersuuteqarnerniluunniit ilaasortat oqaaseqaammut siunnersuummulluunniit taasisimasut amerlassusii allasimassapput.
Imm. 2. Aalajangiinerit imaqarniliorneqarnissaat siulittaasup isumagissavaa. Ikinnerussuteqartut piumasarisinnaavaat isummatik allaasut aalajangiinerit allanneqarfigisassaannut naatsumik allanneqassasut aalajangiunneqartullu pisortanut allanut nalunaarutigineqarneranni ilaatinneqassasut. Imaqarniliaq akuerineqassaaq suleriaasissatut aalajangersar neqarsimasuniittut naaportorlugit, tak. § 9, imm. 1.

§ 13. Ilinniartitsisut rådiat kommunemilu ilinniartitsisut siunnersuisoqatigiivi pisussaanngillat piginnaatitaanatillu pissutsit ilinniartitsisut tjenestemanditut atorfeqarnerannut tunngassuteqartut pillugit oqaaseqarnissaminnut.
Imm. 2. Ilinniartitsisut rádianni imaluunniit kommunemi ilinniartitsisut siunnersuisoqatigiivini ilaasortaasoq ilinniartitsisut rådiata imaluunniit kommunemi ilinniartitsisut siunnersuisoqatigiivisa ataatsimiinnerini nutserisuusimaguni akissarsisinneqassaaq maleruagassat sukkulluunniit atortuusut malillugit.

§ 14. Ilinniartitsisut rådiata kommunemilu ilinniartitsisut siunnersuisoqatigiivisa sulinerannut atasumik, soorlu nutserinermut, skrivemaskiinamik allannermut, nuutiterinermut, pappiaranut, frimærkenut allanullu aningaasartuutit akilerneqassapput kommunep budgettiani tamakkununnga atugassatut akuerisaasut atorlugit.

 

IV. Atortuulernissamik il.il. aalajangersakkat.

§ 15. Nalunaarut una atuutilissaaq 1. juni 1989. Ulloq taanna atorunnaassaaq Kulturimik Atuartitsinermillu Aqutsisut lærerrådi, fælleslærerrådi aamma landslærerrådi pillugit kaajallaasitaat 3/80.

Namminersornerullutik Oqartussat, Nuuk, ulloq 16. maj 1989

Jens Lybert

/

Hugin S.Christiansen