Namminersornerullutik Oqartussat nalunaarutaat nr. 9, 16. marts 1989-imeersoq aalisarsinnaanermut akuersissutinik nakkutilliisut suliassaannut pisinnaaffiinullu tunngasoq.
Inatsisartut inatsisaanni nr. 11-mi 21. november 1984-imeersumi inuutissarsiutigalugu aalisarneq pillugu inatsimmi § 18, § 20 aamma § 23 tunngavigalugit aalajangerneqarput makku:
§ 1. Nalunaarummi angallatit tamarmik akuersissuteqarluni aalisarnermik ingerlatsisut, tunisassiortut aammalu/imaluunniit aalisakkanik aalisakkanillu tunisassianik ?alaallit Nunaata aalisarnermi imartaani allanut usingiartut pineqarput.
§ 2. § 1-imi angallatit pineqartut nakkutilliisunik Kalaalit Nunaanni aalisarsinnaanermut akuersissutinik Nakkutilliivimmeersunik (GFLK) kalaallit aalisarfiini tamani angallammut ikititsisinnaassallutik pisussaatitaapput.
Imm. 2. Angallat Kalaallit Nunaata aalisarnermut imartaanut toqqaannartumik taassuma avataaniit aalisariarpat, taava angallat pisussaatitaavoq nakkutilliisunik Kalaallit Nunaata avataani umiarsualivimmi ikisitsissalluni.
Imm. 3. Kalaallit Nunaata aalisarnermut imartaaniit allamukarnermi nakkutilliisut angallammiiginnarsinnaatitaapput umiarsualiviup tulliup tikinneqartussat imaluunniit umiarsualivimmut Kalaallit Nunaata aalisarnermut imartaani pisarisimasanik usingiarfiusussaq tikitserlugu.§ 3. Nakkutilliisut aalisarnermut tunngatillugu angallammiinnerminni, aalisarfimmukaanneqarnerminni aalisarfimmiilluunniit timmukaanneqarnerminni angallatip aqumiuisut siniffissaqarniarnernut nerisassaqarnernullu tunngasuni pineqassapput. Siniffissaqarniarnernut nerisaqarniarnernullu atatillugu aningaasaajaatit angallatip nammineq isumagissavai.
§ 4. Aalisarsinnaanernut akuersissutinik nakkutilliisut qaqugu ikinissaat niunissaalluunniit qanorlu sivisutigisumik angallammiinnissaat tamatigut Aalisarsinnaanermut akuersissutinut inspektørip imaluunniit taassuma pisinnaatillugu toqqarsimasaanit aalajangerneqartassaaq.
Imm. 2. GFLK-p pisussaaffigaa imm. 1-imisut nakkutilliisut umiarsuarmut ikinerannut niunerannullu tunngatillugu angallatip aalisarneranut allanulluunniit suliarineqartunut ajoqutaannginnerpaamik ingerlanneqarnissaa.§ 5. Nakkutilliisut angallammiinnerminni immikkoortortani assigiinngitsuni pisanik, tunisassiornernik kiisalu pisanik tunisassianillu lastimut ilioraanernik ingerlatsiffiusuni taakkununngalu ilanngullugu poortuutissaasiviusumik isiginnaarsinnaanerat assiliisinnaanerallu ajoqusersorneqarnani ingerlanneqassaaq. Kiisalu aamma nakkutilliisut angallammi immikkoortortanut uuttortaalluni, aqunnernut tunngasunik suliffiusunut avammullu attaveqaateqaateqarfinnut ajoqusersorneqaratik isersinnaassapput kiisalu angallatip sumiissusersiutai immallu assiutai sumi aalisarneq, sumiinneq il.il. nalunaarniarlugit atorneqarsinnaassapput.
§ 6. Nakkutilliisut pisinnaatitaapput angallatip allattugaanik, umiarsuup allagaataanik taakkununnga ilanngullugit qanoq usitigineranut tunisassiortigineranullu assigisaannullu tunngasunik paasiniaasinnaassallutik.
Imm. 2. Angallatip naalagaa nakkutilliisup qinnuteqarneratigut pisussatitaavoq imm. 1-imi pappiaqqanut tunngatillugu eqqaaneqartunik takussutissanut saqqummiussassanullu tunngatillugu ikiuutissalluni.
Imm. 3. Nakkutilliisut pisinnaatitaapput immikkoortoq 1-imi pappiaqqanik taagorneqartunik assiliinissamut. Angallatip naalagaa pisussaatitaavoq assiliinerni pisariaqarpat ikiuutissalluni aammalu taamaaliornermi atortussanik tunniussissalluni.
Imm. 4. Angallatip naalagaa nakkutilliisup qinnuteqarneratigut pisussaatitaavoq quppernerit assilineqartut tamaasa eqqortuuneri uppernarsarlugit atsiortassalluni. Tamanna suliassaq naalakkap allamut suliassiissutigisinnaanngilaa.§ 7. Nakkutilliisut angallatip akiligassaanik angallatip avammut attaveqaatai atorlugit atorfimminut tunngasunik paasissutissanik nassitsisinnaatitaapput nassinneqarsinnaatitaallutillu.
§ 8. Nakkutilliisut angallatip pisaanik tunisassiaannillu paasiniagassanik pisinnaatitaapput kiisalu aamma tamakku paasiniagassat angallatip isumannaatsumik lastianiitissinnaassallugit umiarsuarmiit tiguneqarnissaasa tungaannut.
Imm. 2. Imm. 1-imi taaneqartunut tunngatillugu angallatip naalagaa nakkutilliisup qinnuteqarnera tunngavigalugu pisinnaatitaavoq nakkutilliisup suliassaanut tunngatillugu inuttaasunik ikiorteqartissallugu tamanna angallatip iluamik ingerlannissaanut akerliusuunngippat aammalu angallatip aalisarneranut pilersaarutigineqareersimasumut annertuumik ajoqutaassanngippat.§ 9. Akiliisitaanermik kinguneqarsinnaavoq
1) §§ 2 aamma 3, § 6, imm. 2, 3 aamma 4 kiisalu § 8, imm. 2-mi inerteqqutaasut malinneqanngippata kiisalu
2) § 6, imm. 1 aamma 3, § 7 aamma § 8 malillugu nakkutilliisut suliassaannut tunngatillugu ajoqusersuisoqarpat.§ 10. Nalunaarut atortuulissaaq 1. april 1989.
Nuuk, ulloq 16. marts 1989
Kaj Egede/
Jørn Graversen