Namminersornerullutik Oqartussat Ittoqqortoormiit kommunianni imigassanik kimittuunik killilersuineq pillugu nalunaarutaat nr. 7, 28. februar 1989-imeersoq.
§ 1. Ataani nalunaarutigineqartoq Ittoqqortoormiut kommunianni atuuppoq.
§ 2. Kinaluunniit 18-inik ukioqalereersimasoq ullormut pingasunik agguagarsiassaqartitaavoq (tak. ataani pineqartut alkoholenheder).
Imm. 2. Ullormut pisassarititaasut taakku sapaatip akunneri marluk tikillugit katersorneqarsinnaapput, taakkulu qaangiunnerini atorunnaartarlutik.
Imm. 3. Piniariat pillugit, taakku qaammat naammatsillugu pisassaminnik sipaarsinnaatitaapput. Aalliussisussamik uppernarsaateqanngippat sipaakkat tiguneqarsinnaajunnaassapput.
Imm. 4. Arfininngornikkut niuertarfinnit imigassanik nioqquteqarneq ajornartitaavoq. Arfininngornikkut point-isiassat tallimanngornikkut atorneqarsinnaapput.§ 3. Agguagarsiassat imatut aalajangersarsimapput:
Immiaaqqat sorliugaluartulluunniit ........... 1 point
Underberg puiaasaq ataaseq 2 cl. ............. 1 point
vin nerinermut atortoq puiaasaq ataaseq 72 cl. 5 point
vinit allat 72 cl. ........................... 10 point
angustura puiaasaq ataaseq 24 cl. ............ 5 point
imigassaq puiaasaq ataaseq 72 cl. ............ 20 point
vinsprit puiaasaq ataaseq 72 cl. ............. 40 point§ 4. Immikkut ittumik ullorsiortoqartillugu saniatigut agguagarsisoqarsinnaavoq. Taamaaliornissaq kommunalbestyrelsip aalajangertassavaa.
§ 5. Pointinik tuniniaaneq pisinerlu tamarmik inerteqqutaapput.
Imm. 2. § 2 imm. 1-imi pineqarsinnaasut Danmarkimiillu Kalaallit Nunaannut akitsuuteqanngitsumik eqqunneqarsinnaasut saniatigut imigassanik sunilluunniit eqqussineq allatulluunniit tunisineq inerteqqutaapput.
Imm. 3. Qanorluunniit ittunik imigassaliorneq inerteqqutaavoq.
Imm. 4. Suliffeqarfiit eqqaanni kikkunnilluunniit imertoqassanngilaq.
Imm. 5. Imm. 1-miit 4-mut aalajangersakkanik unioqqutitsineq mianersoqqussummik akiliisitsinermilluunniit pillaatisiaataasinnaavoq.§ 6. Imigassanik atornerluisoqarsimatillugu, tamatumunngalu ilanngullugu § 5, imm. 1-4-mi aalajangersakkanik unioqqutitsisoqarsimatillugu, politiit eqqartuussivilluunniit point-inik arsaarinnissinnaavoq point-illuunniit pisassat ikilisissinnaallugit piffissamut aalajangersimasumut. Taamatut aamma politiit eqqartuussivilluunniit pointinik arsaarinnissinnaavoq pinerluttuliortoqarsimatillugu politiinik tigummineqarnermik kinguneqartumik.
§ 7. Nalunaarutut manna atulerpoq 21. februar 1989 aallarnerfigalugu.
Imm. 2. Tamatumunnga peqatigitillugu Ittoqqortoormiit kommunianni imigassanik kimittuunik killilersuineq pillugu nalunaarut 15. juli 1983-imeersoq atorunnaarsinneqarpoq.
Namminersornerullutik Oqartussat 28. februar 1989
Moses Olsen/
Martha Labansen