Brancheudvalg pillugu Namminersornerullutik Oqartussat nalunaarutaat nr. 3, 19. januar 1989-imeersoq.
Kalaallit Nunaanni inuussutissarsiutitigut ilinniartitaanerit, ilinniagaqarnermi tapisiat aammalu inuussutissarsiutinik ilitsersuisarneq pillugit Inatsisartut peqqussutaat nr. 2 16. november 1984-imeersoq naapertorlugu brancheudvalgit pilersinnissaannut, taakku suliassaannut, akisussaaffissaannut, katitigaanissaannut sulinerminnilu najoqqutassaannut malittarisassat makku aalajangersarneqarput.
Kapitali 1.
Siunertarisaq.§ 1. Inuussutissarsiutini pingaarnerni tamani brancheudvalgemik pilersitsisoqassaaq.
§ 2. Brancheudvalgip nakkutigisassaraa suliatigut ilinniartitaanerit annertussusissaasa eqquutsinneqarnissaat aammalu najukkani inuussutissarsiutitigut ilinniartitaanernut ataatsimiititaliat ulluinnarni aqutsisuisa attavigisarnerisigut qulakkiissallugu najukkani inuussutissarsiutitigut ilinniartitaanerit imaasa assigiiaarnissaat.
Imm. 2. Brancheudvalgi Inuussutissarsiutitigut Ilinniartitaanernut Siunnersuisoqatigiinnut makku pillugit siunnersuuteqartassaaq:
1) ilinniartitaanerit siunertarisaat imaallu,
2) sullivinni sungiusarfiusuni ilinniartitaanernut maleruagassat,
3) sulliviit sungiussarfittut akuerineqarnissaannut maleruagassat,
4) nangitsisumik ilinniartitaanerit aallartinneqarnissaat, aammalu
5) ilinniaqqittarnerit nangitsisumillu ilinniarnissat nutaat aallartinneqarnissaat, kiisalu inuussutissarsiutip pingaarnerup pineqartup iluani sammivimmut allamut ilinniarteqqitaanerit.§ 3. Ilinniartitaanernut, Siamasissumik Tunngaviusumik Ilinniartitaanernut STI-mik taaneqartartuni ilaanngitsunut brancheudvalgip sulliviit sungiusarfissat aammalu sungiusarnissamik isumaqatigiissutit akuerisassavai.
Imm. 2. STI-mi ilinniarnerup immikkoortuata siulliup ingerlanerani sulliviit sungiusarfittut akuerineqarsimasut brancheudvalgip akuerineqarnerat atorunnaarsissinnaavaa, takuuk tamanna pillugu nalunaarut. STI-mi ilinniarnerup immikkoortuata aappani sulliviit sungiusarfiusussat brancheudvalgip akuersissutigisassavai.§ 4. Sulianut tunngatillugu atuartitsinermi pissutsit naammaginanngippata brancheudvalgip tamakku forstanderimut imaluunniit najukkami inuussutissarsiutitigut ilinniartitaanernut pisortamut assuarliutigisinnaavai.
§ 5. Ilinniarfiup forstanderianiit siunnersorneqareernikkut qitiusumik ilinniarfimmit ilinniartut soraarsitaanissaat brancheudvalgip isummerfigisassavaa.
§ 6. Brancheudvalgi maalaarfittut atorneqartassaaq:
1) najukkami inuussutissarsiutitigut ilinniartitaanernut ataatsimiititaliap ilinniartut pillugit suliarisimasaannut sulianut aammalu naalattussaatitaanermut tunngasunut, aammalu
2) soraarummeeersitsinerni, nalíliinerni nalornisoortoqartillugu.§ 7. STI pillugu nalunaarummi § 30, imm. 2 naapertorlugu inuit ataasiakkaat qinnuteqaateqarnerisigut ilinniarniakkamut tunngasumik sulisimanermik tunuliaqartunut brancheudvalgi ilinniarnerup immikkoortuanut siullermut imaluunniit taassuma ilaannaanut peqataannginnissamik immikkut ittumik akuersissuteqarsinnaavoq.
§ 8. Brancheudvalgi sulinermini ikiortigisassamisut sulianut ataasiakkaannut tunngatillugu suleqatigiissitaaqqanik pilersitsisinnaavoq.
§ 9. Brancheudvalgip Ilinniartitaanermi Pisortaqarfimmi direktørimut siunnersuutigisinnaavaa qitiusumik ilinniarfinni ineriartortitsinermik sulinerup ingerlateqqinnissaanut ikiuuttussanik immikkut ittumik suliassamut paasisimasalinnik aggersaanissaq.
§ 10. Najukkami sammiviit iluanni pisut, brancheudvalgip sulineranut tapertaasut pillugit brancheudvalgi paasiniaasassaaq.
