Nunaqqatigiit Siunnersuisoqatigiivinut ilaasortassanik qinersisarneq pillugu Namminersornerullutik Oqartussat nalunaarutaat nr. 11 ulloq 7. april 1989-imeersoq.
Kommunet aggornerisa avataanniittuni Nunaqqatigiit Siunnersuisoqatigiivi pillugit Inatsisartut inatsisaanni nr. 13-imi ulloq 20. oktober 1988-imeersumi § 2, imm. 2 naapertorlugu makku aalajangersarneqarput:
Kapitali 1.
Nunaqqatigiit Siunnersuisoqatigiivi, qinersisinnaatitaaneq qinigaasinnaanerlu.§ 1. Kommunet aggornerisa avataanni Kangerlussuaq aamma Pituffik tamarmik immikkut nunaqqatigiinnut siunnersuisoqatigeeqarfiupput. Nunaqqatigiinnut siunnersuisoqatigeeqarfik ataaseq qinersivittut ataatsitut naatsorsuunneqassaaq.
§ 2. Nunaqqatigiinnut siunnersuisoqatigeeqarfimmi ataatsimi Nunaqqatigiit Siunnersuisoqatigiivinut ilaasortat tallimat imaluunniit arfineq-marluk qinerneqartassapput.
Imm. 2. Nunaqqatigiit Siunnersuisoqatigiivisa tunuartussat piffissami qinigaaffiup atuuffiani tullermi ilaasortat amerlassusissaat aalajangertassavaat.
Imm. 3. Nunaqqatigiit Siunnersuisoqatigiivini ilaasortat ukiuni marlunni atasussanngorlugit qinerneqartassapput, ilaasortallu tamarmik ataatsikkut tunuartassapput. Piffissaq qinigaaffiup atuuffia 1. junimit naatsorsuunneqartassaaq. Naalakkersuisut ulloq qinersiffissaq aalajangiiffigisassavaat. 1989-imi ulloq qinersivissaq 9. maj 1989-usussanngorlugu aalajangerneqarsimavoq.§ 3. Nunaqqatigiit Siunnersuisoqatigiivinut qinersisinnaatitaapput:
1) Kikkulluunniit qallunaatut innuttaassuseqartut, Folketingimut qinersisinnaanermut ukiussarititaasunik naammatsitsisimasut aammalu qinersinissaq sioqqullugu sivikinnerpaamik qaammatini arfinilinni siunnersuisoqatigeeqarfimmi aalajangersimasumik najugaqarsimasut.
2) Kikkulluunniit Finlandimi, Islandimi, Norgemi imaluunniit Sverigemi naalagaaffimmi innuttaassuseqartut, Folketingimut qinersisinnaanermut ukiussarititaasunik naammatsitsisimasut aammalu qinersinissaq sioqqullugu sivikinnerpaamik ukiuni pingasuni naalagaaffimmi sakkutooqarfimmilu sivikinnerpaamik qaammatini arfinilinni aalajangersimasumik najugaqarsimasut.
Imm. 2. Inuit Kalaallit Nunaanni eqqartuunneqarnermikkut nammineersinnaajunnaarsitaasimasut qinersisinnaatitaanngillat.
Imm. 3. Kinaluunniit qinersisartut allassimaffiannut ilanngunneqarsimatinnani qinersisinnaatitaanngilaq.
Imm. 4. Ulloq 9. maj 1989 qinersinermut atatillugu imm. 1-3 qinersinermik siulersuisut aamma Naalakkersuisut isumaqatigiissuteqarnerisigut sanioqqunneqarsinnaapput.§ 4. Nunaqqatigiit Siunnersuisoqatigiivinut qinigaasinnaatitaapput kikkulluunniit § 3 naapertorlugu tassunga qinersisinnaatitaasut, kisianni aatsaat ukiut kingulliit tallimat ingerlaneranni pinerluuteqarsimanerminut inissutaasumik eqqartuunneqarsimanngikkunik imaluunniit ukiut kingulliit pingasut ingerlaneranni eqqartuunneqarsimanertik pissutigalugu Nunaqqatigiit Siunnersuisoqatigiivini ilaasortaanissaminnut naleqqukkunnaarsimanngikkunik. Piffissaliussat ullormit qinersivimmit naatsorsuunneqassapput.
Imm. 2. Kommunalbestyrelsenut bygderådinullu qinersineq pillugu Inatsisartut inatsisaanni nr. 2-mi ulloq 30. marts 1982-imeersumi kingusinnerusukkut allannguuteqartinneqartarsimasumi §-ini 31-mi aamma 32-mi qinikkatut sulisinnaanerup annaaneqartarnera pillugu aalajangersakkat aammattaaq Nunaqqatigiit Siunnersuisoqatigiivini ilaasortanut atuupput.
