Tikinnermi nioqqutissat akitsuuteqanngitsut nassatarisinnaasat pillugit Namminersornerullutik Oqartussat nalunaarutaat nr. 16, 6. maj 1989-imeersoq.

Nioqqutissanik eqqussinermi eqqussuinermilu akitsuutit pillugit Inatsisartut inatsisaanni nr. 1, 6. maj 1989-imeersumi § 9 naapertorlugu tulliiniittut aalajangersarneqarput:

 

§ 1. Tikinnermi angalasut nioqqutissat tulliini taagorneqartutulli annertussuseqartut akitsuuteqanngitsumik nassatarisinnaavaat:
a) Cigaritsit 200 imaluunniit sikaat 50 imaluunniit cigarillosit 100 imaluunniit tupat 250 g.
b) Cigaritsit pappiarartassaat imaluunniit pappiarartassat ineriikkat 200.
c) Imigassaq kimittooq 1 liter imaluunniit hedvinit 2 liter kiisalu vinit nerrisit 2 liter.
d) Tipigissaat 50 g aamma 1/4 liter tipigissoq.
e) Immiaaqqat 2 liter.
f) Sukkulaatit, lakridsit imaluunniit assigisaat katillugit 1 kg.
g) 1 kg kaffet imaluunniit tiit.
h) Neqi, neqinit nioqqutissiat imaluunniit timmissat katillugit 5 kg.
Imm. 2. Inuit 18-inik ukioqalereersimasut kisimik immiaaqqanik vininik imigassanillu kimittuunik kiisalu tupanik akitsuuteqanngitsunik eqqussisinnaatitaapput.

§ 2. Angallassinermi sulisuusut - t.1. inuit umiarsuarni timmisartunilu nunat tamalaat akornanni angalasuni angallassissutip ingerlanneqarnerani imaluunniit taassuma iluani suliaqartut - ullut 15 inorlugit sivisussusilimmik Kalaallit Nunaata avataani najugaqareersimagunik uternerminni makkuninnga eqqussisinnaatitaapput:
a) Cigaritsit 60 imaluunniit sikaat 40 imaluunniit ciqarillosit 50 imaluunniit tupat 250 g.
b) Hedvinit 2 liter aamma vinit nerrisit 2 liter, kisianni imigassanik kimittuunik pinnatik.
c) Tipigissaat 50 g aamma 1/4 liter tipigissoq.
d) Kaffet 500 g.
e) Tiit 100 g.
Imm. 2. Ulluni 15-ini taakkuluunniit sinnerlugit Kalaallit Nunaata avataani najugaqareernermi angallassissutini inuttaasut § 1-imi maleruagassat naapertorlugit nioqqutissanik nassarsinnaapput.

§ 3. Umiarsuarni, Kalaallit Nunaata avataani nalunaarsorneqarsimasuni, inuttaasut umiarsuup Kalaallit Nunaata imartaani angalanerani akitsuusigaanngitsunik atugaqarsinnaatitaapput. Inuttaasumut ataatsimut ulloq unnuarlu akitsuusigaanngitsunik atorneqarsinnaasut imaapput: vini 1/4 liter, imigassaq kimittooq 1/4 liter aamma tupanik nioqqusiat 40 g.
Imm. 2. Umiarsuarni inuttaasut, imm. 1 naapertorlugu nioqqutissanik akitsuusigaanngitsunik pissarsisimasut, akitsuusigaaffiusumiit aallarnissartik pissutigalugu umiarsuarmiit niusimasut nioqqutissanik akitsuusigaanngitsunik, §§-ini 1-imi 2-milu annertussusissamut aalajangersakkat annertoqataannik, nassataqarsinnaatitaapput. Nioqqutissat taakku akitsuusigaaffiusumi atorneqaqqusaanngillat.
Imm. 3. Takornariat nunat allamiut umiarsuaannut ilaasartaatinut ilaasut imm. 1-imi taaneqartutut akitsuusigaanngitsunik atuisinnaatitaapput.
Imm. 4. Takornariat, imm. 3 naapertorlugu akitsuusigaanngitsunik atugaqartut, nioqqutissanik akitsuusikkanik allanik nunaliaasseqqusaanngillat, taamaallaat tupat, sukkulaatit aamma lakridsinik nioqqusiat, nammineq atugassat. Kalaallit Nunaat aqqusaarlugu angerlamut aallarnissaq akuersissutigineqarpat takornariap § 1 naapertorlugu nioqqutissat akitsuusigaanngitsut nassatarisinnaavai. Nioqqutissat taakku akitsuusigaaffiusumi atorneqaqqusaanngillat.
Imm. 5. Imm. 1 aamma 3 naapertorlugit akitsuusigaanngitsunik atuisinnaatitaaneq taamaallaat nioqqutissanut, umiarsuup akitsuusigaaffiunngitsumi pisiarisimasaanut, atuuppoq.