§ 11. Brancheudvalgip aalajangigaa Inuussutissarsiutitigut Ilinniartitaanernut Siunnersuisoqatigiinnut maalaarutigineqarsinnaavoq, tamannali atuutinngilaq §§ 6 aamma 7 malillugit aalajangiisimanernut, tassani brancheudvalgi ingerlatsinikkut inaarutaasumik aalajangiisussaatitaammat.
§ 12. Brancheudvalgip sulinerani aningaasartuutit suliffeqarfimmit sulisitsisuusumit akilerneqartassapput.
Kapitali 2.
Brancheudvalgit katitigaanerat.§ 13. Sanaartornermut aammalu Saviminilerinermut branhceudvalgit imatut katitigaassapput:
1) ilaasortat 2 Kalaallit Nunaanni sulisisitsisut Peqatigiiffiannit, Den grønlandske Arbejdsgiverforening-imit, DGA-mit toqqakkat,
2) ilaasortat 2 Sulinermik Inuutissarsiuteqartut Kattuffiannit, SlK-mit toqqakkat,
3) ilaasortaq 1 Nunatek-imit toqqagaq,
4) ilaasortaq 1 kommunalbestyrelsemit toqqagaq,
5) ilaasortaq 1 ilinniarfimmi ilinniartitsisut siunnersuisoqatigiivinit toqqagaq,
6) ilaasortaq 1 ilinniarfimmi ilinniagaqartut siunnersuisoqatigiivinit toqqagaq, aammalu
7) ilaasortaq 1 naalakkersuisumit toqqagaq.§ 14. Niuernermut allaffinnullu brancheudvalgi imatut katiterneqassaaq:
1) ilaasortat 2 Sulinermik Inuutissarsiuteqartut Kattuffiannit, SlK-mit toqqakkat,
2) ilaasortaq 1 Kalaallit Niuerfiannit, KNI-mit toqqagaq,
3) ilaasortaq 1 Kalaallit Nunaanni Kommunet kattuffiannit, KANUKOKA-mit toqqagaq,
4) ilaasortaq 1 Kalaallit Nunaanni inuussutissarsiummik ingerlatallit Peqatigiiffiannit, FANG-mit toqqagaq,
5) ilaasortaq 1 kommune-mit toqqagaq,
6) ilaasortaq 1 ilinniarfimmi ilinniartitsisut siunnersuisoqatigiivinit toqqagaq,
7) ilaasortaq 1 ilinniarfimmi ilinniagallit siunnersuisoqatigiivinit toqqagaq, aammalu
8) ilaasortaq 1 naalakkersuisumit toqqagaq.§ 15. Tusagassiortunngornianut brancheudvalgi imatut katiterneqassaaq:
1) ilaasortaq 1 Kalaallit Nunaata Radioanit, KNR-imit toqqarneqartoq,
2) ilaasortaq 1 naqitanik tusagassiorfinnit, sulianik sungiusarfittut akuerineqarsimasunit toqqagaq,
3) ilaasortaq 1 Kalaallit Nunaata TV-anit, KNR-TV-mit toqqagaq,
4) ilaasortaq 1 Tusagassiortut Peqatigiiffianniit, TP-miit toqqagaq,
5) ilaasortaq 1 ilinniagaqartuniit toqqagaq, aammalu
6) ilaasortaq 1 naalakkersuisumiit toqqagaq.
Imm. 2. Brancheudvalgip aammattaq ilaasortani kulturimut oqaatsinullu tunngasunik immikkut paasisimasalinnik ilasinnaavai.§ 16. Inunnik isumaginnittussanik ilinniartitsinermut brancheudvalgi imatut katiterneqassaaq:
1) ilaasortaq 1 Inunnik Isumaginnittut Peqatigiffiannit, IlP-mit toqqagaq,
2) ilaasortaq 1 inunnik isumaginninnermi siunnersortit kattuffiannit toqqagaq,
3) ilaasortat 2 Kalaallit Nunaanni Kommunet Kattuffiannit, KANUKOKA-mit toqqakkat,
4) ilaasortat 2 Inunnik Isumaginninnermi Pisortaqarfimmit toqqakkat,
5) ilaasortaq 1 Kulturimut Atuartitaanermullu Pisortaqarfimmiit toqqagaq,
6) ilaasortaq 1 ilinniarfimmi ilinniartut siunnersuisoqatigiivinit toqqaagaq,
7) ilaasortaq 1 ilinniarfimmi ilinniartitsisut siunnersuisoqatigiivinit toqqagaq, aammalu
8) ilaasortaq 1 naalakkersuisumit toqqagaq.