Kapitali 2.
Qinersinermik siulersuisut aamma qinersisussat allassimaffii.§ 5. Qinersineq qinersinermik siulersuisunit ataatsimik siulittaasoqarlutik aamma ataatsimik marlunnilluunniit ilaasortaqarlutik Naalakkersuisunit sapinngisamik Nunaqqatigiit Siunnersuisoqatigiivisa ilaasortaasa akornanneersuutillugit toqqarneqarsimasunit piareersarneqarlunilu siulersorneqassaaq. Inuit toqqarneqartut suliassiissutigineqartup suliarineqarnissaanut pisussaapput. Qinersinermik siulersuisut taaguinermik aqutsisussamik toqqaassapput. Namminersornerullutik Oqartussat Danmarkimi allaffeqarfianni inuit aqqinik nalunaarsuiffimmi pisortaq allakkatigut taasinernut inuit aqqinik nalunaarsuiffimmut tassunga tunniunneqartunut atatillugu taaguinermik aqutsisuusassaaq.
§ 6. Ulloq qinersiffissaq kingusinnerpaamik ullunik 22-nik sioqqullugu qinersinermik siulersuisut inuit qinersivimmi najugallit ullormi qinersiffissami qinersisinnaatitaasut allassimaffiat suliarisassavaat.
§ 7. Qinersisussat allassimaffianni qinersisussat aqqi kiisalu ullut ukiullu inuuffii allassimasassapput. Aammattaaq qinersisussat allassimaffianni Nunaqqatigiit Siunnersuisoqatigiivinut qinersinermi krydsiliiffissaq ilanngunneqarsimassaaq.
§ 8. Qinersisussat allassimaffii suliarineqareerniariaraangamik ulluni marlunni qinersivimmi kikkunnilluunniit orninneqarsinnaasumi saqqumitinneqartassapput.
Imm. 2. Inuk qinersisussat allassimaffiannut ilanngunneqarsimasoq qinersisussat allassimaffiata suliarineqarnerata kingorna qinersiviup avataani aalajangersimasumik najugaqalersimagaangami qinersisussat allassimaffiannit piiarneqartassaaq.§ 9. Qinersinermik siulersuisut qinersisussat allassimaffiata qaqugu sumilu saqqumitinneqarnissaa nalunaarutigisassavaat.
Imm. 2. Kinaluunniit isumaqaruni nammineq allassimaffimmi pissutissaqanngitsumik ilanngunneqarsimanani imaluunniit inuk alla pissutissaqanngitsumik ilanngunneqarsimanngitsoq qinersisussat allassimaffiata saqqumitinneqarnerata naammassinerata kingorna kingusinnerpaamik ullut marluk qaangiunnerisigut qinersinermik siulersuisunut allakkatigut naammagittaalliuteqarsinnaavoq, tassanilu naammagittaalliornerminut pissutigisani naatsumik taassallugit.
Imm. 3. Qinersisussat allassimaffiat pillugu naammagittaalliutit qinersinermik siulersuisunit ataatsimiinnermi ullut tulliuttut arfinillit ingerlaneranni ingerlanneqartumi aalajangiiffigineqartassapput. Qinersisussat allassimaffii tamatuma kingorna iluarsineqarsimasut qinersinermik siulersuisut siulittaasuannit atsiorneqartassapput.
Imm. 4. Kinaluunniit ataatsimiinnermi imm. 3-mi taaneqartumi qinersisussat allassimaffiannit peerneqartoq imaluunniit nammineq ilanngunneqarsimannginnini inuulluunniit allap ilanngunneqarsimannginnera pillugu naammagittaallioraluarluni itigartitaasoq tamanna pillugu qinersinermik siulersuisunit allakkatigut nalunaarfigineqassaaq.
Imm. 5. Inuup qinersisinnaatitaannginnerminik naammaginninngitsup qinersisussat allassimaffiata imm. 3 malillugu iluarsineqarnerata kingorna ullut arfinillit qaangiutsinnagit apeqqut Naalakkersuisunut suliassanngortissinnaavaa, taakkulu aalajangiinerat inaarutaasumik aalajangiinerussaaq. Naalakkersuisut naammagittaalliortoq qinersinermillu siulersuisut pineqartut aalajangiinerminnik nalunaarfigissavaat, tamatumalu kingorna qinersisussat allassimaffianni iluarsisassaalersussat qinersinermik siulersuisunit iluarsineqassapput.
Imm. 6. Qinersisussat allassimaffiat imm. 3 aamma imm. 5 naapertorlugit qinersinermik siulersuisunit iluarsineqareerluni allatigut allanngortinneqarsinnaanngilaq.
Kapitali 3.