§ 4. Angalanermi nammineq atugassatut atortut - tipigissaatit, pinnersaatit tipigissullu - inatsisip § 2, nr. 20-a, naapertorlugu akitsuuteqartussat taamaallaat tamakku nakkutilliisutut oqartussat naliliinen tunngavigalugit annertussutsimikkut ilutsimikkullu angalanerup sivisussusianut nallersuunneqarsinnaappata, akitsuuteqanngitsumik eqqunneqarsinnaapput.

§ 5. Kalaallit Nunaanni najugaqarallarnermi nammineq atugassatut angalanermi atortut, inatsisip § 2, nr. 24-31-ni taaneqartut, taamaallaat tamakku nakkutilliisutut oqartussat naliliineri tunngavigalugit annertussutsimikkut ilutsimikkullu angalanermi atortussatut nalinginnaasutut isigineqarsinnaappata, eqqunneqarsinnaapput
Imm. 2. Akitsuusiinnginnissamut piumasarineqarpoq angalanermi atortut aallarnermi nassarneqarnissaat.

§ 6. Inuit Kalaallit Nunaanni najugaqartut imaluunniit najugaqavissut Kalaallit Nunaannut tikeqqinnerminni angalanermi atortut, inatsisip § 2, nr. 24-31-ni taaneqartut, angalasup akitsuusigaaffiusup avataani angalanermini nammineq atorsimasai, akitsuuteqanngitsumik eqquteqqissinnaavai.

§ 7. §§-it 1-miit 6-mut malillugit akitsuusiinnginnissamut piumasarineqarpoq nioqqutissat/angalanermi atortut inummit nassarneqarnissaat imaluunniit tikinnermi inummit namminermit nassataniittinneqarnissaat, taamaalilluni nioqqutissat/angalanermi atortut tikiffimmi takutinneqarsinnaanngorlugit.

§ 8. Oqimaassutsip, angissutsip naleqassutsillu il. il. aalajangersarneqarnissaanni maleruagassat danskit ilanngaaserisuisa malitaat malinneqassapput.

§ 9. Akitsuusiinermik maleruagassat malinneqarnissaannik nakkutilliineq Kalaallit Nunaanni politinit aamma Kalaallit Niuerfiannit ingerlanneqassaaq. Oqartussaasut taakku pisussaaffeqarlutillu pisinnaatitaaffeqarput Inatsisartut inatsisaanni nr. 16-mi 29. oktober 1985-imeersumi, nioqqutissat Kalaallit Nunaannut eqqunneqartartut tassanngaaniillu anninneqartartut nalunaarsorneqarnerat nakkutigineqarnerallu pillugit Inatsisartut inatsisaanni, takuneqarsinnaasunik.

§ 10. Nalunaarummi uani aalajangersakkanik unioqqutitsineq akiliisitsissutaasinnaavoq aammalu nioqqutissaq imaluunniit aningaasat, taassuma nalingata angeqatai, arsaarinnissutigineqarsinnaapput.

§ 11. Nalunaarut una ingerlaannaq atortuulerpoq.
Imm. 2. Nalunaarutip atortuulerfia killigalugu nioqqutissanik eqqussinermi eqqussuinermilu akitsuutit pillugit nalunaarut nr. 36, 30. december 1985-imeersoq atorunnaarpoq.

Namminersornerullutik Oqartussat, ulloq 6. maj 1989.

Emil Abelsen

/

Kaare Hagemann