Imm. 2. Ilaasortat imm. 1-mi, nr. 3-mi aamma 4-imi taaneqartut tamarmik sulianut taakkununnga attuummassuteqartunut paasisimasaqartuussapput.§ 17. Umiartornermut Aalisarnermullu ilinniartitaanernut brancheudvalgi imatut katiterneqassaaq:
1) ilaasortaq 1 Avataasiutinik Aalisariutaatillit Kattuffiannit, AAK-mit toqqagaq,
2) ilaasortaq 1 Kalaallit Nunaanni Aalisartut Piniartullu Kattuffianniit, KNAPK-miit toqqagaq,
3) ilaasortaq 1 Kalaallit Niuerfianniit, KM-miit toqqagaq,
4) ilaasortaq 1 kommunalbestyrelsemiit toqqagaq,
5) ilaasortaq 1 Kilisaatini aalisariutinilu Inuttat Peqatigiiffiat, KAIP-miit toqqagaq,
6) ilaasortaq 1 Aalisartut Avataasiutillit Peqatigiiffianniit, AAP-miit toqqagaq,
7) Ilaasortaq 1 Namminersornerullutik Oqartussat Kilisaataateqarfianniit, GHT-miit toqqagaq,
8) ilaasortaq 1 ilinniarfimmi ilinniartut siunnersuisoqatigiivinit toqqagaq,
9) ilaasortaq ilinniarfimmi ilinniartitsisut siunnersusisoqatigiivinit toqqagaq, aammalu
10) ilaasortaq 1 naalakkersuisumiit toqqagaq.§ 18. Aalisakkanut suliffissuaqarnermi ilinniartitaanernut brancheudvalgi imatut katiterneqassaaq:
1) ilaasortat 2 Kalaallit Tunisassiorfianniit, KTU-miit toqqakkat, aappaa illoqarfimmi ilinniarfiusumi fabrikkip pisortaa aappaalu KTU-miit ilinniartitaanermut pisortaq,
2) ilaasortaq 1 Sulinermik Inuutissarsiuteqartut Kattuffianniit, SIK-miit toqqagaq,
3) ilaasortaq 1 illoqarfimmi ilinniagaqarfiusumi kommunalbestyrelsemiit toqqagaq,
4) ilaasortaq 1 ilinniarfimmi ilinniartitsisut siunnersuisoqatigiiviniit toqqagaq,
5) ilaasortaq 1 ilinniarfimmi ilinniartut siunnersuisoqatigiivinit toqqagaq, aammalu
6) ilaasortaq 1 naalakkersuisumiit toqqagaq.§ 19. Inuussutissalerinermi ilinniartitaanernut brancheudvalgi imatut katiterneqassaaq:
1) ilaasortaq 1 Akunnittarfiutillit Imerniartarfiutillillu Peqatigiiffiannit, Hotel- og Restaurationsforening-imiit toqqagaq,
2) ilaasortaq 1 Den grønlandske Økonomaforeningi-miit toqqagaq,
3) ilaasortoq 1 Kalaallit Niuerfiata KNI-p aammalu Brugsforeningit Kattuffiata ataatsimoorlutik toqqagaat,
4) ilaasortaq 1 Sulinermik Inuutissarsiuteqartut Kattuffianniit, SlK-miit toqqagaq,
5) ilaasortaq 1 kommunalbestyrelsemiit toqqagaq,
6) ilaasortaq 1 Kalaallit Tunisassiorfianniit, KTU-miit toqqagaq, illoqarfimmi ilinniagaqarfiusumi fabrikkip pisortaanut sinniisuutitaasoq,
7) ilaasortaq 1 ilinniarfimmi ilinniartitsisut siunnersuisoqatigiiviniit toqqagaq,
8) ilaasortaq 1 ilinniarfimmi ilinniartut siunnersuisoqatigiivinit toqqagaq, aammalu
9) ilaasortaq 1 naalakkersuisumiit toqqagaq.
Imm. 2. Ilaasortaq imm. 1-mi, nr. 3-mi pineqartoq Kalaallit Niuerfianniit, KNI-miit aammalu Brugsforeningit Kattuffianniit ataatsimoorussamik toqqarneqassaaq, iffiortut neqaarniallu sinniisuattut.§ 20. Ilaasortut toqqarneqarsimasut illoqarfimmi ilinniarfiusumeersuunngippata, illoqarfimmi najukkami sinniisussat toqqarneqassapput.
§ 21. Ilaasortat naalakkersuisumiit toqqarneqarsimasut sulianut imaluunniit perorsaanermut tunngasunik paasisimasaqartuussapput.
§ 22. Ilaasortat Sulinermik Inuutissarsiuteqartut Kattuffianniit, SlK-miit toqqarneqarsimasut suliamut pineqartumut paasisimasaqartuussapput.