Qinigassanngortitanik nalunaarutit.§ 10. Qinigassanngortitanik taakkulu sinniisussaannik nalunaarutit ulloq qinersiffissaq sioqqullugu kingusinnerpaamik ullut qulinganni nal. 18.00 qinersinermik siulersuisut siulittaasuannut tunniunneqarsimassapput.
Imm. 2. Qinigassanngortitamik nalunaarut qinersivimmi qinersisartunit qinigassanngortitsisunit ikinnerpaamik tallimanit amerlanerpaamillu qulinit atsiorneqarsimassaaq.
Imm. 3. Qinigassanngortitat tamarmik immikkut ataatsimik marlunnilluunniit sinniisussaqassapput. Sinniisussat marluuppata qanoq tulleriinneqarlutik qinigassanngortitamut sinniisussaanerat qinigassanngortitamik nalunaarummi nalunaarneqarsimassaaq.
Imm. 4. Qinigassanngortitap nalunaarutiginerani kukkusoqarsimappat qinersinermik siulersuisut taassuma qinigassanngortitsisui kukkunerup aaqqinneqarnissaanut ullunik marlunnik piffissalissavaat.
Imm. 5. Tamatuma kingorna qinersinermik siulersuisut - kingusinnerpaamik qinersinissaq ullunik arfinilinnik sioqqullugu - nalunaarutit tunniunneqarsimasut atorsinnaasutut akuersissutigineqassanersut aalajangissavaat.
Kapitali 4.
Taasinerit.§ 11. Naalakkersuisut pappialat taasivissat pisariaqartut kalaallisut qallunaatullu "Nunaqqatigiit Siunnersuisoqatigiivinut qinersineq"-mik allassimasussat pissarsiarinissaat, ilusilernissaat agguaannissaallu pillugit erseqqinnerusumik aalajangersaasassapput.
Imm. 2. Qinersisartut taasinissamut piffissaliussat iluanni taasiartorfimmukarsinnaanngitsut imaluunniit pisarissersungaatsiaqqaarlutik taasiartorfimmukarsinnaasut qinersinermik siulersuisunut, taaguinermik aqutsisumut imaluunniit Namminersornerullutik Oqartussat Danmarkimi allaffianni inuit aqqinik nalunaarsuiffimmut allakkatigut taasisinnaapput. Siusinnerpaamik ulloq qinerfissaq sapaatip akunnerinik arfinilinnik sioqqullugu allakkatigut taasisoqarsinnaavog.
Imm. 3. Qinersivimmi qinersisussat allassimaffiannut ilanngunneqarfigisimasami qinersinermik siulersuisunut aamma taaguinermik aqutsisumut kiisalu Namminersornerullutik Oqartussat Danmarkimi allaffianni inuit aqqinik nalunaarsuiffimmut allakkatigut taasisoqarsinnaavoq. Allakkat puui pappialanik allakkatigut taasivinnik imallit taaguinermik aqutsisumit aamma Namminersornerullutik Oqartussat Danmarkimi allaffiannit taaguineq aallartitsinnagu tiguneqareersimassapput.
Imm. 4. Pappialat taamatut taasinermi pisariaqartut Naalakkersuisunit pissarsiarineqassapput.
Imm. 5. Aammattaaq kommunalbestyrelsenut qinersineq pillugu inatsimmi §-ini 37-miit 41 ilanngullugu aalajangersakkat pissutsit tunngavigalugit Naalakkersuisunit pisariaqartitsineq naapertorlugu sakkukillineqarlutik malinneqassapput.
Kapitali 5.
Ataatsimut aalajangersakkat.§ 12. Naalakkersuisut allanik aalajangersaanngippata nunaqqatigiinnut siunnersuisoqatigeeqarfinni ataasiakkaani qinersinerit ingerlanneqarnerini, qinersinerit inernerisa naatsorsorneqarnerini nalunaarutigineqarnerinilu kommunalbestyrelsenut qinersineq pillugu inatsimmi kap. 1 naapertorlugu kommunalbestyrelsenut qinersinermi aalajangersakkat atuutissapput.
§ 13. Qinersinermik siulersuisut aalajangiineri Naalakkersuisunut naammagittaalliutigineqarsinnaapput.
§ 14. Naqitertitanut, nalunaarutinut pappialanullu taasivinnut aningaasartuutit Landskassemit akilerneqartassapput. Nunaqqatigiit Siunnersuisoqatigiivinnut qinersinerup ingerlanneqarneranut aningaasartuutit allat Nunaqqatigiit Siunnersuisoqatigiivinit pineqartunit akilerneqartassapput.
Namminersornerullutik Oqartussat, ulloq 7.april 1989.
Jonathan Motzfeldt/
Aqigssiaq Møller