§ 23. Brancheudvalgip kissaateqarnera pisariaqartitsineralu malillugit brancheudvalgi inunnik ataatsimeeqataasussaatitaasunik imminut ilasinnaavoq.
§ 24. Ilinniarfiit ataasiakkaat pisortaat ataatsimiititaliani allattuussapput.
Imm. 2. Tusagassiortunngorniat ilinniartitaaneranni pisortaasoq tusagassiortunngorniat brancheudvalgianni kiisalu ulluinnarni aqutsisuni allattuusassaaq. Ataatsimiititaliap ataatsimiinnerini ilinniarfiup forstanderia taaseqataasinnaanani peqataasassaaq.
Imm. 3. Allatsi ataatsimiititaliami taaseqataasinnaanngilaq.§ 25. Brancheudvalgi nammineerluni siulittaasussarsiorluni, siulittaasullu tullissaanik qinersilluni inissitsitertassaq.
§ 26. Ataatsimiititaliap siulittaasua siulittaasullu tullia kiisalu allatsi ulluinnarni aqutsisuussapput suliassanik kinguartitassaanngitsunik apeqqutinillu nalinginnaasunik suliarinnittuusassallutik. Siulittaasoq imaluunniit/aamma siulittaasup tullia illoqarfimmi ilinniarfiusumi najugaqanngikkaangata, najukkami pineqartumi taakkununnga sinniisussat toqqarneqartassapput.
Imm. 2. Qitiusumik ilinniarfinni ataasiakkaani forstanderi ulluinnarni aqutsisunut taamatuttaaq allattuusassaaq.
Kapitali 3.
Sulinissamut najoqqutassaq.§ 27. Brancheudvalgi Naalakkersuisumit pilersinneqassaaq.
§ 28. Brancheudvalgip sulinera siulittaasumit aqunneqassaaq. Taassuma najuutinnginnerani siulittaasup tullianit.
§ 29. Brancheudvalgimut allatsip siulittaasoq suleqatigalugu ataatsimiititaliap sulinissaa piareersartassavaa isumagisassallugillu oqaluuserisassat suliarineqarnissaat, ataatsimiinnermi saqqummiussassat ataatsimiinnernilu imaqarniliat kiisalu taakku nassiussuunnissaat.
§ 30. Aallatsi brancheudvalgimut siunnersuuteqartassaaq, aammalu ataatsimiititaliap suliarinninnissaanut paasissutissanik pisariaqartinneqartunik pissarsisassalluni.
§ 31. Brancheudvalgi nipangiussisussaatitaavoq, pisortanik sullissisunut atuuttumik.
§ 32. Brancheudvalgi pisariaqartitsisoqartillugu ataatsimiittassaaq.
§ 33. Allatsi siulittaasoq sinnerlugu ileqquusumik ataatsimiigiaqqusisassaaq oqaluuserisassallu ikinnerpaamik ullunik 30.-nik sioqqutsisumik nassiuttassallugit.
§ 34. Immikkut ittumik ataatsimiinnerit sivikinnerpaamik ullunik 3-nik sioqqutsilluni nalunaaruteqarnikkut pisassapput, tamanna siulittaasup, ilinniarfiup imaluunniit ilaasortat marluk pisariaqarsorigaangassuk.
Imm. 2. Ataatsimiigiaqqusinermut ilutigitillugu ilaasortanut allakkatigut nalunaarutigineqartassaq immikkut ittumik ataatsimiittoqarnissanut suna pissutaasoq.§ 35. Aalajangiinerit pisassapput nalinginnaasumik amerlanerussuteqarnikkut.
Imm. 2. Brancheudvalgi aalajangiisinnaassuseqassappat, ilaasortat affaat sinnerlugit ataatsimiinnermi najuutissapput.
Imm. 3. Taasinerit amerlaqatigiikkaangata ataatsiminnermi ingerlatsisuusup isumaa aalajangiisuusassaq.§ 36. Suliassat nukinginnartut piaartumik aalajangiiffigineqarnissaat kissatigineqaraangat ulluinnarni aqutsisut aalajangiisinnaapput. Aalajangiinnerilli taamaattut ataatsimiititaliamut paasissutissiissutigineqartassapput ileqqussumik ataatsiminnermi tullermi.
§ 37. Nalunaarut manna atuutilerpoq ulloq 1. februar 1989.
Imm. 2. Tamatumunnga ilutigitillugu brancheudvalgip pillugit Namminersornerullutik Oqartussat nalunaarutaat nr. 4. 3. april 1981-imeersoq atorunnaarsinneqarpoq.
Namminersornerullutik Oqartussat, ulloq 19. januar 1989.
Jens Lyberth/
Ejvind Christoffersen